Luka 12

Yesu ánanya ebutebanyi

(Mat 10:26-27)

1Mwe'chi chihangi, byumbi binene bya bandu bera kuchilunda aola, kuikira echihangi bera kutangirisa bákandangana. Yesu era kutangirisa áhambala tanga ne'banafunzi* bai mbu: «Mundaa mwáchilanga kwa chachu* che'Bafarisayo*, kukuteta mbu emyasi yabo ye'butebanyi. 2Kutáli cha chìbishirwe cha chitákabihukale. Kanji kutáli cha bubisho-bisho cha chitákamenyeke. 3Choshi cha mwáhambalaa mwa musimya, chikômvikala esuba limenzi. Na cha mwátetaa mwa byooo mwa chumba cho'mwa ndanda, chikátechibwa na murenge munene kwa ngangamo se'nyumba.»

Ola wěmire kwôbaibwa

(Mat 10:28-31)

4Yesu era kuendekera áteta mbu: «Nábabura mu mùli bera banyi: Muténdaa mwôbaa ba bàngeta emubiri, si era nyuma se'kwîta bàtangaala kuira chinji. 5Náhonda kubalosa ola mwěmire kunde mwôbaa: Mundaa mwôbaa Ongo i'unganyáa ekalamo ke'mundu, ne'ra nyuma se'kunyaa'ko, éte ebuashi bwe'kúuma emundu ekusimu. Kubinali, nábabura kwa oyola i'mundaa mwôbaa.

6«Bitera-mbuwa bitano, byénjire byáfa bikoroto bibiri bya buteya pwere. Si chiro bacha, kutali chiro na chiuma mubi, cha chénde chébirirwa era muhondo sa Ongo. 7Anabe ne'mviri so'kwa mitwe yenyu, Ongo anêshi emuanjo wasi soshi. Bushi no'ku, muténdaa mwôbaa, bushi mwabo mu mwète mufa munene kurenza bitera-mbuwa binene.»

Ekumenyeka na Yesu

(Mat 10:32-33; 12:32; 10:19-20)

8Yesu era kuhuba kuteta mbu: «Nábabura kwa chira mundu woshi ola wányemerera era muhondo se'bandu, nanyi nyi Mwana we'Mundu nyikámwemerera era muhondo se'bamalaika* ba Ongo. 9Si chira mundu woshi ola ùnganyinana era muhondo se'bandu, nai akánanyibwa era muhondo se'bamalaika* ba Ongo. 10Na chira mundu woshi ola ukáteta kubi era luulu sanyi nyi Mwana we'Mundu, akábabalirwa. Si ola ukákamba eMuchima Mubuya-buya, yeke atákababalirwe chiro na hicha.

11«Mango bangénde bábeka chasiya mutóngane mwa mashenge me'Bayuta*, nesi era muhondo se'baishi be'manja, nesi era muhondo se'bakulu-kulu, muténdaa mwáchǎnya mbu kute mungátongana, nesi chi mungáteta. 12Bushi mwe'chi chihangi chine'chi, eMuchima Mubuya-buya angábakangirisa cha mwěmire kuteta.»

Emuanyi we'mbuta ye'muare

13Mundu muuma mwa luamba, era kubura Yesu mbu: «Mukangirisi, unyíbwiriraa munyaketu mbu ànyiabiraa ewanyi mwango kwa mwandu ola tata áturekeraa.» 14Yesu era kumwǎkula mbu: «E mwira wanyi! Nde iwànyiírire kuba muishi wa manja mwa kachi-kachi kenyu, nesi mundu wa kubaábira ebikulo byenyu?» 15Chasinda, Yesu era kwire ábura ebandu boshi mbu: «Muményaa! Mundaa mwáchilanga kwa buhuma-huma bwe'bikulo. Bushi ekalamo ke'mundu kàtatenganyire ne'bwingi bwe'bikulo byéte, chiro mbu àngaba muare busese.»

16Chasinjire, Yesu era kubaishira ono muanyi mbu: «Kwábaa muare muuma ola mahwa mai mêsaa myaka inene. 17Era kutangirisa áanyisa ne'kuchibusa mbu: ‹Rero kute nyingáira? Ene myaka yanyi yoshi, si ndàchete ala nyingábíka'i!› 18Era kwire áteta mbu: ‹Bacha ku nyingáira: Nyingângula enguli sanyi ne'kwânga esinji sa sìri sinenene. Na mwe'si nguli, mu nyingére nábika emyaka yanyi yoshi ne'binji bikulo byanyi. 19Chasinda, nyingére náchibura mbu: "Nyono, nera nyichibikirire bikulo binene bya bikámala myaka inene. Rero, nera nyingatámuka, nyírye, nyímwe, nyinámowe!"›

20«Si Ongo era kumubura mbu: ‹Wôyo ùli mbuta! Mwo'buno butufu bwa lwarero wáfa. Rero ebi bindu byoshi wáchibikirire mira, bingére byába byande?›»

21Yesu era kuteta kanji mbu: «Ebyera bi byénde byáikira emundu ola wénde wáhonda kuchilunjira buare bunene, si àtahonda kuba muare era muhondo sa Ongo.»

Ekulangalira Ongo

(Mat 6:25-34)

22Chasinda, Yesu era kubura ebanafunzi* bai mbu: «Echera chi chàtumaa nábabura mbu muténdaa mwáchǎnya bushi ne'kalamo kenyu mbu chi mungálya. Nesi mwáchǎnya bushi ne'mibiri yenyu mbu chi mungémbala. 23Kubinali, ekalamo kenyu ku kète mufa busese kurenza ebiryo. Ne'mubiri wenyu iwète mufa busese kurenza enjimba. 24Mulóreraa kwa bikona: Bìtainga, bìtanashebula, bìtatusa na chisiki cha bìngabika mwe'kalyo, nesi nguli. Si Ongo énde ánalisa'bi. Rero, mwabo mu mwète mufa munene kurenza emilonge! 25Nde mu mwabo, kurengera ekuchanya kwai, ola ùngaala kuchibikira chiro na saa nguma kwa kalamo kai? 26Akaba mùtangala kuira ehye'kandu hieke hya hìri nge'hi, rero chi chìngatuma mwáchǎnya era luulu se'binji bindu?

27«Mulólaa kwa bwaso bwénde bwáhowa. Bùtakola, bùtachilanjira na njimba, si nábabura kwa anabe na mwami Solomono, mwa buare bwai boshi, atémbalaa luchimba lwa lùkomire nga chiro na lwaso luuma. 28Ebichi byo'mwe'hwa byénde byálorekana'ko lwarero na mishangya byánaumwa mwa muliro. Si chiro bacha, Ongo énde émbasa'bi njimba sa sikomire. Rero kute atáběmbase kubuya busese, mu bandu be'bwemeresi bueke? 29Muténdaa mwáchiribusa mwa kuhonda cha mungálya nesi cha mungámwa. 30Bushi ebandu bo'muno butala, ba bàtatúla bèshi Ongo, bu bénde báhonda ebi bindu byoshi busira kutama. Si mwabo Eho wenyu anêshi kwa mùlaire kwe'bi bindu. 31Rero mwabo, mundaa mwáhonda tanga eBwami bwa Ongo*, nai àngaberesa ebi binji bindu.

32«Muténdaa mwôbaa mu mùli chikembe chieke! Bushi Eho wenyu ásimaa kuberesa eBwami bwai.»

Ekuchibikira ebuare kwa nguba

(Mat 6:19-21)

33Yesu era kuhuba kuteta mbu: «Muúsaa bya mwéte, ne'buteya bingáfa mwánêrsa'bo ebakene. Mùchiíriraa ehao sa sitákakunguwe. Kanji kwa nguba, ku mundaa mwáchibikira ebikulo bya bitákawe. Okola kweke, kutangaika mwisi, ne'kaembe kàtangaesha'bi. 34Bushi ala bikulo byenyu bìri, we'michima yenyu nai yénde yánaba.»

Mundaa mwékala muchikunganyise

35Yesu era kuhuba kuteta mbu: «Mundaa mwékala muchikunganyise kwa kukola emulimo. Ne'matara menyu namo, méndaa mékela mákorera. 36Mundaa mwába nga báanda ba bálinjira enawabo àfuluke átenga kwa buya. Mango angáika ne'kukongota kwa lwisi, unao-unao bánamuchingulira. 37Twaáhanyirwe etuungu* twa enawabo angábuana tuchíri twálanga kwa angáika! Kubinali, nábabura kwa oyu enawabo angémbala enjimba se'mulimo, chasinda ánabura'to mbu tubáhaa kwa mesa túlye, na kushiba aola éulira'to ebiryo. 38Twaáhanyirwe etuungu* twa enawabo angáika kachi-kachi ka butufu, nesi bwálinga kucha tunáchiri twálanga.

39«Muményereraa kubuya kwa akaba ena enyumba àngamenyire echihangi cha mwisi angáika, àtangarekire enyumba yai itulibwe. 40Rero, nenyu mundaa mwékala muchikunganyise, bushi nyi Mwana we'Mundu nyingábaha kwa chihangi cha mungába mutáanyisisa.»

Emuanda ola ùngachinyiirwa no'la ùtangachinyíirwa

(Mat 24:45-51)

41Petero kukwera kubusa Yesu mbu: «Enawetu, oyu muanyi wera kuisha, tubano tu anêrekere oshâo, nesi èrekere ebandu boshi?»

42Enawetu era kumwǎkula mbu: «Nde i'muanda we'kuchinyiirwa kanji ola wète bwenge? Emuanda ola ulí ngo'yu, i'enawabo àngabika kuba mwimangisi we'nyumba yai. Oyu muanda, angénde êresa baanda balikabo ebiryo kwa chihangi cha chikomire. 43Aáhanyirwe oyu muanda, akaba enawabo mwa kubalamuka àngamubuana anáchiri ákola oyu mulimo. 44Kubinali, nábabura kwa enawabo angáira oyu muanda kuba mwimangisi we'bikulo byai byoshi.

45«Si akaba oyu muanda àngachitetembya mwa muchima wai mbu: ‹Enawetu êrisise busese.› Chasinda, ánatangirisa kunde ápunda baanda balikabo, ebalume ne'bakasi, na kutangirisa álya ne'kumwa ne'kutamira. 46Rero oyu muanda, enawabo akáfuluka kwa lusuku lwa atáanyisisa, no'kwa chihangi cha àteshi. Aola, enawabo akámuisha'mo bimbi bibiri na kumuanja nga mundu ola ùtangachinyíirwa.

47«Emuanda ola wìshi ekuhonda kwe'nawabo, si ánaina kuchikunganya na kuira ngo'kwa oyu enawabo ahónjire, akáhutwa tuchi tunene. 48Si emuanda ola ùngaba ùteshi ekuhonda kwê'nawabo, akáira bya bìngatuma áhutwa, akáhutwa tuchi tueke. Emundu ola wêresibwaa binene, akánemibwa binene. No'la wábikisibwaa binene, akábusibwa binene busese.»

Yesu árechire emalikano

(Mat 10:34-36)

49Yesu era kuhuba kuteta mbu: «Nábahire kúuma muliro mwa butala, kanji nyìngasimire busese oyu muliro ábe àkoresibwe mira! 50Nyéte musio wa malibuko ola binyěmire kwêka. Rero, nálibuka busese mwa muchima kuikira ebihangi bya amu malibuko mangáberera. 51Mwáanyisa mbu nábahire kureta bôlo kuno butala? Nânga! Nábabura kwa malikano mu nábahire kureta! 52Kutengera lwarero, bandu batano ba nyumba nguma bangáberekana'mo, bahatu bangálwisa babiri, na babiri bangálwisa bahatu. 53Emwana ne'she batákômvane, emunyere na nyina batákômvane, emwasana na nasala batákômvane.»#12:53 Somaa Mika 7:6.

Ekuanulula emyasi era yárenga mwe'sine suku

(Mat 16:2-3)

54Kanji Yesu era kubura eluamba lwe'bandu mbu: «Mango mwénde mwálola elumbumbu lwátenga era esuba lyénde lyásokera, unao-unao mwénde mwáteta mbu: ‹Emvula yáhonda kutowa.› Kanangana, yénde yánatowa. 55Na mango ekausi kénde kátengera kwa lunda lwera masina se'chio, mwénde mwáteta mbu: ‹Echuka chingáluwa.› Kanangana, chénde chánaluwa. 56Mùli batebanyi! Mutúla mwìshi kuanulula ebianyiro bye'chitaka ne'bye'nguba. Si kute mùngafundwa kuanulula emyasi era yárenga mwe'sine suku?»

Ekûmvikana ne'murenda

(Mat 5:25-26)

57Yesu era kuhuba kuteta mbu: «Chi chìngatuma nenyu mubeine mútalola kubuya cha mwěmire kuira? 58Mango ùngaba wáya kwa tiribinali kutongana ne'murenda wao, uíraa emisi yao ǔmvikane nai mango muchiri mwa njira. Bítabere bacha, àngakuisa era muhondo se'muisha manja, ne'muisha manja ánakwana era mwe'musula, ne'musula ánakuuma mwa buroko. 59Nákubura kwa ùtangatenga omola mango ùtasa kuonga eluteya lusinda-sinda.»

Currently Selected:

Luka 12: tbt

Highlight

Copy