Luka 3
3
Yowani Mubatisayi átangirisa emulimo
(Mat 3:1-12; Mar 1:1-8; Yow 1:19-28)
1Mango Tiberiyo, mwami we'Baroma, ábaa àmala myaka ekumi ne'tano èmire, babano bu bábaa bákola nai: Pondiyo Pilato ábaa mukulu-kulu we'chio che'Yuteya, na Heroti ábaa mukulu-kulu we'chio che'Kalilaya, na munyakabo muuma mbu i'Firipo nai ábaa mukulu-kulu we'chio che'Itureya ne'che'Tarakoniti. Na Lisaniya ábaa mukulu-kulu we'chio che'Abileni. 2Na Anasi na Kayafa bu bábaa bàli bakulu-kulu be'bakuhanyi*.
Rero, mwe'si suku mu echinwa cha Ongo cháikiraa Yowani, muala wa Sakariya, mango ábaa àli mwa buyeye*. 3Oyu Yowani era kurenga mwa bio byoshi bya byábaa bìri ofu ne'lwishi lwe'Yorotani, áenda áhubanganyisa ebandu mbu: «Mubíndukaa muténge mwa bibi byenyu, munábatisibwe, chasiya Ongo àbabalire ebibi byenyu.» 4Mwa bacha, emyasi yera kwire yáberera, era murebi* Isaya áanjikaa mwa chitabo chai mbu:
«Mundu muuma áteta na murenge munene mwa buyeye* mbu:
‹Mukunganyaa enjira ya Enawetu,
mùmuiriraa enjira sa silámbukere!
5Chira mubanda, angêhusibwa.
Na chira ndulungu na chira katulungu, bingáhuba malambo.
Enjira sa sìchionyire, singálambukala.
Ne'sa siri mwe'tukubo, singálambaatanyisibwa.
6Ne'bandu boshi bangálola kwa Ongo átununula!›»#3:4-6 Somaa Isaya 40:3-5.
7Bandu banene bera kunde báikiranga Yowani chasiya abábatise. Si era kunde ábura'bo mbu: «Mwabo mùli nga buko bwa njoka! Nde wàbalosise enjira ye'kufufumuka ebuchinjibusi bwa Ongo bwa bwěshire? 8Rero, mundaa mwálosa kurengera emyanya yenyu kwa mwàbindukire kutenga mwa bibi byenyu. Kanji muténdaa mwáchitonga mbu: ‹Tubano, Aburahamu ihokulu wetu.› Nábabura kwa Ongo àngabindula mano makoi kuba bana ba Aburahamu! 9Mǔmvaa! Ekakuma kàbikirwe mira mwa bisina bye'michi. Chira muchi woshi ola ùteka bifuma bibuya, angákonjibwa na kuumwa mwa muliro.»
10Chasinda, olu luamba lwe'bandu bera kumubusa mbu: «Rero, chi tuíraa?» 11Nai mbu: «Emundu ola wéte njimba ebiri, êresaa mulikabo luuma, ola utéte kandu. No'la wète ebiryo, nai kuno'ku ku anáiraa.»
12Bafuchisi bauma be'mbarata nabo, bera kuikira Yowani, chasiya abábatise. Bera kumubusa mbu: «Mukangirisi, netu chi tuíraa?» 13Nai mbu: «Muténdaa mwáholosa binene kurenza bya byěmirwe.»
14Ebasula nabo bera kumubusa mbu: «Netu, chi tuíraa?» Era kubǎkula mbu: «Muténdaa mwányaa mundu ebutea bwai, nesi kumusinga cha àtairire. Si mundaa mwámoera elwêmbo lwenyu.»
15Ebandu bábaa bálinjirira ekuika kwa Kirisito*. Boshi bera kunde báchibusa mwa michima yabo era luulu sa Yowani mbu eri àtangaba i'yoyu. 16Yowani kukwera kubabura boshi mbu: «Nyono nábabatisa kwa meshi, si ola wàbahire era nyuma sanyi iwète ebuashi kunyirenza. Chiro ndéte kwa nyìri kwa kùngatuma náboola emirisi ye'birato byai. Yeke i'ungábabatisa kwa Muchima Mubuya-buya no'kwa muliro. 17Rero, era éte elweri mwa mino sai, kwa kwélula ebichi mwa bulo. Obu bulo, àngabika'bo mwa nguli yai. Si ebichi byeke, angáuma'bi mwa muliro. Oyu muliro, atákasime chiro na hicha.»
18Yowani era kunaendekera áhubanganyisa ebandu eMwasi Mubuya-buya, na kwêresa'bo manji máno manene.
Heroti áuma Yowani mwa buroko
19Emukulu-kulu Heroti árendesaa Herotiya, muka munyakabo. Kanji éndee áira na manji mabi. Bushi ne'bi byoshi, Yowani era kumukaliira. 20Si Heroti era kunarengeresa kuira emabi, mwa kuuma Yowani mwa buroko.
Ekubatisibwa kwa Yesu
(Mat 3:13-17; Mar 1:9-11)
21Mango abu bandu boshi bábaa bera bàbatisibwaa, Yesu nai era kwire ábatisibwa. Ábere era éma Ongo, enguba yera kubookala, 22eMuchima Mubuya-buya era kumwandaalira'ko nga chiruka. Ne'murenge era ekûmvikala kutenga kwa nguba mbu: «Woyo, u'Muala wanyi musiirwa, u'utúla unyísimise busese.»#3:22 Somaa Saburi 2:7.
Elubuto lwa Yesu áshokaa'mo
(Mat 1:1-17)
23Yesu ábaa era éte myaka ìngaika ku mahatu mango átangirisaa emulimo wai. Ebandu béndee báanyisa mbu atúla muala wa Yosefu.
Oyu Yosefu ábaa muala wa Heli.
24Na Heli ábaa muala wa Matati,
na Matati ábaa muala wa Lawi,
na Lawi ábaa muala wa Meliki,
na Meliki ábaa muala wa Yana,
na Yana ábaa muala wa Yosefu.
25Na Yosefu ábaa muala wa Matatiya,
na Matatiya ábaa muala wa Amosi,
na Amosi ábaa muala wa Nahumu,
na Nahumu ábaa muala wa Esiri,
na Esiri ábaa muala wa Nake.
26Na Nake ábaa muala wa Mati,
na Mati ábaa muala wa Matatiya,
na Matatiya ábaa muala wa Simeyi,
na Simeyi ábaa muala wa Yoseki,
na Yoseki ábaa muala wa Yota.
27Na Yota ábaa muala wa Yoana,
na Yoana ábaa muala wa Resa,
na Resa ábaa muala wa Sorobabeli,
na Sorobabeli ábaa muala wa Salatiyeri,
na Salitiyeri ábaa muala wa Neri,
na Neri ábaa 28muala wa Meliki,
na Meliki ábaa muala wa Ati,
na Ati ábaa muala wa Kosamu,
na Kosamu ábaa muala wa Elimatamu,
na Elimatamu ábaa muala wa Eri.
29Na Eri ábaa muala wa Yoshuwa,
na Yoshuwa ábaa muala wa Eliyeseri,
na Eliyeseri ábaa muala wa Yorimu,
na Yorimu ábaa muala wa Matati,
na Matati ábaa muala wa Lawi.
30Na Lawi ábaa muala wa Simeoni,
na Simeoni ábaa muala wa Yuta,
na Yuta ábaa muala wa Yosefu,
na Yosefu ábaa muala wa Yonamu,
na Yonamu ábaa muala wa Eliyakimu.
31Na Eliyakimu ábaa muala wa Meleya,
na Meleya ábaa muala wa Mena,
na Mena ábaa muala wa Matata,
na Matata ábaa muala wa Natani,
na Natani ábaa muala wa Tauti.
32Na Tauti ábaa muala wa Yese,
na Yese ábaa muala wa Obeti,
na Obeti ábaa muala wa Bowasi,
na Bowasi ábaa muala wa Salumoni,
na Salumoni ábaa muala wa Nasoni.
33Na Nasoni ábaa muala wa Aminatabu,
na Aminatabu ábaa muala wa Atimini,
na Atimini ábaa muala wa Arini,
na Arini ábaa muala wa Hesironi,
na Hesironi ábaa muala wa Peresi,
na Peresi ábaa muala wa Yuta.
34Na Yuta ábaa muala wa Yakobo,
na Yakobo ábaa muala wa Isaka,
na Isaka ábaa muala wa Aburahamu,
na Aburahamu ábaa muala wa Tera,
na Tera ábaa muala wa Nahori.
35Na Nahori ábaa muala wa Serungu,
na Serungu ábaa muala wa Reu,
na Reu ábaa muala wa Peleki,
na Peleki ábaa muala wa Eberi,
na Eberi ábaa muala wa Sela,
na Sela ábaa 36muala wa Kainana,
na Kainana ábaa muala wa Aripakisati,
na Aripakisati ábaa muala wa Semu,
na Semu ábaa muala wa Nowa,
na Nowa ábaa muala wa Lameki.
37Na Lameki ábaa muala wa Metusela,
na Metusela ábaa muala wa Enoki,
na Enoki ábaa muala wa Yareti,
na Yareti ábaa muala wa Mahaleli,
na Mahaleli ábaa muala wa Kainana.
38Na Kainana ábaa muala wa Enosi,
na Enosi ábaa muala wa Seti,
na Seti ábaa muala wa Atamu,
na Atamu ábumbwaa na Ongo.
Currently Selected:
Luka 3: tbt
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc.
