Luka 13

Emufa we'kubinduka kutenga mwa bibi

1Mwe'chi chihangi, bandu bauma bera kuikira Yesu, báya kumubalira emyasi kwa Pilato echísaa besha Kalilaya bauma, mango babáa bátenda enyama se'kutula Ongo. 2Yesu era kubusa'bo mbu: «Mwáanyisa mbu abu Bakalilaya bèchibwaa bacha, bushi bu babáa bandu be'bibi kurenza ebanji Bakalilaya boshi? 3Nânga! Si nábabura kwa akaba nenyu mùtangabinduka kutenga mwa bibi byenyu, muboshi mungánafa ngo'kwa abu bandu nabo bafáa. 4No'mwa musi we'Silowamu, enyumba era ìtowamire busese yàkundukiraa bandu ekumi na munane na báfa. Rero, mwáanyisa mbu abu bandu, bu babáa bakosi be'bibi kurenza besha Yerusalemu muboshi? 5Nânga! Si nábabura kwa nenyu akaba mùtangabinduka kutenga mwa bibi byenyu, muboshi mungánafa ngo'kwa abu bandu nabo bafáa.»

Emuanyi we'muchi ola ùteka bifuma

6Chasinda, Yesu era kubaishira ono unji muanyi mbu: «Kwábaa mundu muuma ola wáingaa muchi wai wa tini mwe'hwa lyai lye'misabibu*. Lusuku luuma, era kuya kuhonda kwe'bifuma, si chiro ákabona ku kandu. 7Bushi no'ku, era kubura emukosi wai ola wéndee wámukorera mwe'hwa mbu: ‹Myaka ehatu ene yàrenga nénjire náika kuhonda ebifuma kwo'no muchi we'tini, si ndénjire nábona ku chiro na kandu kasibya. Uíshaa'o! Êta echitaka buha.› 8Si oyu mukosi nai mbu: ‹Waliya, uhúbaa kurekerao ono mwaka kanji. Nyingaéndekera kushekerera'o na kubika mwe'buinu. 9Mwa bacha, abunya àngêka bifuma kwa mwaka wěshire. Bítabere bacha, wánere wáisha'o.›»

Yesu álamya mukasi muuma elusuku lwe'Sabato

10Lusuku luuma lwa Sabato*, Yesu ábaa ákangirisa ebandu mwa bushenge bwe'Bayuta*. 11Mwo'bu bushenge, mwábaa mùli mukasi muuma mulwala. Oyu mukasi, ábaa àmala myaka ekumi na munane álibuka ne'chihwasi. Echi chihwasi chábaa chámuonyire emuongo, kuikira echihangi ábaa àtangachiala kwínamukala. 12Yesu ámulolire'ko, era kumwamaala na ámubura mbu: «Mali! Wanúnulibwe kutenga mwa bulwala bwao.» 13Era kumubika kwe'mino, unao-unao kuna kwénamukala, na átangirisa átonga Ongo.

14Si emukulu-kulu we'bushenge bwe'Bayuta* era kuaya busese, bushi Yesu alámise emundu elusuku lwe'Sabato*. Bushi no'ku, era kubura ebandu mbu: «Kutula suku ndatu se'kukola. Rero mwe'si suku mu mwěmire kunde mwáika kulamisibwa, si atá elusu lwe'Sabato*.»

15Si Enawetu era kumwǎkula mbu: «Mùli batebanyi! Elusuku lwe'Sabato*, chira muuma mu mwabo énjire áboola engaafu nesi endokumu yai ala énde áiminyira, áya kuimwesa emeshi. 16Ono mukasi àli wo'mwa lubuto lwa Aburahamu, Wamusimu ábaa ámuminyire ku myaka ekumi na munane. Rero, byabáa bitěmire àboolibwe elusuku lwe'Sabato*?»

17Ábere Yesu era àmalaa kuteta ei myasi, ebarenda bai boshi bera kufa honyi. Si ebanji bandu boshi beke, béndee bámowera ebisomerano byoshi bya éndee áira.

Ekuhuhanya eBwami bwa Ongo

(Mat 13:31-33; Mar 4:30-32)

18Yesu era kuhuba kuteta mbu: «eBwami bwa Ongo* bùngahuhanyisibwa na chiye? Na chiye chi nyìngabulingamanya nachi? 19Obu Bwami, buhúhanyisibwe na kafuma kaeke ke'haratali, ka mundu muuma áyaa kuinga mwe'hwa lyai. Aku kafuma, kera kumera na káhuba muchi, ne'milonge yera kuika kuimba ematu mabo kwa ndabi sao.»

20Yesu era kuteta kanji mbu: «Chiye chi nyìngahuhanya ne'Bwami bwa Ongo*? 21Buhúhanyisibwe ne'chachu* era mukasi muuma átolaa, era kuhoonganya'i mu biyanga bihatu bya shano, kuikira echihangi yáimbya era shano yoshi.»

Bande bu bakánunulibwa?

(Mat 7:13-14, 21-23)

22Yesu ábaa àli mwa lubalamo áya eYerusalemu. Ábaa árenga mwa misi no'mwa tumbara áenda ákangirisa ebandu. 23Mundu muuma era kumubusa mbu: «Enawetu, bandu baeke bu bakánunulibwa oshâo?» Yesu nai mbu: 24«Muchisesaa mwǐngirire mwa lwisi lwa lùfundeerere. Bushi nábabura kanangana kwa bandu banene bákaereka kwêngirira mulo, si batákaale.

25«Mango ena enyumba akába emángire mira na kuchinga elwisi, nenyu mukába mwiménze era butala. Na mwátangirisa mwákongota kwa lwisi mbu: ‹Enawetu, ùtuchuguliraa!› Nai akábǎkula mbu: ‹Ndèshi era mwátenga.› 26Chasinda, mukátangirisa mwáteta mbu: ‹Twalyáa na kumwa ala'uma nao. Kanji wakángirisaa ebandu mwa myêngere ye'musi wetu.› 27Si akábabura mbu: ‹Ndèshi era mwátenga. Muténgaa mwa meho manyi, muboshi mu bakosi be'mabi!›

28«Mukálola ku Aburahamu, na Isaka, na Yakobo, ne'barebi* boshi mwa Bwami bwa Ongo*. Si mwabo, mukáumwa era mbuwa. Eyera, mukálira na kulola kwa kasibu. 29Ebandu bakátengera era suba lyénde lyáulukira, ne'ra lyénde lyáchirowa, no'kwa lunda lwe'ra luulu, no'kwa lunda lwe'ra masina. Abu bandu bakékala bálya ebiryo mwa Bwami bwa Ongo*. 30Mǔmvaa! Bandu bauma ba bàli basinda-sinda, bangába babere-bere. Na ba bàli babere-bere, bangába basinda-sinda.»

Yesu áchǎnya bushi na besha Yerusalemu

(Mat 23:37-39)

31Mwe'chi chihangi, Bafarisayo* bauma bera kuikira Yesu na bámubura mbu: «Uténgaa anola uchíire mu chinji chisiki, bushi Heroti áhonda àkwîte.» 32Nai mbu: «Muyáa kubura oyu mutereri mbu lwarero na mishangya nyingâmbula ebihwasi na kulamya ebalwala. Na lishisho nyingába namálire emulimo wanyi. 33Si binyěmire lwarero, na mishangya, na lishisho nyiéndekere ne'luendo. Bushi chìtangaalikana mbu emurebi* ěchibwaa mu unji musi kureka eYerusalemu.»

34«Alibwe besha Yerusalemu! Mwabo mwénde mwêta ebarebi*. Ne'bandu ba Ongo abátumirire, mwénjire mwêtanga'bo mwa kubaumanga emakoi. Mbiso sinene nabáa nénjire náhonda nyìbakomberere ngo'kwa ngoko yénde yákomberera etunyau twai mwa bibaba. Si mwabo chiro mukêmerera! 35Mǔmvaa! Enyumba yenyu ingába muhaka. Nábabura kanangana kwa mutáchinyilole'ko, kuikira mango mungáteta mbu: ‹Aáhane ono wàbahire kwe'sina lya Enawetu.›» #13:35 Somaa Saburi 118:26.

Currently Selected:

Luka 13: tbt

Highlight

Copy