Mataafa Uumata 22
22
Akka Waaqa Aprihaami ekkaysade
1Wossen piisa kammaayye, Waaqa Aprihaami ekkaysatta fade ka hale ka kide, “Aprihaami!” Aprihaami ka ehade ka kide, “Ee! aren ca.” #Ip 11:17-19
2Waaqa ka ishi' kide, “Innasene' xaayti takkan a' jaalannitta, Hisaaqi qeede ka piita Mooriya opa ishin aane ka eyye'e, irroota an ke lelo qara'e, kalisoota ana' kalshe.” #otoo a 2ta 3:1
3Aprihaami ka oori parri paraappan xa'e ka qora a kalisootan kupa' faate ka harreeta qara' fee'e. Ka innaadi Hisaaqi isho orxayaadi lakki ollin porase a Waaqa lele opa anta' xa'en. 4Kuyyaata sessattati Aprihaami laka' desa irrootase akke. 5Ka orxayasene' xaadi' kide, “Ishina areppa harreeta kapa' tawa. “Ana isho innaayyo ino anno ka Waaqa' sakatano, kuli arepaawwen oorraay.”
6Aprihaami ka qorasene a kalisootan kupane Hisaaqi qara' xayshe ka isha pilla isho apitta qapade ka lamattiiyyi ollin anni. 7Hisaaqi ka aappaayshoti' kide, “Aappo!” Isha ka kide, “Ee!” Hisaaqi ka ishi kaassade ka kide, “Apitta ka qora aren qapna ma, xawwa laahase a kalisoota ayshaayye ca?”
8Aprihaami ka kide, “Innaayyo, laaha kalisoota Waaqa mattaadi' harmisha.” Ka lamattiiy ollin anta qudaaw caan.
9Ete porase a Waaqa kide oppa kayeneeyye, Aprihaami pora qara' kalisoota kalsho kode ka qara' qora afe. Sekkammaayye harka ka loqqa Hisaaqi tupa hide ka qorasene a afe qara' mukkishe. #Yay 2:21 10Ka innasene' xaadi qala'e opa pilla oorsade. 11Erkampattoota Yaahiwwe xoori moonte xata isha haleete ka kiite, “Aprihaami! Aprihaami!”
Aprihaami ka ehade ka kide, “Ee! aren ca.”
12Ikka ishi' kiite, “Innaatti quda an qappadan, umma we takkan nefo isha qara in kodan. Innaati takkane a' qapta ana' daasha'e a' suraysanneey, akkima ana Waaqa fuurritto in upnaade.”
13Aprihaami ete ela kide ka tultan desa tooyyadeeyye, laaha muroppaayye a kaassaadi qara hinjaartan qapamene akke. Ka aane ka laahase' qeede ka pakka innaadi oppa'e kalisoota' kalshe. 14Aprihaami oori poraseeti'i, “Yaahiwwe yiri'e” #22:14 Waaqa yirie Waaqa i'akkini, taaki Waaqa iharminni kideeta Kide ka maxxa ishi' kode. Porose haka awweti'i, orra ka kiini, “Irroota a Yaahiwwe qara' paata harminno.”
15Erkampattoota Yaahiwwe ka a lammattati Aprihaami haleete. 16Ka ishi' kiite, “Yaahiwwe ikiini, ‘Innaatti takkan a' qapta ana' daassata'e, a' suraysanneey, anti akkan saka kuttayta ke' daasho'e, maxxiyyonnen xaxade. #Ip 6:13-14 17Anti sanynyeetaaytin akka hikka moonta isho hinkaajjeta daka kela' mina leksha. Sanynyeetaayti ka paarkalaadi putta ka piitaaysho kuli lehatta. #Ip 11:12 18Qoota' waan ke' kiina' dakayte malla, orra piita qara co piisa sanynyeetaayti minan sakama.’” #koda 3:25
19Sekkammaayye Aprihaami ka orxayasene' xaadi kapopa tiitaawe ka takka ollin Persaapehi opa kalen. Aprihaami ka Persapehi' kallaani.
Sanynyeeta Naakor
20Se kammaayye, i'Aprihaami' lelen ka kidene, “Milka' kuli innaassin Naakoori'i hellaa diira' xaayte. 21Ishootta nefo inna kuuta Uusi, kamma'e Puussi ka Qamu'eeli aappa opa Araami 22ka Kesseti ka Hasso ka Fildaashi ka Yitlaafi isho Patu'eeli.” 23Paatu'eeli Ripiqa xaaye. Inna opa Aprihaami Naakoori milkoppaayye hellaa sette xaayade. 24Lammitteeta Naakoori Ra'umma'ew, Tepaahi ka Kahamini ka Tahashini isho Ma'ikani ishi' xaayte.
Currently Selected:
Mataafa Uumata 22: MaQu
Highlight
Share
Copy
Want to have your highlights saved across all your devices? Sign up or sign in
