Jon 20

Ana elahm sa ekpakekpake

(Mat 28:1-8; Mak 16:1-8; Luk 24:1-12)

1Ngbokambang efung go erahde, Meri ji lohng go Magdala kehm fungu go elahm efungfu atv atv, kehm song nyehn eltal ni bo bannge bulu go nnyo elahm ma bannge noongo go nkpe. 2Á kehm beke tahm goji Saimon Pita, a ntꞌtoono Jisos noko go fvfo, no jo sahb kꞌkor Jisos,#20:2 Jon 13:23 kehm song tong bo re, “Bobyehke Ntul ewahre go elahm fi a ne. E nehme kahn edi ji bo m-e song bum.”

3Pita, a ntꞌtoono noko, bo kehm mehle tahm gona elahm. 4Bo ane abal abal jo be abahl. Ntꞌtoono noko be sehnge Pita, gbo mbang song rehng go elahm. 5Á kehm song kehme, jo fahng go elahm, kehm nyehne abarebare abomo nyao nong no go atahng. Á yelem go atahng. 6Saimon Pita ji jo tob toon-e, kehm bake, ba sehng na sehng, yel go elahm, kehm nyehne abarebare abomo nyao nong no, 7fere nyehn mbomo mi bo kpennge Jisos go esi. Noongem edi ajehng a abarebare abomo nyako. Mbomo mio mi bo kpennge Jisos go esi noongo elfehd.

8Owo ntꞌtoono noko no gbo mbang rehng go elahm, kehm tob yel song nyehn, fere taame. 9Tibre wuku wuku bo tikem kahn edi nwer Esowo ji bungu re, á bahke nyahme go elkv.#20:9 1 Kor 15:4; Elt 2:22-36; 13:35-37

10Abatꞌtoono Jisos bao kehm feere kehnge.

Ana Jisos song kpiri Meri ji lohng go Magdala

(Mat 28:9-10; Mak 16:9-11)

11Meri yiimi eje kohlo elahm, jo ling. Eji á jo ling, á kehm kehme, jo fahng go elahm. 12Á kehm nyehne enjel na ebal nyi kake abarebare nsol jehk no go edi jio ji bo kake ekv ji Jisos, noko ji edi ji esi Jisos noongo no, noko ji edi ji akpade nya Jisos noongo no.

13Enjel nyio kehm-e bahbe re, “Nnenkal, jen ji wahnge a kpꞌlingi?”

Á kehm faange bo re, “Tibre bobyehke Ntul ewame fi a ne. N nehme kahn edi ji bo bum-e no.” 14Á bungu kan ana mal, á kehm soro keebe, nyehn Jisos yim no. Á kahnem re, Jisos wo.

15Jisos kehm-e bahbe re, “Nnenkal, jen ji wahnge a kpꞌlingi? Nne awo a kp-e sebe?”

Meri jo tiri re, nne no kpo lim eltum etahngga jio wo. Owo á kehm-e tongo re, “Nsoo, joare wo wo rod-e, tib-m edi ji a bum-e no, eji n lꞌsong rod-e tahm a ne.”

16Jisos kehm-e lungu re, “Meri!”

Meri kehm keebe, kehm bungu go ellum Hibru re, “Rabbuni,” ji lohngo re ntꞌtibi.

17Jisos kehm-e tongo re, “Ka ma lak abo, eji n kala tahm go ero goji Nsoo. Song goji abonanee,#20:17 Hib 2:11-12 wo song tong bo re, n kpꞌtahme go ero goji Nsoo, no tob li Nso ejahne. N fi goji Esowo ebame, bi tob li Esowo ebahne.”

18Meri ji lohng go Magdala kehm tahme song kpiri abatꞌtoono Jisos, kehm tongo bo re, “Me n nyehn Ntul,” fere tong bo ana Jisos bungu no tong-e.

Ana Jisos song kpiri abatꞌtoono ebe

(Mat 28:16-20; Mak 16:14-18; Luk 24:36-49)

19Efung bꞌnehm ona bi jolo ngbokambang efung go erahde, elgung nio ona, abatꞌtoono Jisos woomo ekpꞌkpa ajehng, gbaange abutahk kpee tv elbo, tibre bo jo fahle Jus.

Jisos kehm bake, ba yiimi go bo ellong, kehm kake bo nnyo re, “Belen elkoono!” 20Á bungu kan ano mal me, á kehm tibi bo abo enye, a ngbaange.#20:20 1 Jon 1:1

Abatꞌtoono ebe bele eyebatahng sehng, eji bo nyehne Ntul abo.

21Jisos kehm kpe kak bo nnyo re, “Belen elkoono! Ana Nsoo tum-m no, ano wo fvfo n kp-n tob tum.”#20:21 Jon 17:8

22Á bungu kan ano mal me, á kehm soro fahle elfeb wohngo bo, kehm bungu tong bo re, “Taaren Etingi Etohko! 23Ń lꞌtahm ka nne go ege abiafem, yeblohko bel eltahmeka. Ń tohko tahm ka nne go ege abiafem, á bahke sake ano go ege abiafem.”#20:23 Mat 16:19; 18:18

Jisos abola Tomos

24Tomos ji woomo go ellong abatꞌtoono Jisos, ewubu ane abal, ji bo jo lung-e re Ayafele, á jolem a bo ona ngare nyi Jisos ba no.#20:24 Jon 11:16; 14:5

25Owo abatꞌtoono Jisos bako kehm-e tongo re, “Wahr ebnyehn Ntul.”

Á kehm faange bo re, “Tohko tiki jol re, n nyehne anv nya abang aba go ege abo, nya bo kum-e no, fere kooro ebnyohkobo go anv nyao, fere lak ebo ebame go ege a ngbaange, n nehm tiki taame.”

26Eji ma kang nfung enehkeni, abatꞌtoono Jisos kpe je edi jio. Tomos jolo a bo o fvfo. Bo ta abutahk kpee.

Jisos kehm kpe ba lohng go bo ellong, kpe kak bo nnyo re, “Belen elkoono!” 27Á kehm tongo Tomos re, “Koor-m ebnyohkobo a, wo fere nyehn abo enyame. Tanne ebo eba, wo lak-m go ngbaange. Ka kpe faabe, taame na taame!”

28Tomos kehm-e faange re, “Wo wo li Ntul ewame, a Esowo ebame!”

29Jisos kehm-e bahbe re, “Wobtaame tib eji a ma-m nyehna? Elfuulu li ka ane ba ki nyehn go amahr, bo taame na taame.”#20:29 1 Pit 1:8; 2 Kor 4:18; 5:7

Ejum ji wahnge bo nyono nwer nyia

30Jisos limi akpokosi gbalee go esamahr abatꞌtoono ebe, nya ki wob nwer nyia. 31Nyaa bo nyono, goji ń lꞌtaame re, Jisos wo li Kraist ji Mmon no Esowo. Ń lꞌtaame, ḿ bahke bele elkpin go ege a mbing.#20:31 1 Jon 5:13

Currently Selected:

Jon 20: EKA-011

Highlight

Copy