Genesis 31

1Wan leisi Yakob yere den manpikin fu Laban taki: “Yakob teki ala sani san ben de fu wi p'pa. A kon gudu fu den sani fu wi p'pa.” 2Yakob ben kon si tu taki Laban no ben e libi moro nanga en leki fa a ben libi fosi. 3Dan MASRA taigi Yakob taki: “Drai go baka na a kondre pe yu gebore, pe yu famiri de. Mi sa de nanga yu.”

4Dan Yakob seni kari Rachel nanga Lea kon ini a wei pe a ben de na den meti. A taigi den taki: 5“Mi si taki un p'pa no e libi moro nanga mi leki fa a ben e libi fosi. Ma a Gado fu mi afo ben de nanga mi. 6Unsrefi sabi fa mi wroko nanga ala mi krakti gi un p'pa. 7Ma un p'pa bedrigi mi. Tin leisi a kenki a moni kba san a e pai mi. Ma Gado meki taki a gi mi ala san a ben mus pai mi. 8Te a ben taki tak' mi kan teki den penipeniwan leki paiman, dan den meti ben e kisi soso penipeni pikin. Te a ben taki tak' mi mus teki den strepistrepiwan leki paiman, den meti ben e kisi soso strepistrepi pikin. 9Na so Gado puru den meti na yu p'pa dan A gi mi den. 10Wan leisi mi kisi wan dren. A ben de a ten di den meti ben e dyompo den umawan. Ini a dren mi luku dan mi si taki den bokoboko di ben e dyompo den skapu nanga den krabita ben strepistrepi, penipeni noso flakaflaka. 11Dan a Engel fu MASRA kari mi ini a dren taki: ‘Yakob’ Mi piki: ‘Iya, mi e arki.’ 12A taki: ‘Opo yu ede luku, dan yu o si taki ala den bokoboko di e dyompo den skapu nanga den krabita, strepistrepi, penipeni noso flakaflaka, fu di Mi si san Laban e du nanga yu. 13Mi na a Gado fu Betel, pe yu ben kanti oli tapu a ston di yu ben poti tnapu èn pe yu ben meki wan sweri gi Mi. Opo. Du san yu mus du. Libi a kondre disi. Drai go baka na a kondre fu yu famiri.’ ” 14Ne Rachel nanga Lea piki en taki: “Wi no abi noti moro fu kisi fu wi p'pa. 15A seri wi srefi neleki wi na doroseisma gi en, dan en wawan kba a moni di a ben kisi gi wi. 16Ala a gudu di Gado puru na wi p'pa anu na fu wi nanga den pikin fu wi. So du ala sani san Gado taigi yu fu du.”

17Dan Yakob seti ala sani fu gwe. A poti den pikin nanga den frow fu en tapu den kameel, 18dan a meki ala den meti fu en di a ben kisi ini Padan-Aram waka na en fesi. A teki ala en tra gudu tu fu tyari go na en p'pa Isak ini Kanaan. 19Laban ben gwe go koti a wiwiri fu den skapu fu en. Dan Rachel fufuru a popki fu a gado di en p'pa ben e dini. 20Yakob ben bedrigi Laban tu, fu di a no taigi en taki a ben o gwe. 21Dan so a kon lowe gwe nanga ala sani di a ben abi. A koti a Eufratliba abra, dan a hari go na a bergi fu Gilead.

22Baka dri dei Laban kisi fu yere taki Yakob lowe. 23Ne a teki den famiri fu en dan a hari go na baka Yakob seibi dei langa. Na a bergi fu Gilead a kon miti Yakob. 24Ma neti fu en Gado sori ensrefi na Laban, a man fu Aram. A taigi en taki: “Mi e warskow yu fu no taki grofu nanga Yakob.”

25Yakob ben opo en kampu tapu a bergi fu Gilead. Di Laban doro, en nanga den famiri fu en opo den kampu tu tapu a bergi. 26Dan Laban taigi Yakob taki: “San yu du nanga mi? Yu bedrigi mi dan yu teki den umapikin fu mi tyari gwe leki srafu. 27Fu sanede yu lowe gwe kibrifasi? Fu sanede yu kori mi dan yu no taigi mi? Nanga prisiri mi ben o poti yu afupasi. Wi ben o singi gi yu èn meki poku nanga tamboerijn nanga citer. 28Na wan don sani yu du fu no meki mi taki den umapikin nanga den boi fu mi odi nanga wan bosi srefi. 29Mi tranga nofo fu du yu ogri ma a Gado fu yu p'pa taigi mi esde neti taki: ‘Luku bun. No taki grofu nanga Yakob.’ 30Efu yu gwe fu di na angri nomo yu e angri so fu drai go baka na yu famiri, fu sanede yu fufuru den gado fu mi dan?” 31Ne Yakob piki Laban taki: “Mi ben frede taki yu ben o puru den umapikin fu yu nanga tranga baka na mi. 32Efu yu feni den gado fu yu na wan sma, a sma dati no sa tan na libi. Yu kan suku alapresi fesi den famiri fu unu. Efu yu feni wan sani di na fu yu, yu kan teki en tyari gwe.” Ma Yakob no ben sabi taki na Rachel fufuru a sani. 33Laban suku ini a tenti fu Yakob, a suku ini a tenti fu Lea nanga ini a tenti fu den umasrafu, ma a no feni noti. Di a kmoto ini a tenti fu Lea, a go ini di fu Rachel. 34A pisten dati Rachel ben teki a popki fu a gado poti ini wan baskita di den e anga abra a kameel en baka, dan a go sidon na en tapu. Laban suku a heri tenti ma a no feni en. 35Dan Rachel taigi en p'pa taki: “Mi p'pa, yu no mus mandi taki mi no man opo gi yu, ma mi abi mi munsiki.” Laban suku finifini, ma a no feni a gado fu en.

36Ne Yakob ati bron dan a bigin krutu nanga Laban. A taigi Laban taki: “Fu sanede yu de so fayafaya na mi baka? Sortu fowtu mi meki? Sortu sondu mi du? 37Yu suku ini ala den ososani fu mi. San yu feni di na fu yu? Poti en dyaso na fesi den famiri fu mi nanga yu, meki den taki suma fu unu abi leti. 38Tutenti yari mi tan na yu. Den uma skapu nanga den krabita fu yu no lasi no wan bere èn mi no teki no wan bokoboko fu den meti fu yu fu nyan. 39Te wan krasi meti ben kiri wan meti fu yu, mi no ben e tyari en kon gi yu, ma misrefi ben e sorgu taki yu kisi wan trawan baka. Efu na neti noso deiten den ben fufuru wan meti fu yu, yu ben meki mi pai yu baka fu en. 40Na so sani ben de. Deiten son ben e bron mi. Neti kowru ben e steifi mi. Furu leisi mi no ben man tapu wan ai srefi. 41Na tutenti yari mi tan na yu oso. Mi wroko tin-na-fo yari gi den umapikin fu yu nanga siksi yari gi den meti disi fu yu. Tin leisi yu kenki a moni san yu ben e pai mi. 42Efu a Gado fu mi afo Abraham, a Gado di Isak ben e dini nanga dipi lespeki, no ben de nanga mi dan yu ben o seni mi gwe nanga leigi anu. Ma Gado si fa mi pina. A si o tranga mi wroko, dat' meki A taigi yu es'de neti taki yu no abi leti.”

43Dan Laban taigi Yakob taki: “Den frow disi na umapikin fu mi. Den pikin disi na mi pikin èn den meti disi na meti fu mi. Ala sani di yu e si dyaso na fu mi. Fa mi ben o man du mi eigi umapikin nanga mi eigi granpikin wan sani? 44Yu sabi san, kon meki mi nanga yu meki wan ferbontu. A sa de leki wan ketoigi gi mi nanga yu.” 45Ne Yakob teki wan ston dan a poti en tnapu fu memre san ben psa drape. 46A taigi den man fu en fu tyari moro ston kon. So den tyari moro ston kon, den poti den tapu wan ipi, dan den sidon nyan makandra na a ipi ston. 47Laban kari en: Yegar-Sahaduta. Yakob kari en: Gal-Ed#31:47 Ini ala tu tongo a wani taki: A ipi di e meki wi memre. 48Dan Laban taki: “Tide a ipi ston disi sa de a ketoigi gi mi nanga yu.” Dat' meki den kari en: Gal-Ed. 49Laban kari a presi Mispa tu. A taki: “Meki Gado hori ai na wi tapu tu baka te wi go wi eigi pasi. 50Efu yu no libi bun nanga den umapikin fu mi èn efu yu teki moro tra uma boiti den umapikin fu mi, dan yu mus sabi taki awinsi no wan sma si fu kon taigi mi, Gado na wi ketoigi.” 51Laban taigi Yakob moro fara taki: “Luku, a ipi ston disi nanga a ston di mi opo tnapu fu memre san psa dyaso, 52sa de ketoigi. Fu tru, mi no sa psa a ipi ston disi fu kon du yu ogri èn yu no sa psa a ipi ston disi fu kon du mi ogri. 53A Gado fu Abraham nanga a Gado fu Nakor, sa koti krutu fu mi nanga yu.” Ne Yakob sweri na a Gado di en p'pa Isak ben e dini nanga dipi lespeki. 54Yakob kiri wan meti tapu a bergi tu leki wan ofrandi, dan a kari ala den sma fu en fu kon nyan. Den nyan èn den psa a neti tapu a bergi. 55A tra mamanten, frukufruku, Laban bosi den granpikin nanga den umapikin fu en, a blesi den, dan a drai go baka na en oso.

Currently Selected:

Genesis 31: SB16

Highlight

Copy