Luka 7

Yesu álamya ekaungu ke'mukulu-kulu we'basula be'Baroma

(Mat 8:5-13)

1Ábere Yesu era amálaa kuteta ei myasi yoshi era ábaa ábura ebandu ba bábaa bámumvirisa, era kuya mwa musi we'Kaperinaumu. 2Mwo'yu musi mwábaa mùli mukulu-kulu muuma we'basula be'Baroma. Oyu mukulu-kulu ábaa éte kaungu kai ka ábaa asímire busese. Na'ku kaungu kábaa kálinga kufa ne'bulwala. 3Oyu mukulu-kulu ômvaa kwa myasi era ebandu bénjire báteta era luulu sa Yesu. Era kwire ámutumira bangumwa bauma be'Bayuta, báye kumwěma mbu abáhaa kulamya ekaungu kai. 4Mango abu bangumwa báikaa ala Yesu ábaa àli, bera kumwěma busese mbu: «Oyu mundu ěmire ùmuirire ebi ákwema, 5bushi atúla asímire elubaa lwetu, kanji iwátuímbiraa ebushenge bwetu bwe'Bayuta.»

6Yesu kukwera kuenda nabo. Ábere era àli ofu ne'nyumba yo'yu mukulu-kulu, wamukulu-kulu era kutuma bera bai báye kumubwirira Yesu mbu: «Enawetu, ùtachitamyaa, bushi ndéte kwa nyìri kwa kùngatuma wêngirira mwa mwanyi. 7Echera chi chanátumaa nálola kwa ndàngaala kuchiikira era muhondo sao nyeine. Si woyo, unátetaa chinwa chiuma oshâo ne'muanda wai angálama. 8Bushi nanyi nyitúla era bufuli se'buashi bwe' bakulu-kulu banyi. Nanyi nyinéte basula ba bàli era bufuli se'buashi bwanyi. Nyikábura muuma mbu: ‹Éndaa›, énde ánaenda. Na nyikábura eunji mbu: ‹Bàhaa›, énde ánabaha. Nyikábura ekaungu kanyi mbu: ‹Íraa kandu karebe›, kuika anáire'ko.» 9Yesu ômvire bacha, era kusanwa busese bushi no'yu mukulu-kulu we'basula. Era kubinduka era nyuma, na áburaa echikembe che'bandu ba bábaa bamúkulire mbu: «Nábabura kwa anabe mwa chio choshi che'Isiraeli, ndàfuraa kulola ku mundu ola wète bwemeresi bungana ngo'buno.» 10Ba bátumwaa bera kufuluka kwa musi, bera kubuana ka kaungu kalámire mira.

Yesu ômola emwana we'muhumba-kasi

11Chasinda, Yesu era kuya mu musi muuma mbu i'Naini. Ebanafunzi* bai na luamba lunene lwa bandu bera kuenzikanya nai. 12Ábere era àli ofu ne'chiso che'lusito lwe'musi, era kubuanana na bandu ba bábaa báya kutaba chirunda cha mutabana muuma. Ábaa chihwa, cha muhumba-kasi muuma. Bandu banene ba mwo'yu musi bábaa berékesise oyu muhumba-kasi. 13Enawetu ámulólire'ko, era kumufira bonjo bunene. Era kumubura mbu: «Ùtaliraa!» 14Yesu era kuchifunda ofu ne'sanduku, na áiuma'ko. Ebandu ba bábaa bayéte, bera kwîmanga. Yesu era kuteta mbu: «Mutabana, nàtechire: sísimukaa!» 15Ola mutabana wábaa wafíre kuna kusisimuka. Era kwíkala na átangirisa áhambala. Yesu era kumuálulira nyina.

16Ebandu boshi bera kwôbaa, bera kutangirisa bátonga Ongo mbu: «Murebi* munene iwàpamukire mwa kachi-kachi ketu!» Kanji bera kuteta mbu: «Ongo aíkire kutabala ebandu bai!» 17Oyu mwasi Yesu áiraa, era kuhandabana mwa chio choshi che'Yuteya no'mwa binji bio bya byábaa bìri ofu nachi.

Yowani Mubatisayi átuma ebanafunzi bai era Yesu àli

(Mat 11:2-19)

18Ei myasi yoshi, ebanafunzi* ba Yowani bera kumubalira kui. Bushi no'ku, Yowani era kubarangira babiri mubo. 19Era kubatuma báye kubusa Enawetu mbu: «Eri woyo u'Masiya wàbahire? Nesi tulinjiraa unji?» 20Abu banafunzi* bera kuika ala Yesu ábaa àli. Bera kumubura mbu: «Yowani Mubatisayi iwàtutumire ene ùli tukubuse mbu: ‹Eri woyo u'Masiya wàbahire? Nesi tulinjiraa unji?›»

21Mwe'chi chihangi, Yesu era kulamya bandu banene ba bábaa bálibuka ne'malwala, na ba bábaa baremere, na ba bábaa basímbirwe ne'bihwasi. Era kwêresa na bauta banene emuisha we'kulola. 22Chasinjire, era kwǎkula ebanafunzi* ba Yowani mbu: «Muyáa kubalikisisa Yowani bya mwalólire'ko na kûmva'ko. Ebauta bera bálola, ne'birema byera byáenda, ne'babenzi-benzi bákomisibwa*, ne'binguchi byera byômva, ne'bafu bômolibwa, ne'bakene bénjire báhubanganyisibwa eMwasi Mubuya-buya.#7:22 Somaa Isaya 35:5-6; 61:1. 23Aáhanyirwe ola utákaese ebwemeresi bwai ku nyono!»

24Abu banafunzi* ba Yowani bera kufuluka. Yesu era kutangirisa ábura eluamba lwe'bandu kwa myasi yèrekere Yowani mbu: «Chi mwayáa kutangula mwa buyeye*? Eri lusheke lwa lwabáa lwáhanyisibwa ne'mbusi? Nânga! 25Kasi chi mwayáa kutangula? Eri mundu ola wabáa wěmbese njimba sa chichiro chinene? Nânga! Ba bénde bémbala enjimba se'chichiro chinene na kuba mwa muako, mwa nyumba se'bwami mu batúla! 26Rero chi mwayáa kutangula kasi? Eri murebi*? Nechi! Nábabura kwa abáa murebi*, kanji abáa àrenzise na murebi*. 27Oyola i'bitúla byǎnjikirwe era luulu sai mwa Maanjiko Mabuya-buya mbu:

«‹Mǔmvaa! Nàtumire endumwa yanyi ìkuhondorere,

chasiya ikukunganyise enjira.›#7:27 Somaa Malaki 3:1.

28«Nábabura kwa mwa bandu boshi bo'muno butala, kutáli ola ùrenzise Yowani. Si chiro bacha, ola ulí mueke mwa Bwami bwa Ongo*, i'mukulu-kulu kumurenza.» 29Ebandu boshi ne'bafuchisi be'mbarata ba bômvaa emyasi ya Yowani, bera kumenyerera kwa Ongo énde áira bya bìtungenene, kuikira echihangi bera kubatisibwa na Yowani. 30Si eBafarisayo* ala'uma ne'bakangirisi be'Mwaso*, beke bánánaa bya Ongo ábaa áhonda kubairira. Bushi no'ku, bera kuchinanyira mbu bàtangabatisibwa na Yowani.

31Yesu era kunaendekera áteta mbu: «Nde i'nyìngalingamanya ne'bandu ba lwarero? Na nde ibàhuhire? 32Bahúhire nga bana ba běkese mwe'soko, bábanjirana etushembe mbu:

‹Twàbaomberaa engoma, si mùtasinaa!

Kanji twàbêmbiraa enyimbo se'chiriyo, si mùtaliraa!›

33«Bushi mango Yowani Mubatisayi àbahaa, abáa àtenjire álya biryo, abáa àtenjire ámwa na tifai. Mwera kunde mwáteta mbu: ‹Éte bihwasi.› 34Mango nyono nyi Mwana we'Mundu naíkire, nénjire nálya nánamwa, mwénjire mwáteta mbu: ‹Mulólaa! Ono mundu atúla asímire ebiryo busese, àli na mutamisi! Kanji àli mwira we'bafuchisi be'mbarata, ne'banji bakosi be'mabi.› 35Si ebandu boshi ba bèmerere ebwenge bwa Ongo, bénjire bánalola kwa obu bwenge bwai bunátungenene kanangana.»

Yesu ábabalira mukasi muuma

36Mufarisayo* muuma álalikaa Yesu mbu abáhaa álye kwa biryo mwa mwai. Yesu era kuya mwa mwo'yu Mufarisayo*, era kwíkala na átangirisa álya. 37Mwo'yu musi, mwábaa mutúla mukasi muuma, mukosi wa bibi. Mango oyu mukasi ômvaa kwa Yesu álya kwa biryo mwa mwo'yu Mufarisayo*, era kuika'mo éte mulangi wa marashi ma chichiro chinene. 38Era kwîmanga era nyuma sa Yesu, ofu ne'bihando byai, álira. Emihonya yai yera kutangirisa yálobya ebihando bya Yesu. Chasinda, oyu mukasi era kuhangula'i mwa mviri sai. Era kwôbera ebihando bya Yesu na kubyakaba emarashi.#7:38 Mwa Bayuta, akaba mundu áhonda alóse eunji kwa àmutunjire busese, éndee ámuhuukasa kubuya, na kumuobera ebihando. 39Ola Mufarisayo* wálalikaa Yesu álolire bacha, era kutangirisa áchitetembya mwa muchima wai mbu: «Ono mundu àngabere murebi* àngamenyire akaba ono mukasi wámuuma'ko àli mundu muchiye. Àngamenyire kwa atúla mukosi wa mabi.»

40Yesu era kubura oyu Mufarisayo* mbu: «Simoni, nyéte mwasi wa wakúkubura.» Nai mbu: «Mukangirisi, hàmbalaa.» 41Yesu era kuteta mbu: «Kwábaa bandu babiri ba bábaa bàli mu mwinda wa mundu muuma. Muuma mubo ábaa éte mwinda wa tinari maana matano, ne'unji ábaa éte mwinda wa tinari matano.#7:41 eTinari bwábaa butea. Ne'Tinari nguma yábaa ingakorerwa mubisi muuma. 42Abu bandu babiri, bushi bábaa batéte ebuashi bwe'kufuwa ei minda yabo, oyu wábenjikaa era kwire ábabalira'bo kwa bánali babiri. Rero, mwa'bu babiri, nde iwábaa ùngasimire ene'bikulo busese?» 43Simoni era kwǎkula mbu: «Naányisise kwa ola wábabalirwaa emwinda munene.» Yesu era kumubura mbu: «Wǎkwire kubuya.»

44Chasinda, Yesu era kwêrekera era ola mukasi ábaa àli, era kubura Simoni mbu: «Uséne kwo'no mukasi? Nengíraa muno mwao, ùtanyêresaa emeshi me'kowa kwa bihando. Si ono mukasi yeke, ànyôsise ebihando mwa mihonya yai, ne'kubihángula mwa mviri sai. 45Ùtanyôberaa mwa kunyilámusa. Si yeke kutengera ala naíkiraa muno, kwôbera ku anáchiri ôbera ebihando byanyi. 46Ùtanyâkabaa emafuta mwe'twe, si yeke ànyâkabire emarashi kwa bihando.#7:44-46 Mwa myanya ye'Bayuta, emuenyi ákaíka, béndee bámuhuukasaa mwa kumweresa emeshi me'kwôwa kwa bihando, mwa kumuobera, ne'kumwakaba emarashi. 47Bushi no'ku, nákubura kwa chiro angaba mbu ebibi byo'no mukasi bìri binene, si byoshi byàbabalirwe. Echera chi chatúmire álosa kwa ànyisimire busese. Si emundu ola wábabalirwe kueke, énde ánasima kueke.»

48Chasinjire, Yesu era kwire ábura oyu mukasi mbu: «Ebibi byao byàbabalirwe.»

49Ebanji bandu, ba bábaa bálya ala'uma nai bera kutangirisa bábusanya mbu: «I'wera nde ono nai, ola ùngababalira ebibi?» 50Si Yesu era kubura ola mukasi mbu: «Ebwemeresi bwao bwàkununwire. Uéndaa ne'bôlo.»

Currently Selected:

Luka 7: tbt

Highlight

Copy