Luqaasi 18
18
Teekolayteeta takka a hiyyeetteta isho tiiyyoolayta ataanynya
1Se kammaayye, Yesuusi akka a in kafannin mali, kuyyaata piisa qinsatta ishootta parpaaccisnitto kollissa'e pahanoosen ishootta' lele ka kide, 2“Katama takkan oppaayye taanynya takkan Waaqa fuuri in kinnini ka nama nefo fokkisanni in kinnini'i ca. 3Hiyyeetteta takka ka katamoosen kara kalta ka taanynyosene kapopa anta quda' tawni ka isha kiini, ‘Deexase an paarkaalaayyo olli qapo desa ana' farate’ 4Isha ka deexose mura mali a kuttati jare. Ka kammaayye, isi karan xata dikade ka kide, ‘Kaan punu Waaqa an fuuri an kinnin ka nama nefo an fokkisanni an kinniniiy, 5hiyyeettese qoota ana payyahisse malla, in ishi dee'aadi farata. Ataakkati deena quda'e tawta ka ana payyahissaay;’”
6Kamma desa Poqalla Yesuusi ikide, “Wa ukkuttootase a taanynya haasawade matte qapnaada. 7Ka kuli Waaqa, samaytase xaadi halkeetta ka kuyyaata ishopaaw ullupno ka isha qinsanno'e, dukaata in farato? Ka tuffattaanne qaarqaarsaadi ishootta qara jarsha? 8Anti in ishina kiini, Waaqa irra qara ishootta dukaata farata. Ma xoori, inna a nama awta deenaaneeyye, hela ipiita qara amanteeta teya?”
Feresittase isi peepno isho naalaytase a nama qarata qaratno
9Kamma desaaw Yesuusi, orra issi kiino, “Ino an hanqeellaya” Ka orra pila puyanno'e pahanoosen lele ka kide, 10“Nama lakki tika qulqulloota kelopa qinseeta aane; takka Feresitta, takka'ew nama qarata qaratino.
11“Feresitta iqaade ka isi karan xata qinsade ka kide, ‘Waaqqo, anti qootan a orra pila mina saramayta ka ukkuttoota isho dahalampayta an koddinin malla in ke kalataysanni; ka qootan namoose qarata qaratno nefo an pahanin malla ke kalataysanni. 12Anti torpaappa kuyyaata lakkin damta musanni ka waan akkanna piisa qaraayye, kuma kundatta sookinni ka kalinni.’
13“namoose qarata qaratino xoori, laka desa qa'ade, umma opeela kideeta ka moontandela tooyyatta nefo in heennaanne ma, harkaadinni kessoppa issi tottoommi ka qinsanni ka kiini, ‘Waaqqo, ana juppolayta maare.’
14“In ishina kiini, a hanqeelluma akkade ka tikaadipa kale, namoose qarata qaratno diisheey, Feresittan. Nama a moontopeela isi kuttinno piisa, xata shakkanni; nama xata isi shakkinno xoori, opeela kuttanni.” #Maati 23:12; Luqa 14:11
Yesuusi akkima hellaa' sake
Maati 19:13-15; Maari 10:13-16
15Akka Yesuusi hellaa shashakka qara harkaadi qapado'e, orra Yesuusi kapopa hellaan de. Tamaarewwa Yesuusi ka sede akken ka orra peeqen. 16Yesuusi xoori hellaasene shashakka'e isi kapopa halaade ka kide, “Mankisteeta Waaqa a sene asse pappahaati'iy, hella an dawran, a ana kapopa de'en. 17Dukaatannen ishina kiini, nama mankisteeta Waaqa akkima hellaa shakshakka mina in teyyannini, isheetoppopa in kalo.”
Teyaanta piita ka mankisteeta moonta
Maati 19:16-30; Maari 10:17-31
18Saarra Yihutaata oppa takka ka Yesuusi kaassade ka kide, “Atti kollissampayta, a paxaara, akkan caatta parpara akkado'e, maana kodeeta ana faani?”
19Yesuusi ka kide, “Maana'e a paxaara ana kiini? Waaqa takkayta mali a paxaara in cooy. 20Ajajjasene kiina'e ‘In dahalan/ in dahalsadan in ishshan, in hatan, darta in maakkuman, aappaayshin ka aayyaassin ulfeesse’ i'upta.” #sooka 20:12-16; ooreta 5:16-20
21namase ka ishi oorshe ka kide, “Ajajaddosene an shakkiiwwin paayye ka tooyte.”
22Yesuusi ete sede dakayeeyye, inamaseti kide, “Asseeyye we takkan kodeetaaw ke hase; wa a qapta piisa kate ka kaajosen teekolaya qoote, moonteeyye teyanta ollopa tuulamte akkattaay ka de'e ka ana kamma xooye.” 23Namase xoori qoota teyanta kutta qapo malla, ete sede dakayeeyye, a kuttaati nyarrahe. 24Yesuusi ka akka namase nyarrahe akke ka kide, “Teyantoolaya'e, mankisteeta Waaqa oppopa kalaa'e, oo attan rakkoota! 25A teyantoolayta mankisteeta Waaqa oppopa kalo kapaayye, a kaala qaawa marfeeta karan kullo sholla'i.”
26Orra sede dakaye ka kide, “Ka kuli asseeyye, ayno dina ettansha?”
27Yesuusi xoori ikide, “Wa nama ettansammi in kinnini Waaqa'e i'ettansammi.”
28Peetiroosi ka ishi kide, “Tin ino wa an qapna piisan alle diinne ka ke kamma deene, xanno attaaw?”
29Yesuusi ka ishootta kide, “Dukaatannen ishina kiini, nama mankisteeta Waaqa malla kide ka tikaadi taakki, iskatteetaadi taakki, helaasso taakki, toolaaysho a isha xaaye taakki, hellaadi diinno, 30amma piisse qaraayye harka lekayta akkada; ka piita itturopa deenittooyye caatta parapara akkada.”
Yesuusi qoota tootaaditi ka a xaanaaditi desa a sessattati' haasawade
Maati 20:17-19; Maari 10:32-34
31Yesuusi tamaarewwasene xaadi kudanka lakki xawwi desa hale ka ishootta kide, “Tin Yursaalami opan anna; qoota inna namati desa wa xuumampaya taafene piisa ka dikkadan. 32Isha, harka orra a Yihutaata in koddinini oppopa tuukkama ikka isha qara seesan ka oppa otan ka qara tufadan. 33Ka oto isha karafan kammaayye, isha ishshanema xoori kuyyaata sessattati tootoppaayye i'aa.”
34Tamaarewwaadi xoori sepiisa oppaayye we takkan nefo ishootta in kalle; umma maana kapa akka asse kide qoota ishootta tura juutamte malla maana akka haasawade in upnaanne.
Yesuusi akkima katama Iyyaarko kara joolta dinshe
Maati 20:29-34; Maari 10:46-52
35Yesuusi ete katama Iyyaarko kapa dehaadeeyye, nama takka joole pora kapa kute'e ka eyye qinsanni. 36Ete nessa orra lekayta a isha kapan tarpino dakayeeyye, ikaassade ka kide, “Ata sene maana?”
37Orra ka ishi' lele ka kide, “Ha Yesuusise Anaasirati'i, areppa desa tarpini.”
38Sitiiyyi namase joole ka ullupe ka kide, “Yesuusi inna a Taawwiti, atara ana maare!”
39Orra fuula tura qate ka turandesa anno ka isha fukke ka isha kide “Jaw kide!” Isha xoori a qaran qapto'e nessaadi kuttishe ka ullupni ka kiini, “Yesuusi inna a Taawwiti, atara ana maare!”
40Semmalla Yesuusi iqa'ade ka ajaje ka kide “An kapopan xooya; namase joole ete isha kapopan de'eneyye, Yesuusi ka isha kaassade ka kide,
41“Akkan maana ke kodo' faani?” Namase joole ka kide, “Poqallaay, paata akkaan faani.”
42Yesuusi ka ishi kide “Akke, amanteetaayti ke dinsheey.”
43Namase joole ka eennew paata akkeeta ettanshe. Ka Waaqa kalataysattan Yesuusi kamma annta paayye. Samaytase piisa ete sede akkeeyye Waaqa kalataysade.
Currently Selected:
Luqaasi 18: MaQu
Highlight
Share
Copy
Want to have your highlights saved across all your devices? Sign up or sign in
