Mataafa Uumata 26
26
Hisaaqi akka piita keraarati kalo
1Doxa sapana Aprihaamiiyyi de'e maliiyyi doxa pila piita qara' de'ew. Hisaaqi ka nuqusa piita Filisteemi Apemeleki kapoopa alle piita Keraara opa paqe. 2Yaahiwwe ka Hisaaqi akkaade ka ishi' kide, “Piisse an ke akkishe oppa' tawe diisheey, piita Kipssi opa an aanan. 3Anti ke ollin caada ka ke' sakaay, piisse are kitto oppa' tawe. Ka akkan aappaayshin Aprihaami' xaxa kale mina'e, piisse are kitto piisan ke ka sanynyeetayti' daasha. 4Sanynyeetaayti akka hiikka moonta mina'en leksha ka piisse are kitto piisa ishootta' daasha. Samayta a piita qara co piisa ka sanynyeetaayti minan saka akkada. #uuma 22:16-18 5Waan malla ke' saka' nefo, qoota aappaayshin Aprihaami ana' ajajame ka seeriyyo tooytaade malla.”
6Hisaaqi ka oori piita Keraariti' kallaanni. 7Iskatteetaadi Ripiqa qoota akata mali paxaaritto malla, akka orra piitooseti isheetta minan isha in ikannini'i fuure. Ka ete orrase qoota Ripiqa desa isha kaassade ka kidene, “Isheetta' maanaayti?” Isha ikide, “Alawtiyyo.” #uuma 12:13 8A eeyye kalooyye, kuyyaata takkaayye, nuqusase a Filisteemi Apemeleki maskootetoppanne Hisaaqi isho Ripiqa a diirta ka iskatteetaadi ollin kahannaan mina'e oli quda sahana'e akke. 9Ka Hisaaqi hale ka ishi' kide, “Ata atta iskatteetaayti'i ‘Alawtiyyo’ kiini?”
Hisaaqi ka kide, “Akka isheetta malla orra ana in ikanninin fuure ka malla asse kide.”
10Apemeleki ka ishi' kide, “Xawwi maana'e asse ino koote? Kadi orrinno oppa nama takka iskatteetaayti qapade kiitiiyyi heladdi juppootoppopa ino kalinni heente.” 11Apemeleki ka oori orraadi piisa'e dehama kokkoka daashe ka kide, “Nama namoose taaki iskatteetaadi quda qappado i'ishshan.”
12Hisaaqi ka piitooseti unta aylaade, Yaahiwwe ka oppa ishi' sake ikka parase oppaayyeew akata palaysade. 13Qoota teyanta qara' teyantaaw ishi' padaawamaan annitto malla, akata teyantoode. 14Qoota xelloota a kahirra ka a telalla ka a lo'alla lekayteeta qapo ka orxaya lekaya kuli qapo malla, Filisteemeta waadi a qapa'e yooni. 15Ka semmalla ellasene a xatta a orxaya a Aappaaysho Aprihaami' cooyye qotene, piisa tura kiyyen ka oppa' piita immaken.
16Apemeleki ka Hisaaqi' kide, “Hupnanne, i'ino qara qapnaatteey, piitinno oppaayye alle' xa'e.” 17Hisaaqi ka oori porase a oppa kalo oppa xa'e ka aane ka naaba Keraari kara' kallaatta' kuti'e. 18Ka ellasene a xatta a Aprihaami' cooyye qotacciise, Filisteemeta ka ete Aprihaami' to'eyye alli kiyyite, piisa qootacciiseew. Ka maxxadasene a aappaaysho xatta ishootta' kode, senenneew ishootta hale.
19Orxaya Hisaaqi ka naabase kara'e, ela qoten ka paada pisha oppa' sookshen. 20Sikmaya piita Keraari ka “Xanno” kiden ka qara sikmaya Hisaaqi oli shiishen. Qoota qara oli shiishen malla, Hisaaqi ka elooseti'i, “Eseqi” #26:20 eseqi shisha kideeta. kide.
21Orxaya Hisaaqi ka ela pila' qoteneew, peeqqa pila ka qara xa'eneew. Hisaaqi ka elooseti'i, “Sitina” #26:21 sitina needduma kideeta. kideew. 22Ikka desa heeqqen ka ela pila' qoteneew. Ma xoori' qoota eloose qara peeqa in xaanin malla, Hisaaqi ikide, “Amma oori Yaahiwwe i'ela ino' paldisheey, piisse oppa'en lekna.” Ka kide, “Rehopoti.” #26:22 rehopoot pora palda kideeta.
23Sekkammaayye Hisaaqi porose oppa xa'e ka katama Persaapehi opa kotaane. 24Waaqa ka halkeettosetiiyyi Hisaaqi akkaade ka ishi' kide, “Anti an Waaqa opa aappaayshina, a Aprihaami. Anti ke ollin caay, in fuuran. Kodayteetase an orxaytiyyo Aprihaami' kale malla in ke' saka ka sanynyeetaayti leksha.” 25Hisaaqi ka pora kalisoota' kode ka Yaahiwwe' sakatade. Ka eeyye tukkanaadi daapade. Orxayaadi ka eeyye ela qoteneew.
Hisaaqi isho Apemeleki akka olli' kalen
26Apemeleki piita Keraariti namase Ahusati kidammo ka isha dehaammo ka Fiikolise saara a xelaadi a oranna' kode ollin Hisaaqi kapopa de'en. #uuma 21:22 27Hisaaqi ka ishootta' kide, “Ishina i''ana needdatten ka isi kapa ana daanteneey, amma maana'e ana kamma deenittaneew?”
28Ishootta ka ishi oorshen ka kidene, “Akka Yaahiwwe ke olli con fayya upnaanne ka semmalla akkiman nakaytan ollin kallaatta oltura kodayteeta kodanno malla ke kapopa deene. 29Ino akkan ke an qappannin, akka nakaytan piitinno oppa' kallaatte ka ete piitinno oppa sooknittooyye nefo, nakaytan sookte mina'e, atti'iw akka ino qara' wa neeqa a' dikannin, Yaahiwwe amma nefo ike' sake.” 30Hisaaqi ka oori damta ishootta' daashe, ikka damen ka iken. 31Ka parri paraappan xa'en ka oli tura kodeeta dodaden. Hisaaqi ka ishootta keesse, ikka nakaytan piitaaysho opa tiitaawen.
32Kuyyaasetiiyyi, orxaya Hisaaqi ka de'en ka qoota elase a qotene desa ishi' lelen ka kidene, “Ha in pishaappa' sookinne.” 33Isha ka elooseti maxxa kode ka kide, “Saapehi.” #26:33 saapehi xaxa taaki tappa kidama iettanissa. Sede qaran xaate'e, maxxa katamoosene ka haka awweti'i Persaapehi kidammi.
Eesaawi iskatta hapta'e heme
34Eesaawi ete para kunda afur pireeyye, Yooditi enenta Pi'eri ka Paasemaati enenta Elooni heme. Tuparrosen lakki piisa tuparra Hittaata'ew. 35Haantowwosen ka Hisaaqi isho Ripiqa kara karitta kupni.
Currently Selected:
Mataafa Uumata 26: MaQu
Highlight
Share
Copy
Want to have your highlights saved across all your devices? Sign up or sign in
