Luqaasi 17

Juppootoppopa nama kateeta tooytatta

Maati 18:6-7, 21-22; Maari 9:42

1Yesuusi itamaarewwaadi kide, “Wa orra kehaytisha ka juppootoppopa kata deenaasso in hasan. ma xoori, nama a minan kehaysadan ka juppootoppopa pi'an, oo isha kido! 2Nama, a sene shashakka #17:2 “isasene shashakka” “orra amanteetannen qimmini” kideeta. oppaayye takka kehaytisho kapaayye, kadi yomatta kuttayta xolmaappa ishi hiddan ka pakateeta karopa alle katane ishi wayyi. 3Semmalla mattaayshina isi tooytaada innaassin oto ke ishin dapaneenyye, isha fuke; oton i'ishin dapaytaadi oppa issi maraarfadeeyye, ishi diishe. #Maati 18:15 4Kadi kuyyaatoppa tappaan ishin ke dapaayye ka tappaan ke kapopa deena ka ke kiina, ‘Ishin dapaytiyyo oppa in maraarfadeeyye’ ishi diishe!”

Qoota amanteetati desa

5Erkamampayasene a Yesuusi ka Poqalla Yesuusi kidene, “Poqallaay, amanteeta ino padaawe” 6Poqalla Yesuusi ka ishootta kide, “Kadi amanteeta uqqinteeta leya mina kitto qaptaneeyye ka leyoositi kiinittane, ‘Areppaayye putame ka pakateetoppa dishameeyye’ i'ishina ajajama.”

Koda orxayta qara fadammo

7Kamma desaaw Yesuusi ikide, “Ishin oppaayye nama takka kadi, orxayta a dula ishi qonno, taaki kaharra ishi sikinno qapaayye, orxaytose oto koda kela kalooyye, hela i'ennow ishi kiini, ‘xooye ka damta kute'e?’ 8Sekkapaayye ishi kiini in coo, ‘Eetotiyyo ana kode, ka harmisado ka hakan dammo ka ikkino kara'e, ana paata deddehayshe xaayti kuli damtaay?’ 9Ka kuliyya, orxaytose qoota wa ajajme kode malla a poqallaadi isha kalataysado ishina pahata? 10Ishina nefoow, oto wa ajajamtene kootaneeyye kida, ‘Ino orxaya a we nakanni in kinnini kodinno a ino kidameewwen koone,’”

Yesuusi akka qoosholaya kudani dinshe

11Yesuusi ete katama Yursaalami opa annooyye, arrta piita Samaariya isho a Kelila karanne tarpini; 12ete paleeta takka karopa kulleeyye, qoosholaya kudani isha kapopa de'e ka laka desa qa'ade. 13Ka nessaaysho kuttishe ka ullupe ka kidene, “Yesuusi; kollissampayto; atara ino maare!”

14Yesuusi ka ishoottopa tooyyade ka ishootta kide, “Aana ka dakintaayshin qeesewwa akkisha” Ishootta ka ete annaaneeyyew, poroppa dinen. #Lewi 14:1-32 15Ishootta oppaayye takka akka qooshaadi kela dine akke ka nessaadi kuttishe ka Waaqa kalataysattan qinda Yesuusi opa tiitaawe. 16Ka Yesuusi kalataysattanne loqqaadi kela pi'e. Isha nefo nama piita Samaariya. 17Yesuusi ka kide, “A qoosha kela dine nama kudaninne? Ka kuli sakali ayysha caan? 18A Waaqa kalataysatta tiitaawe, namoose a hapta mali hela takka nefo in co?” 19Ka sekkammaayye namooseti kide, “xa'e ka kale amanteetaayti ke dinsheey.”

Deena mankisteeta Waaqa

Maati 24:23-28, 37-41

20Feresata ka Yesuusi kaassatte ka kiite, “Ata mankisteeta Waaqa aytami deeta?” Isha ka ishootta oorshe ka kide, “Ha mankisteeta Waaqa isheetta asattaan deeni in kitto, 21Umma opa isheeta kiinincaane; ‘Tin are kitta, taaki disi kitta!’ Tin mankisteeta Waaqa otantaayshin oppa kitta.”

22Kamma desaaw Yesuusi itamaarewwaadi kide, “Kuyyaata oppaayye kuyyawwa inna a nama oppaayye, takka akkeeta yaatattane de'a. Ma xoori a akkitan. 23Orra i'ishina kida, ‘Tin Kiristoosi are ca, taaki disi ca,’ Ma ishina, in aanan ka ishootta kamma pora in hiran. 24Hankaada oto moonta quda hankaadooyye, akka qinda takkaayye desa qinda pilaati akkaanno mina'e, deena inna a nama asseew koddan; 25ma xoori inna a nama, se turanne, rakkoota, kuttayteeta teyyatta ka xeltoosetin needdatama isha parpaaccisni.

26“Akkimose a xelta Nooheeyye koddite mina'e, awta inna a nama deenaaneeyye, asseew koddita. #uuma 6:5-8 27Haka kuyyaatase a oppaayye Noohe markapa karopa kale kaynitto kara'e, orra idammi ka ikkini ka oli hemini ka ollopa hemammi. Pisha pateeta ka de'en ka piita qara we piisa pashshen. #uuma 7:6-24 28Akkimoose minae'ew, akkima xelta Lootee koddite mina'e koddita. Sitiiyyi orra mina desa dammi ka ikkini ka olqara paata herini ka olli kanni ka dullaaw aylanni, ka tikkaaw qupanni. 29Ma xoori, kuyyaata a oppaayye Looti katamoosen a Sotoomi kara sookeeyye, apitta isho daka apitta'e moonte xata roope ka ishootta piisa pashshe. 30Kuyyaata inna a nama deenaaneeyye, asseew koddita.

31“Sitiiyyi, nama paftaayye tula qara co, mehadda paftose kela ca teyyatta in lekkannin, nama dullaappa coow, tikopa in tiitaawnin #Maati 24:17-18; Maari 13:15-16 32Iskatteeta Looti matte oorsada. #uuma 19:26 33Nama a issin paha heeno piisa, isi patinni. Nama toota isi daanno xoori, issinni pahani. #Maati 10:39; 16:25; Maari 8:35; Luqa 9:24; Yoha 12:25 34Anti in ishina kiini: halkeessetiiyyi nama lakki loosha takkan qara'e muka; takka kapaayye iqeedama, takka ka eyye hasa. 35Iskatta lakkiiw pora takkaayye ollin yooqayooqa; takka kapaayye qeedamta, takka ka eyye hasta 36[Nama lakki dula takkoppopa ollin sookada, takka kapaayye iqeedama, takka ka eyye hasa.”]#17:36 mataaffa takka takka qaraayye dikoota 36 padaawini qaaletose nefo Maati 24:40 qaraayye kittaaw

37Tamaarewwaadi ka isha kaassaden ka kidene, “Poqallaay, orrose ayshopa asse qeedama?” Isha ka ishootta oorshe ka kide, “Allitta, pora oppaayye pukka co qaropa ollopa tiitaawni.”

Currently Selected:

Luqaasi 17: MaQu

Highlight

Copy