Yohaannisi 6

Yesuusi akkima nama kuma ken damshe

Maati 14:13-21; Maari 6:30-44; Luqa 9:10-17

1Se kammaayye Yesuusi pakateetase a Kelila Tipraadoosi kidammittooyye afa disi opa tuulle. 2Isha qoota paaqolaya dinissaan wa orra qawwanna lekaya kode malla, orra sede akke lekayta, isha kamma aane. 3Yesuusi ka irroota qaropa fayyade ka tamaarewwaadi olli eyye qa'e.

4Sitiiyyi xayso nessuma a qaran tarpeeta a Yihuta kela'e foolsatte. 5Yesuusi ka ela kide ka samayta kuttayta a isha kapopa deeno akke ka Filippoosi kide, “Damta orrose piisa kayto ayshaayyen pidda ettaninna?” 6Yesuusi wa malla asse kide, Filippoosi ekkaysatta'e diisheey, wa koda isha mattaadi i'upa.

7Filippoosi ka isha oorshe ka kide, “Laaqqota a pirreeta dippa lakki nefo ishootta mina moossota moossota in kayto.” #6:7 “tinaara” sitiiyyi piita ayihuta kara tinaara takka, xaayya koda kuyyaata takkati.

8Tamaarewwaadi oppaayye inna a opa Simoon Peetiroosi intiriyaasi ikide, 9“Ha inna takkan laaqqoota poorta ken ka murkuja lakki qapa'e are ca; ma sede maana samayse piisa kayta?”

10Yesuusi ka kide, “Samayse piitopa kutiisha.” Porose nefo oppaayye maanta immake. orrase kuti'e dikootaysho nefo nama kuma ken mina'e caan. 11Se kammaayye Yesuusi laaqqootase qeede ka qara kalataysade ka orrase kuti'e qoote. Ka asseew murkujase ishotta qooteew. Ishootta piisa ka wa ishootta parpaaccisna mina ca akkaden. 12Ete orra piisa dame ka duttane kammaayye, Yesuusi ka tamaarewwaadi kide, “A takka nefo patta in pannin mali moossowwa kela hase piisa ollopa poha.” 13Ishootta ka laaqqootase a poorta ken moossowwa a samaytase dame kela hase ollopa pohen ka satara kudanka lakki oppa immaken. 14Orrase ete wessen orra qawwanna a Yesuusi kode akkeeyye ikide, “Ini dukaatannen xuumampaytase piita qaropa de'o.”

15Yesuusi ete akkima orrase irreetan isha qeeda ka nuqusa koda dikade upnaadeeyye, xawwaati a lammattati alle sekaade ka irroota qaropa fayyade.

Yesuusi akka pakateeta qaran desa loqqaan aane

Maati 14:22-33; Maari 6:45-52

16Ete letta shishshipteeyye, tamaarewwaadi pakateetoppa xata lekkaden 17ka koonkaappa fayyaden ka qinda katama Qifirnahoomi opa anta xa'en. Sitiiyyi letta tukkanta, umma Yesuusi ata ishootta kapopa in deene. 18Qoota puppeeta harmo puuppinitto malla, pakateetase ka olkelan yaaqyaaqte.

19Tamaarewwasene xaadi ete pishasene pulattaan pakateetase qaran desa kiilomeetireeta ken taaki lehi mina kitto aanen kammaayye, Yesuusi a pakateetase qaran desa loqqaan anno ka koonkasene kapopa deeno akken ka fuuren. 20Isha xoori i'ishootta kide, “Anaay, in fuuran.” 21Ishootta ka xasan isha teyyaden ka koonkasene karopa isha fayyissa faden. Koonkaasene ka eennow porase a opa annaan kayen.

Yesuusi akkiman laaqqota caatta

22Parraytaadiiyyi orrase pakateeteyye afa disiti hase, pakateetase qara akkima koonka takkan pattaaw caan, tamaarewwaadi ka xawwaati ishin aanen, Yesuusi ka ishootta olli koonka karopa in fayyannin upnaaden. 23Ma xoori koonkadda pila'e Tipradoosi desa xa'e ka, porase a oppa Yesuusi qinseeta kalata kode; orrase ka oppaayye laaqqota dame opa kapopa de'e. 24Orrose ete Yesuusi taaki tamaarewwaadi akka eyye in kinnin upnaadeneeyye, koonkadoosen oppa'e fayyaden ka Yesuusi fada'e, Qifirnahoomipa aanen. 25Ka ete pakateete afa disiti isha akkeneeyye, ishi kidene, “Kollissampayto, aytami arepa deete?”

26Yesuusi ka ishootta oorshe ka kide, “Anti dukaatannen ishina kiini, ishina wa malla ana faanittane, qoota laaqqoota damten ka duttanten malla diisheey, qoota wa orra qawwanna akkiten mallan. 27Ishina damta pannitto malla in yaalan. Sekapaayye damtase caatta paraparati koddinitto a Waaqa Aappa qara kobbeeta toomme a inna Waaqa ishina daannaneti yaala.”

28Orrase ka ishi kide, “Xawwi koda Waaqa kodeeta'e, maana kodeeta ino faani?”

29Yesuusi ka ishootta oorshe ka kide, “Ha koda Waaqa, isase a Waaqa erke amaneeta.”

30Ishootta ka ishi kidene, “Akkan akkino ka ke amanno'e, koda orra qawwanno maana ino akkissa ka maana koota? 31Akkima taafamte ka kiinitto ‘Akka damane'e moonte xata ishootta laaqqoota daashe’ mina'e, aappadaanno koommaytoppa menna damen.” #sooka 16:4, 15; mas 78:24

32Sitiiyyi Yesuusi ka ishootta kide, “Anti dukaatannen ishina kiini, a laaqqota moonte xata lekkatte ishina daashe Muusen ma a moonte xata laaqqota dukaata ishina daanno Aappinno. 33Laaqqota Waaqa a moonte xata lekkannitto ka orra piitati caatta daannito.”

34Se malla orrase ka isha kide, “Poqallaay, laaqqota asse pahato awta piisa ino daashe.”

35Yesuusi ka ishootta kide, “Ha laaqqota caatta ana. Nama ana kapopa deeno pakkanna in doxo, umma nama ana amanno, pakkanna in deepoodo. 36In ishina kiini ishina xoori i'ana akkiten ma ana a amanne. 37Nama a Waaqa Aappa ana daanno piisa, ana kapopa de'a, umma nama ana kapopa deeno, an alle lakopa an daanno. 38Anti waan malla moonte lekkade, akkaan henna isase ana erkeeti kodo diishe, akkan heenna mattiyyo kodo mallan. 39Heenna isaase ana erkeeti, orra isha ana daashe piisoppaayye akkan takka nefo an patinnin ka piraampira qaraayye tootoppa ishootta xaasho. 40Aa henna a Waaqa Aappinno, nama inna Waaqa akko ka isha amanno, akka caatta parapara akkado. Anti nefo kuyyaata piraampiratiiyyi tootoppa in isha xaasha.”

41Qoota Yesuusi kide, “Laaqqota moonte lekkatte ana.” Malla Yihutaata isha kela qojqoojete 42ka kiite, “Ini Yesuusi innasene a Yoosefinni?, Anka aappaaysho ka aayyaasso kuli an upnoo? kakuli isha atta kiini, ‘Moonte xatan lekkade’ ?”

43Yesuusi ka ishootta oorshe ka kide, “Pora an qoojqoojan. 44A Waaqa Aappa isaase ana erke ana kapopa tiito maliiyyi, nama takka nefo ana kapopa deena ettaninni in co; a ana kapopa deeno nefo, kuyyaata piraampiratiiyyi tootoppan isha xaasha. 45Mataaffa xuumampaya oppa itaafamte ka kiini, ‘Orra piisa a Waaqa kapa kollade kodda.’ Semmalla a Waaqa Aappa qara dakayno ka kela kollanno piisa ana kapopa deeni. #Issa 54:13 46Se kideese nefo, nama Waaqa Aappa akke ca kideetan ma, a Waaqa Aappa akke, isaase Waaqa kapa de'e patta. 47Anti dukaatannen ishina kiini, nama ana amanno, caatta parapara'e qapa. 48Anti an laaqqota caatta. 49Aappadaassin koommaytoppaayye menna damen ma ile'en. 50Laaqqota amoonte xata lekkatte sede; nama laaqqose damo, pakkanna in to'o. 51Laaqqota a moonte xata lekkatte ka caatta daannitoo ana. A Laaqqose quda dammo piisa haka paraparati kallaada. Akka orra piitati caatta koddito'e, laaqqota an anti daanno so'ayyo.”

52Sitiiyyi Yihutaata ka oli shiishte ka kiite, “namase akkan so'adi dammo'e, atta so'adi ino daassata ettansha?”

53Se malla Yesuusi ka ishootta kide, “Anti dukaatannen ishina kiini, ishina otoo so'a a inna nama'e a' damminiiyyi ka diikaadi a ikkinniniiyyi, caatta a qaptan. 54Aso'ayyo dammo ka diikiyyo ikkino piisa, caatta parapara'e qapa. Anti nefo kuyyaata piraampirati tootoppa in isha xaasha. 55So'ayyo damta dukaata, diikiyyo nefo, ikkayta dukaata. 56A so'ayyo dammo ka diikiyyo ikkino piisa, ananne kallaanni, anti ka ishan kallaani. 57Akkima Waaqa Aappa, isase caattampayta kodde ana erke, anti ka ishan caattampayta kodde mina'e, a so'ayyo dammo piisa, ananne caattampayta kodda. 58Semmalla oori laaqqotase moonte lekkatte sede, umma isheetta nefo isaase a aappadaassin damen minan. A laaqqose dame ile'en, maa xoori a laaqqose are kitto dama, haka paraparati kallaadan.”

59Yesuusi a Qifirnahoomiiyyi tikase aqinseeta a orra Yihuta kela kollinnooyye, asse haasawade.

qaaleta a caatta parapara

60Tamaarewwaadi oppa, lekaya ete sede dakayeneeyye, ikidine, “Haasoosen ikokkokiiy, ayno teyyatta ettansha?” 61Yesuusi ka akka tamaarewwaadi qootoseti desa qoojqoojen hapuraadin upnaade ka ishootta kide, “Hela haasoosen ishin kehaytinni? 62ka kuli otoo inna anama pora a turan oppa caan opa fayyannaan akka akkitaneeyye, desa atta kiitaneew? 63Acaatta daanno Hapura Waaqa diisheey, hupna nama we koda ettaninni in co; qaaletose an anti ishina haasawade, hapura ka caatta. 64Ma xoori ishin oppaayye orra demo a amanni in kinnini ca.” Yesuusi wa malla asse kide, paayyota qaraayyew a isha amanni in kinnin opa ayno akkima kodden, ayno ka isha qapsiiso qoota upo malla. 65Kammadesaaw Yesuusi ikide, “Wan malla ishina kide, ‘A Waaqa Aappa kapa ishi faqqatamto mali, nama ana kapopa deena ettaninni in co, tooy sede.’” 66Se minan tamaarewwaadi oppa lekaya ka isi kammandesa ooren. Ka awsiti desa paayyatte Yesuusi kamma anta alle diishen.

67Semmalla Yesuusi ka tamaarewwasene xaadi kudanka lakki kide, “Hela ishina nefo anta heentaneewwe?” 68Sitiiyyi Simoon- Peetiroosi ka oorshe ka kide, “Poqallaay, ayno kapopan anna? Ha atti qaaleta caatta parapara'e qapta. #Maati 16:16; Maari 8:29; Luqa 9:20 69Ino in amanne ka akkima atti qulqullitta inna Waaqa koddite upnaanne.”

70Yesuusi ka ishootta oorshe ka kide, “Anti ishin kudanka lakki an reexadenne? Ma ishin oppaayye nama takka taaploosi.” 71Sede nefo qoota innasene a Simooni asqorottittase Yihuta malla asse kide. Yihuta kadi punu tamaarewwosen kudanka lakki oppa takka kodde nefooyye, a Yesuusi qapsiiso qoota isha koddite malla.

Currently Selected:

Yohaannisi 6: MaQu

Highlight

Copy