Los Hechos 9

Ya ku̱u nuu xa̱á ndíkun ra Saulo ichí Jesús

(Hch. 22:6-16; 26:12-18)

1Ta ra Saulo xíka ra káꞌan ra ya sindiꞌi xaꞌa ndiꞌi ra na kándixa Tata yo Jesucristo. Iin kaꞌni yaa ra na, káchi ra. Xaꞌa ya ikán kua ke̱e ra ndi̱xaꞌan ra nuu sutu, ra ínuu nuu ndiꞌi nda sutu. 2Ndi̱xaꞌan ra ndúku ra tutu ya ndikuiin xaꞌa ra kuꞌun ra veꞌe ñuꞌu sinagoga ya ñúꞌu ñuu Damasco, ya ná taxi nda ichí ndaꞌa ra kiꞌvi ra ini ndiꞌi veꞌe ñuꞌu sinagoga tiin ra na ndíkun ichí Jesús, taa ku nda, ñaꞌa ku ná ta iin tiin yaa ra na taan ra veꞌe kàà ñuu Jerusalén, káchi ra. 3Ta saa ke̱e ra kuaꞌan ra. Tá xa kuaꞌan kúyati ra xaa ra ñuu Damasco, ta iin ku̱u soꞌva ke̱ta iin ñu̱ꞌu̱ nuu ndivi ta iin ndi̱yeꞌe taxan ni. Ñaa ndi̱kava nduu ndiꞌi ya sata ra. 4Saa ndu̱va ra kuaꞌan ra nuu ñuꞌú, ta xi̱ni soꞌo ra iin tachi taa káꞌan ya xiꞌin ra, káchi ya saa:

―Saulo, Saulo, ¿ndachu xíka un sítixuꞌvi un yeꞌe? ―káchi ra xiꞌin ra.

5Saa ndi̱kuiin ra káꞌan ra, saa:

―¿Unku yóꞌo̱, Tata? ―káchi ra.

Ñaa ndi̱kuiin ra káꞌan ra:

―Yeꞌe ku Jesús, ra xáa nduvaꞌa un xiꞌin, ¿ta ndachu sítixuꞌvi un mií un? ta íkan un tá íkan sindiki ri kéta xaꞌa itun káni na ri ―káchi ra xiꞌin ra Saulo.

6Ñaa xa̱á kísi ya ra íꞌvi ka vi ra, saa ndi̱kuiin ra káꞌan ra:

―¿Unkua ikan i kúni un, Tata? ―káchi ra.

Ta saa ndi̱kuiin Tata yo Jesús ndi̱kaꞌan ra xiꞌin ra, káchi ra saa:

―Kuandikoo, ta ná xaa un ñuu Damasco, ta ñaa kaꞌan na xiꞌin un unkua xíniñuꞌu un ikan un ―káchi Jesús xiꞌin ra.

7Ta ndi̱ndiꞌvi ka vi nda ítaꞌan kuaꞌan xiꞌin ra, chi xi̱ni soꞌo nda tachi taa ikán ndi̱kaꞌan ya xiꞌin ra Saulo, sundi nda iin naꞌa köo ndi̱xini nda. 8Ñaa ndi̱kundichi ra Saulo, xúna ra nuu ra, ndúku ra koto ra ta köo ndi̱kuvi ka koto ra. Saa ti̱in nda kuaꞌan xiꞌin ra ndaꞌa ra, ta ndi̱kundaka ñaꞌa nda kuaꞌan ra xiꞌin nda ñuu Damasco. 9Ikán xi̱nduꞌu ra, ta ni köo ndi̱kuvi koto ra uni kivi, ni köo ndi̱xixi ra ni tikuii köo ndi̱xiꞌi ra. Saa ndi̱xiyo ra xi̱nduꞌu ra.

10Ta ndi̱tuvi Tata yo Jesús nuu iin ra íyo mi ñuu Damasco ikán ta ra ndíkun Jesús ku ra Ananías nani ra, saa ndi̱kaꞌan Jesús xiꞌin ra, káchi ra saa:

―Ananías ―káchi ra.

Saa ndi̱kuiin ra Ananías káꞌan ra:

―¿Unkua kúni un, Tata?, yóꞌó íin i ―káchi ra.

11Saa ndi̱kaꞌan Tata yo Jesús xiꞌin ra:

―Kundichi kuáꞌan ichí ya náni Ichí Kuáꞌá. Ta ichí ikán íyo veꞌe iin ra náni Judas, ta veꞌe ra ikán ndakan tuꞌun un xaꞌa ra Saulo, ra ke̱e ñuu Tarso, saa chi vitin íyo ra ikán káꞌan ra xiꞌin i. 12Ta si̱tuvi ya nuu ra xi̱ni ra yóꞌo̱ ndi̱xaa un chínuu ndaꞌa un xiní ra ta ndi̱nuna nuu ra túvi ra ―káchi Jesús xiꞌin ra Ananías.

13Saa ndi̱kuiin ra Ananiás ikán káꞌan ra xiꞌin Jesús, káchi ra saa:

―Tata, xa kuaꞌa ni naꞌa ndítuꞌun xaꞌa ra Saulo ya xáa nduvaꞌa ni ra xiꞌin na taꞌan i na ndíkun yóꞌo̱, na ndóo ñuu Jerusalén. 14Ta vitin xa̱a ra xiꞌin iin tutu ya si̱kuaꞌa nda sutu naꞌnu nuu táxi nda ichí ndaꞌa ra ya ná tiin ndiꞌi ra na ndíkun yóꞌo̱ taan ra veꞌe kàà, che ―káchi ra Ananías xiꞌin Jesús.

15Saa ndi̱kuiin Tata yo Jesús káꞌan ra:

―Kuáꞌan koto un ra, chi ra ikán ku ra ndi̱kaxin i kuꞌun ra ndituꞌun ra xaꞌa i xiꞌin naꞌa na köo kúu judío, saa ndituꞌun tu ra xiꞌin nda rey va. Saa kuꞌun tu ra ndituꞌun ra xaꞌa i xiꞌin na judío va. 16Saa chi yeꞌe ta sinaꞌa i ra ndá kuꞌva xíniñuꞌu ra ndoꞌo ni ra xaꞌa kivi i ―káchi Jesús xiꞌin ra Ananías.

17Saa ke̱e ndixa ra ikán kuaꞌan ra veꞌe nuu íyo ra Saulo. Ndi̱xaa ra chi̱nuu ndaꞌa ra xiní ra, ta ndi̱kaꞌan ra xiꞌin ra, káchi ra saa:

―Ñani Saulo, Tata yo Jesús, ra ndi̱tuvi nuu un tá vaxi un ichí, ra ikán ku ra ti̱ꞌvi yeꞌe vaxi i kaꞌan i xiꞌin un ya ná ndikuna tuku nuu un, ta ndikiꞌin un Tachi I̱í Ndioxi koo ya xiꞌin un ―káchi ra Ananías xiꞌin ra Saulo.

18Tá ndi̱kaꞌan ra saa xiꞌin ra ta iin ku̱u soꞌva ndi̱koyo ñaꞌa nuu ra, tá íin ndiuchi sata tiaka, saa íin ya ndi̱koyo nuu ra. Ñaa ndi̱kuna nuu ra. Ta saa ndi̱kundichi ra, ñaa si̱kuchi ñaꞌa ra Ananías. 19Saa xi̱xi ra ta ndi̱kiꞌin ra ini ra. Ñaa ndi̱ndoo ra ndi̱xiyo ra soo uvi ndaa ka kivi xiꞌin na ndíkun Jesús, ndóo mi ñuu Damasco ikán.

Káꞌan ndoso ra Saulo tuꞌun xaꞌa Jesús ñuu Damasco

20Ta saa ndikun xa̱á ra káꞌan ndoso ra xaꞌa Cristo ini veꞌe ñuꞌu sinagoga mi ñuu Damasco ikán, káꞌan ndoso ra xaꞌa ra ya kúu ra Seꞌe Ndioxi ―káchi ra xiꞌin na.

21Ta ndíkanda ka vi ini na xíto na nuu ra. Ñaa xa̱á na káꞌan na:

―¿Án süvi ra xáa nduvaꞌa xiꞌin na kándixa ni Jesús ndóo ñuu Jerusalén ku ra yóꞌó? Suvi xaꞌa ya ñaa vaxi ra tiin ra na kuꞌun na xiꞌin ra taxi ra kuachi xaꞌa na ndaꞌa nda sutu naꞌnu ñuu ikán ―káchi na ikán soꞌva.

22Ta ndinuni loꞌo ka káꞌan ra xiꞌin na xaꞌa Jesús, ñaa iin ndisaka soꞌva ini na judío ndóo ñuu Damasco ikán. Chi ndíkani ra nuu na ya kúu Jesucristo ra ti̱ꞌvi Ndioxi vaxi sikaku yoo.

Táva sêꞌe na ra Saulo kuaꞌan ra

23Sindiꞌi ndi̱yaꞌa kuaꞌa ni kivi, ta chi̱taꞌan tuꞌun sava na judío ya kaꞌni na ra Saulo. 24Saa ku̱ndaa ini ra ya xíka na ndáa ñaꞌa na. Nduvi niuun ndóo na ndáa na ra yeꞌe ya kuakiꞌvi ñuu na, ya kaꞌni ñaꞌa na. 25Ta iin ñǔu ndi̱kitaꞌan na kándixa Jesús, ki̱ꞌin na ra Saulo chi̱kaa na ini iin itun tika. Ñaa si̱nuu sêꞌe na ra sata nama ñuu ikán. Saa ku̱u nuu ndi̱kaku ra ke̱ta ra kuaꞌan ra.

Ndi̱ko koo ra Saulo ndi̱xaa ra ñuu Jerusalén

26Saa tá ndi̱xaa ra Saulo ñuu Jerusalén ta ku̱ni ra ndikitaꞌan ra xiꞌin na ndíkun Jesús, ndóo ikán. Ta köo ndi̱xiin na kutaꞌan na xiꞌin ra chi íꞌvi na nuu ra. Süvi ya ndixa kua ndi̱kundikun ra Jesús, káꞌán na. 27Ta iin ra ndíkun Jesús ku ra chi̱ndee ra Saulo, Bernabé náni ra. Ra ikán ku ra ndáka ra ndi̱xaꞌan ra xiꞌin ra nuu nda apóstol. Saa ndi̱tuꞌun ra xiꞌin nda ya ndi̱tuvi Jesús nuu ra tá kuaꞌan ra ichí ta ndi̱kaꞌan ra xiꞌin ra. Yakan tá ndi̱xiyo ra ñuu Damasco ta köo ndi̱ndiꞌvi ra, ndinuni loꞌo ndi̱kaꞌan ndoso ra tuꞌun xaꞌa Jesús ―káchi ra Bernabé xiꞌin nda.

28Tá xi̱ni soꞌo nda tuꞌun ikán, saa ndi̱xinu ini nda ndi̱ndoo ra Saulo xiꞌin nda ñuu Jerusalén. Ñaa ndi̱kitaꞌan ra xíka ra xiꞌin nda. 29Ndinuni loꞌo ndítuꞌun ra xaꞌa Tata yo Jesús xiꞌin naꞌa, ta ni köo íꞌvi ra káꞌan ra xiꞌin na judío, na káꞌan tuꞌun griego, ta na ikán ndúku na kuꞌva kaꞌni na ra. 30Tá xi̱ni na ndíkun Jesús ya kúni na ikán kaꞌni na ra, ñaa ndi̱kiꞌin na ra kuaꞌan xiꞌin na chí ñuu Cesarea. Ta ikán ti̱ꞌvi na ra kuaꞌan ra chí ñuu Tarso.

31Sindiꞌi ikán ta köo ka na ndi̱xaa nduvaꞌa xiꞌin na ndíkun ichí Jesús, na ndóo Judea tin na ndóo Galilea xiꞌin na ndóo Samaria. Vaꞌa ni xi̱ndoo na. Káñuꞌu ni na Ndioxi. Ta mií Tachi I̱í Ndioxi chíndee na, ñaa ndúndee ka na kándixa na Jesús. Ta saa ndúkuaꞌa tu na ndíkundikun ichí va ra.

Síndaꞌa ra apóstol Pedro iin ra náni Eneas

32Saa ku̱u ke̱e ra Pedro kuaꞌan ra iin iin ñuu, xíka ra xíto ra na ndíkun Jesús. Saa ndi̱xaa tu ra xíto ra na ndóo nda ñuu Lida va. 33Tá ndi̱xaa ra ikán, ta ndi̱taꞌan ra iin ra náni Eneas, ra ndu̱chiꞌña xaꞌa ku ra ta xa ndi̱xinu una kuiya índuꞌu ra nuu xito, küvi kaka ra. 34Saa ndi̱kaꞌan ra Pedro xiꞌin ra, káchi ra saa:

―Tata Eneas, vitin síndaꞌa Jesucristo yóꞌo̱. Kuándikoo, ndaniꞌi un xito un ―káchi ra xiꞌin ra.

Tá ndi̱kaꞌan soꞌva ra xiꞌin ra, ta saa ndikun ndi̱koo ra, ndu̱vaꞌa ra. 35Tá ku̱ndaa ini ndiꞌi mií na ñuu Lida ikán xiꞌin na ndóo ñuu Sarón ya ndu̱vaꞌa ra ikán, ta ndi̱kundikun na ichí Jesús.

Si̱taku ra Pedro iin yá náni Dorcas

36Ta kivi ikán íyo iin yá kándixa Jesús ñuu Jope náni yá Tabita, ta tuꞌun griego kúni kachi ya Dorcas. Ta nina ya vaꞌa íkan yá, chíndee ni yá na ndaꞌvi. 37Ñaa ki̱ꞌin kueꞌe yá, ta ndi̱xiꞌi yá. Saa si̱kuchi na ikin kuñu yá, ta ki̱ꞌin na ya chi̱nduꞌu na piso ni̱nù. 38Ta yati ndíkaa ñuu Jope xiꞌin ñuu Lida nuu íin ra Pedro. Ñaa ku̱ndaa ini na ndíkun Jesús ya íin ra ñuu ikán, saa ti̱ꞌvi na uvi nda taa kuaꞌan nda nduku nda ya mani nuu ra ya ná kixi ra, ta kama ni ná kixi ra, káchi na xiꞌin chiñu kuaꞌan nuu ra.

39Saa ke̱e nda ikán ndi̱xaꞌan nda nuu ra Pedro ta ndi̱kiꞌin ra kuaꞌan ra xiꞌin nda. Ndi̱xaa nda xiꞌin ra veꞌe yá, nda̱a nda xiꞌin ra piso ni̱nù nuu índuꞌu ikin kuñu yá. Ta iin ndi̱katin ná ndi̱ndoo ndaa xáku ni ná xaꞌa yá. Sínaꞌa ná toto ya si̱kuaꞌa yá ta̱xi yá ndaꞌa ná, tá täꞌan kuvi yá. 40Ñaa xa̱ꞌnda ra Pedro chiñu ya ná kee ndiꞌi na cuarto nuu índuꞌu yá. Ta saa ka̱na koo na. Tá ke̱e ndiꞌi na, ta ñaa si̱kusiti ra xa̱á ra káꞌan ra xiꞌin Ndioxi. Saa ndi̱koto ra nuu yá, káꞌan ra xiꞌin yá, káchi ra saa:

―Nana Tabita, kuándikoo ―káchi ra xiꞌin yá.

Saa ndi̱xuna nuu yá. Tá xi̱ni yá ra Pedro, ta ndi̱koo yá ndi̱kunduꞌu koo yá. 41Saa ti̱in ra ndaꞌa yá chi̱ndee ra yá ndi̱kundichi yá. Ñaa ka̱na ra ndiꞌi na ndíkun Jesús xiꞌin ná ndindoo ndaa ta si̱naꞌa ra yá nuu na ya ndi̱taku yá. 42Ñaa ku̱ndaa ini ndiꞌi na ndóo ñuu Jope xaꞌa ya ndo̱ꞌo yá, saa kuaꞌa ni na ka̱ndixa Jesús. 43Saa ndi̱ndoo ra Pedro ndi̱xiyo ra ñuu Jope ikán. Naꞌa loꞌo ka ndi̱ndoo ra ndi̱xiyo ra veꞌe iin ra náni Simón, ra xáa chiñu xiꞌin iín kiti.

Currently Selected:

Los Hechos 9: xta

Highlight

Copy