Eltibi 3
3
Ejum ajehng ajehng kpi ngare ny'nye
1Ejum ajehng ajehng kpi ngare ny'nye,
fvfo ejum ajehng ajehng ji kp'limi go njini kpi ngare;
2kpi ngare nyi bo kpo jel nne, fvfo tob kpi ngare nyi nne kpo kpo,
ngare nyi nsol abahme, a ngare nyi elfohko nsol,
3ngare nyi elwulu a ngare nyi enobayam,
ngare nyi etahk afake a ngare nyi elsehke,
4ngare nyi eling alingi a ngare nyi asol awolo,
ngare nyi eljolo ndon ndon a ngare nyi ase abahne,
5ngare nyi atal afare faade a ngare nyi elkpuku atal luk edi ajehng,
ngare nyi a bahke bingi nne a ngare nyi a bahke yaame go elbingi nio,
6ngare nyi ejum asebe a ngare nyi ekpu ayini,
ngare nyi elbumu ejum a ngare nyi elroko ejum jio go,
7ngare nyi nne bahke yare mbomo a ngare nyi á bahke jahme baade,
ngare nyi li re nne belle a ngare nyi li re nne bung,
8ngare nyi li re nne jo kor-a a ngare nyi li re nne jo tehn-a,
ngare nyi ebta a ngare nyi elkoono.
9Nsehng anyii abalimentum kpo bel go ebo eltum ni bo kpo nyehn erem jo lim?
10Me n nyehn elsol ni Esowo ma si nne.
11Esowo eblim ejum ajehng ajehng re nob go ege a ngare. Yebkak elkahne ni elkpin ni njinanjini go eltim ni nne, tvtv o, nnene nehm ma lohko kahn ji Esowo kp'limi kpee go mbomo rehng go ekahlsi.
12Nkp'kahne re ejumjum go limmm ji nobo ka ane, sehnge re bo jo bel eyebatahng fere lim nnoobo ngare nyi bo li go elkpin.
13Re nne jo li fere w'wo fere bel elwohngo go ntum ebo nyi bo kp'nyennge lim, tib jia ayare nya Esowo nya.
14N kp'kahne re ejum ajehng ajehng ji Esowo limi no bahke jolo go njinanjini, jol nne nehm ma budu ejumjum o, afii yehke na. Esowo kpo lim ano eji ane l'jo fahl-e.
15Ejum ajehng ajeng ji li no, ebtohko jol, ji bahke jolo ebtohko jol,
fvfo Esowo bahke limi ji ma tohko lim kpe lim.
16N kpe nyehn ejum ajehng jehko go njini nyia ji li re:
Go edi elam alame, ab'bi li o, go edi ji fuumu re ane jo lim nsol songo songo, ab'bi li o.
17N kehm bungu tong elname re, <<Esowo bahke lame etinginne a ebinne, bo ane abal abal,
tibre ngare bahke jolo ka eltum anehng anehng, ngare nyi bo bahke lame ejum ajehng ajehng ji nne limi no.>>
18N tob bungu tong elname re, <<Ana ane, Esowo kpo wuungu bo, eji bo l'kahn re bo li ana enyam.>>
19Etingitingi, ji li ka nne, tob li ano ka enyam; j'nehm ji kpi bo sik: Ji li re, ana nnyam bahke kpoko, ano wo nne kpo tob kpo. Bo kpee kpi elv elv anehng ni elkpin, nne kpimm na nsehng sehnge nnyam. Go ejum ajehng ajehng, ejumjum lohngem.
20Bo kpee kpo feere tahm edi j'nehm; bo ko ebtohko lim nne a nnyam, ano wo bo bahke feere go ebtohko.
21Nne awoo kp'kahne jo re etohko ji nne kpo mehl tahm go ero, fvfo jo re ji nnyam kpo badde yel go ndi?
22Ano wo n nyehne no re ejumjum go limm ji kp'nobo ka nne, sehnge re a jo geere kak eltum ene tibre jio ji li etuureltum j'je. Tibre, anv, nne awoo bahke feere abo ba tib bo ji bahke jolo ngare nyi bo ma kpo fi?
Currently Selected:
Eltibi 3: EKA-011
Highlight
Share
Compare
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
