Yohaannisi 21
21
Yesuusi akka tamaarewwaadi tappa tura akkaade
1Se kammaayye Yesuusi pakateeta Tipraadoosi kapa'e tamaarewwaadi tura akkaadeew. Pora a ishin akkaade nefo sede: 2Simoon Peetiroosi ka Tomaasise Didimoosi kidammo ka Naatina'eli isase piita Kelilaati katama Qaanaati de'e ka hella a Septiyoosi isho tamaarewwa a pila lakki pora takkaayye ollin caan. 3Simoon-Peetiroosi ka ishootta' kide, “Anti murkuja qapa'en anni.” #Luqa 5:5
Ishootta ka ishi' kidene, “Ino' nefo ke olliiwwin anna.” Ka aanen ka koonka karopa fayyaden. Ma xoori halkeessetiiyyi Murkuja takka nefo in qapne. 4Ete letta pariteeyye, Yesuusi pakateetase kapa'e qa'ade. Tamaarewwasene umma isha in upnaanne.
5Yesuusi ka ishootta kaassade ka kide, “Hellaay, hela Murkuja i'qaptane?”
Ishootta ka ishi oorshen ka kidene, “Murkuja takka nefo an qapno.”
6Isha ka ishootta' kide, “Nyupuraassin koonkaayye qinda akkittatin pakateetoppopa kata i'akkattaneey.” Ishootta ka pakateeta karopa nyupurasene katen ka qoota murkuja kuttayta qapen malla, nyupurasene tita malaalen. #Luqa 5:6
7Sitiiyyi tamaarittase a Yesuusi' jaalanno ka Peetiroosi' kide, “Ha Poqalla!” Simoon-Peetiroosi ka ete nessa a kiino Ha Poqalla dakayeeyye, qoota koda malla mehaddaadi isi quda sooksade malla, eennow mehaddaadi kalsade ka pakateetoppopa shore. 8Tamaarewwasene a taakane' xoori, qoota piita kapaayye desa a metireeta dippa' mina' kitto sekaaden malla, nyupurasene murkujaan immakaade'e tinni ka koonkaan de'en. 9Ete koonkasene kara xata lekkadeneeyye, porooda a apitta a qara murkuja xaayen isho laaqqoota akken. 10Yesuusi ka ishootta' kide, “Murkujase a amma qapten qudaayye ishin xooya.”
11Simoon-Peetiroosi ka koonka karopa fayyade ka nyupura a murkuja kukutta dippa ka kunda keni sessa oppa immakaade piitopa tite. Kadi punu murkuja asse kutta kara ca nefooyye nyupurasene in kaamanne. 12Sekkammaayye Yesuusi ka ishootta' kide, “Xooya ka dama.” Akka Poqalla Yesuusi kodde qoota piisanti upnaaden malla, ishoottoppa nama “Atti a ayno?” Kide ka isha kaassatta' nyere takka nefo in co. 13Sekamma Yesuusi ka de'e ka laaqqotase isho murkujase' qeede ka ishootta daashe.
14Yesuusi a tootoppa xa'e kammaayye tamaarewwaadi a sessattati'i isha akken.
Yesuusi kaassuma a Peetiroosi' dehayshe
15Ete ammaayitta ammaye kammaayye, Yesuusi iSimoon-Peetiroosi' kide, “Simooni inna Yoona, hela a sene ana jaalannaan qaropa ana jaalanni?”
Isha ka ishi oorshe ka kide, “Aa, Poqallaayyo, akkiman ke jaalanno atti i'upta.” Yesuusi ka ishi' kide, “Nyelqaayyo damshe.”
16Ka a lammattati ishi' kideewwe, “Simooni inna Yoona, hela i'ana jaalanni?”
Peetiroosi ka ishi oorshew ka kideewwe, “Aa, Poqallaayyo, akkiman ke jaalanno atti i'upta.” Yesuusi ka ishi' kide “Haariyyaayyo a kaharra tooyte.”
17Ka asessattati ishi kideewwe, “Simooni inna Yoona, hela i'ana jaalanni?”
Qoota a sessattati ishi' kide ‘Hela i'ana jaalanni malla, Peetiroosi inyarrahe ka kide, “Poqallaay! Atti we piisa' upta, akkiman ke jaalanno nefo atti i'upta.”
Yesuusi ka ishi. kide, “Kahirraayyo dawwe. 18Anti dukaatannen ke' kiini, atti a xayya qaptooyye, issinni saalpataayti hiddanni ka pora a heento opa anni; oto keritooyye xoori, harkaatti derassa ka nama pila ka mehadda ke' kalsha ka pora atti a heennini opa ken aana.” 19Sede nefo wa malla asse ishi' kide, Peetiroosi toota atta pahaton akkima Waaqa ulfeesso akkissa malla. Ka se kammaayye Peetiroosi' kide, “Ana kamma' xooye.”
Yesuusi isho tamaarittase a pila
20Peetiroosi ka desa tiitaawe ka, tamaarittase a Yesuusi jaalanno a ishootta kamma desa deeno akke. Tamaarittose a eetota dammaaneeyye, isha Yesuusi qudopa desa kide ka Yesuusi kaassade ka kide, “Ata Poqallaay, ayno ke qapsiisa.” #Yoha 13:25 21Peetiroosi ka isha tooyyade ka Yesuusi kaassade ka kide, “Poqallaay! namoose atta koddaaw?”
22Yesuusi ka ishi oorshe ka kide, “Hakan anti deeno kara'e, akka kallaado'e kadin faqqatayye, maana oppopa ke kalshe? Atti ana kammaaw xooye.”
23Se qaran xaate'e, otanta orra Yesuusi kamma anno oppa'e, otoota a kiinitto, “Ha tamaarittose in to'o” ka fidamte. Ma xoori Yesuusi “Hakan anti deeno kara'e akka kallaado'e, kadin faqqataayye, maana oppopa ke kalshe?” Kide diisheey, “in to'o” kiine.
24Semmalla tamaarittose tooy, isha qoota wessen piisaaye desa maakkume ka wessen piisa taafe; maakkumoose' xaadi nefo akkima dukaata kodde in upna. 25Kodadda a Yesuusi kode a pila lekaya ka caaneew. Xayyo akka ana' pahato mina'e, kati kodaddoosen a isha' kode piisa takka takka ollopa taafnaaneeyye, mataaffa a taafama, piisse nefo haadeta in ettanisso.
Currently Selected:
Yohaannisi 21: MaQu
Highlight
Share
Copy
Want to have your highlights saved across all your devices? Sign up or sign in
