Jon 12

Ana bo wohngo Jisos akehng go Betani

(Mat 26:6-13; Mak 14:3-9)

1Eji ma sa nfung erakera, Pasova rehng, Jisos kehm tahme go Betani, edi ji Lasaros lene no, ji á nyahme go elkv. 2Owo bo kehm lame nsol ka-e. Mata wo jo loko bo. Lasaros tꞌtob woomo go ellong ane ba ji ekpꞌkuru nsol alehke a Jisos.

3Meri kehm koko egburu elom akehng ji sahb kꞌkim ekun, ba a ji, ba yaange wohngo Jisos go akpade, kehm fere ko alv esi enye, jo dohk-e akpade.#12:3 Jon 11:2; Luk 10:39 Esꞌsvv akehng mao kehm yeele na yeele ekpꞌkpa jio.

4Judas Iskariot ji woomo go ellong abatꞌtoono Jisos, ye jio ji bahk-e gungu, kehm bungu re, 5“Jen ji wahnge bo ki gungu akehng maa, ko eltahl a mpon ewubu ka akpak?” 6Alum nyaa nya á bungu no, lohngem re á tiiri akpak, lohngo re á tiiri elne. Tibre ye jolo nwajv. Á jolo nne no jo kuuru akpohko, fere jo yehke o, jo kak elne ebo.#12:6 Luk 8:3

7Jisos kehm bungu re, “Yaken nnenkal noo! Á kuuru akehng maa sik elkv ename. 8Akpak li a nahne ngare anyehng anyehng, wo, me n limm a nahne ngare anyehng anyehng.”

Ana bo jo lam kak Lasaros

9Eji ellong Jus tvv wuku no re, Jisos li o, bo kehm jeke. Bo jeem tib Jisos wo wo. Bo je re, bo tob song nyehn Lasaros ji Jisos nyahm-e go elkv.

10Atubesi abalimajom kehm toobo re, bo tob wul Lasaros fvfo. 11Tib go ege esi wo wahnge egom Jus gbalee jo yake bo, fere jo taame tv Jisos.

Ana Jisos yele go Jeusalem

(Mat 21:1-11; Mak 11:1-11; Luk 19:28-40)

12Etoono efung behko ellong ane gbalee ba, ba go elkak kehm wuku re, Jisos kpꞌbake go Jeusalem. 13Owo bo kehm jake amang mbohng, tahm a nya re bo song wan-e. Bo kehm kehme elrabe re,

“Tehken Esowo!

Elfuulu li a nne no kpꞌbake go mbing nyi Jehova.

Elfuulu li a ntul no Israel!”

14Jisos nyehne mmombvankang no nse, kehm kuumu, ana bo nyono go nwer Esowo re,

15“Ka kpe fahl Jeusalem, mmon a Sayon.

Nyehn, ntul ewa kpꞌbake,

á kun go mmombvankang no nse.”

16Abatꞌtoono ebe wakem lennge bo ngare nyio. Eji Jisos ma bel ellub ene, owo bo kehm buumu re, edi nwer Esowo jio ji bo nyono bada Jisos. Eblohko jol ano ka-e.

17Ellong ane ba jolo o ngare nyi á lungu Lasaros go elahm, fere nyahm-e go elkv, bo ba yiimi Jisos ntianse. 18Owo wahnge ellong ane kame no re bo ba kpiri Jisos, tibre bo wuku re, ye wo ma lim nkpokosi nyio.

19Bab Farisi kehm bungu atemtem re, “Ń kpꞌnyehne re, ń nehm ma lim ejumjum. Nyehnen ana njini kpee ma tahm kp-e toono.”#12:19 Jon 9:22; 11:48,53

Ana aneb Grik bandiki jo seb Jisos

20Anebe Grik bandiki woomo go ellong ni ane ba je elkak go Jeusalem re bo song kak Esowo. 21Anebe Grik bao kehm bake goji Filip ji lohng go Betsaida ji Galili,#12:21 Jon 1:43 kehm ba tong-e re, “Nsoo, e kpꞌsebe re wahr nyehn Jisos.”#12:21 Mat 2:2

22Filip kehm tahme song tong Andru. Andru abola Filip, bo kehm tahme ano, song tong Jisos.

23Jisos kehm faange bo re, “Ngare ebrehng nyi Mmon no nne, bo bahk-e egburu ellub ka. 24Etingitingi, n kpꞌbungu tong-n re, Tohko tiki jol re mmohk eti fooro na gbo go ndi kpo, bahke sake ano ano. Lꞌkpo, bahke kabe akab gbalee.#12:24 Rom 14:9 25Nne no elkpin ene lꞌkor-e, á kpꞌtane na elkpin ene. Nne no elkpin ene lꞌsab-e go njini nyia, á kpꞌkuuru na elkpin ene bum go njinanjini.#12:25 Mat 10:39; Luk 17:33 26Nne awohng awohng no lꞌtong re á kp-m loko, á bahk-m tiki toono. Edi ji n li no, owo nlokeltum ewame bahke tob jol. Nne awohng awohng no lꞌlok-m, á bahke jo lub Nsoo.

Ana Jisos jo bung bade elkv ene

27“Anv, eltim ename kp-m gbiingi. M bahke bungu renan a? Lꞌli re me m bung re, ‘Nsoo, tahr-m go ngare nyiaa?’ Eꞌee, jꞌnehm ana ji wahnge m ba no re me m ba nyehn erem ngare nyia.#12:27 Mat 26:38-39 28Nsoo, lim, goji mbing enya lꞌbel ellub!”

Bo kehm soro wuk ellum go ejahbetul Esowo ni bungu re, “Me n lim re, mbing enyame bel ellub, m bahke kpe lim, kpe bel ellub.”

29Ellong ane ba yiimi kohlo o wꞌwuk ellum nio. Egom jindiki kehm bungu re, ndan ebta. Egom jindiki bungu re, enjel nyi ma bung a ne.

30Jisos kehm faange bo re, “Ellum nia a, ba tib go egahne esi, go egame esi sang wahnge.#12:30 Jon 11:42 31Anv wo li ngare nyi njini nyia yim go eti elam. Ngare nyia nyi ntubesi no njini nyia, bo bahk-e kame yake go.#12:31 Luk 10:18; Jon 14:30; 16:11 32Ngare nyi bo ma-m kum go ejangnti, rod jahm,#12:32 Jon 3:14 owo m bahke leebe ane kpee tv elname.”#12:32 Jon 10:16 33Jisos bungu ellum nia, goji á lꞌtib ane elkohn elkv ni á bahke kpoko.

34Ellong ane bao kehm-e faange re, “Wahr ebwuk go atahm nya Esowo re, Mesaya bahke jolo go njinanjini. Jen ji wahnge a kehm bungu re, Mmon no nne, bo bahk-e kumu go ejangnti, rod jahm? Nne awo li Mmon no nne?”

35Jisos kehm faange bo re, “Ellennge nia, li a nahne mmongare ntiil. Jo jenen, eji ellennge kpeke li, goji ejannge lꞌki-n kpiri. Nne no kpꞌjene go ejannge, á kpehme kahn edi ji á fi fi. 36Eji ellennge nia, kpeke li a nahne, taamen tv ellennge nia, eji ń lꞌjol abon ba ellennge.”#12:36 Ef 5:9

Jisos bungu kan a mal, á kehm tahme song seb edi biiri, eji bo lꞌki-e nyehn.

Ana Jisos jo bung bade ekꞌtaame ji Jus

37Jus tikem taame tv Jisos, jol eji á jo lꞌlim akpokosi gbalee, tib bo.

38Jia jolo, tib goji ellum ni nnyehnamahr Aisaya bungu no lꞌlohko jol go etingitingi, ni á bungu re,

“Ntul, nne awo ma taame tv etib ebahre?

Nne awo no Jehova m-e tib nsahm enye?”#12:38 Rom 10:16

39Tib go esi alum nyao, bo tikem ma taame. Tibre Aisaya kpe bung re,

40“Esowo ebwa bo amahr,

fere lim asi ebo tahne.

Ki li ano, kehn bo kpꞌnyehne go bo amahr,

fere kahn go bo a ntim, fere sennge,

feere go egame, eji n lꞌlim bo,

bo nob.”#12:40 Mat 13:14-15

41Aisaya bungu alum nyaa, tibre á nyehne ellub ni Mesaya, fere bung bada ne.

42Tvtv o, atubesi Jus gbalee tꞌtaame tv Jisos. Tib eji bo jo fahl Bab Farisi, bo joom bung gbul gbul gbuul, eji bo lꞌkꞌkam bo yehke go ero.#12:42 Jon 9:22 43Tibre ellub ni bo kpo ko goji atem, ni ni jo ga kor bo, sehnge ellub ni Esowo.#12:43 Jon 5:44

Alum nya Jisos jo bung jolo alum nya elam

44Jisos kehm kehme elbungu wahre wahre re, “Nne no lꞌtaame tv-m, á taamem tv me me, á tob taame tv nne no tum-m no. 45Nne no lꞌnyehn-m, yebnyehn nne no tum-m no.#12:45 Jon 14:9 46M ba go njini nyia ba jol ellennge, eji nne awohng awohng no lꞌtaame tv-m, á lꞌkꞌkpe sa go ejannge. 47Nne awohng awohng no lꞌwuk alum enyame, kꞌfere bum alum nyao, we n nehm lam. Tibre m baam re me m ba lam njini nyia. M ba na re me m ba tahre njini nyia.#12:47 Luk 9:56

48“Nne no lꞌten-m, kꞌko alum enyame, ye wo elam nong kp-e siki. Alum nya m ma bung a, nyanehm nya bahk-e lame go esꞌkohro efung. 49Tibre alum nya m bungu no, nyanyame sang. Nsoo no tum-m no, ye wo tong-m ji m bahke bungu, fere tib. 50N kpꞌkahne re, alum enye kpo ka elkpin ni li go njinanjini.#12:50 1 Pit 1:23 Owo wahng ka n kpo bung ana Nsoo tong-m no re me m bung.”

Currently Selected:

Jon 12: EKA-011

Highlight

Copy