Luka 6

Yesu i'Mukulu-kulu we'Sabato

(Mat 12:1-8; Mar 2:23-28)

1Lusuku luuma lwa Sabato*, Yesu ábaa árenga mu mahwa ma bulo. Ebanafunzi* bai bera kutangirisa bápololanga ebulo, bera kunde basínganya'bo mwa mino, na bálya'bo.#6:1 Akaba mundu àngaba árenga mwe'hwa, áfa na businya, ábaa èresibwe eloso lwe'kuuka nesi kupolola kwa myaka era yèrire'mo na álya'i. Ekuíra bacha, kwábaa kuta kwîba. Somaa Bukengere bwe'Mwaso 23:26.

2Bafarisayo* bauma bera kubusa'bo mbu: «Era! Chi chatuma mwáira bya Mwaso* wetu atúla ànanyise kuira elusuku lwe'Sabato*?»

3Yesu era kubǎkula mbu: «Mùtafuraa kusoma bya Tauti áiraa mango yeine ala'uma ne'bandu ba ábaa àli nabo, bábaa bafíre ne'businya? 4Êngiraa mwa Nyumba ya Ongo,#6:4 Nyumba ya Ongo: Mwa suku sa mwami Tauti, eLuhu lunene lwa Ongo lwábaa lùtasa kuimbwa eYerusalemu. era kutola emikati era bandu bátulaa Ongo. Era kulya'i, era kwêresa ne'bandu ba ábaa àli nabo, chiro àngaba mbu ebakuhanyi* beine bu bábaa bète eloso lwe'kulya emikati era iri nge'i!»#6:4 Somaa 1 Samweri 21:2-7. 5Yesu era kuhuba kubura'bo mbu: «Nyono, nyi Mwana we'Mundu nyi Ena eSabato.*»

Yesu álamya emundu elusuku lwe'Sabato

(Mat 12:9-14; Mar 3:1-6)

6Lunji lusuku luuma lwa Sabato*, Yesu êngiriraa mwa bushenge bwe'Bayuta*, na átangirisa ákangirisa ebandu. Mwo'bu Bushenge, mwábaa mùli mundu muuma ola wábaa urémere emino ye'malyo. 7eBakangirisi be'Mwaso* ne'Bafarisayo* bera kutumbikisa Yesu, balóle akaba angálamya oyu mundu elusuku lwe'Sabato*. Báiraa bacha, chasiya babóne emwasi ola bàngemangira'ko kwa kumusitaka. 8Si Yesu ábaa àmenyire emianyisa yabo. Era kubura oyu mundu wábaa urémere emino mbu: «Bàtukaa wǐmange mwa kachi-kachi ke'bandu.» Era kubatuka, ne'manga mwa kachi-kachi kabo.

9Chasinda, Yesu era kubabura mbu: «Nábabusa: Chiye chi eMwaso* wetu atúla emérere mbu túndaa twáira elusuku lwe'Sabato*? Kuira emabuya nesi emabi? Kulamya emundu nesi kumwita?»

10Yesu era kubasonga boshi, era kwire ábura ola mundu mbu: «Nánulaa emino yao.» Era kunanula'i, era mino kuna kulama. 11Si abu bakangirisi be'Mwaso* ne'Bafarisayo* bera kusibuka busese. Bera kutangirisa bábusanya mbu kute bangáira Yesu.

Yesu álondola endumwa ekumi ne'biri

(Mat 10:1-4; Mar 3:13-19)

12Mwe'si suku, Yesu era kwírukira kwa ndulungu, áye kwéma Ongo. Ebutufu bwera kumuchera'ko éma. 13Ábere mwe'i mishangya, Yesu era kwâmaala ebanafunzi* bai, era kulondola ekumi na babiri mubo, era kuběrika mbu: «ndumwa.*» 14Na bu babano: Simoni, ola Yesu ásulaa esina lya Petero, na munyakabo mbu i'Andereya, na Yakobo, na Yowani, na Firipo, na Baritolomayo, 15na Matayo, na Tomasi, na Yakobo mwenyi Alufayo, na Simoni Museloti, 16na Yuta mwenyi Yakobo, na Yuta Isikariyota ola wárenganyaa Yesu.

Yesu ákangirisa ebandu álamya ne'balwala

(Mat 4:23-25)

17Yesu era kwândaala kwa ndulungu àli ala'uma ne'ndumwa* sai. Áikire kwa bulambo, era kwîmanga. Era kubuana'o chikembe cha banafunzi* bai na banji bandu banene busese ba bábaa bátengera mwa chio choshi che'Yuteya, no'mwa musi we'Yerusalemu, no'mwa bimbi bye'musi we'Tiro ne'we'Sitona, kwa musike-musike se'nyanja. 18Abu bandu bábahaa chasiya bǒmvirisise Yesu, balámisibwe ne'malwala mabo. Na ba bábaa bálíbusibwe ne'bihwasi, nabo bera kunalámisibwa. 19Ebandu boshi béndee báhonda bamúume'ko, bushi ebuashi bwéndee bwámutenga'mo, na bwálamya'bo boshi.

Engahanyi ne'buanya

(Mat 5:1-12)

20Yesu era kusonga ebanafunzi* bai, era kubabura mbu:

«Mwǎhanyirwe mu bakene,

bushi eBwami bwa Ongo* bùli bwenyu.

21Mwǎhanyirwe mu mwáfa ebusinya lwarero,

bushi mungéuchisibwa.

Mwǎhanyirwe mu mwálira lwarero,

bushi mungásheka.

22Mwǎhahanyirwe mango ebandu bábahomba, báchikula ku mwabo, bábakamba, na kwâmaana emasina menyu bulio,

bushi nanyi nyi Mwana we'Mundu.

23Mango ei myasi ingénde yábaikira, mundaa mwámowa na kuchiterera, bushi mubikirirwe lwêmbo lunene kwa nguba. Kuno'ku ku bahokulu babo béndee bánalíbusa ebarebi*.

24Si mu baare, mùli bânya,

bushi mwábonyire elwenyu lumoo mira.

25Nenyu mu mwìuchire lwarero, mùli bânya,

bushi mungáfa businya.

Nenyu mu mwásheka lwarero mùli bânya,

bushi muchiri mungálira na kuba mwa chiriyo.

26Mùli bânya mango ebandu boshi bábatonga,

bushi kuno'ku ku bahokulu babo béndee bánatonga ebarebi* be'bisha.»

Mundaa mwásima ebarenda benyu

(Mat 5:38-48; 7:12a)

27Yesu era kuhuba kuteta mbu: «Si mwabo mu munyûmvirise, chechine chi nábabura: mundaa mwásima ebareanda benyu. Na ba batúla babáhombire, mundaa mwáirira'bo emabuya. 28Ba bénde bábatakira, mundaa mwéma Ongo ǎhanyire'bo. Na ba bénde bábalibusa, mundaa mwáběmera era mwa Ongo. 29Mango emundu àngakumaasisa kwe'tama liuma, umúteaa ne'rinji. Na mango emundu àngakunyaa ekochi, ùmurekaa ěke ne'furemo. 30Mango àngakwema ekandu ùtamwîmaa'ko, nesi mango àngakunyaa ka kali kao, ùtachimwemaa'ko. 31Na kwa mwáhonda ebanji bandu bàbairiraa, ku nenyu mundaa mwánairira'bo.

32«Akaba mùngende mwánasima ba batúla babásimire, nzimwa ichiye mùngabona? Anabe ne'bakosi be'mabi nabo bénde bánasima ba babásimire! 33Kanji akaba mùnganairira emabuya ba bénde bánabaírira'mo, nzimwa ichiye mùngabona? Anabe ne'bakosi be'mabi nabo ku bénde bánaírirana bacha! 34Kanji akaba mùnganênjika ba mulángalire kwa bu bàngabafua, nzimwa ichiye mùngabona? Anabe ne'bakosi be'mabi nabo bénde bánênjika ba bànganabafua!

35«Si mwabo mundaa mwásima ebarenda benyu. Mundaa mwáirira'bo emabuya. Kanji mundaa mwênjika busira kulangalira mbu bangabáfua. Mwa bacha, mungábona lwêmbo lunene, kanji mungába kanangana bana ba Ongo, i'utúla era luulu sa byoshi. Bushi yeke énde áira emabuya anabe kwa bandu ba bàtateta mbu akoko, no'kwa bakosi be'mabi. 36Mundaa mwáfirana bonjo ngo'kwa Eho énde ábafira'bo.»

Muténdaa mwáchinjibusa ebanji

37Yesu era kuhuba kuteta mbu: «Muténdaa mwáchinjibusa ebanji, na Ongo atábachinjibuse nenyu. Muténdaa mwáteta mbu ebanji bachiíjibusibwaa, na Ongo àtatete mbu nenyu muchinjibusibwaa. Si mundaa mwábabalirana, na Ongo àngabababalira nenyu. 38Mundaa mwêresa ebanji na Ongo àngaberesa nenyu. Na cha mungêresibwa chingába chiréngirwe kubuya na kusindairwa na kwêhusa ehao senyu kwana meno. Kwa mwénde mwárengera ebanji ku Ongo akánabarengera.»

39Kanji Yesu era kubaishira ono muanyi mbu: «Emuuta àngaala kutandaisa muuta mulikabo? Nânga! Akaba àngaira bacha, kwa banáli babiri kuika banátowere mwa fumbi! 40Emwanafunzi* àtangarenza emukangirisi wai. Si chira mwanafunzi* ola wamálire kukangirisibwa kubuya-buya, iwera ùngaba nge'mukangirisi wai.

41«Chi chátuma wálola kwa kaaha ke'muchi ka kàli mwa liho lya mulikenyu, si ùtalaire kwa muchi ola ulí mwa lyao? 42Chi chìngatuma wábura mulikenyu mbu: ‹Iraa nyikúkule ekachi ka kàli mwa liho lyao›, no'ku mwa lyao weke muchiri muchi? E umutebanyi! Ukúlaa tanga emuchi ola ulí mwa liho lyao, eri walóla kubuya kwa ùngakula ekachi ka kàli mwa lya mulikenyu!»

Emundu énde ámenyeka kurengera emyanya yai

(Mat 7:16-20; 12:33-35)

43Yesu era kuhuba kuteta mbu: «Kutáli muchi mubuya ola ùngeka bifuma bibi, nesi kutáli muchi mubi ola ùngeka bifuma bibuya. 44Chira muchi énde áményeka kurengera ebifuma byáo. Ebandu bàtaokola byambamba nesi ngobya kwa katenge-tenge. 45Kuno'ku, emundu mubuya énde áteta ebibuya bya byátenga mwa muchima wai. Ne'mundu mubi, emabi ma énde áteta, ménde mátenga mwa bubi bwa bwèhwire mwa muchima wai. Bushi ebunu bwa mundu bwénde bwáteta bya byèhwire mwa muchima wai.»

Emuanyi we'nyumba ebiri

(Mat 7:24-27)

46Yesu era kunaendekera áteta mbu: «Chi chátuma mwénjire mwányěrika mbu: ‹Enawetu, Enawetu›, mutánaira na bya nénjire nábabura? 47Nábalosa kute emundu ahúhanyisibwe ola wénjire wányikulikira, na kûmva emyasi yanyi na kuira ngo'kwa ìtechire. 48Ahúhanyisibwe ne'mundu ola wáimbaa enyumba. Era kuchima busese tanga mwa chitaka kuikira kwe'koi. Kwe'ri koi, era kubika kwe'musingi ola áimbiraa kwe'nyumba. Mango emvula inene yátowaa, elwishi lwera kwêhula, emwihuso era kuchihuta kwe'i nyumba, si chiro íkahaala bushi yábaa iserire. 49Si emundu ola wénjire wáchiremba kûmva emyasi yanyi àtanaira ngo'kwa ìtechire, ahúhanyisibwe ne'mundu ola wáimbaa enyumba yai kwa chitaka buha-buha, busira kuchima musingi. Mango emwihuso áchihutaa kwe'i nyumba, unao-unao yera kukunduka, na yáhandukala yoshi.»

Currently Selected:

Luka 6: tbt

Highlight

Copy