U̱r-Taku̱n 7
7
Bu̱-mu̱ taku̱ste̱ u-dak
1Se̱ Yawe zu̱ Nuhu, <<Cwa u-hat, bo̱ u̱ bu-u̱ ró ne̱ be̱e̱t, remu̱ zu̱ u̱m hyanu̱g bo̱ wa jab-u̱ so̱-o̱ wa u̱-me̱ ne̱t-tu̱ uno̱ da-o̱. 2Bisa-tu̱ u-he̱n u̱t-be̱e̱t, kab kag ta'er u̱ so̱ ne̱ ta'er du̱gu̱ ko̱du̱he̱ go̱-de̱. Bisa-tu̱ za u-he̱n u̱t-be̱e̱t, kab u-kag u-gan u̱ so̱ ne̱ u-gan du̱gu̱ ko̱du̱he̱ go̱-de̱.#7:2 bisa-tu̱ u-he̱n to̱ o̱o̱ge̱ no̱m-tu̱ na ya-e̱ Yahuda-ne̱ ke̱rru̱ u̱t-tu̱, bisa-tu̱ za u-he̱n to̱ o̱o̱ge̱ tu̱ na hose̱ u̱t-tu̱. 3Go̱-tu̱ no u̱t-be̱e̱t, kab kag ta'er u̱ ro̱b ne̱ ta'er, u̱ remu̱ go̱-u̱t e̱ reet u-shu̱ u̱r-yu̱ ne̱ da-u̱ bu̱-mu̱ re̱-du̱ u-dak arke̱. 4Kwu̱ku̱s m-roog u̱t-ta'er du̱gu̱ da-o̱, u̱m do̱'e̱ kasnu̱ u-yu̱ u̱ re̱-du̱ u-dak u̱t-ho̱ u̱t-shik u̱t-yu̱r [40] m-gye̱p ne̱ u̱t-ho̱ u̱t-shik u̱t-yu̱r [40], har se̱ u̱m haste̱ no̱m-tu̱ u̱r-fat tu̱ u̱m no̱me̱ u-dak u-be̱e̱t.>>
5Se̱ Nuhu no̱m ko̱-uyan u̱ka Yawe zu̱tte̱ wa no̱m.
6U̱ da-u o̱ Nuhu o̱o̱g u̱s-hak u̱t-ko̱k u̱t-shishin [600] da-u̱ bu̱-mu̱ takse̱ u-dak. 7Tu̱msu̱ Nuhu, u̱ ya'ag-u̱ wane̱, u̱ ne̱ta wa ne̱, u̱ ne̱ta-tu̱ ya'ag-u̱ wa ne̱, e̱ to u-hat remu̱ e̱ poste̱ bu̱-mu̱ do̱'e̱ re̱-du̱ u-dak. 8-9U̱ dame̱ ya-ubu Nuhu ne̱, bisa-tu̱ to u-me̱ u-hat: u̱t-bisa u̱t-go̱ u̱t-go̱ tu̱ u-he̱n u̱ tu̱ za u-he̱n ne̱, u̱ go̱-tu̱ no ne̱ u̱ no̱mu̱ ho̱g ne̱ i o̱ u̱t-riig u-dak. E̱ to u-hat u-so̱ u̱ u-gob ne̱ yu̱r yu̱r ka Ru̱-u̱ zu̱tte̱ Nuhu. 10Da-u̱ roog-mu̱ u̱t-ta'er no̱me̱, se̱ bu̱-mu̱ re̱-du̱ u-dak haan mo̱ taku̱s u-dak.
11Da-u̱ Nuhu o̱ u̱s-hak u̱t-ko̱k u̱t-shishin [600], u̱ ho̱-du̱ o̱p u̱t-ta'er [17] u̱ pyaat-yu̱ u-yu̱r, bu̱-mu̱ ta u-dak mo̱ bo̱ko̱n du̱gu̱ me̱ u-dak, na nom yu̱-u̱ u̱t-tu̱ru̱m so̱k du̱gu̱ do̱m u-ru̱. 12Yu̱-u̱ re u-shu̱ u̱r-rob ne̱ m-te u̱t-ho̱ u̱t-shik u̱t-yu̱r [40] u̱ m-gyu̱p ne̱.
13U̱ gandi ho̱-u̱r re̱ de̱ Nuhu to u-hat, u̱r-kot u̱ ya'ag-u̱ wa ne̱ She̱m, Ham, u̱ Jape̱t ne̱, u̱r-kot u̱ ne̱ta wa ne̱ u̱ ne̱ta-tu̱ ya'ag-u̱ wa ne̱ tu̱t. 14U̱n to u-hat u̱ ko̱-uyan go̱-du̱ u̱t-bisa tu̱ u-bu, u̱ ko̱-uyan bisa-tu̱ u̱r-do̱g ne̱ tu̱ o̱ u̱t-riig u-dak kowan u̱ du̱ wa go̱de̱, u̱ ko̱-uyan bisa-tu̱ u̱t-kurup ne̱ u̱r-kot, u̱ no ne̱ u̱t-go̱ u̱t-go̱. 15No̱m u̱r-fat i ko̱-uyan go̱-de̱ e̱ haan u̱du̱ Nuhu u-kag u-so̱ ne̱ e̱ to u-hat. 16Campa u̱ ne̱ta-ne̱ u̱ go̱-tu̱ u̱t-bisa ne̱ u̱t-be̱e̱t e̱ to u-hat u̱ka Ru̱-u̱ zu̱tte̱ Nuhu. Se̱ Yawe tage̱ u-is yu̱ u-hat u̱-dim.
17M-roog u̱t-shik u̱t-yu̱r [40] na o̱ u̱ rob-du̱ u-yu̱ u-dak, bu̱-mu̱ hu̱ swu̱ru̱n, mo̱ hu̱ jak-su̱ u-hat du̱gu̱ u-dak m-da u-ru̱. 18Se̱ bu̱-mu̱ sur m-no̱m u-tát mo̱ no̱m m-ja so̱k du̱gu̱ u-dak, hat-yu̱ hu̱ u̱t-riig u̱-do̱m m-bu̱. 19M-vaste̱ bu̱-mu̱ taku̱s m-ha ro̱r-tu̱ zu̱ge̱ m-ja u̱t-be̱e̱t u-dak. 20Bu̱-mu̱ nom m-ja mo̱ pu̱s ja-mu̱ u̱t-ro̱r m-te u̱s-na u̱r-shik [20], tu̱msu̱ mo̱ taku̱s u̱t-ro̱r u̱t-be̱e̱t. 21No̱m-tu̱ u̱r-fat u̱t-be̱e̱t tu̱ o̱o̱ge̱ u-dak to̱ mu̱ru̱s. E̱ mu̱ru̱mu̱ste̱ be̱e̱t: u̱ no ne̱, u̱ bisa-tu̱ u-bu ne̱, u̱ bisa-tu̱ u̱r-do̱g ne̱, u̱ no̱m-tu̱ u̱r-fat tu̱ re̱k-to̱ u̱ i o̱o̱ge̱ u̱t-riig u-dak, u̱ ne̱t-ne̱ u̱t-be̱e̱t. 22No̱m-tu̱ u̱r-fat u̱t-be̱e̱t, e̱ mu̱rmu̱sse̱, tu̱ nome̱ u̱s-vu̱'e̱ i o̱o̱ge̱ u̱t-riig u̱ dak-u gagu̱n. 23Ru̱-u̱ hast no̱m-tu̱ o̱o̱ge̱ u-dak u̱t-be̱e̱t, ne̱t-ne̱ u̱t-bisa ne̱ u̱ no̱m u̱r-fat ne̱ i o̱ u̱t-riig u-dak u̱ no do̱m u-ru̱ ne̱ be̱e̱t na hast e̱ du̱gu̱ me̱ u-dak. Nuhu wa Ru̱-u̱ yage̱ u̱ i o̱ u̱r-kot u̱ wa ne̱ u-hat.
24Bu̱-mu̱ re̱-du̱ u-dak mo̱ rees u-dak m-te m-roog u-ko̱k u-gan u̱ roog-mu̱ u̱r-shik u̱t-yu̱r u̱ o̱p [150].
Currently Selected:
U̱r-Taku̱n 7: UtMain
Highlight
Share
Copy
Want to have your highlights saved across all your devices? Sign up or sign in
© 2024 Wycliffe Bible Translators in cooperation with
Ut-Ma'in Language and Translation Committee
