Luka 15

Embuli era yáeraa yanáboneka

(Mat 18:12-14)

1Lusuku luuma, ebafuchisi be'mbarata na banji bakosi ba bibi báchifundaa ofu na Yesu bàmûmvirise. 2eBafarisayo* ne'bakangirisi be'Mwaso* bálolire bacha, bera kutangirisa bâmaana Yesu bulio mbu: «Ono mundu énjire áhúukasa ebandu babi na kunde álya nabo!»

3Bushi no'ku, Yesu era kubaishira ono muanyi mbu: 4«Mundu muuma mu mwabo àngaba éte mbuli sai eyana, nguma musi yánaera. Kute ku àngaira? Àngareka echenda na mwenda mwa bwaasi áya kuhonda ei nguma era yàerire kuikira echihangi angáibona. 5Mango àngaba àbonyire'i, ánayeka kwa chituo áenda ámowa. 6Mwa kuika kwa wai, ánâmaala bera bai, ne'balungu bai na kubabura mbu: ‹Mumówaa ala'uma nanyi! Bushi nàbonyire embuli yanyi era yabáa yàerire.›» 7Nábabura kwa kuno'ku ku kwa nguba nako kwénde kwaba lumoo lunene busese mango mukosi muuma we'bibi énde ábinduka kutenga mwa bibi byai. Olu lumoo lwai lwénde lwába lunene busese kurenza kwa àngamoerere bandu chenda na mwenda ba bàtungenene era muhondo sai, ba bàtachilaire ku kubinduka bátenga mwa bibi byabo.

Echikoroto cha cháeraa chànaboneka

8Yesu era kuendekera áteta mbu: «Mukasi muuma àngaba éte bikoroto ekumi bya buteya, chiuma mubi chánaera. Kute ku àngaira? Angàkoresa etara na kubisa enyumba, na kuhonda kubuya-buya kuikira echihangi ábona'chi. 9Mango àngaba àbonyire'chi, ánâmaala bera-kasi bai, ne'balungu bai ne'kubabura mbu: ‹Mumówaa ala'uma nanyi. Bushi nàbonyire echikoroto chanyi che'buteya cha chabáa chàerire.› 10Nábabura kwa kuno'ku ku ebamalaika* ba Ongo bénde bámowa, mango mukosi wa bibi muuma oshâo énde ábinduka kutenga mwa bibi byai.»

Emutabana ola wáeraa ánaboneka

11Yesu era kuhuba kuteta mbu: «Kwábaa mulume muuma ola wábaa wéte baala bai babiri. 12Ola mutoto mubo era kubura eshe mbu: ‹Tata, nyêresaa ewanyi mwandu kwa bikulo byao.› Eshe era kubaabira ebikulo bya ábaa éte.

13«Ábere kwàrenga suku sieke, ola mutoto era kuusa ewai mwandu, na áya mu chio cha burerere. Áikire'yi, era kumala ebikulo byai mwa myasi ye'buhungu. 14Mango ábaa era àmalaa ebikulo byai byoshi, mwe'chi chio mwera kuika bulio bunene. Era kuika kwa chihangi áina ne'cha àngalya. 15Bushi no'ku, era kuya kukorera mulume muuma wa mwe'chi chio. Oyu mulume, era kumutuma mwa mahwa mai, áye kulanga engulube. 16Oyu mutabana éndee áhonda chiro álye kwa biryo bya ngulube séndee sálya, si kutáli ola wámuwaa'bi.

17«Bushi no'ku, era kutangirisa áchitetembya mbu: ‹Alibwe! Ebakosi ba tata bátanga mwa biryo, si nyono enera kufa ku náfa ne'businya! 18Nyingáhuba era mwa tata na kumubura mbu: "Tata, naírire bibi era muhondo sa Ongo ne'ra muhondo sao. 19Ndàngachítolibwa nga mwana wao. Úraa wányitola nga muuma mwa bakosi bao!"›

20«Oyu mutabana era kuchiuma áhuba era mwe'she. Ábere àchiri bure hicha, eshe era kumulola'ko, era kumufira bonjo bunene. Era kulibichira kumuhuukasa, na ámwobera. 21Emuala era kumubura mbu: ‹Tata, naírire bibi era muhondo sa Ongo ne'ra muhondo sao. Rero, ùtachinyitolaa nga mwana wao.› 22Si eshe era kubura ebaanda bai mbu: ‹Fuba, murétaa eluchimba lwa lùkomire busese, mumwěmbase'lo. Mumwémbasaa ne'chitanga kwa mutoke, mwánamwěmbasa ne'birato. 23Murétaa ne'chana che'ngaafu cha chinúnyire, muténdaa'chi, túlye elinye, tunámowe. 24Bushi ono muala wanyi ábaa áfire, si omwókire. Ábaa áerire, si àbonekire.› Bera kutangirisa bálya elinye.

25«Mwe'chi chihangi, efula yai yábaa ichiri era mahwa. Ábere yera yáfuluka ichiri mwa chifuna cha'la mwabo, yera kûmva engoma yàhumire ne'bandu básina. 26Yera kwâmaala muuma mwa baanda, na kumubusa mbu chi chàbere. 27Oyu muanda nai mbu: ‹Mulumuna wao iwàikire. Ne'ho echíre echana che'ngaafu cha chinúnyire, bushi muala wai àikire àhaalukire.›

28«Ei fula yera kufa bute busese, chiro ikêngirira no'wa nyumba. Eshe era kuuluka, na ámwěma busese mbu ěngíraa. 29Wamutabana nai mbu: ‹Myaka inene enera nákukorera, ndàfuraa kuisha na mwe'cha wàtechire. Si chiro bacha, ùtafuraa kunyeresa ne'chana che'mbene mbu nanyi nyírye elinye ala'uma na bera banyi. 30Si kuno muala wao, ola wámalire ebikulo byao kwa bakasi àikire, wàmwîchirire echana che'ngaafu cha chinúnyire!›

31«Eshe nai mbu: ‹Emanzi mwana wanyi! Woyo unátula nanyi esuku soshi, na bya nyéte byoshi bináli byao. 32Si byabáa binemire túlye linye na kumowa. Bushi ono mulumuna wao ábaa áfire si omwókire. Ábaa àerire si àbonekire.›»

Currently Selected:

Luka 15: tbt

Highlight

Copy