Mariqoosi 7

Yesuusi qoota aata aappadaati desa wa haasawade

Maati 15:1-9

1Feresaata isho kollissampaya a seera a Yursaalami desa de'e oppaayye, takka takka ka Yesuusi kapopa ollopa de'en. 2Ka tamaarewwa Yesuusi oppa a demo a harka nyaleetin se kideese nefo a harkasso in jaqqannin mali damta damma akken.

3Feresaata isho orra a Yihuta a ata hase haka aata qimaya tooytaadan ka taantetan harkaasso jaqadan mali damta dammi in caan. 4Ka asseew oto urmalaappa kalaneeyye haka jaqqadan mali dammi in caan. Ka akkimose mina'ew, wa kuppaayya ka okkota ka meehaaysho a sipla oppa kodame isho looshshada jaqqeetan aata asse paha lekaya tooytaanni. #7:4 “oto urmalaayye kallaaneeyye, a harkaasso jaqadan mali damta dammi in caan.”

5Semmalla Feresata isho kollissampaya a seera Yesuusi kaassaden ka kidene, “Tamaarewwasene xaayti maana'e aata qimaya qara kallaani in kinnin ka a harkaasso'e in jaqannin mali damta dammi?”

6Yesuusi ka ishootta orshe ka kide, “Ishina pahanassampayaay, isase a Issayyaasi qootayshina desa xuuma haasawade ka kide,

‘ha samayse afa pattanne ana ulfeessini,

ma karittaaysho ana kapa isekaade#Issa 29:13. 7Ishootta aata anama kode'e seera Waaqati koden ka

orra kollinni ka patta ana waaqaysanni.’ dukaata.

8“Semalla ishina ajaja Waaqa'e alle diissen ka aata nama tooytaannittan.

9Aataassin tooytaatta malla ajaja Waaqa alle diinnittan. 10Muuse ikide, ‘aappaayshin isho aayyaassin ulfeesse. Nama aappaaysho taaki aayyaasso qara wa neeqa haasawanno, a alle ishshamo#sooka 20:12; 21:17; Lewi 20:9; ooreta 5:16!’ 11Ishina xoori ikkiinnitane, ‘Nama takka oton aappaaysho taaki aayyaassoti kiini qaarqaaarsa allu helati ana qara akkatto piisa kalisoota Waaqati in kalsheeyye;’ 12Akka aappaaysho taaki aayyaasso qaarqaaro a faqqanni a kittan. 13Ka pora asse pahon aataassin tooytaatta malla qaaleta Waaqa alle hattinnittan; ka wa asse paha lekaya koonittan.”

Wa nama nyalinna

Maati 15:10-20

14Yesuusi isi kapopa samayta haleew ka ishootta kide, “Ishina piisanti anopa dakkaysada, ikka ishina kalto! 15Wa nama kara sookna'e nama nyalinni diisheey, wa lake desa nama karopa anna nama nyalinni in caan! 16[Semmalla nama napahata a dakaynitto qapo, a dakayo.”]#7:16 mataaffa demo qara'e dikoota 16 padawame. wessen padawame nefo a dikoota 4:23 qara kitto oli pahan.

17Yesuusi ete samayta eyye diishe ka kapa tika kelopa kulleeyye, tamaarewwaadi ka qoota pahanaseneti desa isha kaassaden. 18Yesuusi ka ishootta oorshe ka kide, “hela ishin kuli sede matte in qapinini? Hela wa lake desa nama karopa anna akkima pakkanna nama nyalinni in kinnin ishina kalli in kitto? 19Karitta karanne anni ka eenxata lakopa sookni diisheey, sataata karopa anni in caan.” Pamta piisa akkima nyala in qapnin Yesuusi ka seden ishootta upnayshe.

20Sekkamma Yesuusi ikide, “Wa nama nyalinna, wa nama kara sookna. 21Ishootta nefo, dikatta neeqa ka sharmuutuma ka hatanta ka nama ikassa 22ka dahaleeta taaki dahalsatta ka paata kaabbeeta ka neequmta ka sassapa ka fokkoota dapeeta ka yooyo'uma ka paata otitta ka isi peepa isho isi qaran xata paata xaayeeta. 23Wossin nenneeqa piisa nama karaaw sookni ka nama nyalinni.”

Amanteeta iskatteeta takkati

Maati 15:21-28

24Yesuusi eyye xa'e ka paleeta takka katama Tiroosi kapa kitto opa aane. Ka tika takka karopa kulle. Ka akkima eyye co akka nama takka nefo in upnaannini fade; ma dekatta in ettaninne. 25Iskatteeta takka a enentaadi hapura neeqan qapamte ka qoota Yesuusi desa dakayte ka eennow deete ka loqqa Yesuusi kela pi'ite. 26Iskatteetase nefo Kirikkitteeta a sanynyeeta Sirofinqa, ka akka Yesuusi hapurase neeqa enentaadi kara sooksho'e isha qinsatte. 27Yesuusi xoori i'isheetta oorshe ka kide, “Damta hellaa qeedeeta ka kutta kateeta in parpaaccisneey, paayyota a hellaa duttanen.”

28Isheetta ka ishi oorisse ka kiite, “Poqallaayyo, sede dukaata ma, ha kutta nefo pusaasa a hellaa kela sehena'e piite pohanni.”

29Yesuusi ka isheeta oorshe ka kide, “Sede a asse kiite malla hapurase neeqa enentaayti kara isookeey, tikaaytipa kale.”

30Iskatteetase oori ete kalteeyye, enentase xaadi kara hapura neeqa isooke ikka isheeta a loshsha qara nakaytan mukte akkite.

Yesuusi nama dakkawe ka haasa kuli ettaninni in kinnin dinshe

31Yesuusi piita a Tiroosi kapandesa kitto oppa alle xa'e, ka Sitoona oppan tarpe ka piita takka Katamadda kudan kidammitto desa pakateeta Kelila opa aane. 32Ikka piitositiiyyi nama dakkaawe ka haasa kuli ettaninni in kinnin isha kapopan de'en ka akka harkaadi isha qara qapado isha naappaden; 33Yesuusi ka namase orroppaayye xawwi desa qeede ka qupiyyaadi nappa karopa ishi kullishe ka hanjuftaadi tuffe ka arrapa qaran ishi qappade. 34Ka moontandela tooyyade ka shammaqsade ka namaseti kide, “Effatah!” Se kideese nefo “Paname!” kideeta.

35Nappaadi ka eennow panamen, arrapaadi nefo ka furmade ikka rakkoota takka nefo mali haasawatta paayye. 36Yesuusi ka akka sede nama takka nefo in lellini'i, orrase ajaje. Ma xoori ishootta a isha akka pora in torrinini ishootta kokkonnayshe qaran qapto'e a kuttaati torren. 37Orra torrosen dakaye piisa ka a kuttati oppa qawwaawe ka kide, “We piisa harmishe ka dakkaya akka dakayan ka orra haasa ettaninni in kinnin nefo akka haasawado kooni.”

Currently Selected:

Mariqoosi 7: MaQu

Highlight

Copy