Luk 16
16
Jizɔs atuwa ikan ɔr utom ungwen afɔ ayom
1Jizɔs agɛma ɔɔr Ayɛghɛnɛv anav: ikan ingin. Akaa na “Ɔr ghu usu ugen atɛng ɔr utom, ne ɔr usu hun amgba na ɔr utom una ghɛ vihin un usu dangdang. 2Ne atah apine un, ‘Kine mgwe imgban ghi itogh ikow mana? Angɛr hin ɔɔrum mɔ wuhiyen ghi ɛrɛn ghɛ akaa aam, Itiyo ikaa, uku ɛnɛyi va ghɛkaa aam gha.’
3“Ɔr utom hun akaa ghi imɛngh inagh, ‘Kine mɛ ɛr hanagen? Mɔ uwun wam awa isima na adum utom mɔ. Mɛgwe ikɔw ukahan ikɔr gha, ne Mɛhoon uhuran ɔr kwagh. 4Mfɔ kwagh ungwen mɛ ɛr, ɔ ɛn adum utom han, sɛ mɛru ghu akar tsɛng angan azum kɔ atumbɛ avo.’
5“Ne atah iyɔr amban vɛ ya uwun una anjɔ umɔm ghu umɔm. Apine ɔr mahɛ, ‘Uya utan uwam injɔ nana?’
6“Arumun na, ‘Andaa makurɛ iti-anyin.’
“Ɔr utom hun akaa una, ‘Teng uka, tɛma inya fa-fa, gɛma gɛr andaa makurɛ iti.’
7“Ne apine ɔr kɔ uhar, ‘Ne uwɛ injɔ iyow ingiye nana?’
“Akaa na, ‘Asɔhɔ ikurɛh iti atan.’
“Ne ɔr utom hun a ɔɔr un na, ‘Teng uka gɛma gɛr asɔhɔ ikurɛh iti anyin.’
8“Uwun hun asigha ɔr utom hun ungwen aru gɛr-gɛr gha, Itiyo ikaa ayom ana. Mɔ ne iyɔr utarev vɛ bugh ase afɔ mɔ amba ɛrɛn ghu iyɔr amban ɛn kɛ avo ahɛmba iyɔr Aonz. 9Mwa un ayom, teng usu utara hin ya ikar ghu utarev, ɔ ɛn ikiru gha iyɔr vɛ ɔzun kɔ ghi ahiye ungwen uru kpemkpem.
10“Ɔr ungwen angwe ghi isima ibɛrɛn kɔ ukwagh urara aru za ghi isima ibɛrɛn ukwagh utaan, ne ɔr ungwen angwe ghi isima ibɛrɛn ukwagh urara gha aru ghi isima ibɛrɛn ukwagh utaan gha. 11Ɔ ɛn uru isima ibɛrɛn ikɔrun usu utara gha, ka ana abe awaw usu tsɛb ghu uvo? 12Ɔ ɛn ungwe ghi isima ibɛrɛn ukwagh ɔr ugen gha, kɛ ana abe ana uwɛ uwow?
13“Ɔr utom umɔm abe ɛr uwun ahar utom gha. Ɔ ɛn a ɛr mɔ ɛr atsɔn umɔm ghɛshiya un ghu ugen, awa iyɔr ghu umɔm aka wa iyɔr ghu ugen gha. Ube uru wan utom una Aonz ghu una inarigh ukpɛ umɔm gha.”
14Ufarasi, amban ghɛ shiya avo ghɛ inarigh tsɛng, vɛ mgba akaa angan amem ne vɛ hingnye Jizɔs. 15Jizɔs akaa avo na, “Un amban ubu tɛsɛn kɔ ase iyɔro na umbun gbɛngang, kas mɔ Aonz afɔ asima a awon. Kɔ akaa angan iyɔr ahɛmban iwan iyɔr gha aa mɔ Aonz asɛna aa.
16“Mɛnna una Mosis ghɛ akaan aramenɛv ɛchi Aonz ka aa ne iyɔr vɛru ghi itsoghun kpem Jon ava. Hiye ukpɛ Jon, iyɔr amba ghi itsoghun urɛhɛ usɛ ghu utorov unav Aonz, iyɔr amba ghi isasɛn unɔrun. 17Utar ungun han ghi inya ghɛ ungun kɔisa ukar, kas imu umɔm kɔ ukaa Mɛnna atsuwa gha.
18“Hanamɔ ɔr ungwen abe ghi ɔz ghu ukwas una ta a ɔz ukwas ugen a ɛr ibur, ɔr ungwen a ɔz ukwas ungune abe ghi ɔz ghu Unom una a ɛr ibur.
Jizɔs atuwa ikan ɔr usu ghɛ Lazɔs
19“Ɔr usu ugen aru, ungune awayi akond ghi narigh itanɛgh angan agham ase aru ghu utor usov ghu usov. 20Kɔ uhunza ugar achiya una ɔr usu hun, ɔr uhuran ugen ungwen vɛ tayi na Lazɔs ghɛ avav iyɔr imem. 21Ɛnmɔ Lazɔs aru agbir hen ukeren na un aya avur akaa ayan angan agba inya kɔ utɛbur ɔr usu hun. Iwa ivayi inum avav ana.
22“Ahɔ akaren mɔ ichan ɔr ungumɔ akpo vudugɛr anav Aonz vɛ teng vɛ za ghu un kɔ ahiye una Abɛraham. Ɔr usu hun ashigh akpo vɛ yii un. 23Ajingɛjing una yov kɔ uzu ungun ungu pirin gha, aru yan ichan ken. Akond itogh isa a ɛn ghɛ Abɛraham marɛmb, ghɛ Lazɔs aru un ihan. 24Ne atah gbong, ‘Utir Abɛraham, kɔr ishon ghɛ amwe, tind Lazɔs hin aper mbɛ Unom-nom uvo kɔ ijɔr hin ava atsɔrum ghu nɛmber, itiyo ikaa mgwe ghi hiyan han ghu uzu.’
25“Kpa Abɛraham akaa ghu una, ‘Uwan uwam, umbur na ukpɛ ungwen uru umwa ukɔr akaa asɛ kɔ utar, kpa Lazɔs akɔr akaa abe. Ne hanagen angwe ghu utor, ne uwɛ ungwe ghi ichan. 26Ka akumɔ tas gha, kan ghu ukɔ ungwe idogh itan ingi ghɛ atɛ, amban kan vɛ abe vɛ ahungwa kɔ gha, amban kɔ vɛ abe ihungwan kan gha.’
27“Ɔr usu ungumɔ akaa na, ɔ ɛn ghɛru mɔ, ‘Mɛ kɔr uzɔ utir, tind Lazɔs kɔ achiya utir uwam. 28Mɛ ungwe ghɛ anomgban atan aza hin atumbwɛ avo utogh, na vɛ aka vayi han ghi ihiye ichana ungwen gha.’
29“Ne Abɛraham akaa na, ‘Amba kpa ghu Mosis ghɛ aramenɛv ɛchi Aonz; vɛ mgba avo.’
30“Ne Ɔr usu hun akaa na, ‘Cho utir Abɛraham; Ɔ ɛn ɔr kan ghɛ akponɛv aza ɔɔr avo, vɛ gɛma asɛma.’
31“Abɛraham akaa una, ‘Ɔ ɛn vɛ aka waiko ghu Mosis ghɛ aramenɛv ɛchi Aonz gha, kas ɔr ungwen aduwe kɔ akponov kpa vɛ gɛma asɛma gha.’ ”
Currently Selected:
Luk 16: UTA
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
