Yohaannisi 19
19
Foolisoota akka Yesuusi kojeessite
Maati 27:27-32; Maari 15:15-21
1Sekkammaayye Pilatoosi ka Yesuusi qeede ka karafsiise. 2Foolisootase ka qeeyya a xalaala' mina marte ka matta qara Yesuusi' kalisse. Ka kaappa tiima quda' kalshen. 3Ka isha kapopa deeni ka qara seesni ka ishi' kiini, “Atti nuqusa Yihutaatiiyyi, nakayta a ke koddo!” Ka isha kakkandinni.
4Pilatoosi ka amma lakopa sookeew ka ishootta' kide, “Tin akkiman namoose qara' dapa takka nefo an akkinin akka upnaattane'e, lakopan ishina isha sooksha.” 5Semmalla Yesuusi ka xalaalasene a qeeyya isho kaappasene tiima kalsade ka lakopa sooke. Pilatoosi ka ishootta' kide, “Tin namase.”
6Saarrasene a qeesewwa isho kutkuttowwasene a tooytampaya ete Yesuusi akkeneeyye, ihoren ka kidene, “Fannise! Fannise!”
Pilaatoosi xoori i'ishootta kide, “Anti qindiyyo desa, dapa takka nefo qara'e, an akkineey, oto heentaneeyye ishina' qeeda ka fannisada.”
7Yihutaata ka kiite, “Ino seeran qapna, namoose' qoota inna Waaqati isi kode malla, akkima seerinno' qara'e, toota isha parpaaccisni.”
8Pilatoosi ete sede piisa dakayeeyye, a qaran qapto'e fuure. 9Ka tikase karopaaw kulle ka Yesuusi kaassade ka kide, “Atti ayshaayye' deete?” Yesuusi xoori oppa ishi in oorinne.
10Pilatoosi ka ishi kide, “Ana'e allelto? Akkaan ke fura taaki ke fannisa'e hupna ukkuma qapo, a upto?”
11Yesuusi ka ishi' kide, “Katin Waaqa kapa hupna ukkuma ke'en daasammin, kiiteeyye, helani ana qara hupna ukkumeeta takka nefo qapnaanni a' heenne. Ma xoori nama ke qaropa ana tarpishe, juppoota a dikke neeqa'e isha qara ca.”
Yesuusi qara akka toota faratamte
Maati 27:15-31; Maari 15:6-20; Luqa 23:13-25
12Pilatoosi ete haasoosen a Yesuusi dakayeeyye, alle isha fureeta fade. Yihutaata xoori, ihorte ka kiite, “Oton namoose'e' furtaayye, atti a' mootta nuqusase kutta a piita Roomiti'in. Maana malla, nama nuqusa isi koono piisa, paarakaala a nuqusase kutta a piita Roomiti'iyyi.”
13Pilatoosi ete sede dakayeeyye, lakopa Yesuusi sookshe ka porase Shalala kidammo oppaayye pora qara xata firteeta farannaan oppa' kute'e. Porose nefo afa Iprutinni ‘Kepata’ kidammi 14Kuyyaatose nefo, kuyyaata dikkisama a xayso nessuma a qaran tarpeeta. Letta nefo saateta lehi mina'e kitta. Sitiiyyi Pilatoosi ka Yihutaata' kide, “Tin nuqusaayshin.”
15Ishootta' xoori ihoren ka kidene, “Alle' sekayshe, alle sekayshe ka fannise!”
Pilatoosi ka ishootta' kide, “Hela nuqusaayshinan alle' fannisa?”
Saarra qeesewwa kuli ka ishi oorshen ka kidene, “Nuqusase kutta a Roomi qeesaari maliiyyi ino nuqusa pila an qapno!”
16Sitiiyyi Pilatoosi ka akka fannisane'e, Yesuusi qeede ka harkaaysho oppa' daashe. Ishootta ka Yesuusi qeeden ka ishin tawen.
Yesuusi akkima fannisame
Maati 27:32-44; Maari 15:21-32; Luqa 23:26-43
17Sekkammaayye Yesuusi ka masqalaadi qapade ka porase pukurkura matta kidammo opa aane, poroose nefo, afa Iprutini Kolkoota kidammi, 18Ikka eyye isha fannisen; ka otanta kara isha qattishen ka nama lakki, pila takka qinda akkittatin ka takka qinda pittittatin isha kapa' fannisen. 19Pilatoosi ka taafeta a kiinitto, “Yesuusise a Naasirati nuqusa a Yihuta” Taafe ikka masqala qara xata rakke. 20Pora oppa Yesuusi fannisame, qoota katama kapa' dehi malla, Yihutaatoppa lekaya ka taafetase nappapen. Taafese nefo afa Ipru ka afa Laatini isho afa Kirikkitinni taafamte. 21Saarra qeesewwa a Yhutaata ka Pilaatoosi' kidene, “Atti ‘Nuqusa a Yihuta’ in kidan ka in taafan ma, taafe ka kide ‘Namoose i'issi' kide, anti an nuqusa a Yihuta.’”
22Pilatoosi xoori i'ishootta oorshe ka kide, “Anti waan taafe in taafe.”
23Foolisootase ete Yesuusi fanniste kammaayye, mehaddaadi a kalsanna'e qeette ka akka matta foolisoota mina takka takka kayto'e pora afuri oppa qootte ka qamiseetase xaadi kuli qeette. Qamiseese harkaan deddera xoori, heddoota in qapto ma, illi xata paayyatte ka dawamte ka xata kayte. 24Foolisootase ka olli' kiite, akkima ayno qayto “qoyritta qara' katanna diisheey, an kaa'ino.” Sede nefo wa malla asse koddite, qaalese a mataafa qulqulloota kiinitto;
“Mehaddaayyo an kalsanna'e qootaden,
ka qamiseetiyyo a harkaan deddera' qara qoyritta kataden”
Akka dikkatto malla. Foolisootase ka akkimose mina' koote. #mas 22:18
25Aayya opa Yesuusi isho enenta opa aayya opa Yesuusi ka iskatteetase a Qeliyoobba Maariyaami isho Mekdelitteetase Maariyaami masqalase a Yesuusi kapae'e qaqqaaden. 26Yesuusi, ete aayyaasso isho tamaarittase a jaalanno a isha kapa qa'ade akkeeyye, i'aayyaassoti' kide, “Aayye, tin innaatti.”
27Ka sekkammaayye tamaarittaseti' kide, “Tin aayyaassin.” Saateseti desa paayyatte, tamaarittase ka tikaadipa isheetta teyyade.
Akka Yesuusi to'e
Maati 27:45-56; Maari 15:33-41; Luqa 23:44-49
28Sekamma Yesuusi amma akkima we piisa dikkadene upnaade ka akka qaaletase mataafa qulqulloota' kara' taafamte dikkatto'e, kide, “In deepoode.” #mas 22:15; 69:21 29Eyyeeyye meeha a kara haddaya immakaaden ka ca. Orra eyyeppa co ka Sefneketoppa#19:29 sefneeketa, kideeta wa kanaannaysa ka ilta paha, ka pakateeta kara dehna, ka isikaropa pisha juujina. haddayasene immake ka qoyra Hansaabitta qara' jikke ka afa kapopa ishi' dehayshe. 30Yesuusi ete haddayasene afaan tooyye kammaayye, ikide, “Idikkatte.” Ka mattaadi raa'ishe ka nessa diishe.
Yesuusi akka qinittoppa oranan dotame
31Sekkammaayye ukkumampaya a Yihuta akka orrose fannisame tupa kupeeyya qeqqepshan ka masqala qara lekkishane'e Pilaatoosi, naapaden, wa malla asse kodene nefo, qoota kuyyaase kuyyaata sampata Yihuta tura dikkisatta koddite, sampatoose nefo ka xayso nessuma a kutta kodde malla, akka pukkaaysho sampatan masqala qara in kinnaannin malla. 32Foolisootase ka ante ka orrase Yesuusi olli fannisame tupa'e, kupeeyya qeqqepisse. 33Ete Yesuusi kapopa anteeyye xoori, akka isha turanneew to'e akkite ka kupeettaadi in qepinnin; 34ma xoori foolisootase oppa takka qinittoppa oranan Yesuusi dote. Eennow diika isho pisha ka karaayye urqen. 35A sede akke ka akka ishina amantane'e imaakkume; maakkumaadi nefo dukaata. Wa haasawanna akkima dukaata kodden, isha' nefo i'upa. 36Sede nefo wa malla asse koddite, qaaletase a mataafa qulqulloota kiinitto, “Ishoppaayye lafta takka nefo in qepto.” Akkima dikkatto malla. #sooka 12:48; dikoota 9:12; mas 34:20 37Mataafa qulqulloota kara pora pila oppaayye ikiiniwwi, “Isase a dotene akkan.” #Sakka 12:10; kele 1:7
Yesuusi akka hawlame
Maati 27:57-61; Maari 15:42-47; Luqa 23:50-56
38Yoosefi Armaatittase, ukkumampaya a Yihuta fuura minan dekandekatti tamaaritta Yesuusi kodde ka pukka Yesuusi qeeda'e Pilatoosi naappade; Pilatoosi ka ishi faqqate. Yoosefi ka aane ka pukkase' qeede. 39Niqodimoosise turan halkeette Yesuusi kapopa aane ka karpeeta isho arkayta a ollin lahen; a nitiroota dippa mina' #19:39 nitiri takka kiraameta dippa afuri kunnda keni kayni kideeta kitto qeede ka ishin aane. #Yoha 3:1-2 40Namoose lakki ka pukka Yesuusi qeede ka akka kollima a Yihuta a pukka hiddinaan mina'e, shittoota ollini ohaata qaahatin hidden. 41Pora a oppa Yesuusi' fannisame oppaayye pora dishima takka ca. Porose a dishima karaayyeew hawla a nama takka nefo turan kara in hawlammini caaw. 42Qoota kuyyaata dikkisama a sampata koddite malla, hawlase ka pora a dehoppa co malla, ikka pukkase a Yesuusi eyye' hawlen.
Currently Selected:
Yohaannisi 19: MaQu
Highlight
Share
Copy
Want to have your highlights saved across all your devices? Sign up or sign in
