Los Hechos 5

Ku̱ni ra Ananías xiꞌin yá síꞌi sindaꞌvi na nda apóstol

1Ndi̱xiyo tu iin ra náni Ananías xiꞌin yá síꞌi ra yá Safira, ta ndi̱xiyo iin ñuꞌú na, saa ndi̱xiko na ya. 2Ñaa ta̱ꞌvi sava na xuꞌun ikán, ta̱xi na ndaꞌa nda apóstol. Ta ti̱seꞌe tuꞌun na xaꞌa ya ndi̱ndoo ndaꞌa na, chi köo ndi̱kaꞌan na xiꞌin nda ya ndi̱ndoo ya ndaꞌa na. Iin yuꞌu ndi̱xiyo uvi saa na ya i̱kan na saa. 3Ñaa ndi̱kaꞌan ra Pedro xiꞌin ra Ananías, káchi ra saa:

―Tata, ¿ndachu kua i̱kan un saa? Ta̱xi un ndi̱kiꞌvi kiti Satanás nima un ta ku̱ni un sindaꞌvi un Tachi I̱í Ndioxi. Ya yóꞌó ku ndiꞌi xuꞌun ki̱ꞌin un xaꞌa ñuꞌú un, káchi un, ta süvi ya ndaa kua chi ndi̱ndoo ka ya ndaꞌa un. 4Ñuꞌú mií un kua ndi̱xiko un ta xuꞌun ki̱ꞌin un xaꞌa ya, xuꞌun mií un ku ndiꞌi ya. Yakan íyo ichí un ikan un ya kúni mií un, án loꞌo taxi un án kuaꞌa taxi un ndaꞌa nde, mií un xíni va xiꞌin ya. Sundi yóꞌo̱ ta súvi ndisaa ndeꞌe ndi̱sindaꞌvi un, Ndioxi ku ra kuni un sindaꞌvi un ―káchi ra Pedro xiꞌin ra Ananías.

5Ñaa tá xi̱ni soꞌo ra ya ndi̱kaꞌan ra Pedro ta ndikun ndi̱kava ra ndi̱xiꞌi ra. Ta ndiꞌi na xi̱ni soꞌo ya ndo̱ꞌo ra ta ndi̱ndiꞌvi ni na. 6Ñaa ndikuita sava nda kuâán ndi̱kiꞌin nda ikin kuñu ra su̱vi ñaꞌa nda, ta ndi̱kiꞌin nda ra kuaꞌan xiꞌin nda sinduxin nda.

7Sindiꞌi ndi̱yaꞌa uni hora ta xa̱a yá síꞌi ra, ni köo kúndaa ini yá unkua ku̱u. 8Saa ndi̱ndakan tuꞌun ra Pedro yá káchi ra saa:

―Nana, ndituꞌun xiꞌin i, ¿án ndixa ya yóꞌó ku ndiꞌi xuꞌun ki̱ꞌin ndo xaꞌa ñuꞌú ya ndi̱xiko ndo? ―káchi ra xiꞌin yá.

Saa ndi̱kuiin yá, káꞌan yá:

―Saa loꞌo kúu va ya ki̱ꞌin nde, tata ―káchi yá xiꞌin ra.

9Ta saa ndi̱kaꞌan ra Pedro xiꞌin yá, káchi ra saa:

―¿Ndachu i̱kan ndo saa? Iin káchi chi̱taꞌan tuꞌun ndo xi̱to ndoso ndo Tachi Iva yo Ndioxi. Keꞌe ñaa vaxi nda ndi̱xaꞌan si̱nduxin i̱í un, ta vitin kuꞌun tu nda sinduxin nda yóꞌo̱ va ―káchi ra xiꞌin yá.

10Káꞌan ra xiꞌin yá saa ta ndikun ndi̱kava yá ndi̱xiꞌi yá. Saa ndi̱kiꞌvi tuku nda ndi̱xaꞌan si̱nduxin i̱í yá, ndi̱kiꞌin nda ikin kuñu yá kuaꞌan xiꞌin nda si̱nduxin nda ñaꞌñu nuu ndi̱nduxin i̱í yá. 11Ñaa ndi̱ndiꞌvi ni na ndíkun Jesús xiꞌin ndiꞌi ka na xi̱ni soꞌo ya ndo̱ꞌo ra Ananías xiꞌin yá síꞌi ra.

Íkan nda apóstol yatuꞌun Ndioxi nuu naꞌa

12Ñaa xa̱á nda apóstol íkan nda kuaꞌa ni yatuꞌun Ndioxi tañu na ñuu. Ta ndiꞌi saa ichí ndíkitaꞌan ndiꞌi na ndíkun Jesús ini corredor ra Salomón ya ndíkaa mií veꞌe ñuꞌu kaꞌnu. 13Ta inka naꞌa ta vaꞌa ni káꞌan na xaꞌa na ndíkun Jesús. Sundi köo xáꞌa ndee ini na kutaꞌan na xiꞌin na xaꞌa ya íꞌvi na. 14Ta ndúkuaꞌa ka na ndíkundikun ichí Tata yo Jesús, taa ku nda, ñaꞌa ku ná. Kuaꞌa ka vi ndúu na kándixa ra. 15Ta kuaꞌa ni naꞌa táva na taꞌan na, na kúꞌvi, ndóso na nuu xito kuaꞌan na xiꞌin na yuꞌu ichí. Ta ikán kíꞌin ñ#5:15 aꞌa na chíndoo na nuu yáꞌa ra Pedro, chi ndíkani ini na, án nda ndati ra ná kani ndaa sata sava na ta nduvaꞌa na, káchi na. 16Saa tu na ñuu ítaꞌan yati xiꞌin ñuu Jerusalén ndáka na taꞌan na, na kúꞌvi xiꞌin na kúu mií tachi nduvaꞌa kuaꞌan na nuu nda apóstol, ta iin ndúvaꞌa ndiꞌi na.

Táan na chiñu nda apóstol veꞌe kàà

17Saa ku̱u ta xa̱á kûni ini ra sutu: ra ínuu nuu ndiꞌi sutu xiꞌin ndiꞌi ka nda saduceo, nda ndóo xiꞌin ra. Xa̱á nda kûni ini nda xíni ñaꞌa nda apóstol. 18Ñaa ti̱in ñaꞌa nda ki̱ꞌin nda ta̱an nda veꞌe kàà. 19Saa tá ku̱ñuu ta ndi̱xaa tatun Ndioxi xu̱na ya veꞌe kàà ke̱e nda. Ta saa ndi̱kaꞌan ya xiꞌin nda káchi ya saa:

20―Kuáꞌan ndo keꞌe veꞌe ñuꞌu kaꞌnu, kaꞌan ndoso ndo tuꞌun vaꞌa xaꞌa Jesús xiꞌin naꞌa ya ná kundaa ini na kundikun na Jesús, ta saa kuchiñu na koo na tá kuꞌva káꞌan Ndioxi ―káchi tatun Ndioxi xiꞌin nda.

21Ñaa ke̱e nda kuaꞌan nda, ta ndi̱tuvi inka kivi xitaan, xa̱á nda sínaꞌa nda naꞌa keꞌe veꞌe ñuꞌu ikán.

Ta ra sutu, ra ínuu nuu ndiꞌi sutu, ndi̱kaꞌan ra xiꞌin na xikuaꞌa na kúu mií chiñu nuu na Israel. Ka̱na ra na xa̱a na ndi̱kitaꞌan na koo junta. Ta saa xa̱ꞌnda ra sutu ikán chiñu nuu na policía ya kuꞌun na tava na nda veꞌe kàà. 22Saa ke̱e na policía ikán kuaꞌan na. Tá ndi̱xaa na veꞌe kàà ta ni köo ka nda ndi̱xini na. Ñaa ndi̱ko koo na xiꞌin chiñu 23káchi na saa:

―Ndi̱xaꞌan nde veꞌe kàà xíto nde ta ndási tuun yeꞌe veꞌe kàà. Ndóo na policía ndáa na yeꞌe, sundi tá xu̱na nde ta nda iin ka naꞌa köo ndi̱xini nde ―káchi na policía ikán.

24Tá ku̱ndaa ini sutu ra ínuu nuu ndiꞌi sutu xiꞌin ra xáꞌnda chiñu nuu na policía ndáa veꞌe ñuꞌu xiꞌin inka ka nda sutu naꞌnu, saa iin ndi̱saka soꞌva ini nda chi köo xíni nda ndá kuꞌva ndiꞌi tindoꞌo ya ndóꞌo nda xiꞌin nda apóstol. 25Káꞌan nda saa, ta xa̱a iin taa, ndi̱kaꞌan ra xiꞌin nda káchi ra saa:

―Tata, nda ta̱an ndo veꞌe kàà, ta xa keꞌe veꞌe ñuꞌu kaꞌnu ñaa ñúꞌu tuku nda sínaꞌa nda na ñuu ―káchi ra ikán xiꞌin nda.

26Saa ke̱e ra ínuu nuu na policía kuaꞌan ra xiꞌin na policia, ndikuiso tuku ñaꞌa nda. Sundi köo ndi̱xiin nda xaa nduvaꞌa nda xiꞌin nda xaꞌa ya íꞌvi nda nuu naꞌa, chi sana ndikitaꞌan ndiꞌi na ta kaꞌni ñaꞌa na xiꞌin yu̱ú, káꞌán nda.

27Ñaa ndi̱xaa tuku nda nuu na chiñu ki̱ꞌin ñaꞌa nda ka̱ndita nda nuu ndóo na íyo junta. Ta saa xa̱á káꞌan ra sutu ínuu nuu ndiꞌi sutu xiꞌin nda, káchi ra saa:

28―Xa ndi̱kaꞌan teꞌe nde xiꞌin ndo ya ná käꞌan ka ndo xaꞌa kivi ra náni Jesús ñaa. ¿Ta ndachu soꞌo ni ndo? Köo xíin ndo kuni soꞌo ndo ya ndi̱kaꞌan nde xiꞌin ndo. Chi xa kuaꞌa ni na ndóo Jerusalén yóꞌó sáka ndo xiní xiꞌin ya sínaꞌa ndo ta chíkaa ka ndo kuachi ndeꞌe xa̱ꞌni nde ra Jesús ñaa ―káchi ra xiꞌin nda.

29Saa ndi̱kuiin ra Pedro xiꞌin nda taꞌan ra, káchi nda saa:

―Ya xíniñuꞌu ni nde xaa súvi nde kua kúni Ndioxi nuu ya xaa súvi nde ya kúni na ñuu ivi yóꞌó. 30Ndioxi ra ka̱ndixa ni xii sikua yo ku ra si̱taku Jesús, ra chi̱nuu ndo nuu cruzin xa̱ꞌni ndo. 31Ta Ndioxi ta̱xi ra chiñu ndee ni ndaꞌa Jesús, ta̱xi ra ichí ndaꞌa ra ndu̱u ra iin ra chee ni ndi̱kunduꞌu ra ñaꞌñu kuáꞌá Ndioxi. Ta̱xi tu ra ichí ndaꞌa ra ya sikaku ra naꞌa ya ná kuchiñu na ndinama ini na, ta saa xaa kaꞌnu ini Ndioxi xaꞌa kuachi na. 32Ta ndeꞌe ku testigo xaꞌa ya yóꞌó, saa tu Tachi I̱í Ndioxi ya táxi ra ndaꞌa ndiꞌi na xíni soꞌo ya káꞌan ra ―káchi ra Pedro xiꞌin na chiñu ikán.

33Ñaa tá xi̱ni soꞌo na chiñu ya ndi̱kaꞌan ra ta ndi̱saa ni na, xa̱á kúni kaꞌni na nda. 34Ta tañu na ikán ndíkaa iin ra fariseo, ra náni Gamaliel, ra ndíchi ni ku ra ikán, sínaꞌa ra ley Ndioxi ya ta̱a ra Moisés. Ta ndiꞌi na ñuu káñuꞌu ni ñaꞌa na. Saa ndi̱kundichi sava ra maꞌñu na, xa̱ꞌnda ra chiñu tava na nda ke̱e nda keꞌe iin rato loꞌo. 35Ta ndi̱kaꞌan ra xiꞌin na chiñu ikán káchi ra saa:

―Na taꞌan yo ñuu Israel, ndikani vaꞌa ini ndo xaꞌa ya kúni ndo ikan ndo xiꞌin nda yóꞌó. 36Ndikaꞌán ini ndo, saa ku̱u yachi ndi̱kuita iin ra náni Teudas ta chiñu ndee ni kúu mií ra, káchi ra xiꞌin naꞌa. Ta kuaꞌa ni naꞌa ta̱a sii ra xi̱ndikun sata ra. Iin kuꞌva kumi ciento kuu taa nda xi̱ndikun sata ra. Ñaa ndi̱xiꞌi ra ta ndi̱ndoo ndaꞌa ndiꞌi nda xi̱ndikun sata ra, ta nda iin ya köo ndi̱kuu. 37Ndi̱yaꞌa loꞌo, tá ndi̱kuita censo, tuku ra náni Judas, ra ke̱e estado Galilea ndi̱kuita. Iin taꞌnda chee ku tu na xi̱ndikun sata ra ikán va. Ñaa ndi̱xiꞌi ra, ta ndiꞌi na xi̱ndikun ñaꞌa iin ndi̱xita ndiꞌi tu na ikán va. 38Ta saa tu nda yóꞌó va, këꞌe ndo nda, ná kaka mií nda, chi tá tu ya ndíkani xiní iin taa kua íkan nda ta ndiꞌi xaꞌa tu nda yóꞌó va. 39Sundi tá tu ya káꞌan Ndioxi ku ya káꞌan nda ta küchiñu ndo sindiꞌi xaꞌa ndo ya. Kuenta ni koo ndo chi va sana süvi xiꞌin nda ñaa vi káni taꞌan ndo, va sana xiꞌin Ndioxi va káni taꞌan ndo ―káchi ra Gamaliel xiꞌin na chiñu ikán.

40Nda saa ndi̱xinu ini na. Ñaa xa̱ꞌnda na chiñu nuu na policía ikán ndi̱xaꞌan na ndi̱kuiso na nda ikán. Tá xa̱a nda xiꞌin na. Saa ndi̱taꞌnda chiñu nuu na xaa nduvaꞌa na xiꞌin nda kani ñaꞌa na. Ta saa ka̱ni ñaꞌa na ta ñaa si̱ꞌvi ñaꞌa na ya ná käꞌan ka nda xaꞌa kivi Jesús. Saa sa̱ña na nda ka̱na koo nda kuaꞌan nda. 41Tá ka̱na koo nda kuaꞌan nda ta kúsini ni nda kuaꞌan nda, chi ta̱xi Ndioxi ichí ndo̱ꞌo nda xaꞌa ya ndítuꞌun nda xiꞌin naꞌa xaꞌa kivi Jesús. 42Ndiꞌi saa kivi káꞌan nda xaꞌa Jesús, nda mií nuu ndi̱xaa nda káꞌan nda xaꞌa ra, veꞌe kua, veꞌe ñuꞌu kaꞌnu kua, ndiꞌi nuu ndi̱xaa nda ta sínaꞌa nda xaꞌa ra tin káꞌan ndoso nda xiꞌin naꞌa xaꞌa ya vaꞌa xaꞌa Jesucristo, ra ti̱ꞌvi Ndioxi vaxi sikaku na ñuu ivi.

Currently Selected:

Los Hechos 5: xta

Highlight

Copy