Mataafa Uumata 25
25
Hellaa Aprihaami iskatteeta pila oppa xaayade
1Aprihaami iskaatteeta pila a Katurra kidammitto heme. 2Isheetta ka Simiraani ka Yoqshaani ka Mataani ka Midiyaami ka Yushpaaqi isho Shuhani ishi' xaayte. 3Yoqshaani'iw Saapaani ka Dadaani xaaye. Sanynyeeta Dadaani, Asoorata ka Lettushaata isho Le'umaata. 4Hella Midiyaami, Efa ka Eferi ka Hanooki ka Apiida'i isho Elda'a. Sene piisa sanynyeeta katurraaw.
5Aprihaami wa qapa piisa Hisaaqi'iw kode. 6Ka hellaa a iskatta pila oppa xaayadeeti'iw, we lamayaaw ishootta' daddaashe ka akka Hisaaqi kapa qinda piirtota opa alle' sekaadane' kode.
Toota Aprihaami
7Aprihaami parra lekaya kallaade 8ka akata kere ka ete para dippa ka kunda tappa' ken pireeyye to'e. 9Hellaadi Hisaaqi isho Isma'eeli ka rahanase Maakfeela kidammo kara' pukkaadi hawladen. Hawloose nefo dulase a Hittitta a inna So'ari, a Efrooni Mamreeyye qinda piirtota opa co oppa ca. 10Porose a hawla, dulase a Aprihaami Hittitta qara pidde ka iskatteetaadi Saara ka oppa' hawlamte oppa'e hawlame. #uuma 23:3-16 11Ete Aprihaami to'e kammaayye, Waaqa innaadi Hisaaqi'i sake. Hisaaqi ka elase Pi'erla haayro'i kidammo kapa' kallaanni.
Sanynyeeta Isma'eeli
12Hella Isima'ealise a Kipsitteetase Akkaari, orxayteeta Saara xaayte, sene are kammopa xata ca. 13Maxxada hellaa Isma'eeli akka dalatta oli kamma' qatenenne, inna kuuta Napaayoti, kamma'e, Qeedaari ka Adipi'el ka Miipsaami. 14Ka Miishima'i ka Duuma ka Maasa 15ka Hataati ka Teema ka Yituuri ka Naafiishi isho Qedimma. 16Helloosene a Isma'eeli kafa kudanka lakki ishoottan aappada paayyota. Katamadda isho kantada oppa kalane ka maxxadaassotinni halaammi. 17Isma'eeli ete para dippa ka kunda sessa' tappa pireeyye ito'e. 18Sanynyeetaadi piita Kipsitiiyyi, qinda piirtota opa pora Asooripa anno kapandesa arta Hawiila isho a Asoori kara kallaanni. Ka sanynyeeta Aprihaami a pila oli kapa paarkaaluman kallaanni.
Dalatta Eesaawi ka a Yayqoopi
19Are kammopa xata qoota Hisaaqi desa torrini. Aprihaami Hisaaqi xaaye. 20Hisaaqi ete paraadi kunda afur kayeeyye, Ripiqa heme. Ripiqa enenta Paatu'eeli ka Alawta Laapa ishootta Sooratase piita Mosoppotaamiyaati kalto. 21Ripiqa' qoota xaayni in kinnin malla, Hisaaqi qootaadi malla Yaahiwwe qinsade. Yaahiwwe ka qinseetaadi dakaye; Ripiqa ka inna hitte. 22Qoota sallahama hitte malla, hellasene karitta kara pora oli tuukni. Isheetta ka kiite, “Ata xawwi maana'e wa asse paha ana qara' kayen?” Ka qootoseti desa upnaatta'e Yaahiwwe qinsatta ante. 23Yaahiwwe ka isheetta' kide,
“Helloosen ke kara ca, samayta lakki koddan.
oto daladan kammaayye, umma olli in kalan,
takka ka takka qara jaala.
Qaarta ka kussitta' piddama.” #Roomi 9:12
24Awta xaayatiiyyi, hellaa diira lakki xaayte. 25Inna paayyota' xata pi'e itiimi, dakintaadi ka qudan dela nyirfaan immakaatte. Ikka Eesaawi #25:25 eesaw afa iprutinni, “nyirfoolayta” kideeta ishi' kiden. 26Sekkamma'e, inna a lammatta ete dalannaaneeyye, kamanta/sankara Eesaawi kamma qapen. Maxxaadi ka Yayqoopi #25:26 yayqoopi afa Iprutinni “a kamanta/a sankara nama kamma qapno, taaki sasapampayta” kideeta. kidame. A isheetta' xaayteeyye, Hisaaqi para kunda lehi kaye.
Eesaawi qartumaadi katade
27Hellaasene ete kukuttadeneeyye, Eesaawi xemampayta a pinaana lenno kodde. Yayqoopi'iw, tajjanta umma kisa kela dapanni in co. 28Eesaw' qoota so'aan kakkallo malla, Hisaaqi isha jaalanni. Ripiqa' xoori Yayqoopi jaalanni.
29Kuyyaata takkaayye, ete Yayqoopi wateeta a missira a tiima' koonooyye, Eesaawi sitiiyyi kutayma kela kale ka aren akata doxe. 30Ka Yayqoopi' kide, “Sakne akatan doxeey, wateese' xaayti tiima ana'e a' daasso?” Maxxaadi sede malla Etoomi #25:30 etoomi itiimi kideeta, Eesaawi ka ishin halaammi. kidame. 31Yayqoopi ka ishi' kide, “Paayyota'e, kapa' qaartumaayti ana' kate.” 32Eesaawi ka kide, “Ata anti kara doxa are ana ikanniiy, qaartumadda maana ana qara nakayshan?” 33Yayqoopi ka kide, “Paayyota'e ana' xaxado.” Ikka xaxade ka qaartumaadi Yayqoopi' kate. #Ip 12:16 34Yayqoopi ka oori putteena ka wateetase a missira ishi' daashe. Eesaawi ete dame ka ikke kammaayye, ixa'e ka alle aane. Eesaawi asse qaartumaadi jeershe.
Currently Selected:
Mataafa Uumata 25: MaQu
Highlight
Share
Copy
Want to have your highlights saved across all your devices? Sign up or sign in
