Los Hechos 11

Ndítuꞌun ra Pedro xiꞌin na kándixa Jesús ndóo ñuu Jerusalén xaꞌa chiñu ya íkan ra

1Saa ku̱u ku̱ndaa ini nda apóstol xiꞌin na kándixa Jesús na ndóo estado Judea, xaꞌa na köo kúu judío ya ndi̱kiꞌin tu na ikán va tuꞌun Ndioxi. 2Ñaa tá ndi̱ko koo ra Pedro ndi̱xaa ra ñuu Jerusalén ta xa̱á sava na judío ndíkun Jesús káꞌan kuachi na xaꞌa na köo kúu judío, xaꞌa ya köo tuni Ndioxi na ikán, 3káchi na saa:

―¿Ndachu i̱kan un saa? Ndi̱xaꞌan un veꞌe na köo kúu judío, xi̱xi un xiꞌin na. Väꞌa ndi̱kan un chi ndi̱xaꞌan un xi̱xi un xiꞌin na ta köo tuni Ndioxi kúu mií na ―káchi na xiꞌin ra Pedro.

4Saa ndi̱kuiin ra xa̱á ra ndítuꞌun ndiꞌi ra xiꞌin na ndá kuꞌva ndi̱xiyo xaꞌa ya, saa káꞌan ra xiꞌin na, káchi ra saa:

5―Tá ndi̱xiyo i ñuu Jope, ta íyo i káꞌan i xiꞌin Ndioxi, saa si̱tuvi ya nuu i. Xi̱ni i iin sábana chee vaxi nu̱u ya nuu ndivi ta núꞌni kumi saa nuu ya, vaxi nuu ya nuu i. 6Ñaa si̱kuꞌun nuu i xíto vaꞌa i ini ya unkua ñúꞌu, ta xi̱ni i ñúꞌu kiti kumi xaꞌa, xiꞌin kiti kueꞌe, xiꞌin kiti ñúu ndai tixin nuu ñuꞌú, tin kiti ndáchi. 7Ta saa xi̱ni soꞌo i ndi̱kaꞌan na xiꞌin i, káchi na saa: “Pedro, kundichi kaꞌni un iin kiti kuxi un”, káchi na xiꞌin i. 8Saa ndi̱kuiin i káꞌan i: “Küvi ikan i saa, Tata, chi köo xíxi i kuñu kiti yakua”, káchi i. 9Ñaa ndi̱kaꞌan tuku na xiꞌin i, káchi na saa: “Ñaꞌa ya nda̱sa yaa Ndioxi ta käꞌan un xaꞌa ya yakua ya”, káchi tachi na ikán xiꞌin i. 10Uni ichí ku̱u saa. Tá ndiꞌi ta ndi̱ko koo tuku sábana ikán kuaꞌan ya nuu ndivi. 11Tá ndiꞌi soꞌva si̱tuvi ya nuu i, ta ndi̱xaa uni nda taa ke̱e ñuu Cesarea veꞌe nuu ndi̱xiyo i ndákan tuꞌun nda xaꞌa i. 12Ñaa ndi̱kaꞌan Tachi I̱í Ndioxi xiꞌin i ya ná käka uvi ini i kuꞌun i xiꞌin nda. Saa ndi̱kiꞌin i kuaꞌan i xiꞌin nda, ndi̱xaꞌan tu sava nda taꞌan yo yóꞌó va xiꞌin i. Iñu ku nda ndi̱xaꞌan xiꞌin i. Ndi̱xaa nde veꞌe iin ra náni Cornelio. 13Ta ndi̱tuꞌun ra ikán xiꞌin nde ndá kuꞌva ndi̱tuvi iin tatun Ndioxi veꞌe ra. Ndi̱tuvi ya ndíchi ya nuu ra ta ndi̱kaꞌan ya xiꞌin ra, káchi ya saa: “Tiꞌvi sava nda taa ná kuꞌun nda ñuu Jope ndikiꞌin nda ra Simón ra káꞌan na xiꞌin Pedro ná kixi ra xiꞌin nda. 14Ta ra ikán ku ra ndituꞌun xiꞌin un unkua xíniñuꞌu un ikan un ya kuchiñu un kaku un xiꞌin ndiꞌi na veꞌe un”, káchi tatun Ndioxi xiꞌin ra, che. 15Tá xa̱á i káꞌan i xiꞌin na ta xa̱a tu Tachi I̱í Ndioxi sata na ikán va. Tá kuꞌva xa̱a núnu̱ú ya sata yoo na judío, saa ki̱xi tu ya sata na köo kúu judío ikán va. 16Ta saa ndi̱kaꞌán ini i ya ndi̱kaꞌan Tata yo Jesús tá ndi̱kaꞌan ra xiꞌin yo xi̱taꞌan xiꞌin ra: “Ra Juan ta ya ndaa kua si̱kuchi ra naꞌa xiꞌin tikuii, sundi ndóꞌo̱ ta vaxi kivi kuchi ndo xiꞌin Tachi I̱í Ndioxi”, káchi ra xiꞌin yo. 17Tá i̱kan Ndioxi xiꞌin yoo, saa i̱kan tu ra xiꞌin na ikán va. Ta̱xi ra Tachi ra ndaꞌa na kándixa Tata yo Jesucristo. ¿Ta unku vi yeꞌe ya ndikasi i nuu Ndioxi täxi ra Tachi ra ndaꞌa na? ―káchi ra Pedro xiꞌin na.

18Tá xi̱ni soꞌo na ya ndi̱kaꞌan ra Pedro, ta ku̱taxin yuꞌu na. Ñaa xa̱á káꞌan na ya vaꞌa xaꞌa Ndioxi, káchi na saa:

―Tá tu saa ku̱u, ta kúni kachi ya, nda na köo kúu judío va ta̱xi Iva yo Ndioxi ichí ndaꞌa ya ndiko koo ini na xaꞌa kuachi na, ta saa kutaku na xiꞌin ra ―káchi na.

Soꞌva ku̱u tá ndi̱xaa tuꞌun Ndioxi nuu na ñuu Antioquía

19Tá kivi xa̱ꞌni na chiñu ra Esteban, ta saa ku nu xa̱á ndóꞌo ni na ndíkun Jesús, xaꞌa ya ikán kua ndi̱xita ndiꞌi na kuaꞌan na. Ta sava na ikán xi̱nu na kuaꞌan na chí estado Fenicia xiꞌin ñuu Chipre tin ñuu Antioquía. Ta iin iin ñuu nuu kuaꞌan na ndítuꞌun na tuꞌun vaꞌa xaꞌa Ndioxi. Ndisaa xiꞌin na judío ndítuꞌun na köo ndítuꞌun na xiꞌin inka naꞌa. 20Sundi sava na kándixa Jesús na ke̱e ñuu Chipre xiꞌin na ke̱e ñuu Cirene ndi̱xaa na ñuu Antioquía ta na ikán ku na xa̱á ndítuꞌun tuꞌun vaꞌa xaꞌa Tata yo Jesús xiꞌin na griego na köo kúu judío. 21Ta Ndioxi ta̱xi ra ndee ra ndaꞌa na káꞌan ndoso tuꞌun ra. Ta kuaꞌa ni naꞌa xi̱ni soꞌo tuꞌun ya ndi̱kaꞌan ndoso na ikán, si̱ndoo ichí ya kándixa na, ta ndi̱kundikun na ichí Tata yo.

22Ta saa ku̱ndaa ini na kándixa Jesús ndóo veꞌe ñuꞌu ñuu Jerusalén ya xa̱á na köo kuu judio kándixa na Jesús. Ñaa ti̱ꞌvi na ra Bernabé kuaꞌan ra nda ñuu Antioquía. 23Tá ndi̱xaa ra Bernabé ikán ta xi̱ni ra ya kuaꞌa ni ya vaꞌa íkan Ndioxi xiꞌin na, ñaa kúsini ni ra. Ta saa ndi̱xaꞌa ra ndee xiꞌin na ya ndinuꞌu ni ini na ná kundikun na ichí Tata yo, ta vitin taan ná kandixa ka ñaꞌa na, káchi ra xiꞌin na. 24Vaꞌa ni taa ku mií ra Bernabé ta ndee ni ndee íyo Tachi I̱í Ndioxi xiꞌin ra, saa ndáa ni ini ra xíni ra Ndioxi. Ta kuaꞌa ni na xi̱ni soꞌo ya ndi̱kaꞌan ra ndi̱kundikun na ichí Tata yo.

25Sindiꞌi ikán ta ke̱e ra Bernabé kuaꞌan ra chí ñuu Tarso nduku ra ra Saulo, tá ndi̱taꞌan ñaꞌa ra saa ndi̱kundaka ra ra kuaꞌan ra xiꞌin ra ñuu Antioquía. 26Ta iin kuiya níi ndi̱xiyo nda xiꞌin na kándixa Jesús ñuu ikán. Ta kuaꞌa ni naꞌa sínaꞌa nda. Ta ñuu ikán ku nu núnu̱ú ndi̱kaꞌan naꞌa xiꞌin na kándixa Jesús nani na Cristiano.

27Tá íyo ra Bernabé xiꞌin ra Saulo ñuu Antioquía ikán saa ndi̱xaa sava nda ke̱e ñuu Jerusalén, nda káꞌan tuꞌun yuꞌu Ndioxi. 28Saa si̱kaꞌán Ndioxi ini iin ra ikán, Agabo nani ra ta ndi̱kundichi ra nuu na taꞌan ra na kándixa Jesús, xa̱á ra káꞌan ra, káchi ra saa:

―Koo tama chee ni ndiꞌi ni kuu ñuu ya ndíkun ndaa ñuu Roma ―káchi ra.

Ta saa ndixa ndi̱xiyo, xa̱á tama tiempo ku̱u ra Claudio rey. 29Saa xi̱ni soꞌo na tuꞌun Ndioxi ya ndi̱kaꞌan ra Agabo, ñaa chi̱taꞌan tuꞌun na tiꞌvi na xuꞌun kuꞌun ndaꞌa na taꞌan na ndóo Judea. Tá kuꞌva náni ndaꞌa iin iin na, saa íyo ya ta̱xi na. 30Saa ndi̱xiyo ya i̱kan na, ta ta̱xi na xuꞌun ikán ndaꞌa ra Bernabé xiꞌin ra Saulo, kuaꞌan xiꞌin nda taxi nda ndaꞌa na xikuaꞌa na kándixa Jesús ndóo estado Judea.

Currently Selected:

Los Hechos 11: xta

Highlight

Copy