Nuk 22
22
Judas atama nɛgoro Jisɛs
1Ɛsika ɛyighi ji ɛnɛghɛa brɛd yi arɛ kak yist ɛrɛ kpere, ka ji ɛrɛ bɨgha ka ɛyighi Nɛfɔrɔ, 2atona ba ɛjɔɔ Ɛsɔwɔ ka ba ɛkpɨna ɛjighi Mosis ára sɛb mbaa si ayon Jisɛs ka mbaa yi anɛ arɛghɛgbɛre, atubsi ára bɛ ámar anɛ. 3Ka Nton-ajɛ anam ɛsɔgba Jisɛs ɛwii ka ɛbɨŋɔ anɛ wobo ka abaa yɔ ane si Judas, yɔ atɨma abiŋɛ si Iskariɔt 4Yɛ amu ama kɔɔŋɔ atona ba ɛjɔɔ Ɛsɔwɔ ka ba ɛbaba njoa njɔm Ɛsɔwɔ ɛsika atama yɛ agoro Jisɛs. 5Abɔɔ atama ka ɛyɛbɛ netem si akɛɛ kɛ akpugha. 6Judas atima atama si yɛ asɛbɛ ɛtiŋi nden yi anɛ arɨghɛ gba akighɛ ɛsika yɛ atɔ abɔɔ abɔbɛ.
Nkɨnanjam ɛjonɛnɛghɛ ka asɔgba ayɛ
7Ɛfo nɛnɛghɛ brɛd yi arɛ jɔna toó, bi ayono njɔɔa ɛyighi nɛfɔrɔ ɛmɛsi. 8Jisɛs atom Pita ka Jɔn si, “Ba sɔŋ toŋo mfom bi ɛneghɛ ɛyighi Nɛfɔrɔ.”
9“Ɔsɛbɛ si ɛtoŋo ka faŋ?” Abɔɔ abɔmɛ.
10Jisɛs akpɛ abɔɔ si, “Ɛkpina nam ka ɛjibɛ, ɛyɛɛ mannom ɛwi yɔ asɔnɔ anab, ba tɔŋɛ sɔŋ ka njo yi ánɨmɛ, 11ka ɛtɔ mfɔna njo si, ‘Nkpikpɨne asi war ɛbɔma: Ɛkpɔ ajɛnanɛ maa, ji njɔnɔ nnɛ ɛyighi Nɛfɔrɔ ka ɛkan ɛjɨŋa?’ 12Átɨŋɔ war nkpaŋa ɛkpɔ ka bɛsɔ ji ɛkpe kpakpa nsɔn yi ɛsɛbɛ. Ba toŋo nsɔn fa.”
13Abɔɔ atam amu ama yɛɛ mfom ɛsika Jisɛs atɔ abɔɔ. Átoŋo nsɔn ɛyighi Nɛfɔrɔ fa.
14Ɛsika nden ama si, Jisɛs ka asɔgba abɛ ama jɔn si anɛ ɛjonɛnɛghɛ. 15Ka Jisɛs atɔ abɔɔ si, “Nda mbri si nnɛ ɛyighi Nɛfɔrɔ ji ka nɨrɛ ka njam nɛyiri. 16Ka ntɔ war si, mkpɨmɛ nɛ ɛyighɨ nji tɛtɛ ɛjɔn ka nkater ɛton Ɛsɔwɔ ɛtɔŋɔ.”
17Jisɛs atab mkpogho yi akɨgha amɔm akabante, akak Ɛsɔwɔ sam ka atɔ asɔgba abɛ si “Ba kɔ ɛbaŋa ɛkɛ ɛnɨrɛ. 18Si ntɔ war si mkpɨmɛ wɔ amɔm ya aru ka ɛgbɛ akaba nte nnya tɛtɛ ɛton Ɛsɔwɔ ɛba.”
19Ka áton brɛd, ákak Ɛsɔwɔ sam, ákɨbɛ brɛd nyi, ka akɛ abɔɔ ka arɨgha si, “Bɛji ɛbɨŋa bi nna bi nkɛ ka ɛsi jɨrɛ; ba ra nem na kasɔŋ ɛrɛ gbɔm nter.”
20Nden yi akinɛ ka ɛjonɛnɛghɛ, afɨna ton mkpogho nyi, ka arag si, “Nkpogho nnyi atɨŋɔ nɛwɛmɛ ni mfɛ ni anɔŋ ayɨŋa awuru akɛ war. 21Ka ɛbɔ nnɛ yɔ ágorom ɛre mfa ka ɛbɨŋa ka ɛte ɛjonɛnɛghɛ. 22Mɔanɛ yɔ Ɛsɔwɔ akɨno amughu ɛsika ɛsɔwɔ agara. Ka ɛbibib ɛkɛ nnɛ nyɔ ya agorɛ!” 23Asɔgba ayɛ ajam nɛbɔmɔ atɛm, atere nnɛ ka ɛbɔŋɔ abɔɔ yɔ ane ɛjom ji.
24Mfab atɨma agbɔ abɔɔ atub nnɛ yɔ áre ka ɛsi ka ɛbɨŋɔ abɔɔ. 25Jisɛs atɔ abɔɔ si, “Aton anɛ ba arɛ gbɛrɛ Ɛsɔwɔ ára komo abɔɔ ka ɛsi anem abɔɔ nɛyiri; asaa abiŋ nabɔɔ si árɛ ba ɛnagha anɛ. 26Ka war, ba krɛ jɔn na. Ba nɨŋɔ nnɛ yɔ ágaa yar ka ɛbɨŋɔ ɛja ajɔn na ka mɔnsɛ, ka nnɛ yɔ afɨne anɛ atɨma jɔn na ka ndɔghanɛtom. 27Maŋ yɛnnɛ áre ka ɛsi, nnɛ yɔ ára nanam ama kɨnoɛ kasɛ nnɛ yɔ anaa ama kɨnoɛ? Nnɛ yɔ ára naa ama kɨnɛ kɨno saŋ? Ka mmɛ nde ka ɛbɔŋɔ ɛjɨrɛ nna ka ndɔghanɛtom. 28War ba ɛre anɛ ba ami yimi ka nɨŋa ka ndena nɛgara ɛnɨŋa. 29Ka mmi war kɛɛ nɛyɔ ɛton nna ka Nsɔjiŋa akɛm, 30kasɔŋ war ɛnɛ ɛfɨna ɛwɔ ka nɨŋa mmina jɔn ka ɛton ɛbɨŋa. Ka war ɛjɔnɔ ka ɛton ɛkpe nnam ɛkɛ bɛjibɛ Isrɛn wobo ka biba.
31“Samɔn, Samɔn, Nton-ajɛ si akiɛ nɛyɔ yɛ ajak war na ka ajɨgha arasi ayighi afifɛ. 32Ka mmia kak ka njɔm si ɛkɨnoamar ɛja ji ɔrakɛm ɛrɛ sɨnɛ. Ka nden yi ɔmina fɛnɛ ɔyimi nnɔbɔnɔbɔ ka nɨŋa, ra kak abɔanaja ɛkoro bɛji.”
33Ka Saimɔn Pita akpɛɛ si, “Ntaa, mmitoŋo bɛji si ntɔŋa mmu mgbakɔbɔ ɛruna nɛkpɔghɔ ka na mkpɔ.”
34Jisɛs akpɛɛ si, “Pita ntɔa si jam ka nɛmaŋ si ka nden yi nkɔk ákogho ɛnɛ, ɔtɛnɛm mkpɛnɛ ɛsaa si mɔnyim.”
35Ka Jisɛs abɔmɔ abɔɔ si “Nden yi ntó war si ɛmɛ rag ntɔrɔ Ɛsɔwɔ abɔabɔ, ɛrɛ fɨne ɛbam si akpɨghata, ɛrɨnɛran ɛjom jiku?”
“Jiku,” abɔɔ akpɛɛ.
36Yɛ atɔ abɔɔ si “Ka nɛmaŋ, ɔkpe na akpugha sɔŋ ka aya, sɔŋ ka ɛbam; ka ɔrɛna bɛn akparija, goro ɛnebe ɛba wɔ ɔgó ayi. 37Áyɛnɛ ka nwɛr Ɛsowɔ si: ‘Ka afanɛ akak ka ɛbɔŋɔ ane ba abibi afɛm;’ ka ntɔ war si ji ayɛnɛ ɛtubum ɛkpi bɨgha nɛwɛmɛ.”
38Asɔgba ayɛ atɔɛ, “Ntaa yigha, akparija abaa areŋga.”
“Ɛmi beŋɛ,” yɛ akpɛ abɔɔ.
Jisɛs akak njɔm ka ɛgon Onif
39Jisɛs aru ɛsika ama nɛ ne amu ka ɛgon Onif, ka ɛkan ɛjɛ atɔŋɛ. 40Ɛsika asi ga, atɔ abɔɔ si “Ba kak njɔm si ɛrɛ gbɔ ka nɛgara.” 41Jisɛs ajɛrɛ asig abɔɔ amu na ka nnɛ atubu nɛtan, akɨmɛ bɛrɔŋ akak njɔm si, 42“Nsɔjiŋa, ɛkɔra na kɔr, yighim nɛyiri nni, ka ɛrɛ jɔn ka ɛkɔrɔm, nɔŋɔ ɛjɔn ka ɛkɔra.” 43Nsɔn ateb Ɛsɔwɔ aru ka nɛbo ama kɛɛ ɛkoro bɛji. 44Ɛjɔn ga si ajɔnɔ ka ntakpa nɛyiri, akɨgha nkora njɔm ka ɛtiŋitiŋi ɛmɛ jɔn yi nɛyobo ɛnɛ ɛrɛ tɔŋɔ nse nna ka anɔŋ.
45Nden yi Jisɛs atɨmɛ ka njɔm afɛnɛ ka mfom bi ɛkan ɛjɛ ajɔnɔ, ára yɛɛ abɔɔ ka anana ɛsika bɛji ɛmi abɔɔ rɛɛ ka ɛkpɔghɔsi ji abɛnɛ. 46“Ɛgbɔnaŋ ka ɛrɛ nana?” Yɛ abɔmɔ abɔɔ. “Ba tam ba kak njɔm kasɔŋ ɛrɛ gbɔ nɛgara ɛmina ba.”
Abɔb Jisɛs
47Ɛsika Jisɛs akpɨgha rɨgha ka asɔgba abɛ, anɛ aru ka ɛbɔŋɔ ama yimi. Nnɛ yɔ agbɔɔ abɔɔ mbaa ajɔnɔ Judas yɔ are ka ɛbɔŋɔ asɔgba wobo ka abaa ya Jisɛs. Ajɛrɛ akpere Jisɛs si ama sɔrɛ ka ɛkpɔghɔ ka ndeŋe yi akɔghɔ agorɛ, 48ka Jisɛs abɔmɛ si, “Judas, ɔkpi goro Mmɔanɛ yɔ Ɛsɔwɔ akɨno ka ɛsɔrɔ akpɔghɔ?”
49Ɛsika ɛkana Jisɛs ayɛ ji ɛkpi wɛmɛ, abɔmɛ si “Ntaa, ɛkɔ akparija ayɨrɛ ɛbɔm abɔɔ?” 50Ka nsɔgba ɛwi abɔm mmɔa njoa atona ba ɛjɔɔ Ɛsɔwɔ ɛwi akɨbɛ ɛtɔŋ bi nom.
51Ka Jisɛs atɔ abɔɔ si “Ba krɛ kpɛ nem na!” Ka akɔmɔ mannom nyɔ ka ɛtɔŋ ɛfɨnɛ ɛnɔb. 52Jisɛs akpeghe abɔmɔ atona ba ɛjɔɔ Ɛsɔwɔ, ka ba ɛba ba njoa Ɛsɔwɔ ka abakogho ba abá si ama bɔbɛ si, “Mmɛ nde ne abibia nsɔn ka ɛbigha ka akparija ka akpɨno? 53Njɔnɔ ka nɨrɛ ka kpakpa afo ka bɛkpɔ njoa Ɛsɔwɔ ka ma rɛkɔmɔm ɛbɔ. Ka nden ɛyirɛ yi na yi nnɛjiŋ ara bɛnɛ nɛyɔ ka ɛjiŋi.”
Pita atɛn nɛgbɛrɛ Jisɛs
54Ka ba ɛba ba njoa Ɛsɔwɔ abɔb Jisɛs akɔɛ amu ka njoa ntona atona ba ɛjɔɔ Ɛsɔwɔ. Pita ajɛnɛ dɨghadɨgha atɔŋɔ abɔɔ. 55Ka nden yi bantiŋi ami kɔnɔ ngon ka neka ɛtik ajɔn ji, Pita atima jɔn ka abɔɔ. 56Ɛsika ngon ɛyɨgha na, mɔanjo ɛwi yɔ nka ayɛ Pita ka ajik ka nkɔa ngon. Abriɛ nnɔbɔnɔbɔ ka arag si, “Nnɛ nnyɔ ajɔnɔ ka nɛ.” 57Ka yɛ atɛn. “Maŋka, yɛ nyim,” yɛ arag.
58Ka nden kɛɛm, nnɛ yɔntiŋi afɨna yiɛ ka árag si, “Wɔ ɔyɔb ka ɛbɔŋɔ asɔgba Jisɛs.”
Pita atɛn si, “Mɔanom, mmɛ saŋ!” 59Ɛkpɛ njɔn ma nden, nnɛ yɔntiŋi arag ka ɛkoro koro si “Ka ɛdidɨghɛ, mɔanom nyɔ ajɔnɔ ka nɛ, atubsi áru Ganini.” 60Pita akpɛɛ si, “Mɔanom, mmɛ nyim jiku atub ji ɔrɔ rɨgha!” Ɛsika arɨgha na, nkɔk akok. 61Ntaa amaŋa abriɛ ka ámar. Ka Pita agbɔnter ji Ntaa atɔɛ: “Sɔŋ nkɔk akok ɛnɛ, ɔtɛnɛm mkpɛnɛ ɛsaa.” 62Ka Pita aru ka nina ama bere atubsi ɛmaŋɛ ɛsiŋisiŋ.
Ba ɛbaba mfom ayɔn Jisɛs
63Anɛ ba ára baba Jisɛs ajimɛ nɛyɔghɔ ka amɨbɛ. 64Abɔbɛ mbɔɔ ka amar ka abɔmɛ, “Ɔnyinanyi, tɔ war si ɔrɔyɛ nɛbri amar! Yɛnnɛ amɔba?” 65Ka anyiɛ ka abembem abibia nsɔn ya akpaa anighɛ.
Akɔ Jisɛs amu ka aton ɛjibɛ
66Ka ɛfrusu, abakogho ɛjibɛ, atona ba ɛjɔɔ Ɛsɔwɔ ka ba Ɛkpina ajighia Jus akɔn, ka akɔ Jisɛs ama kɛɛ abɔɔ. 67“Arena wɔ yɔ ɔre Kɨras,” Abɔɔ abɔmɛ, “Tɔ war.”
Jisɛs akpɛ abɔɔ, “Ntɔ na war ɛtamam, 68ka mbɔmɔ na war mbɔmɔ mɛkpɛm. 69Ka jam ka nɛmaŋ, Mmɔanɛ yɔ Ɛsɔwɔ akɨno ára jɔn ka ɛbonom Ɛsɔwɔ bi gaga.”
70Abɔɔ kpakpa abɔmɛ, “Ɛru si wɔ ɔre Mmɔ Ɛsɔwɔ?”
Yɛ akpɛɛ abɔɔ si, “Ɛmi rak si ndere.”
71Ka abɔɔ arag, “Nnaŋ ka ɛkpɛsɛb anɛ ba atɔ war atubɛ? War abafɔnɔ ɛmi yɔk ka nnyɔ ɛbɛ.”
Currently Selected:
Nuk 22: NDD-011
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
