Luka 14

Yesu álamya emulwala elusuku lwe'Sabato

1Lusuku luuma lwa Sabato*, Yesu áyaa kulya kwa biryo mu nyumba ya mukulu-kulu muuma we'Bafarisayo*. Ebandu ba bábaa bàli mwe'i nyumba, bábaa bámutumbikisa busese balóle cha angáira. 2Era muhondo sa Yesu yábaa ìri mundu muuma ola wábaa ùimbire emubiri bushi na bulwala. 3Yesu era kubusa ebakangirisi be'Mwaso* ne'Bafarisayo* mbu: «eMwaso* wetu atúla emérere nesi atúla ànanyise kulamya emundu elusuku lwe'Sabato*?» 4Bera kuchisirira. Yesu era kuuma kwo'yu mulwala, era kumulamya na kumubura mbu àendaa. 5Chasinda, Yesu era kubabusa kanji mbu: «Nde mu mwabo ola muala wai nesi engaafu yai ìngatowera mwa chitomu, aíne kulibichira kuikula'mo, chiro angaba mbu lùli lusuku lwa Sabato*?» 6Chiro bákaala kumwǎkula mwasi.

Ekuchěrusa nesi ekuchandaasa

7Yesu álolaa kwa bandu ba bálalikwaa bénjire báchihóa ebifumbi bye'ra muhondo. Era kwire êresa'bo line eano: 8«Mango mundu murebe àkulalikire kwa buya, uténdaa wékala kwa bifumbi bye'ra muhondo. Bushi kulimango, mwa ba bàlalikirwe mùli mundu ola wète tunda kukurenza. 9Oyu mundu wète etunda mango angáika, ola wabálalikaa mu babiri àngakubura mbu: ‹Shéeraa ono mundu.› Aola, ungáfa honyi sa kuya kwíkala kwa chifumbi che'ra nyuma. 10Si mango wàlalikirwe, uyáa kwíkala kwa chifumbi che'ra nyuma. Mwa bacha, mango ola wakúlalikaa angáika, àngakubura mbu: ‹Mwira wanyi, chifundaa ene muhondo.› Aola, ungábona etunda era muhondo se'bandu boshi ba mwálya nabo. 11Bushi chira mundu woshi ola wénde wáchěrusa, akândaasibwa. Si ola wénde wáchandaasa yeke, àkêrusibwa.»

12Chasinda, Yesu era kubura ola wámulalikaa mbu: «Mango wáteka ebiryo bye'linye, bíbe bya mushi nesi bya luolo-olo, uténdaa wálalika bera bao, nesi banyakenyu, nesi ebasere bao, nesi ebalungu bao ba bàli baare. Bushi nabo bangesha kukulalika, na wába ngo'la wàfuirwe bya waíriraa'bo. 13Si mango wàtekire ebiryo bye'linye, úndaa wálalika ebakene, ebirema, ne'nyiata, ne'bauta. 14Aola, ungáahanyirwa bushi abu bandu batéte cha bàngakualulira. Ongo akákufuwa mango ebandu ba bénde báira bya bìtungenene bakômolibwa.»

Emuanyi we'bandu ba bálalikwaa kwa linye

(Mat 22:1-10)

15Mundu muuma mwa ba bábaa bálya ala'uma na Yesu ômvire bacha, era kumubura mbu: «Aáhanyirwe emundu ola ukálya kwa biryo mwa Bwami bwa Ongo*!» 16Yesu era kumwǎkula kurengera ono muanyi mbu: «Mundu muuma átekaa biryo binene bya linye, era kulalika na bandu banene. 17Ábere ebihangi bye'kulya byaíka, era kutuma emuanda wai mbu àyaa kubura ebandu ba ábaa àlalikire mbu: ‹Mwíraa mwábaha bushi byoshi byàkunganyisibwe mira.› 18Si boshi, chira muuma era kutangirisa áteta bya byàmwângikire kuika. Emubere era kumubura mbu: ‹Naúlire ehwa, rero binyěmire nyíye kutangula'li. Nákwěma unyíbabaliraa.› 19Ne'unji mbu: ‹Naúlire mbanzi ekumi sa nyingénde nákoresa mwa kuinga, náya kuhona akaba singákola. Nákwěma unyíbabaliraa.› 20Ne'unji nai mbu: ‹Naísise mukasi nyichíri mwa buya. Bushi no'ku, ndàngaala kubaha.›

21«Oyu muanda era kufuluka era mwa enawabo, era kunamufulira ei myasi yoshi. Oyu enawabo ômvire bacha, ebute bwera kumusimba, era kubura oyu muanda wai mbu: ‹Uyáa fuba mwa nama, no'mwa myêngere ye'musi ubínge ebakene, ne'nyiata, ne'bauta, ne'birema, ubêngise muno.› 22Chasinda, oyu muanda era kufuluka na áteta mbu: ‹Waliya, bya wanyíburaa mbu nyiíraa, nàbiirire. Si chiro bacha kuchiri bisiki.› 23Enawabo kukwera kumubura kanji mbu: ‹Uyáa mu chira mwêngere, no'mwa njira so'mwa tunzali. Ebandu ba ungálola'ko, uchíchikaa'bo běngire mwa mwanyi, chasiya enyumba yanyi yéhule. 24Kubinali, nábabura kwa kutáli chiro na mundu mwa ba bálalikwaa ola ungálya kwa biryo byanyi.›»

Ekukulikira Yesu kuli kureka byoshi

(Mat 10:37-38)

25Lusuku luuma bandu banene bábaa bàkulikire Yesu. Era kubinduka na ábura'bo mbu: 26«Ola wáhonda kunyikulikira, anyísimaa kurenza eshe na nyina, na mukai, ne'bana bai, na banyakabo, na baliwabo. Kanji anyísimaa kurenza ekalamo kai yeine. Bítabere bacha, àtangaala kuba mwanafunzi* wanyi. 27Emundu ola ùtangeka emusalaba#14:27 Kwêka emusalaba: Kuli kwêmerera kulibuka nesi kufa bushi na Kirisito*. wai, anányimise àtangaba mwanafunzi* wanyi.

28«Mango mundu muuma mu mwabo áhonda kuimba nyumba era ìtowamire busese, byěmire ékale tanga, àlole akaba àngabona ebikulo bya angákoresa kwa kumala oyu mulimo. 29Si akaba àngaimba emusingi, chasinda ánafundwa kwêhusa ei nyumba, boshi ba bangénde bálola kui, bangénde bámushekera, 30mbu: ‹Ono mundu átangirisaa kuimba enyumba, si yámufunjire kwêhusa.›

31«Mango mwami murebe áhonda kulwa na unji mwami, byémire ékale tanga, àlole akaba kurengera ebuashi bwe'basula bai byumbi ekumi bète, àngaala kuima oyu mulikabo wète byumbi makunyabiri. 32Ákalola kwa àtangaala, àngatumira oyu mulikabo ebandu mango àchiri burerere, chasiya àmubuse kute bàngabona ebôlo. 33Nenyu kubinali bacha! Kutali mundu mwa kachi-kachi kenyu ola ùngaba mwanafunzi* wanyi, akaba àtangareka byoshi byéte.»

Emunyu ola utéte mufa

(Mat 5:13; Mar 9:50)

34Yesu era kuhuba kuteta mbu: «Emunyu katúla kandu kabuya. Si akaba àngaesa ebuloke bwai, chi bàngahuba kubika'mo chasiya ahúbe kuloka? 35Oyu munyu, àtachete mufa asibya, kwa butaka nesi kwa buinu. Bénde bákabula'o era mbuwa. Ola wète matwi me'kûmva, ǒmvaa!»

Currently Selected:

Luka 14: tbt

Highlight

Copy