Luka 5

Yesu álondola ebanafunzi bai babere-bere

(Mat 4:18-22; Mar 1:16-20)

1Lusuku luuma, Yesu ábaa eménze kwa musike se'nyanja ye'Kenesareti.#5:1 Enyanja ye'Kenesareti: Ei nyanya i'bénde bérika kanji mbu nyanja ye'Kalilaya. Bandu banene bábaa bámufundeeresa, bushi bábaa báhonda bómve kwa Chinwa cha Ongo. 2Era kulola ku mato mabiri ma mábaa meménze kwa musike se'nyanja. Ebafubi bábaa bàtengire mumo bálonga etusira twabo. 3Yesu era kwírukira mu bwato buuma mwa ma mábaa màli aola. Obu bwato érukiraa'mo, bwábaa bwa Simoni. Yesu era kumubura mbu àfundaa'bo mwa nyanja, bure hicha ne'chihabukiro. Era kwíkala mwo'bu bwato na átangirisa ákangirisa ebandu.

4Ábere era àmalaa kukangirisa ebandu, era kubura Simoni mbu: «Fundaa ebwato ala esibe lìri, mwǐne etusira twenyu mwa meshi, munáfube efi.» 5Simoni era kumwǎkula mbu: «Aaye Mukangirisi! Ebutufu boshi bwachére twáfuba busira kubona kandu kasibya! Si bushi woyo u'wàtechire'ko, náhuba kuuma etusira mwa meshi.» 6Bera kwire báuma etusira mwa meshi. Bera kubona efi sinene, kuikira echihangi etusira twabo twábaa twera twábereka. 7Bera kusimira balikabo ba bábaa bàli mwa bunji bwato mbu babáhaa babáase. Ábere abu balikabo bàika, bera kwêhusa emato mabo kwa manáli mabiri, kuikira echihangi mábaa mera máhonda kwóngobera mwa meshi.

8Mango Simoni Petero álolaa kwe'bi, era kukoma emafi era muhondo sa Yesu. Era kuteta mbu: «Enawetu, tèngaa ofu nanyi, bushi nyìri mukosi wa bibi!» 9Byábaa bacha, bushi Simoni ala'uma na bálikabo boshi básanwaa busese mwa kulola kwa bwingi bwe'fi sa bábonaa.

10Baala ba Sebetayo, Yakobo na Yowani béndee báfuba ala'uma na Simoni. Nabo bera kunasanwa busese. Si Yesu era kubura Simoni mbu: «Ùtobaaa! Kutengera lwarero, ungére wába mufubi wa bandu.» 11Mwo'lu, bera kuhubya emato mabo kwa musike se'nyanja. Bera kureka byoshi na bákulikira Yesu.

Yesu álamya emubenzi-benzi

(Mat 8:1-4; Mar 1:40-45)

12Mango Yesu ábaa àli mu musi muuma we'chi chio, kwera kuulukira mundu muuma ola wábaa wèhwire bibenzi kwa mubiri woshi. Oyu mundu álolire ku Yesu, era kufukama era muhondo sai, ne'buso bwera kunaikirira kwa chitaka. Era kumwěma busese mbu: «Enawetu, akaba uhónjire, ùnganyilamya.» 13Yesu era kunanula emino, era kumuuma'ko na áteta mbu: «Náhonda, ulámaa.» Unao-unao, bya bibenzi kuna kulama. 14Yesu era kumuchichika mbu: «Ùtabaliraa chiro na mundu asibya kwo'yu mwasi. Si uyáa kuchilosa tanga era mwa kuhanyi*. Chasinda, wánâna emitulo* kukulikana no'kwa Musa áanjikaa, kwa kulosa kwa walámire.»#5:14 Akaba emundu alámisibwe ebibenzi, oyu mundu éndee áya kulosa ebakuhanyi kwa alámire mira. Éndee áira bacha, chasiya bamwêmerere ahúbe kuba ala'uma ne'banji bandu. Somaa Balawi 13:45-46, 14:1-32.

15Si chiro bacha, engulu ya Yesu yera kunaendekera yáhandabana mwa bandu. Bandu banene bera kunde bábuanana chasiya bamûmvirise, balámisibwe ne'malwala mabo. 16Si Yesu era kunde áya bure ne'bandu, mu chisiki chai yeine kwémera'yi Ongo.

Yesu álamya emundu ola urémere

(Mat 9:1-8; Mar 2:1-12)

17Lusuku luuma, Yesu ábaa ákangirisa ebandu. Bafarisayo* bauma na bakangirisi bauma be'Mwaso* ba bábaa bátengera mwa misi yoshi ye'chio che'Kalilaya, ne'Yuteya, ne'Yerusalemu nabo bábaa békesi aola. Yesu ábaa énjire álamya ebalwala kwa buashi bwa Enawetu Ongo.

18Bandu bauma bera kuika béte mundu kwa chipoyo ola wábaa urémere. Bera kuhonda enjira ye'kumwingisa mwa nyumba, chasiya bamúbike era muhondo sa Yesu. 19Si bera kuina ala bàngamurenzesa bushi ne'kuluwa kwe'bandu. Bushi no'ku, bera kwire béruka kwa ngangamo se'i nyumba.#5:19 Bayuta bauma, mwa kuimba enyumba sabo, béndee bátambika emichi kwa ngangamo, chasinda bánatambika kwe'matebura. Bera kuhanda kwa matebura, na bámwandaasisa mwa kachi-kachi ke'bandu, era muhondo sa Yesu, análi no'kwa chipoyo chai. 20Mango Yesu álolaa kwa bwemeresi bwa'bu bandu, era kubura oyu mulwala mbu: «E mwira wanyi, ebibi byao byàbabalirwe!» 21Ebakangirisi be'Mwaso* ne'Bafarisayo* bera kutangirisa báchitetembya mbu: «Mundu muchiye ono wákamba Ongo? Kunali mundu ola ùngaala kubabalira ebibi kureka Ongo yeine?»

22Yesu era kumenyerera emianyisa yabo, era kubabusa mbu: «Chi chátuma mwáanyisa bacha mwa michima yenyu? 23Munyiburaa! Chiye chi chìbofuire kuteta: eri ekubura emundu mbu: ‹Ebibi byao byàbabalirwe›, nesi ekumubura mbu: ‹Emàngaa uénde?› 24Rero, náhonda muményerere kwa nyi Mwana we'Mundu nyéte ebuashi bwe'kubabalira ebibi muno butala.» Chasinda, Yesu kukwera kubura ola mundu wábaa urémere mbu: «Nyínatechire, èmangaa, tòlaa echipoyo chao unáfuluke kwa wao.» 25Unao-unao, ola mundu kuna kwîmanga era muhondo se'bandu, era kutola echipoyo chai cha ábaa àonjire'ko, era kuhuba kwa wai áenda átonga Ongo. 26Ebandu boshi bera kusanwa busese na kusimbibwa na buba. Bera kutonga Ongo mwa kuteta mbu: «Lwarero twalólire ku bishishalo!»

Yesu ábura Lawi mbu àmwêmisaa

(Mat 9:9-13; Mar 2:13-17)

27Era nyuma se'bi, Yesu era kuuluka mwa nyumba. Era kulola ku mufuchisi muuma wa mbarata mbu i'Lawi.#5:27 Lawi kanji i'Matayo. Somaa Matayo 9:9. Oyu Lawi ábaa ékese mwa nyumba ye'kufuchisisa mwe'mbarata. Yesu era kumubura mbu: «Unyêmisaa!» 28Lawi era kwîmanga, era kureka byoshi na ákulikira Yesu.

29Chasinda, Lawi era kuirira Yesu linye linene mwa mwai. Mwe'i nyumba mwábaa mùli bafuchisi ba mbarata banene ala'uma na banji bandu ba bábaa bálya ala'uma nabo. 30Mango eBafarisayo* ne'bakangirisi be'Mwaso* bálolaa bacha, bera kutangirisa báchitetembya ne'kubura ebanafunzi* ba Yesu mbu: «Chi chìngatuma mwálya ne'kumwèra ala'uma ne'bafuchisi be'mbarata ne'bakosi be'bibi?» 31Yesu era kubǎkula mbu: «Ebandu ba bàhaalukire bàtahonda muhake, si ebalwala bu bénde bámuhonda. 32Ndàbahire kwâmaala ebandu ba bàtungenene era muhondo sa Ongo. Si nábahire kwâmaala ebandu be'bibi, chasiya babínduke kutenga mwa bibi byabo.»

Bafarisayo bauma báhambala na Yesu

(Mat 9:14-17; Mar 2:18-22)

33Bafarisayo* bauma bera kubura Yesu mbu: «Ebanafunzi* ba Yowani, anabe ne'betu, chira mango bénde báya mwa memo ma ménde máirwa busira kulya. Si ebao beke bàtaira bacha, bénde báendekera kulya ne'kumwa.» 34Yesu era kubǎkula mbu: «Mwìshi mbu mùngaala kwângika ebandu ba bàlalikwaa kwa buya mbu bàtalyaa mango muya mulume àchiri ala'uma nabo? Nânga! 35Si esuku singáika, mango oyu muya mulume angákulibwa mwa kachi-kachi kabo. Rero mwe'si suku, mu bangére bénde báchima ekulya.»

36Yesu era kuhuba kubaishira ono muanyi mbu: «Kutali mundu ola ùngaisha echiraka kwa luchimba luyayaya na álanjira'chi kwa chiramba. Ola ùngaira bacha, àngaba àberengire olu luchimba luyayaya, kanji echi chiraka chàtengaa'ko, chitásimbane ne'chi chiramba. 37Kanji, kutali mundu ola ùngabika etifai iyayaya mwa hao se'nyuu#5:37-38 Hao se'nyuu: Sábaa hao sa sìkwisibwe mwa luu lwe'mbene. eBayuta béndee báisisa etifai mwa hao se'nyuu siyayaya, bushi seke sábaa sìtangabereka mwa kuba etifai yera yáya. Béndee báira bacha, bushi ehao se'nyuu sa sìkunguire séndee sába sirémbire kanji sìngabereka fuba. Anola kulikuteta kwa emyasi era Yesu éndee ákangirisa, yábaa iyayaya era itangasimbana ne'myanya ibi yo'kwa mira. sa sìkunguire. Ola ùngaira bacha, àngatuma ei tifai iyayaya yáberenga esi hao, etifai yánashesheka, ne'hao sánafa buha. 38Si etifai iyayaya yèmire kubikibwa mwa hao se'nyuu siyayaya. 39Kutali mundu ola ùngaba wàmwere kwa tifai era ìire, ola ùngachísima kumwa kwa tifai iyayaya. Bushi énde áteta mbu: ‹Etifai era ìire i'itúla ìkomire busese!›»

Currently Selected:

Luka 5: tbt

Highlight

Copy