Eltibi 1
1
Nsol kpee ejumjum lohngem
1Alum nya a, nya ntiingi etib, mmon a Devid no jolo ntul go Jeruselem, bungu no re:
2<<Nsol kpee ejumjum lohngem!>>Ntiingitib wo bungu.
<<Jol egburu ejum lohngem ejumjum!>>
<<Nsol kpkee Ejumjum lohngem ejumjum lohngem.>>
3Nsehng anyii ane kpo li go eboa ntum kpee,
nyi bo kp'limi go njini nyia?
4Aying kpo ba, fere sehng asongo,
wo ndi tiki li go njinanjini.
5Njul kpo lohng fere lahm,
fere foomo feere go edi ji á kpo lohng.
6Nfeb kpo lim feere go ejang eboblum, fere sennge feere go ejang ebobkal;
kpo sennge ano ano, tiki jo feere toono elsehnge ene.
7Ngba kpee kpo fab song yel go agburu aya,
wo agburu aya nehme tiki rur.
Go edi ji ngba kpo lohng ba, go wo kpo kpe feere tahm.
8Nsol kpee ebkpen nne,
sehnge ana nne bahke ma bung.
Amahr kp'sebe re nyehn wo nsol elyehne lim, jol atung kp'sebe re wuk wo nsol elwuku lim.
9Jio ji ma tohko jol, bahke kpe jol, ji bo ma tohko lim, bo bahke kpe lim;
ejumjum limm ji li ejum nfenfe go njini.
10Ejum ajehng ajehng jia go ji nne bahke ma bung re,<<Nyehnene! A ejum nfenfe ji a?>>
Ebtohko jol a, mahne mahne; tohko jol a ngare enyahre kehm rehnge.
11Nnene kpehme kpe buumu aying nya mahne mahne,
jol aying nya kp'bake ane nehm buumu, ane ba bahke jolo toono ngare nyio, nehm kpe jo buumu aying nyao.
Ngbere ejumjum lohngem
12Me ntiingi etib, n kuumu etul go Jerusalem jo fili Isreel.
13N yehke ntir enyame kak re me n kpili nsol, fere ko ngbere feede nsol kpee nyi ane kpo lim go njini.
A wo li egburu elsol ni Esowo ma rod si nnee!
14Me n seenge nsol kpee nyi ane kpo lim go njini;
nsol nyio kpee ejumjum lohngem, nne kp'kame na toono elfeb.
15Ejum ji ma galle, nne nehm ma tanne;
ji ki li a nehm ma fange kak nti.
16M bungu tong elname re, <<Me m bel ngbere sehnge nne awohng awohng no ma tohko kuumu etul go Jerusalem me n kehm ba kuumu; ngbere a elkahne ma-m nahre gbalee.>>
17Owo n kehm yehke ntir enyame kak re me n kpili bada ngbere, a esahl go elgboolo, wo n tob kpili re, jia fvfo, nne kp'beke na kam elfeb.
18Tibre nne no kpi egburu ngebere kpo jol ndon ndon sehng;
ana elkahne kp'gbale, ano wo egbiingeltim tob li.
Currently Selected:
Eltibi 1: EKA-011
Highlight
Share
Compare
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation