Mataafa Uumata 27
27
Hisaaqi Yayqoopi'i sake
1Hisaaqi ete kere, ildaadi ka paata akka malaaleneeyye, innaadi Esaawi hale ka kide, “Innaayyo!” Isha ka ehade ka kide, “Ee! aren ca.”
2Hisaaqi ka ishi' kide, “Tin anti amma in kereey, umma kuyyaata an oppa to'o an upo. 3Semmalla amma xatilase a' kara Lawa haadannitto ka Paantase a pinaanaan lennitto qeedado ka kappina oppopa kute ka so'aan ana' kale. 4An antoonin turanne damta a me'aawnitto an jaalanno kode ka ishin ana' xooye, an ka damo ka qara ke' sako.”
5Ripiqa wa Hisaaqi innaadi Eesaawi kide piisa dakayte. Ka ete Eesaawi kappina oppopa kutana' taweeyye, 6Yayqoopi' kiite, “A aappaayshin Eesaawi' kiino, 7‘Kutayma aane ka so'aan ana' kale ka akkan an intoonin turan Yaahiwwe tura ke' sako'e, damta a me'aawnitto ana' harmishe,’ In dakaye. 8Amma innaayyo, waan ke' kiina dakaye ka waan ke ajajna' kode. 9Aane ka moonaappaayye haara qolpaya a papaxxaara lakki qeede ka ishin xooye. Anka damta a me'aawnitto a aappaayshin jaalanno kodo. 10Ka aappaayshina ishin aane, ikka a intoonin turanne damo ka ke' sako.”
11Yayqoopi' xoori, i'ayyaassoti' kide, “Xawwi dakinta innaanno a Eesaawi qudan dela nyirfa pattaay, umma anti dakinta qudandela an nyirfa an qapooy, 12oto aappa ana quda qappado ka akkan isha sassapade upnaadooyye, a ana' sako kapa oto ana jiijo honno?”
13Aayyaasso ka ishi' kiite, “Innaayyo, jiija atti jiijamta a ana teyen, ma akkan ke' kide mina'e, aane haarase a qolpaya'eew qeede.”
14Ikka akka kiite mina aane haarase qeede ka aayyaassoti ishin de'e, ikka damta a me'aawnitto a aappa jaalanno koote. 15Ka meeha a Eesaawi sira kalsanna pora oppa' xaayte oppa qeete ka Yayqoopi' kalisse. 16Ka maydahase a qolpaya harka quda'e ka xolma kela'e, pora nyirfa in qapnini oppa isha uwwisse. 17Ka wateetase a koote laaqqotase a laaqqite ollin Yayqoopi' daasse.
18Isha ka aappaaysho kapoopan kulle ka kide, “Aappo!” Ikka kide, “Ee! innaayyo, ata atti a ayno?”
19Yayqoopi ka kide, “Anti an kuutaayti Eesaawi, akka ana' kiite mina'e in kodeey, ela xa'e ka so'asene an kutayma kela ishin kale' dame ka ana' sake.”
20Aappaaysho ka ishi' kide, “Innaayyo, atta asse eennow xartootte?”
Yayqoopi ka kide, “Yaahiwwe Waaqase' xaayti ana qaarqaare, anka eennow teye.”
21Hisaaqi ka kide, “Akka' dukaatan innaayyo Eesaawi koddite, akkan upnaado'e ana kapopa heeqqe anka ke quda qappado.” 22Yayqoopi ka oori isha kapoopa desa heeqqe; ikka quda qappade ka kide, “Nessaayti nessa Yayqoopi paha, ma harka harka Eesaawi pahan.” 23Qoota harkaadi harka Eesaawi mina qudandela nyirfa qapan malla, iYayqoopi upnaatta malaale ka ishi' saka fade. 24Ka amma kuli oppa' oore ka kaassade ka kide, “Amma asu atti keeto a innaayyo Eesaawi?” Isha ka kide, “Aa! an Eesaawi.”
25Hisaaqi ka kide, “So'asene a' ishin kalte ana' daashe anka damo ka ke' sako.” Ikka ishi' daashe, ikka dame ka taadeta wayneeta kuli ishi' qeede ikka ike. 26Ka oori Yayqoopi' kide, “Innaayyo! arepa desa heeqqe ka ana dinke.” 27Yayqoopi ka aane ka isha dinke. Hisaaqi ka mehaddasene a Yayqoopi' kalsade alaysade. Ka ete akka a Eesaawi kodden upnaadeeyye, ishi' sake ka kide, “Aa aytoy, aluma innaayyo akkima dula Yaahiwwe' sake mina. #Ip 11:20 28A Waaqa moonteeyye tadahata ke' roopo!
Ka dulaayti ke' palaysho!
Ka unta ka wayneeta tupa xata ke' daasho!
29Samayta piita piisa a ke' piddamo, orraaw a ke kela koda kodo;
Hellaassin piisa qara'e poqalla kodde,
hellaa aayyaassina a ke tura fuuren;
A ke jiijna piisa a jiijamen;
a ke' sakna piisa a sakamen.” #uuma 12:3
Eesaawi akka saka qinsade
30Ete Hisaaqi Yayqoopi' sake ka dikkishe, Yayqoopi ka kapa sookeeyye, Eesaawi eennow kammaddesa kutayma kela kale. 31Ka damta a me'aawnitto harmisheew ka aappa kapoopan kulle. Ka kide, “Aappo xa'e ka so'asene an ishin kale' dame ka ana' sake.” 32Hisaaqi ka kaassade ka kide, “Ata atti a aynoow?” Isha ka kide, “Anti an kuutaayti Eesaawi.” 33Hisaaqi ka oori tammaqe ka kide, “Ata xawwi ayno deyyo pinanta ishshe ka oppa so'an ana' de'e? Anti ka dame ka ishi' sake. Amma oori isha saka akkade; umma qara in qeedamo.”
34Eesaawi ete wa aappaaysho ishi' kide' dakayeeyye, akata nyarrahe ka pooye ka kide, “Aappo! ana kuli' sake'ew!”
35Hisaaqi ka ishi' kide, “Innaassina de'e ka ana sassapade ka sakaayti teyyade.”
36Eesaawi ka kide, “Isha asu dukaate isha Yayqoopi kiden. Amma lakkinni ana' kaye tooy, ana sassapade ka paayyota'e qartumiyyo ana qara teyyade. Ka ammaw sakiyyo ana qara quu'adeew. Hela xawwi saka kela ana' hattisse takka nefo in co?” #uuma 25:29-34
37Hisaaqi ka ishi oorshe ka kide, “Amma deyyo'ewwen qattishe ka akka poqallaatti koddo'e ishi' sakeey ka hellaasso piisa akka orxayaadi koddane ishi' daashe ka unta isho wayneeta akka ishi' palito'e ishi' sakeey, innaayyo xaayti xawwi maanan ke' kidaaw?”
38Eesaawi ka kide, “Aappo, hela sakaayti takka a quda koke patta? Aappo, ana kuli' sakeew.” Ka akata mali pooye. #Ip 12:17 39Hisaaqi ka kide, “Dakkaysado! pora a oppa' kallaatto, pora oppa roopa roopini in kinnin, unta ka oppa palini in kinnini kodda, umma uusheta nefo a' teyto. #Ip 11:20 40Atti'iw orannaanne kallaata ka innassina' piddamta. Ma xoori awta isi qara oorissooyye, awse isha' piddama kela pahata ka nakaytan kallaatta.” #uuma 36:8; nuqu a 2ta 8:20
41Qoota aappa Yayqoopi' sake malla, Eesaawi akata Yayqoopi qara xommaata qapade ka dikade ka kide, “Aappinno amma itoota kayeey, oton asu xata to'a an ka pooytaadi dikkinna, an Yayqoopi ishsho mali, an diisho.” 42Ma xoori Ripiqa ete wa innaadi a kuuta Eesaawi' dikade dakayteeyye, Yayqoopi haleete ka ishi' kiite, “Innaayyo dakkaysado! Innaassin Eesaawi ke ishshaata dikadeey, 43amma waan ke' kiina dakkaysado! Xa'e ka piita Kaaraani opa innaanno Laapa kapoopa alle' qahe. 44Ka haka innassin marqina harfisannaane'e, isha kapa' tawe. 45Oto innassin marqina harfisado ka wa isha' mihisse teymooyyen ke kamma nama erka akka kalta diisheey, maana'en kuyyaata takka oppa'ew ishin lakki piisa dapa?”
Hisaaqi Laapa kapopa Yayqoopi erke
46Ripiqa ka oori Hisaaqi' kiite, “Tuparrosen a Hitti a Eesaawi heme asu karitta ana kara kupen. Ammaaw a Yayqoopi tuparrosen a Hitti oppa hemo kapaayye, kadin toona ana' wayyi.”
Currently Selected:
Mataafa Uumata 27: MaQu
Highlight
Share
Copy
Want to have your highlights saved across all your devices? Sign up or sign in
