Los Hechos 4

Ti̱in na chiñu ra Pedro xiꞌin ra Juan kuaꞌan nda veꞌe kàà

1Saa ku̱u káꞌan ka ra Pedro tin ra Juan xiꞌin naꞌa, ñaa ndi̱xaa sava nda sutu xiꞌin ra ndíso chiñu nuu na policía ndáa veꞌe ñuꞌu kaꞌnu ndi̱xaa ra xiꞌin inka nda saduceo. 2Sáa ka vi nda xiꞌin ra Pedro tin ra Juan xaꞌa ya káꞌan nda xiꞌin naꞌa ya ndi̱taku Jesús. Ta xaꞌa ya ndo̱ꞌo ra saa kua si̱naꞌa ra mií ra nuu naꞌa ya nditaku na, chi saa ndo̱ꞌo Jesús, ndi̱taku ra, káchi nda xiꞌin na. 3Xaꞌa ya káꞌan nda saa xiꞌin na yakan kua ti̱in na nda ki̱ꞌin na nda ta̱an na veꞌe kàà. Ta xa xikuaa ni ku ya, yakan köo ndi̱tava ñaꞌa na kuꞌun nda nuu na chiñu. Ndátun na tava ñaꞌa na inka kivi ya kunani kuachi nda. 4Sundi yáꞌa ni kuaꞌa ku mií na xi̱ni soꞌo ya ndi̱kaꞌan nda, ñaa xa̱á na kándixa na Jesús. Iin kuꞌva uꞌun mil ku ndisaa nda taa.

5Saa ndi̱tuvi inka kivi ta iin ndi̱kitaꞌan ndiꞌi mií na chiñu nuu na judío xiꞌin na xikuaꞌa tin nda sínaꞌa ley Ndioxi ya ta̱a ra Moisés. Ndi̱kitaꞌan ndiꞌi na koo iin junta ñuu Jerusalén. 6Ikán íin ra Anás, ra ínuu nuu ndiꞌi nda sutu, xiꞌin ra Caifás tin ra Juan xiꞌin ra Alejandro, inka nda veꞌe sutu nda naꞌnu. 7Ta saa xa̱ꞌnda na chiñu ya ná kuꞌun ra Pedro xiꞌin ra Juan nuu ndóo na. Ñaa tá ndi̱xaa nda ta ki̱ꞌin ñaꞌa na ka̱ndita na maꞌñu nuu ndóo na. Saa ndi̱ndakan tuꞌun na nda, káchi na saa:

―¿Unkua i̱kan ndo si̱ndaꞌa ndo ra yóꞌó ¿Ta unku na ta̱xi ndee tin ichí ndaꞌa ndo ya ikan ndo saa? ―káchi na xiꞌin ra Pedro tin ra Juan.

8Ta ndee ni íyo Tachi Ndioxi xiꞌin ra Pedro, ta saa ndi̱kuiin ra káꞌan ra:

―Ndóꞌo̱ tata na chiñu nuu ñuu yo xiꞌin ndóꞌo tata na xikuaꞌa nuu yo Israel. 9Ndákan tuꞌun ndo ndeꞌe ndá kuꞌva ndi̱xiyo ya ndu̱vaꞌa ra yóꞌó, ta ¿án xaꞌa ya ñaa va kua táxi ndo kuachi xaꞌa nde? Tá tu kúni ndo kundaa ini ndo ndá kuꞌva ndu̱vaꞌa ra, 10ta vaꞌa kundaa va ini ndo, vitin kaꞌan nde xiꞌin ndo ya ná kundaa ini ndiꞌi na ñuu yo na Israel ya ndee ni ndee kúu mií Jesucristo, ra ñuu Nazaret, chi ndóꞌo̱ ta chi̱nuu ndo ra nuu cruzin ndi̱xiꞌi ra, sundi Ndioxi ta si̱taku ñaꞌa ra, ta ra ikán ku ra sindaꞌa ra yóꞌó ndu̱vaꞌa ra ndíchi ra nuu ndo vitin. 11Ta Jesús yóꞌó ku ra káa tá káa yu̱ú ya ku̱ndasi ni na síkuaꞌa veꞌe. Xíniñuꞌu ni na yu̱ú ikán ta ku̱ndasi na ya. Tá i̱kan na ikán, saa i̱kan ndóꞌo̱ xiꞌin Jesús, ra ikán ku ra xíniñuꞌu ni ndiꞌi yo ta ku̱ndasi ndo ra. 12Iindaa mituꞌun Jesús ku ra kúu mií ndee ya sikaku ra yoo. Nda iin na ñuu ivi yóꞌó ta köo na kuchiñu sikaku yoo, nda iin ñaꞌñu nïꞌi yo na sikaku mií yo, iindaa Jesús ku ra kúu mií ndee ya ta̱xi Ndioxi ndaꞌa ra sikaku ra yoo ―káchi ra Pedro xiꞌin ndiꞌi na xikuaꞌa ikán tin na chiñu.

13Saa tá xi̱ni soꞌo na ikán ya ndi̱kaꞌan ra Pedro tin ra Juan, ñaa ndi̱kanda ni ini na xíni ñaꞌa na, chi ndinuni loꞌo ini nda káꞌan nda, ni köo íꞌvi nda káꞌan nda. Ta ni süvi nda ndi̱sikuaꞌa ku nda. Ta vaꞌa ni káꞌan nda. Xaꞌa ya ikán kua vaꞌa ndi̱kuni ñaꞌa na ya xi̱taꞌan nda xiꞌin Jesús. 14Ñaa ni köo ndi̱niꞌi ka na tuꞌun kaꞌan na xiꞌin nda, chi xíto na ndíchi ra ku̱ꞌvi, ra köo ndi̱kuvi kaka. 15Ñaa xa̱ꞌnda na chiñu ya ná kee nda keꞌe. Saa ta̱va na nda keꞌe, ta ndi̱ndoo na káꞌan xiꞌin taꞌan mií na, 16káchi na saa:

―¿Unkua ikan yo xiꞌin nda? Xa ndiꞌi na ñuu Jerusalén yóꞌó kúndaa ini xaꞌa yatuꞌun Ndioxi i̱kan nda ta küvi ndikuaa yo ya. 17Ta vaꞌa ka ná siꞌvi yo nda, xaa nduvaꞌa yo xiꞌin nda kachi yo xiꞌin nda. Ta saa ku iꞌvi nda, käꞌan ka nda xaꞌa Jesús xiꞌin naꞌa ―káchi na chiñu ikán xiꞌin taꞌan na.

18Ta saa si̱ꞌvi ni ñaꞌa na chiñu ndi̱kaꞌan ni na xiꞌin nda ya ná sïnaꞌa ka nda naꞌa ni ná käꞌan ka nda xiꞌin na xaꞌa Jesús. 19Ñaa ndi̱kuiin ra Pedro tin ra Juan káꞌan nda xiꞌin na, káchi nda saa:

―Ndikani ini mií ndo, tata, ¿án vaꞌa ka xaa súvi nde nde ya káꞌan ndóꞌo̱ xiꞌin nde ta kändixa nde ya káꞌan Ndioxi? 20Sundi ndeꞌe ta küvi kutaxin yuꞌu nde kaꞌan nde xaꞌa ya xi̱ni nde xiꞌin ya xi̱ni soꞌo nde xaꞌa Jesús ―káchi nda xiꞌin na.

21Vani si̱ꞌvi ni ñaꞌa na chiñu, sundi köo ya ndi̱kan na xiꞌin nda, sa̱ña ndika na nda kuaꞌan nda. Köo ndi̱kuchiñu na taxi na kuachi xaꞌa nda, saa chi ndiꞌi na ñuu ta káꞌan ni na ya vaꞌa xaꞌa Ndioxi xaꞌa ya xi̱ni na íkan nda. 22Ta xa yáꞌa uvi xiko kuiya ra taa, ra si̱ndaꞌa nda xiꞌin yatuꞌun Ndioxi.

Ndúku na kándixa Jesús ndee nuu Ndioxi

23Ta saa ke̱e ra Pedro xiꞌin ra Juan veꞌe kàà. Ñaa ndi̱kiꞌin nda kuaꞌan nda nuu ndóo na taꞌan nda, na ndíkun Jesús. Saa ndi̱tuꞌun nda xiꞌin na taꞌan nda xaꞌa ya ndi̱kaꞌan nda sutu naꞌnu tin na xikuaꞌa ikán xiꞌin nda. 24Sindiꞌi, tá xi̱ni soꞌo na ya ndi̱kaꞌan nda, ñaa nda̱niꞌi na tachi na saa xa̱á ndiꞌi na káꞌan na xiꞌin Ndioxi káchi na saa:

―Tata, yóꞌo̱ ku ra si̱kuaꞌa ndivi xiꞌin ñuꞌú tin nduta ñûꞌu xiꞌin ndiꞌi ka ñaꞌa ya íyo nuu ndivi tin ya íyo nuu ñuꞌú yóꞌó. 25Tixin Tachi un kua ndi̱kaꞌan un xiꞌin ra rey David xii nde, ra xa̱a chiñu nuu un, ndi̱kaꞌan un xiꞌin ra, káchi un saa:

¿Ndachu kua káni taꞌan ni na ñuu ivi ta sǎa ni na?

¿Ta ndachu kua xíka ini na kuchiñu na kanitaꞌan na xiꞌin Ndioxi xaꞌa ñaꞌa ya köo ndáa yaꞌvi?

26Nda rey ñuu ivi yóꞌó xiꞌin na chiñu,

iin ndi̱kitaꞌan ndiꞌi na,

iin yuꞌu ku̱u ndiꞌi na ka̱ni taꞌan na xiꞌin Ndioxi

ta ka̱ni taꞌan na xiꞌin ra kúu Cristo,

ra kúu mií ichí un ya ta̱xi un ndaꞌa ra,

soꞌva ndi̱xiyo ya ndi̱kaꞌan un tixin ra rey David xinaꞌa.

27’Ta vitin ku nuu ti̱ndaa kivi ndi̱xinu ya ndi̱kaꞌan ra rey David, saa chi ra rey Herodes xiꞌin ra Poncio Pilato iin káchi ndi̱kitaꞌan nda ñuu yóꞌó, xiꞌin na inka ñuu na köo kúu judío xiꞌin sava na ñuu Jerusalén yóꞌó. Iin yuꞌu ku̱u na xiꞌin taꞌan na ndu̱ku na kuꞌva xa̱ꞌni na Jesús ra i̱í, ra kúu mií ichí un ya ta̱xi un ndaꞌa ra, Iva yo Ndioxi. 28Nda tá íyo ya ndi̱kaꞌan un kundoꞌo Jesús, ta saa íyo ya i̱kan na xiꞌin ra, si̱xinu na ya ndi̱kaꞌan un. Chi xa saa chi̱tuni un kundoꞌo ra. 29Ta vitin káꞌan nde xiꞌin un chindee un ndeꞌe, Tata, chi xíto mií un ndá kuꞌva síꞌvi ni na ndeꞌe saa chi ndíkasi na nuu nde ya ná käꞌan ka nde tuꞌun un. Ta taxi un ndee un ndaꞌa nde ya ná ku ïꞌvi nde kaka nde ndikani nde tuꞌun un. 30Ta chindee un ndeꞌe xiꞌin ndee un, tixin Seꞌe un Jesús ra i̱í. Sindaꞌa un na kúꞌvi, saa ikan un yatuꞌun un ná kuni naꞌa ―káchi na xiꞌin Ndioxi.

31Ñaa tá si̱ndiꞌi na ndi̱kaꞌan na xiꞌin Ndioxi ta xa̱á táan nuu ndi̱kitaꞌan na ndóo na. Saa ta̱xi Ndioxi Tachi ra ndaꞌa na, ndee ni íyo Tachi I̱í Ndioxi xiꞌin na. Ñaa xa̱á ndu̱ndee ini na ndi̱nuni loꞌo xíka na ndíkani na tuꞌun Ndioxi.

Chíndee taꞌan na kándixa Jesús xiꞌin taꞌan na

32Ndiꞌi kúu na kándixa Jesús vaꞌa ni ndi̱xiyo na xiꞌin taꞌan na. Iin yuꞌu ndi̱xiyo ndiꞌi na xiꞌin taꞌan na, nda tá káa ñaꞌa ndiꞌi na saa ndi̱xiyo ya, iin ndi̱xiyo ndikaꞌnu ndiꞌi ñaꞌa na. 33Ta nda apóstol ndinuni loꞌo káꞌan nda xiꞌin naꞌa xaꞌa Jesús. Ndítuꞌun nda xiꞌin na ya ndixa kua ndi̱taku Tata yo Jesús. Saa kuaꞌa ka vi ya vaꞌa ndi̱niꞌi na nuu Ndioxi. 34Nda iin na köo ñaꞌa ndi̱kumani nuu saa chi tá kúu na íyo ñuꞌú án veꞌe ta ndi̱xiko na ya ta xuꞌun ya ka̱na ikán 35ta̱xi na ya ndaꞌa nda apóstol, ta nda ikán ndi̱taꞌvi ya xiꞌin na köo ñaꞌa. Tá íyo ñaꞌa xíniñuꞌu na saa íyo ya ndi̱taꞌvi nda ta̱xi nda ndaꞌa na. 36Saa i̱kan tu iin ra kúu seꞌe sikua ra Leví, ra náni José va. Ta ra José ikán ke̱e ra ñuꞌu íchi ya ndikaa maꞌñu nduta ñûꞌu, ya náni Chipre. José náni ra ñuu ra, sundi nda apóstol ta chi̱nuu nda kivi ra náni ra Bernabé chi tuꞌun Bernabé kúni kachi ya taa ra síndiko ini naꞌa. 37Ta ndi̱xiyo iin ñuꞌú ra Bernabé ikán, saa ndi̱xiko ra ya, ñaa ta̱xi ra xuꞌun ra ndaꞌa nda apóstol ya nditaꞌvi nda xiꞌin na köo ñaꞌa.

Currently Selected:

Los Hechos 4: xta

Highlight

Copy