Genesis 13

1Abram kmoto fu Egipte dan a hari go na a Negebsabana. A ben tyari en frow, nanga ala sani san a ben abi. Lot ben go nanga en tu.

Abram nanga Lot e prati

2Abram ben de wan guduman di ben abi furu meti, solfru nanga gowtu. 3A hari kmoto fu a Negebsabana èn fu a wan presi a ben e hari go na a trawan te leki a ben doro na Betel, pe a ben meki en tenti wan leisi kba, mindri Betel nanga Ai. 4Dan Abram anbegi MASRA tapu a presi pe a ben meki a altari wan leisi kba.

5Lot, di ben go nanga Abram, ben abi skapu, kaw nanga tenti tu. 6Dat' meki den no ben man tan libi makandra fu di nofo gron no ben de gi ala den meti. 7Disi ben e meki taki den skapuman fu Abram nanga den di fu Lot ben e kisi trobi. A pisten dati den Kananitisma nanga den Perisitisma ben e libi ini a kondre tu. 8Ne Abram taigi Lot taki: “Wi no mus meki trobi èn trobi no mus de tu mindri den skapuman fu wi. Bika mi nanga yu na famiri. 9Kon meki wi prati. Luku, a heri kondre didon na yu fesi, yu kan teki pe yu wani. Efu yu e go na kruktusei, mi e go na let'sei. Efu yu e go na let'sei, mi e go na kruktusei.” 10Dan Lot luku lontu. A si taki a heri kontren fu a Yordan ben abi furu watra. Fosi MASRA ben figi Sodom nanga Gomora puru na grontapu, a heri kontren dati te go miti Soar ben de leki a dyari fu MASRA, wan kontren nanga furu watra neleki Egipte. 11So Lot teki a heri kontren fu a Yordan. Den prati èn Lot hari go na a oostsei. 12Abram tan libi na ini Kanaan. Lot go tan na den foto ini a kontren fu a Yordan. A meki en kampu krosbei fu a foto Sodom. 13Ma den sma fu Sodom ben takru srefsrefi èn den ben e libi wan sondu libi na ini a ai fu MASRA.

14Baka di Abram nanga Lot prati, MASRA taigi Abram taki: “Luku lontu fu a presi pe yu tnapu. Luku go na a noordsei, a zuidsei, a oostsei nanga a westsei. 15Bika Mi sa gi yu nanga den bakapikin fu yu a heri kondre disi di yu e si. A sa de fu unu fu têgo. 16Den bakapikin di Mi o gi yu o furu leki santi. Neleki fa yu no man teri santi, na so den bakapikin fu yu no sa de fu teri tu. 17Opo, dan yu waka alasei ini a heri kondre. Mi sa gi yu a kondre disi.” 18Ne Abram gwe go meki en kampu na den bigi bon fu Mamre, krosbei fu Hebron, dan a bow wan altari drape gi MASRA.

Currently Selected:

Genesis 13: SB16

Highlight

Copy