Mariqoosi 6

Akka toorayta Naasiratiiyyi Yesuusi qara kaye

Maati 13:53-58; Luqa 4:16-30

1Yesuusi eyye xa'e ka katamaasso opa kale. Tamaarewwaadi ka isha kamma aanen. 2Ka kuyyaatase a sampata a orra Yihutaatiiyyi, tikase a qinseeta a orra Yihuta kela kollissa paayye. Orra lekaytaka eyye ca. Ka isha dakkaysanni; ka kide “Ata namoose ayshaayye sede piisa qeede? Ata ookuma a atta paho ishi daasame? Ikka atta daxxowwosen kooni? Ka oppa qawwaawen. 3Ka kamma desa kideneewwe, “Isha harmittase qora xefnnonne? Inna Maariyaaminni? Ka inna opa Yayqoopi ka a Yoosa ka a Yihuta isho a Simooninni? Tuparraasso kuli are in oppaaw in kalane?” Ka isha tuffaden; ka isha dakaya tiiten.

4Yesuusi ka ishootta kide, “Ha xuumampayta piitaaysho ka toolaaysho isho daltaytaaysho oppa'e tuffatammi diisheey, orra pila oppa i'ulfeessammi#Yoha 4:44 .”

5Ka eeyye'e, paaqolaya lamaya qara harkaadi qapade ka dinshe diisheey, daxxowwa a pila kodeeta in ettaninne. 6Qoota amanteeta dapen malla ikka harmo isha qawwasse. Ka sekkammaayye oori, palewwaappa tittiitaawni ka orra kollinni.

Yesuusi akka erkamampayasene xaadi kudanka lakki kollissa erke

Maati 10:5-15; Luqa 9:1-6

7Yesuusi erkamampayasene xaadi kudanka lakki isi kapopa hale ka lakki lakki ollin qape ka erke ka hapurra neeqa qara hupna ukkumeeta ishootta daashe. 8Ka oto pora xaanaaneeyye uleeta maliiyyi, akka laaqqota taaki qarateeta taaki kaaja isi quda in teyyannini ishootta ajaje#Luqa 10:4-11 . 9Ka ishootta kide, “Xopaassin xaayyada diisheey, mehadda a kalsannaane a pila in padaawadan. 10Pora pisa oppaayye, oto tika nama takka opa kullitaneeyye, haka eyye kara sooknittane'e, tikoose kara'ew tawa. 11Pora oppa orra ishin teyyanni in kinnin ka ishin dakayni in kinnini piisa oppa, loqqaassin quda kuyyaalayta dawdawada; sede maakkitta ishootta qara kodditaay#koda 13:51 .”

12Ishootta ka eyye xa'en ka akka orra piisa juppootoppa tiitaawo'e kollishen. 13Ka orriyya lekaya sookshen ka paaqolaya lekaya qara sayteeta daaten ka dinshen. #Yay 5:14

Yohaannisise pishaan orra jaqno akkima ishshame

Maati 14:1-12; Luqa 9:7-9

14Qoota orra piisa maxxa Yesuusi upnaade malla, nuqusase Herodiisi kuli qootaadi desa dakaye; orra demo ka kiini, “Yohannisise pishaan orra jaqno tootoppa xa'e ka. daxxowwosen piisa kooni.”

15Orra demo ikiiniiwwi, “Ha Eliyaasi;” a demoka kiiniiwi, “Ha xuumampaya a xatta oppa akka a takka minna.” #Maati 16:14; Maari 8:28; Luqa 9:19

16Herodiisi ka sede piisa dakaye ka kide, “Ha ini Yohannisise an qara matta mursiise. Ha isha tootoppa xa'e.” 17Herodiisi qoota iskatteeta innaassoti a Filippoosi Herotiyaata heme malla, isheeta minan Yohaannisi qapsiise ka hidacciise ka akka tika hida karopa kalo kode; #Luqa 3:19-20 18sede nefo, qoota a Yohaannisi Herodiisi kide, “Innaassin kela iskatteeta teyyatta ke parpaaccisni in kitto. malla.

19Herotiyaata ka seminan Yohaannisi qara xommaata qapatte ka isha ikassa faani; ma xoori in ettaninne. 20Paayyota qaraayye, Herodiisi akka Yohaannisi qulqullitta ka hanqeellitta kodde qoota upo malla, i'isha tura fuurri ka isha qara tooyni. Herodiisi oto haasa Yohaannisi dakkaysannooye itammaqni. A koddito ma isha dakkaysatta ijaalanni.

21Herodiisi kuyyaata oppa dalade ulfeessaa'e, kutkuttowwa a mankisteeta ka saarra oranna isho orra Kelila a upnaatame saankulta a kutta harmishe; Herotiyaata ka se minan saanta akkatte. 22Enenta Herotiyaata ka tikase a saankulta kelopa kullite ka kirpa diitte ka Herodiisi isho xaykittase xaadi damta halaame xasasse. Nuqusase ka enentaseti kide, “Wa heenta piisa ana kaassado in ke daashaay. 23Ka isheeta xaxade ka kide wa kaassannitta piisa kati punu mankisteetiyyo quda paka nefo kodditeeyye, in ke daasha.”

24Enentase ka oori aayyaasso kapopa ante ka ishi kiite, “Maana isha qara kaassada?” Aayyaasso ka isheetta kiite, “Kaassado ka kide <Matta Yohannisise pishaan orra jaqnoti ana daashe.’”

25Enentase ka eennow nuqusa kapopa jarjartan ante ka ishi kiite, “Akka matta Yohannisise pishaan orra jaqnoti amma qoreetoppa ana daasamon heena.”

26Sede ka harmo nuqusase nyarrahasiisse; ma afasene xaadi a xaykittaadi tura xaxade malla, isheetta dawreeta in heennanne. 27Semmalla nuqusase ka foolisowwasene tooytota qara ca oppa takka akka aano ka Yohaannisi qara matta muro ka ishin de'o erke. Foolisittase ka tika hida opa aane ka Yohaannisi qara matta mure. 28Ka mattase a mure qoreetoppa xaaye ka enentaseti daashe. Enentase ka aayyaassoti daasse. 29Tamaarewwa Yohaannisi ete se dakayeneeyye, ide'en ka pukkaadi qeeden ka hawlen.

Yesuusi akka nama kuma keni damshe

Maati 14:13-21; Luqa 9:10-17; Yoha 6:1-14

30Erkamampayasene a Yesuusi porase a opa erkameneeye kalen ka Yesuusi turopa ollopa de'en ka wa a kodene ka kollishene piisa ishi torren. 31Qoota orra ishootta kapopa deeno ka kallo leki, ikka aroota karan damta daman nefo dapen malla, Yesuusi i'ishootta kide, “Xooya pora a torke co opa anna ka shakkayteeta nessada.” 32Semmalla oori ikka xawwaati caatta'e; koonka karopa fayyaden ka pora takka torke co opa desa aanen.

33a koddito ma, ete annaaneeyye, orra lekayta ishootta akke ka akka ishootta kodden upnaade. Ka katamaddappa ollopa sooke ka loqqan hire ka ishootta qatte ka ishootta kapopa ollopa de'e. 34Yesuusi ete koonka kara lekkannooyye, orra lekayta akke ka qoota kaharra sikmayta dape paho malla, ishootta nyarrahe, ka we lekaya ishootta kollishe#dikoota 27:17; nuqu a 1ta 22:17; otoo a 2ta 18:16; His 34:5; Maati 9:36 . 35Qoota letta shishshipnitto malla, tamaarewwaadi ka isha kapopa aanen ka ishi kidene, “Pora an oppa kinno koommayta, letta nefo ka shishshipniiy, 36alle orra isi qara xaashe, ikka kantada isho palewwa areppan desa ca opa aanen ka damta piddaden.”

37Yesuusi ka ishootta kide, “Ishina wa damane ishootta daasha.” Ikka kidene, “Hela kuli in anna ka tinaareta dippa lakkin laaqqota a daman piddina ka ishootta daanna?”

38Isha ka ishootta kide, “Laaqqoota meeqa qaptan? intoonno aana ka tooyyaay!” Ikka tooyyen ka ishi kidene, “Laaqqoota keni ka murkuja lakki are ca.” 39Yesuusi ka akka samayta kita kita qootan ka maantoppa kutiishane tamaarewwaadi ajaje. 40Samayta ka kita a dippa isho a kunda keniti qootame ka kute'e. 41Yesuusi ka laaqqotase keni ka murkujase lakki qeede ka moontandela tooyyade ka sake ka laaqqotase oppa moosse ka akka orraseti akka qootane'e, tamaarewwaadi daashe. Ka assew murkujase lakki akka taamaewwaadi orra pisa qootani ishootta daashe. 42Nama piisa ka dame ka duttane. 43Tamaarewwaadi ka moossowwa a laaqqota isho a murkujase a kela hase ollopa pohen. Ikka satara kudanka lakki immakkoota kayte. 44Diira a damtose dame, kuma ken mina'e caan.

Yesuusi akka pakateeta qaran desa loqqan aane

Maati 14:22-33; Yoha 6:15-21

45Yesuusi ete samayta isi qara xa'innooyye tamaarewwaadi akka ennoow koonka karopa fayyadan ka pakateete afa disiti Peetesaayda opa isha tura qattane'e ishootta ajaje 46ka ete samaytase isi qara xaasheyye, qinseeta irroota qaropa fayyade. 47Ete shishshipteeyye, koonkasene pakateete otantoppa caan. Isha xoori, xawwaati piite ca. 48Yesuusi ka a puppeeta tamaarewwaadi minaadesa xaanitto minan, ishootta a koonkasene qula malaale ka rakkanna akke ka halkeetteeyye a lukkalitta iyyino mina kittooyye, pakateetase qarandesa loqqaan ishootta kapopa aane ka ishootta kapan a tarpa mina kide. 49ishootta xoori isha a pakateeta qarandesa loqqan anno akken; ikka hapura ishootta pahanaade; ikka ullupen. 50Ka ete isha akkeneeyye, piisani tammaqen. Yesuusi ka eennow ishootta kide, “Anaay in fuuran.” 51Ete koonka karopa ishootta kapopa fayyadeeyye, puppeetase ikiite jaw. Sede nefo ka a kuttaati ishootta qawwasse. 52Karittaaysho'e lule ikka daxxoose a laaqqota qara kode matte in qapnin diishe, helati sede ishoottan qawwasso.

Yesuusi akka piita Kensareetitiiyyi paaqolaya dinshe

Maati 14:34-36

53Ikka pakateeta qaran tuullen ka piita. Kensareeti kayen ka koonkasene piita qudopa heeqqishen ka eyye hidden. 54Lekkatta ishootta koonkaappa lekkadenen, orra ka eennow Yesuusi upade. 55Ka piita eyye kapandesa kitto oppa pora hirri ka pora a opa Yesuusi co oppopa paaqolaya shaabban isha turopa haani. 56Ka pora oppopa isha aane pisa opa palewwa ka katamadda isho kantada kara paaqolaya lakoppopa isha turopa sookinni. Ka akka ohaataadi patta minaaw qappadane isha qinsanni; a qappade piisa ka dinni.

Currently Selected:

Mariqoosi 6: MaQu

Highlight

Copy