Los Hechos 10

Ndíkani ra Pedro nuu ra Cornelio tuꞌun xaꞌa Jesús

1Ta íyo iin ra náni Cornelio ñuu Cesarea, kúu mií ra chiñu nuu iin ciento tiꞌvi nda lapa ñuu Roma. Ta tiꞌvi nda ikán káꞌan na xiꞌin Batallón Italiano. 2Ta káñuꞌu ni ra Cornelio Ndioxi saa tu na veꞌe va ra, káñuꞌu ni na Ndioxi. Saa chíndee ni ra na judío, na ndaꞌvi, ta káꞌan ni ra xiꞌin Ndioxi. 3Ta iin kivi kuꞌva kàà uni xikuaa si̱tuvi ya nuu ra, xi̱ni ra iin tatun Ndioxi ndi̱kiꞌvi ya ini veꞌe nuu ndíkaa ra. Ta saa ndi̱kaꞌan ya xiꞌin ra, káchi ya saa:

―¡Tata Cornelio! ―káchi ya xiꞌin ra.

4Saa ndi̱koto ra nuu tatun ikán, íꞌvi ka vi ra. Saa ndi̱kaꞌan ra, káchi ra saa:

―¿Unkua kúni un, Tata? ―káchi ra.

Saa ndi̱kuiin tatun ikán káꞌan ya xiꞌin ra:

―Xi̱ni soꞌo ndiꞌi Ndioxi ya ndi̱kaꞌan un xiꞌin ra ta xi̱ni tu ra ya vaꞌa íkan un xiꞌin na ndaꞌvi va. 5Yakan vitin ta tiꞌvi naꞌa ná kuꞌun na ñuu Jope ndikiꞌin na ra Simón kixi ra xiꞌin na, ta káꞌan tu na xiꞌin ra Pedro va. 6Ta íyo ra veꞌe iin taa ra xáa chiñu xiꞌin iín kiti ta Simón náni tu ra ikán va. Ta yati yuꞌu nduta ñûꞌu íyo veꞌe ra ikán. Ta veꞌe ra ikán kua íyo ra Simón Pedro ta ra ikán ku ra kaꞌan xiꞌin un unkua xíniñuꞌu un ikan un ―káchi tatun Ndioxi xiꞌin ra Cornelio.

7Saa ke̱e tatun ikán kuaꞌan ya. Tá ke̱ta ya kuaꞌan ya ta ka̱na ra Cornelio uvi nda xáa chiñu nuu ra xiꞌin iin ra lapa. Ta ra lapa ikán káñuꞌu ni tu ra ikán va Ndioxi, ta vaꞌa ni íyo yuꞌu ra xiꞌin ra Cornelio. 8Ka̱na ra nda ikán ta ndi̱tuꞌun ra xiꞌin nda xaꞌa ya ndi̱kaꞌan tatun Ndioxi xiꞌin ra. Tá ndi̱ꞌi ndi̱tuꞌun ra xiꞌin nda, ta ti̱ꞌvi ra nda kuaꞌan nda ñuu Jope.

9Ñaa ndi̱tuvi inka kivi tá xa kúyati nda xaa nda ñuu Jope ikán, saa nda̱a ra Pedro sata veꞌe ya káꞌan ra xiꞌin Ndioxi, ta kua kuꞌva kàà uxi uvi nduvi. 10Saa xa̱á káꞌun ka vi ini ra, kúni kuxi ra. Nani tá xáa ndúvi na ñaꞌa kuxi ra ta saa si̱tuvi ya nuu ra. 11Xi̱ni ra xa̱á xúna nuu ndivi ta ke̱ta iin ñaꞌa tá káá sábana chee ni saa káa ya, ta núꞌni kumi saa nuu ya váxi nu̱u ya nuu ñuꞌú. 12Ta ñúꞌu kiti ini ya, nda tá nuu ri ñúꞌu ini ya. Kiti kumi xaꞌa tin kiti ñúu ndai tixin nuu ñuꞌú xiꞌin kiti ndáchi. 13Ñaa xi̱ni soꞌo ra Pedro tachi iin naꞌa, ndi̱kaꞌan na xiꞌin ra káchi na saa:

―Pedro, kundichi, kaꞌni un iin kiti kuxi un ―káchi na xiꞌin ra.

14Saa ndi̱kuiin ra káꞌan ra:

―Tata küvi kuxi i ri ñaa, chi kiti yakua ku rí ta nda iin taꞌan ri ñaa köo xíxi i ―káchi ra.

15Saa xi̱ni soꞌo tuku ra táchí na ichí uvi káꞌan na xiꞌin ra, káchi na saa:

―Kiti xa nda̱sa yaa Ndioxi ta käꞌan un xaꞌa ri yakua ri ―káchi tachi na xiꞌin ra.

16Uni ichí xi̱ni soꞌo ra tuꞌun ikán, ta saa ndi̱ko koo tuku sábana ikán kuaꞌan ya nuu ndivi. 17Saa ndi̱kunduꞌu ra Pedro ndíꞌi ka vi ini ra unkua kúni kachi ya xi̱ni ra. Ndíkani ini ra índuꞌu ra, ta saa ndi̱xaa nda ti̱ꞌvi ra Cornelio mí ñuu Jope ikán. Saa ndi̱ndakan tuꞌun nda mií íyo veꞌe ra Simón, ta xa ndi̱xaa nda ndíta nda yeꞌe ra. 18Tá ndi̱xaa nda veꞌe ra ikán ta ndee ka vi ndi̱kaꞌan nda, káchi nda saa:

―¿Án yóꞌó íyo ra náni Simón, ra káꞌan na xiꞌin Pedro? ―káchi nda.

19Saa xíka ni ini ra Pedro xaꞌa ya xi̱ni ra, ta ndi̱kaꞌan Tachi I̱í Ndioxi xiꞌin ra, káchi ya saa:

―Koto un, ñaa xa̱a uni nda taa ndúku nda yóꞌó. 20Vaꞌa nuu un kuꞌun un xiꞌin nda, ta käka uvi ini un kuꞌun un xiꞌin nda saa chi yeꞌe ti̱ꞌvi nda vaxi nda ―káchi Tachi I̱í Ndioxi xiꞌin ra.

21Saa nu̱u ra Pedro ndi̱xaa ra nuu ndíta nda, ta ndi̱kaꞌan ra xiꞌin nda, káchi ra saa:

―Yeꞌe ku ra ndákan tuꞌun ndo xaꞌa. ¿Ndá chiñu kúni ndo yeꞌe? ―káchi ra xiꞌin nda.

22Saa ndi̱kuiin nda káꞌan nda:

―Ra Cornelio, ra xáꞌnda chiñu nuu iin ciento nda lapa ñuu Roma ku ra ti̱ꞌvi ndeꞌe vaxi nde nuu un. Vaꞌa ni taa ku mií ra ikán, káñuꞌu ni ra Ndioxi ta ndiꞌi na judío vaꞌa ni káꞌan na xaꞌa ra. Ta ndi̱tuvi iin tatun ya i̱í nuu ra ndi̱kaꞌan ya xiꞌin ra ya ná tiꞌvi ra ndeꞌe kixi nde nuu un kaꞌan nde xiꞌin un kuꞌun un veꞌe ra ndituꞌun un xiꞌin ra ta kuni soꞌo ra tuꞌun ya kaꞌan un xiꞌin ra ―káchi nda ikán xiꞌin ra Pedro.

23Ta saa ndi̱kaꞌan ra xiꞌin nda ndi̱kiꞌvi nda veꞌe. Ñaa ndi̱ndoo nda ndi̱kixi nda ñǔu ikán. Ta inka kivi ndi̱tuvi xitaan ndi̱kiꞌin ra Pedro kuaꞌan ra xiꞌin nda, kuaꞌan tu sava na kándixa Jesús ndóo ñuu Jope ikán va xiꞌin ra.

24Inka kivi ndi̱xaa nda ñuu Cesarea nuu íyo ra Cornelio. Ndi̱kitaꞌan ra íyo ra xiꞌin ndiꞌi na taꞌan ra xiꞌin na itaꞌan vaꞌa ni xiꞌin ra, ndóo na ndátun na ra Pedro. 25Tá ndi̱xaa ra Pedro veꞌe ra Cornelio, ta ke̱ta ra ikán ndi̱kiꞌin ñaꞌa ra si̱kusiti ra nuu ra ya xáa kaꞌnu ñaꞌa ra. 26Ñaa nda̱niꞌi ñaꞌa ra Pedro ndi̱kaꞌan ra xiꞌin ra, káchi ra saa:

―Kundichi, küsiti un nuu i saa chi tá káa yóꞌo̱ saa káa tu yeꞌe va ―káchi ra xiꞌin ra.

27Káꞌan ka ra xiꞌin ra Cornelio, ta saa ndi̱kiꞌvi ra ini veꞌe, ñaa xi̱ni ra na ndi̱kaya ndóo xiꞌin ra Cornelio. 28Ñaa ndi̱kaꞌan ra xiꞌin na, káchi ra saa:

―Xíni mií ndo, ndeꞌe raza na judío ta küvi ndi̱kitaꞌan nde xiꞌin na án kuyati nde nuu na köo kúu judío, chi na yakua ku na nuu nde, káꞌán nde. Sundi Ndioxi ta si̱tuvi ra nuu i ndi̱kaꞌan ra xiꞌin i: küvi kaꞌan nde xiꞌin nda iin naꞌa ya yakua na. 29Xaꞌa ya ikán kua köo ndi̱xindatun i tá ku̱ndaa ini i ya kána un yeꞌe, ta ndikun ndi̱kiꞌin i vaxi i. ¿Ta vitin kúni i kundaa ini i ndá xaꞌa kua kána un yeꞌe vaxi i? ―káchi ra Pedro xiꞌin ra Cornelio.

30Ta saa ndi̱kuiin ra káꞌan ra:

―Ná ndituꞌun i xiꞌin un unkua ndo̱ꞌo i. Xa xínu kumi kivi kua índuꞌu i veꞌe i, tá kuꞌva kàà uni kua íyo i xíxi suꞌun i ta káꞌan i xiꞌin Ndioxi xikuaa, ta ndi̱tuvi iin taa nuu i, yéꞌe̱ ka vi toto ndíxi ra. 31Ndi̱kaꞌan ra xiꞌin i, káchi ra saa: “Tata Cornelio, xi̱ni soꞌo Ndioxi ya káꞌan un xiꞌin ra saa xi̱ni ra ya íkan un xiꞌin na ndaꞌvi. 32Ta vitin tiꞌvi un naꞌa ná kuꞌun na ñuu Jope ndikiꞌin na ra Simón, ra káꞌan na xiꞌin Pedro íyo ra veꞌe iin ra náni Simón ra xáa chiñu xiꞌin iín kiti, ta yati yuꞌu nduta ñûꞌu íyo veꞌe ra ikán. Tá ná kixi ra, ta ndituꞌun ra xiꞌin un”, káchi tatun ikán xiꞌin i. 33Tá ndi̱kaꞌan ya xiꞌin i ta ndikun ti̱ꞌvi i nda yóꞌó kuaꞌan nda ndikiꞌin nda yóꞌo̱. Vaꞌa ni kúu xa̱a un, ndi̱xaꞌvi un xaꞌa ya vaxi un. Ta vitin ndi̱kitaꞌan ndiꞌi nde ndóo nde kúni nde kuni soꞌo nde ya ndi̱kaꞌan Ndioxi xiꞌin un kaꞌan un xiꞌin nde ―káchi ra Cornelio xiꞌin ra Pedro.

Ya káꞌan ndoso ra Pedro veꞌe ra Cornelio

34Saa xa̱á ra Pedro káꞌan ra xiꞌin na, káchi ra saa:

―Vitin ku̱ndaa ini i, Ndioxi ta köo ndi̱kaxin ra naꞌa, iin káchi ndáa yaꞌvi ndiꞌi yo nuu ra. 35Saa chi kúꞌvi ni ini ra xíni ra ndiꞌi ni kúu na káñuꞌu ñaꞌa ta íkan na ya vaꞌa, köo kíꞌin ra kuenta ndá ñuu ku na. 36Ta ndi̱kaꞌan Ndioxi xiꞌin ndeꞌe judío, tá ti̱ꞌvi ra Tata yo Jesucristo ki̱xi ra ndi̱kaꞌan ndoso ra tuꞌun vaꞌa ya táxi koo vaꞌa ni ini yo, chi ra ikán ku ra xáꞌnda chiñu nuu ndiꞌi yo ―káchi ra Pedro xiꞌin na.

37Saa káꞌan ka ra xiꞌin na, káchi ra saa:

―Xa ku̱ndaa va ini mií ndo unkua ku̱u ndiꞌi ni kúu ñuu ya ndíkun ndaa estado Judea chi xa ndi̱xita ndiꞌi va tuꞌun xaꞌa Jesús ra ñuu Nazaret, saa xa̱á káꞌan ndoso ra tuꞌun Ndioxi ñuu Galilea. Ta ndiꞌi ya yóꞌó ku̱u tá si̱ndiꞌi ra Juan si̱kuchi ra naꞌa. 38Ta xi̱ni soꞌo ndo ndá kuꞌva ta̱xi Ndioxi ndee ndaꞌa Jesús ndu̱ndee ra xiꞌin Tachi I̱í Ndioxi ya xa̱a ndúvi ra chiñu nuu Ndioxi. Ta nina ya vaꞌa i̱kan Jesús saa chi Ndioxi íyo xiꞌin ra. Ta ndi̱xika ra si̱ndaꞌa ra na kúꞌvi, saa chi̱ndee ra na kúu mií tachi nduvaꞌa. 39Yeꞌe xiꞌin nda taꞌan i ku nde kúu testigo xaꞌa ndiꞌi ya vaꞌa i̱kan Jesús ñuu Jerusalén xiꞌin ndiꞌi ka ñuu ya ñúꞌu estado Judea. Xaꞌa ya vaꞌa i̱kan ra ta xa̱ꞌni ñaꞌa na, chi̱nuu na ra nuu itun cruzin, ta ikán ndi̱xiꞌi ra. 40Sundi Ndioxi ta si̱nditaku ñaꞌa ra, ndi̱taku ra kivi uni. Si̱tuvi Ndioxi ra nuu nde. 41Ta süvi ndiꞌi na ndi̱situvi Ndioxi ra nuu. Ndisaa nuu ndeꞌe nda ndi̱kaxin Ndioxi kuu testigo, ku nde si̱tuvi ra nuu chi ndeꞌe ku nde xi̱xi xiꞌin Jesús tá ndi̱taku ra. 42Ta ti̱ꞌvi ra ndeꞌe kaꞌan ndoso nde tuꞌun Ndioxi tin ndituꞌun nde xiꞌin na xaꞌa Jesús chi ndaꞌa ra ikán kua ta̱xi Ndioxi ichí ya taxi ra kuachi xaꞌa na íyo kuachi ta saña ra na köo kuachi, saa ikán ra xiꞌin na táku tin na ndíi. 43Xa yachi ndi̱kaꞌan nda káꞌan ndoso tuꞌun yuꞌu Ndioxi xaꞌa Jesús, ndi̱kaꞌan nda tá ná kandixa ñaꞌa na ta xaa kaꞌnu ini ra xaꞌa kuachi na xiꞌin kivi ra ―káchi ra Pedro xiꞌin na.

Ndíkiꞌin na köo kúu judío Tachi I̱í Ndioxi

44Káꞌan ka ra Pedro ta nu̱u Tachi I̱í Ndioxi sata na xíni soꞌo ya káꞌan ra. 45Ñaa iin ndi̱kanda ini nda judío, nda kándixa ni ya xíniñuꞌu ndikunuu tuni Ndioxi naꞌa, xíto nda ya xa̱a tu Tachi I̱í Ndioxi sata na köo kúu judío va. 46Saa chi xi̱ni soꞌo nda káꞌan na ikán inka nuu tuꞌun, saa káꞌan ni na ya vaꞌa xaꞌa Ndioxi. 47Saa ndi̱kaꞌan ra Pedro, káchi ra saa:

―Tá kúu yoo ndi̱kiꞌin yo Tachi I̱í Ndioxi ta chi̱chi yo, ta saa tu na yóꞌó va, ndi̱kiꞌin na Tachi I̱í Ndioxi. Ta unku vi yoo ya kasi yo nuu na täxi yo kuchi na. Vaꞌa kuchi tu na yóꞌó va ―káchi ra.

48Ñaa xa̱ꞌnda ra chiñu ya kuchi na ikán tixin kivi Jesús. Ta saa ndi̱xikan na ya mani nuu ra Pedro xiꞌin nda kuaꞌan xiꞌin ra ya ndoo nda koo nda soo uvi ndaa ka kivi xiꞌin na.

Currently Selected:

Los Hechos 10: xta

Highlight

Copy