ALevitikus 26
26
Nnap nnəna̱n ka̱kul nkpak nnap nnəm
(Ndan NM 7.12-24; 28.1-14)
1UYawe là pa, <<Kang ó nəm ichər ka̱kul ishi wó ka̱t te ala̱ka̱n akpákpà, ka̱t te ndar ǹyə́ryər ka̱kul ishi wó ka̱t te ipáng ikpákpà kà̱ mbin wó pa̱ ó kúchì á na, ka̱kul mmami na uYawe, Inan wó. 2Ó kpak ìlum aSati mi kang ô rup ká̱ atak awop mi. Mmami na uYawe.
3<<A yà pa̱ ó kpak oga nɗyáng mi kang ó nak ishi ká̱ oga nnap mpakpak mi ó nəm inok ká̱ oza̱, 4te mi re nrè ká̱ ìva̱r ka̱ awalang va màl, na mbin i na iya̱m-nrì, kang oga ikún iga ashe iram i na awár oza̱. 5Mpək iya̱m wó i ga i chu awalang aga mpáng ìba̱ngba̱ng, kang mpáng ìba̱ngba̱ng i ga i chu awalang aga nsuk iya̱m, te ó yà ká̱ iya̱m-nrì pa̱ makmak pa̱ ó ri kang ó təm ká̱ ikángkáng ka̱ ashe mbin wó.
6<<Mi na ntəm ikángkáng kà̱ mbin, kang ó ra ká̱ iya̱m iro i gbək wó ka̱t. Mi fa ká̱ izhé iɓá̱ngɓa̱ng ka̱ ashe mbin, kang ndokchì i yà ká̱ nwatar ka̱ ashe mbin wó ka̱t. 7Ó ɓàk onəm ìkum wó kang oza̱ i tàk kà̱ mpyal wó ka̱ atak ndokchì. 8Pa̱ otukun ka̱ ashe wó i ɓàk ìgba̱l, kang ìgba̱l ka̱ ashe wó i ɓàk ìkalong pa̱ ìgba̱pchi, kang okpa ìkum wó i tàk kà̱ mpyal wó ka̱ atak ndokchì.
9<<Mi nak nnap nəna̱n á wó, mi nak wó ó myak ó yə́l, kang mi kpan nsar nnap-nlà mi ká̱ wó. 10Ó ri iya̱m ikpa̱n iva mmá ɓut chit gbà̱ng, kang ó wur ikpa̱n va̱ ta i fa na á le ká̱ atak îzhakan. 11Mi nak atak ntəm mi ka̱ ashe Aghal ayə́ryər ka̱ ashe wó, kang mi yà ká̱ ǹyang ká̱ wó ka̱t. 12Mi chen kà̱ ìshimshe wó kang mi yà Inan wó, kang ó yà onəm mi. 13Mmami na uYawe, Inan wó, uva̱ fa ká̱ wó kà̱ mbin aMasar, na kang ó yà ozwal oza̱ lap ka̱t, kang n cwan ndar ayok wó na á nak wó ó nəm ntəm ngga akul ishi wó.
Mpyat akát ka̱kul nkpak nnap nnəm ka̱t
(Ndan NM 28.15-68)
14<<A yà pa̱ ó kpak nnap nnəm á mi ka̱t, kang ó nak ishi ká̱ nkpaktak oga nnap mpakpak va̱ ta̱ ka̱t, 15kang a yà pa̱ ó yang ká̱ oga nɗyáng mi kang ó yen ká̱ oga nnap nkpakkpak mi, o nak ishi ká̱ nkpaktak oga nnap mpakpak ka̱t, kang o ɓəkchi nsar nnap-nlà mi ká̱ wó, 16te iya̱m va ta̱ mi nəm á wó, mi ɓa ká̱ mɓək anung nnga nnəm ayər ka̱ ashe wó, ká̱ arwa aga nyà ká̱ ntán ka̱t, arwa atak rusok ava i nak iwú wó i fo kang ó yà onəm onəna̱n ka̱t. Ó suk iya̱m nsuk ka̱ anung amwang, ka̱kul okpa ìkum wó i ga nriri. 17Mi nak ìwú mi ka̱ apal wó, kang okpa ìkum wó i nəm igwan ká̱ wó. Onəm oga ǹyáng wó i nəm igwan ká̱ wó. Onəm oga ǹyáng wó i nəm ichumchum ká̱ wó, kang ó chəng nchəng va unəm uro kà̱ nwà wó ka̱t.
18<<A yà pa̱ kà̱ nva̱ng oga iya̱m va̱ ta̱ kang ó kpak nnap nnəm á mi ka̱t te, mi nyám ntàn á wó nva̱ng pa̱ nfangshat ka̱kul nnap mɓá̱ngɓa̱ng wó. 19Mi chwan nkak ishi wó ngga nkəɗyar kang mi nak ìva̱r ipəng ka̱t, kang mbin wó i wom i yà wa acham. 20Ìkam wó i kùr ka̱ iya̱m ilakchi. Ka̱kul mbin wó i na iya̱m-nrì wò ka̱t, kang oga ikún iga mbin wó i na awár oza̱ ka̱t.
21<<Kang a yà pa̱ ó dap ká̱ mi kang ó yang ká̱ nkpak nnap nnəm á mi, te mi nak oga mɓək anung wó i mak nva̱ng pa̱ nfangshat ka̱kul oga nnap mɓá̱ngɓa̱ng wó. 22Mi re nrè ká̱ izhé iga anyin ka̱ ashe wó, iva i gbá̱ng ovan wó, i vyap iya̱m nkang wó, kang i nak ìyəl wó i yen i ga i chu ìva i nak mí chəng oga asa̱l wó.
23<<Kang a yà pa̱ káp ká̱ oga iya̱m va̱ ta̱, te ó ka̱m nɗyáng ntàn mi ka̱t, ó ga mpyal ká̱ nnəm nkak ishi ká̱ mi, 24te mi pyat á wó, kang mi mɓək anung á wó nva̱ng pa̱ nfangshat ka̱kul nnap mɓá̱ngɓa̱ng wó. 25Te mi ɓa ká̱ ndokchì ngga mpyát akat mɓəkchi nsar nnap-nlà, kang ó ɓut kà̱ oga ìtong wó te, mi re nrè ká̱ arwa kà̱ ìshimshe wó, kang mí na wó ka̱ ashe awó onəm ìkum wó. 26Nva̱ng va̱ n gəl asa̱l iya̱m-nrì wó te, ochar pa̱ ogba̱pchi i pə́k nzəngkəng wó ka̱ ashe achər apər aga nwàng iya̱m pa̱ ìzəng, kang oza̱ i ɓa ká̱ nzəngkəng ka̱ atak mmàl ìɗək, ó ri kang i kúr wó ka̱t.
27<<Kang a yà pa̱ káp ká̱ iya̱m va̱ ta̱, ó kpak nnap nnəm á mi ka̱t, ó nəm nkak ishi á mi, 28te mi pyat á wó ka̱ ashe nlak ìgwak ìɓá̱ngɓa̱ng, kang mi nyám ntàn á wó nva̱ng pa̱ nfangshat iji mmatmat ji ka̱ apal oga nnap mɓá̱ngɓa̱ng wó. 29Ó ri izhé ovan wó onunggwan ká̱ izhé ovan wó ochar. 30Mi chwan oga atak awop wó, mi kyen oga atak ndung nturari wó, kang mi ɓut oga akúm wó ka̱ apal oga ichə̀r wó, mi yang ká̱ wó. 31Mi nak oga itong wó i təm agúng kang mi vyap oga atak awop wó. Mi yà ká̱ ka̱m iya̱m inana wó ka̱t. 32Mmami ká̱ ishi mi mi vyap mbin wó, na okpa ìkum wó va̱ i ɓa ntəm kà̱ te oza̱ á ga̱m. 33Te mi tur ndokchì kà̱ wó, kang mi lyangshin wó ka̱ ashe mbin. Mbin wó i təm nkpələng, kang oga itong wó i ra agúng. 34Kang mbin i fe nchang aSati izún wò aga njul kà̱ nkpaktak awalang va̱ á ra nkpələng, nva̱ nna ka̱ ó yà ka̱ ashe mbin onəm ìkum wó á. 35Nkpaktak awalang va̱ ra nkpələng te i ya njul nva̱ uza̱ ka̱ yà ka̱t, kà̱ nra oga aSati wó, nva̱ ka̱ ó yà kà̱ ntəm ka̱ ashishe.
36<<Aɓo oro va̱ le ka̱ ashe wó te, mi nak ayər ka̱ ashe igwak oza̱ ka̱ ashe mbin onəm ìkum oza̱. Nnáp agwal azang i nak oza̱ kà̱ nchəng. Oza̱ i chəng wa nchəng ndokchì, kang oza̱ i tàk, káp ká̱ nva̱ unəm uro kà̱ mɓàk oza̱ ka̱t. 37Káp ka̱ nva̱ pa̱ unəm uro kà̱ mɓàk oza̱ ka̱t, oza̱ i nə́m ifang ka̱ apal owan oza̱ wa nchəng ndokchì. Kang ó yà ká̱ ìkam iga ntong kà̱ mpyal okpa ìkum wó ka̱t. 38Ó zhì ka̱ ashe mbín, mbin onəm ìkum wó i ma̱ng wó. 39Aɓo oro va̱ le ka̱ ashe wó te, oza̱ i kú ka̱ mbin okpa ìkum oza̱ ka̱kul nnap mɓá̱ngɓa̱ng oza̱. Kang oza̱ i kú ka̱kul nnap mɓá̱ngɓa̱ng opo oza̱.
40<<Kang a yà pa̱ oza̱ i pwa nnap mɓá̱ngɓa̱ng oza̱ ká̱ nnap mɓá̱ngɓa̱ng opo oza̱, nlang nnandər oza̱ va̱ oza̱ nəm á mi, ká̱ nkak ishi va̱ oza̱ nəm á mi kpa, 41nva̱ nak mi n pyat oza̱ kpa kang n ɓa ká̱ oza̱ ka̱ ashe mbin okpa ìkum oza̱, te awalang va̱ oza̱ yen ká̱ ishi oza̱ kang à ma̱n ká̱ nnap mɓá̱ngɓa̱ng oza̱, 42te mi rəng nsar nnap-nlà mi ká̱ uYakup. Mi rəng nsar nnap-nlà mi ká̱ uIshaku kpa ká̱ nsar nnap-nlà mi ká̱ uAbəraham. Mi rəng ká̱ mbin va̱ ta. 43Kang oza̱ i yang ká̱ mbin i re, te i ya njul oga aSati wò nva̱ uza̱ ra ikpələng, kang oza̱ ma̱n ká̱ imwa nnyám ntàn nnap mɓá̱ngɓa̱ng oza̱, ka̱kul oza̱ yang oga nnap mpakpak mi kang oza̱ jan oga nɗyáng mi. 44Káp ká̱ nnà te, ka̱ awalang va̱ oza̱ ka̱ ashe mbin okpa ìkum oza̱ te, mi yang ká̱ oza̱ ka̱t kang mi nzhì oza̱ pa̱ chatchat ka̱t, kang mi ɓəkchi nsar nnap-nlà mi ká̱ oza̱ ka̱t, ka̱kul mmami na uYawe, Inan oza̱. 45Ka̱kul oza̱ te, mi rəng ka̱ nsar nnap-nlà va̱ ká̱ opo oza̱, ova n fa ká̱ kà̱ mbin aMasar kà̱ ìwú mbín pa̱ ń yà Inan oza̱. Mmami na uYawe.>>
46Oga nɗyáng, nnap nkpakkpak, ká̱ oga nnap mpakpak va ta̱ uYawe pak kà̱ ìshimshe wò ká̱ oIsa̱rila ka̱ apal aɓam aSinayi ka̱ atak áMusa.
Currently Selected:
ALevitikus 26: YER
Highlight
Share
Compare
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation