Luk 14
14
Jizɔs akos ɔr iwen ihɔ imɛmɛn Ujus
1Ihɔ imɛmɛn Ujus ingen Jizɔs aza iyan ukwagh uyan kɔ itumbɛ ɔr utaan Ufarasi ugen, ne iyɔr amban vɛru hen mɔ vɛru ibɛrɛn ase ana. 2Hen ɔr ugen aru ungwen amura avo ghɛ avor. 3Jizɔs apine Ufarasi ghɛ afɔn mɛnna, “Mɛnna ana iyan na vɛ akos Ihɔ imɛmɛn, hin ina gha?” 4Ne vɛ mgba un swɛng. Jizɔs akɔr ɔr hun, ne akos un akaa una ayovoyi.
5Ne apine avo na, “kɛ ana ɔr ungwen uwan una hin agund una agba kɔ ijɔr itumɛn Ihɔ imɛmɛn, ta adu awɛ ayu-ayu gha?” 6Ne vɛru ukwagh ɔɔr un gha.
Jizɔs awa uzendɛv agenɛv ghɛ uwun ayom
7Mɔ Jizɔs ɛnɛn iyɔr agenɛv kɔ amban vɛ arav avo mɔ vɛ zaayi itɛman kɔ ikɔnuv unomov. Ne atuwa avo ikaan ingin akaa na, 8“Ɔ ɛn ɔr arav uwɛ ghi ɔz, ka tɛmayi ikɔnuv unomov gha, Ade gha vɛ rav ɔr ugen ungwen ahɛmba uwɛ. 9Ɔ ɛn aru mɔ, ɔr ungwen arav un amem mɔ ava kaa uwɛ na, ‘Mugh ɔr ungwen atɛma.’ Umugh ghi ihoon uza tɛma kɔ ikɔnuv unomov gha.
10“Ne ɔ ɛn vɛ rav uwɛ, ka aza tɛmayi kɔ ikɔnuv unomov gha, Ta ɔr ungwen arav un mɔ, ɛr ava akaa ghu uwɛ na, ‘Kwarem, za tɛma kɔ ikɔnuv unomov kɔ ishi.’ Ta uhir Unom kɔ ghɛ ase amban arav mɔ. 11Iyɔr amban vɛ kond iyɔr ivo ghi isa vɛ sen ghɛ avo inya, amban vɛ sen ghi iyɔr ivo inya vɛ kond ghɛ avo isa.”
12Ne Jizɔs agɛma kɔ ɔr ungune arav un mɔ akaa una, “Ɔ ɛn urav iyɔr ukwagh uyan usov ghɛ ayɛ, ka ravyi akar, anomgban, utsombur ghɛ iyɔr utorov amban vɛ kpembere hɔ ahiye uwow gha. Ɔ ɛn ɔ ɛr mɔ, avo kpa vɛ rav uwɛ vɛ akɔru. 13Uru ghi itungnun, rav achanɛv, amban vɛ guzugh, vɛ kɛrɛnnɛv, upir ase, 14Aonz ahagh ibɛrɛn ghɛ awɛ. Itiyo ikaa na ambumɔ abe akɔr uwɛ gha, Aonz akɔru ukpɛ mrɛr kɔ uku amban amba gbɛngang.”
Jizɔs atuwa ikaan itungnun itan
(Matiyo 22.1-10)
15Ne ɔr umɔm ghu amban vɛ tɛma ukwagh uyan ghu un amgban akaa angan mɔ, akaa ghu Jizɔs na, “Ɛr ghɛ shiya amban vɛ aya ukwagh uyan kɔ itungnun ingin iru kɔ Utorov unav Aonz mɔ.”
16Jizɔs arumun: “Ɔr ugen aru ghi iyɔrun itungnun itaan arav iyɔr tsɛng. 17Kpɛ ungwen ghɛ kuma mɔ a ɔɔr ɔr tom una na aza hin a ɔɔr iyɔr amban un arav mɔ na, ‘Van, mɛyor mbe.’
18“Kpa avo amem vɛ na atiyo akaa angan a ɛr sɛ vɛ abe vɛ va gha. Umɔm akaa na, ‘Mɛ yam ikoo mɛza ɛnmɔ ingiye, mɛ kɔr uzɔ itiyo ikaa ingin mbe mva gha nɔ.’
19“Ungen akaa na, ‘Mɛ yam vɛ agund#14.19 Agund Kɔ avo agund ne vɛ kahayi ikɔr. puwɛ mɛza kar avo. Mɛ kɔr uzɔ itiyo ikaa ingin mbe mva gha nɔ.’
20“Ɔr ungen ava akaa una, ‘Mɛ uzɔ ukwas aka ashi gha, mɛ kɔr uzɔ itiyo ikaa ingin mbe mva gha nɔ.’
21“Uwan utom hun ahire ava ɔɔr uwun una akaa hun. Ne Uwun itumbɛ avihi isima ne ana uzɔ na, ‘Za ayu-ayu kɔ ihang itaan ghɛ irara kɔ ahiye utan rav achanɛv, amban vɛ guzugh, upir ase, ghɛ akɛrɛnnɛv.’
22“Uwan utom akaa na, Uwun, ‘Mɛr ɛnmɔ ukaa, kpa ahiye ashi va ken.’
23“Ne Uwun akaa uwan utom na, ‘Za duwe kɔ ahang ahiye vɛ ataanɛv agenɛv ghɛ ahang akɔrɔ kɔr uzɔ ghɛ iyɔr hin vɛ va, ɛn achiya uwam ayiv. 24Mɛ kaa un, amban mvand iravɛn mɔ ɔr uvo umɔm apɛv ukwagh uyan itungnun iyam uzɔ gha.’ ”
Kwagh ungwen a ɛr ɔr ungwen aru ɔr dundan Jizɔs
(Matiyo 10.37,38)
25Isum iyɔr tsɛng iru izan uzend urong ghɛ Jizɔs. Ne agɛma akaa ghɛ avo na, 26“Mɔ uwon ungwen aker na ava kan ghu umwe, ta ghɛshiya un ghu umwe ta hɛmba utir una ghɛ ungɔ, ukwas ghɛ myem, anomgban anombos ghɛ akasɛv, kas, umuwa una gha, abe aru ɔr yɛghɛn wam gha. 27Mɔ won ungwen avenda utɛngnɛn Itsingan ukon una udondanɛm gha, abe aru Ɔr yɛghɛn uwam gha.
28“Ɔ ɛn ɔr awa isima na un ama itumbɛ itaan. Sɛ aka tɛman inya a ɔɔr inarigh ikin ikuma uman itumbɛ hun zan ikuma un ubɛɛn iyi gha? 29Gha ɔ ɛn awa itiyo itumbɛ sɛ aka abe ama ibɛ gha, Iyɔr ghi ɛn isɛ un, 30Na, ‘Ɔr ungwen ahiye itumbɛ iman akaa abe gha.’
31“Zan Utor hana umo sɛ angwe iwan iyɔr inɔngnun itav ghɛ Utor ugen. Sɛ aka atɛma a ɛn ɛnmɔ ɛr ɛn abe ghɛ uwaiku iti-atan puwɛ puwɛ sɛ ahɛmba Utor ungwen ava chir un unɔng ghɛ uwaiku iti-atan puwɛ puwɛ ahar gha? 32Ɔ ɛn aka abe gha, atind itomov anav kɔ utor ugen ungumɔ mɔ amba za marɛmb, mɔ vɛ ɛr sɛ makun aru. 33Mɔ hun ne, uwɛ ungwen ukond avo ghi isa kɔ akaa amem gha ube urun ayɛghɛnɛv uwam gha.
34“Ubar ashiya, ɔ ɛn ubar aka nɛɛn gha, aka ka va mɔ ɔ ɛr sɛ anɛɛn va gha? 35Aka soor va ukwagh kɔ ghi inya gha, ghɛ kɔ ihɛghɛnɛv gha vɛ ahaa kɔ.
“Ɔr ungwen angwe ghɛ ato amgba.”
Currently Selected:
Luk 14: UTA
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
