Yohaannisi 18
18
Yesuusi akkima qapame
Maati 26:47-56; Maari 14:43-50; Luqa 22:47-53
1Yesuusi ete asse kide kammaayye, tamaarewwaadi olliiyyi naaba Qetroonitiiyyi afa disi opa aane. Ka eyyeeyye pora takka a dishima' karopa tamaarewwaadi ollin aanen. 2Yesuusi isho tamaarewwaadi qoota awta piisa porose oppopa ollopa annaan malla, Yihutase isha qapsiise iporose upa. 3Semmalla Yihuta, kola foolisoota takkan isho mattiyya a tooytampaya a saarra qeesewwa isho a Feresaata kapa erkame'e isi kamma' qeede ka porase opan de'e. Ishootta nefo ipsa ka ila isho meeha oranna'e qapaden. 4Yesuusi ka wa isha qara' kaya piisa upnaade ka ishootta turopa desa sooke ka ishootta' kide, “Ata ayno' faanittan?”
5Ishootta ka ishi' kidene, “Yesuusise a Naasirati'in faaninna.”
Isha ka ishootta' kide, “Ha ana” Yihutase isha qapsiise nefo, ishootta olliiyyiiw eeyye qa'anni.
6Ete Yesuusi ishootta' kide, “Ha anaayye” Isi kamman desa kukaden ka piitopa seehen. 7Yesuusi ka oppa' oorew ka ishootta kaassade ka kide, “Ata ayno' faanittan?”
Ishootta ka kidene, “Yesuusise a Naasirati'in faaninna.”
8Isha ka ishootta' kide, “Ha in ishina' kide ana; oton ana' faanittaneeyye, sene diisha, ikka aanen” 9Sede nefo wa malla asse koddite, qaalese a kide, “Aappo, orra ana' daasse oppaayye takka nefo an patinne” akka dikkatto malla.
10Simoon Peetiroosi qoota koraateta qapo malla, iyukade ka orxayta a saara qeesewwa' dayshe ka qudaayye napahata akkitta kate. Maxxa orxaytoseti nefo, Malkoosi kidammi. 11Yesuusi xoori iPeetiroosi' kide, “Koraatetaayti korkortaadi karopa oorshe. Kuppaayyosen a rakkoota a Aappinno ana' daashe, hela an ikko ke' pahata?” #Maati 26:39; Maari 14:36; Luqa 22:42
Yesuusi akkima saara qeesewwa turopa qeedame
12Se kammaayye xelase a oranna ka ajajampayaasso isho mattiyyasene a tooytampaya Yihuta Yesuusi qapen ka hiden. 13Ka paayyota qaraayye Haanna turopan aanen. Haanna nefo aappa opa haantota Qayyaaffase parose oppa, qeesitta kutta koddeeti. 14Qayyaaffa isase ukkumampaya a Yihuta dehaame ka kide, “Kati' nama takka samayta malla toona iwayyi.” #Yoha 11:49-50
Peetiroosi akkima Yesuusi marmade
Maati 26:69-70; Maari 14:66-68; Luqa 22:55-57
15Simoon Peetiroosi isho tamaaritta a pila Yesuusi kamma'e aanen. Tamaarittase a pila qeesitta kutta kapaayye i'upnaysame ka semmalla Yesuusi olliiyyi tika qeesitta a kutta karopa kulle. 16Peetiroosi' xoori laka tulanne xarra kapa' qa'ade. Tamaarittase a saara qeesewwa isha upo ka de'e ka enentase' xarra tooytinitto' lele ka Peetiroosi kullishe. 17Enentase xarra tooytinitto ka Peetiroosi' kiite, “Atti tamaarewwasene a namooseti oppaayye a takkanne?”
Isha' xoori ikide, “Inna'i, ishoottoppa an qapo.”
18Sitiiyyi qoota eta damayta' koddite malla, orxayasene isho mattiyyasene a tooytampaya, dila opaysaden ka kapa qaaqaaden ka awsanni, Peetiroosi ka ishootta olliiyyiiw qa'ade ka apittase awsanni.
Saara a qeesewwa kaassuma a Yesuusi' dehayshe
Maati 26:59-66; Maari 14:55-64; Luqa 22:66-71
19Sitiiyyi saarase a qeesewwa ka qoota tamaarewwaadi isho qoota kollissaaditi desa Yesuusi kaassade. 20Yesuusi ka ishi oorshe ka kide, “Anti nama piisa'en la'ayshe ka haasawade ka tikkasene a qinseeta a Yihutaata kelopa ollopa annitta isho tika qulqulloota kela, awta piisa kollishe; umma waan dekandekatti haasawade takkan' nefo in caan; 21ka kuli maana'e ana kaassanni? Orra an ishootta' haasawannooyye ana dakaye kaassado. Waan haasawade ishootta i'upaneey.”
22Ete Yesuusi sede haasawadeeyye mattiyyasene a tooytampaya eeppaayye qa'anna oppaayye, takka Yesuusi kandishe ka kide, “Saara qeesewwaati'i asse oorissa!”
23Yesuusi ka ishi' kide, “Oton qaaleta neeqa'en haasawadeeyye, a neeqa' haasawattiyyo maakkume, oton wa an haasawade'en dukaataayye maana'e ana da'inni?”
24Se kammaayye Haanna ka Yesuusi akkima hidamen qeede ka Qayyaaffa saarase a qeesewwa qaropa erke.
Peetiroosi akkima a lammattati Yesuusi marmade
Maati 26:71-75; Maari 14:69-72; Luqa 22:58-62
25Sitiiyyi Simoon Peetiroosi iqa'ade ka apitta awsanni. Orra pila ka ishi' kideewwe, “Atti tamaarewwasene a Yesuusi oppaayye a takkanne?”
Isha ka marmade ka kide, “Inna'i, anti ishoottoppa an qapo.”
26Orxaya a saarra qeesewwa oppaayye takka, isase daltayta namase a Peetiroosi qudaayye napahata mure kodde ka ishi' kide, “Porase a dishima oppaayye ishootta olli ke an akkine?” 27Peetiroosi ka oppa' oore ka marmadeew. Eennoow lukkalitta ka iyye.
Yesuusi akkima Pilatoosi turopa qeedame
Maati 27:1-2, 11-14; Maari 15:1-5; Luqa 23:1-5
28Se kammaayye, ikka tika Qayyaaffa kara Yesuusi qeeden ka tika a piddampaytase a piita opa Yesuusin aanen. Kiseeta nefo sitiiyyi teykanta a para qinno. Yihutaata qoota laahase a xaysonessuma a qaran tarpeeta qalammo dameeta ishootta parpaaccisnitto malla, akka in nyallini'i tika a piddamapayta piita karopa kulla diisse. 29Semmalla Pilatoosi ka ishootta turopa sooke ka ishootta kaassade ka kide, “Kisseeta a namoose qara' dehannittan maana?”
30Ishootta ka ishi oorshen ka kidene, “Namoose katin a neequmta koono in koddinin kiiteeyye, helani ke qaropa isha tarpinni an heenne.”
31Pilatoosi ka ishootta' kide, “Ishina'ew mattaayshina isha qeeda ka akka seeraayshina qara isha qara' farata.”
Yihutaata ka ishi' kiite, “Ino nama ikassa ino in faqqatamme.” 32Sede nefo Yesuusi, toota atta pahato akkima to'o qaalese a haasawade, akka dikkatto malla. #Yoha 3:14; 12:32 33Pilatoosi ka a lammattati tikase karopa tiitawe ka kulle ka Yesuusi hale ka isha kaassade ka kide, “Hela atti a' nuqusa Yihuta'e?”
34Yesuusi ka ishi oorshe ka kide, “Hela atti isi kareela sede haasawannim, moon orra pila'e qootiyyo desa sede ke' lele?”
35Pilatoosi ka ishi' kide, “Hela anti an Yihutitta? Orraayshin isho saarra qeesewwa'e, ana qaropa ke tarpishe. Xawwa laadi maana' koote?”
36Yesuusi ka ishi oorshe ka kide, “Ha mankisteetiyyo, a piisse qara kiitiiyyi, akkan harka ukkumampaya a Yihuta oppa an pi'inini'i, orxayaayyo ana torpini in heenne. Ma amma mankisteetiyyo a piisse qare'en.”
37Pilatoosi ka ishi' kide, “Ka asseeyye, a' nuqusa peka?”
Yesuusi ka ishi oorshe ka kide, “Akkiman nuqusa kodde ke kiini, anti waan malla dalade ka piita qaropa de'e, qoota dukaatati desa maakkuma malla. Nama dukaata quda kodde qaaletiyyo dakayni.”
38Pilatoosi ka kaassade ka kide, “Ata dukaata maana?” Ka sekkammaayye a lammattati Yihutaata turopa sooke ka ishootta' kide, “Anti dapa takka nefo isha qara'e, an akkine. 39Ma akka kollumaassina mina'e, xayso nessuma a qaran tarpeeta oppa awta piisan orra hidame oppaayye nama takka ishina' furriiy, hela akkan nuqusase a Yihuta ishina' furo iheentane?”
40Ishootta' xoori ihoren ka kidene, “Parpaani ino' fure diisheey, sede ino'en furan!” Parpaani' xoori xolma tooma.
Currently Selected:
Yohaannisi 18: MaQu
Highlight
Share
Copy
Want to have your highlights saved across all your devices? Sign up or sign in
