San Juan 12

Síkuchi yá María nduta tami xáꞌan xaꞌa Jesús

(Mt. 26:6-13; Mr. 14:3-9)

1Ta kumani ka iñu kivi ya xáa viko pascua, ta ke̱e Jesús kuaꞌan ra ñuu Betania, nuu íyo ra Lázaro, ra ndi̱xiꞌi, ta si̱taku Jesús ra. 2Saa ndi̱xaa Jesús veꞌe ikán nuu xa̱a vií na kuxini ra, ta yá Marta kua chíkaa ñaꞌa kuxi nda, ta índuꞌu ra Lázaro nuu mesa xiꞌin Jesús, saa ndóo ka inka nda. 3Ta saa xa̱a yá María kuꞌva ra Lázaro xiꞌin iin yuyu nuu ñúꞌu nduta tami xaꞌan nardo náni rá, ta kúu rá sava litro níꞌi yá xa̱a xiꞌin yá, si̱kuchi yá xaꞌa Jesús. Ta sindiꞌi ndi̱yakun yá xaꞌa ra xiꞌin ixi xiní yá. Ta iin chu̱tu ndaa xiko tami xaꞌan ini veꞌe ikán. 4Saa ndi̱kaꞌan iin ra ítaꞌan xiꞌin Jesús, ra náni Judas Iscariote, seꞌe ra Simón, ra nditaxi Jesús ndaꞌa na sáa ini xíni ñaꞌa, káchi ra saa:

5¿Án vaꞌa ka ndíxiko yá rá? Kuaꞌa ni xuꞌun ndáa yaꞌvi rá, iin kuiya níi vi xaa chiñu na xaꞌa rá. Ta vaꞌa ka ndíxiko yá rá, ta kana xuꞌun ya chindee yá na ndaꞌvi ―káchi ra.

6Ta süvi ya ndixa ndíꞌi ini ra xaꞌa na ndaꞌvi kua ndi̱kaꞌan ra saa. Ndi̱kaꞌan ra saa chi ra kuiꞌna ku ra, saa chi mií ra ku ra ndíso ñaꞌa nuu kuakee xuꞌun xíniñuꞌu Jesús xiꞌin nda ítaꞌan xiꞌin ra, ta sava ichí síkuiꞌna ra ya. 7Ta saa ndi̱kaꞌan Jesús xiꞌin ra, káchi ra saa:

―Këꞌe un yá, chi ya vaꞌa i̱kan yá xiꞌin i. Chi̱vaꞌa yá rá yóꞌó xíniñuꞌu yá xiꞌin i vitin, chi xa siloꞌo tindaa kivi kuvi i ta nduxin i, yakan xáa vií yá xiꞌin i. 8Chi na ndaꞌvi ta ndiꞌi saa kivi koo na xiꞌin ndo. Sundi yeꞌe, ta süvi ndiꞌi saa kivi koo i xiꞌin ndo ―káchi Jesús xiꞌin ra.

9Ta kuaꞌa ni mií na judío ku̱ndaa ini xaꞌa Jesús ya ndi̱xaa ra ñuu Betania veꞌe ra Lázaro. Saa ndi̱xaa na koto ñaꞌa na, ta süvi ndisaa Jesús ndi̱xaa na koto na, chi ndi̱xaa tu na ya koto na ra Lázaro, ra ndi̱taku i̱kan Jesús va. 10Sundi nda sutu naꞌnu nuu na judío ta xa chi̱taꞌan tuꞌun nda ya kaꞌni tu nda ra Lázaro va. 11Chi xaꞌa ya ndi̱taku ra ta kuaꞌa ni mií na judío xi̱ni ya ndo̱ꞌo ra, ta saa si̱ndoo na ichí ya kándixa na ta ndi̱kundikun na ichí Jesús.

Kuakiꞌvi Jesús ñuu Jerusalén

(Mt. 21:1-11; Mr. 11:1-11; Lc. 19:28-40)

12Kuaꞌa ni naꞌa ndi̱xaa ñuu Jerusalén viko pascua. Ta ndi̱tuvi inka kivi ku̱ndaa ini na ya xa̱a Jesús ñuu Jerusalén. 13Ta saa xa̱ꞌnda na itun ñuú níꞌi na kuaꞌan xiꞌin na ndikiꞌin na Jesús. Ta ndee ni káꞌan na, káchi na saa:

―¡Ra Kaꞌnu ni ku Ndioxi! ¡Ta Kaꞌnu ni tu Taa, ra ti̱ꞌvi ra vaxi nuu va ra! ¡Saa chi rey nuu yo Israel ku ra! ―káchi na.

14Saa ndi̱taꞌan Jesús iin burru loꞌo, ta nda̱a ra sata ri, tá kuꞌva káꞌan tuꞌun Ndioxi ya ta̱a na xinaꞌa,

káchi ya saa:

15Ku ïꞌvi ndóꞌo̱ ñuu Jerusalén.

Koto ndo víi, yóꞌó vaxi rey ndo.

Yóso ra burru loꞌo vaxi ra,

káchi tuꞌun Ndioxi ikán.

16Ta nda ítaꞌan xiꞌin ra, ta köo ndi̱kundaa ini nda ya káꞌan tuꞌun ikán. Tá sindiꞌi nda̱a ra kuaꞌan ra nuu ndivi saa vi kua ndi̱kaꞌán ini nda ya ndo̱ꞌo ra, ta xa yachi vi íyo ya xaꞌa ra ya saa kundoꞌo ra káꞌan tuꞌun Ndioxi.

17Ta ndee ni ndítuꞌun na ítaꞌan xiꞌin ra tá xi̱ni na ka̱na ra ra Lázaro tixin kava nuu ndi̱nduxi ra, ta si̱taku ñaꞌa ra. 18Xaꞌa ya ikán kua kuaꞌa ni naꞌa ka̱na koo kuaꞌan na ndi̱kiꞌin ñaꞌa na, chi xi̱ni soꞌo na xaꞌa yatuꞌun i̱kan ra. 19Ta ndi̱kaꞌan nda fariseo xiꞌin taꞌan nda káchi nda saa:

―Ya uun kuiti xíka yo sata ra. ¡Koto ndo toon! ¡Ndiꞌi naꞌa ndíkundikun kuaꞌan sata ra! ―káchi nda.

Nda na griego ndi̱xaa ndúku Jesús

20Ta ñúꞌu tu sava na griego va ndi̱xaa na tañu na ndi̱xaa xáa kaꞌnu viko pascua ñuu Jerusalén ikán. 21Saa ku̱yati na nuu ra Felipe ra ke̱e ñuu Betsaida, estado Galilea xíkan na ya mani nuu ra, káchi na saa:

―Tata, kúni nde kuni nde Jesús ―káchi na.

22Saa ndi̱kaꞌan ra xiꞌin ra Andrés. Ñaa ndi̱xaꞌan uvi saa nda ndi̱kaꞌan nda xiꞌin Jesús. 23Saa ndi̱kuiin Jesús káchi ra saa:

―Xa yati ni ti̱ndaa kivi ya xaa súvi i chiñu chee ni nuu xaa kaꞌnu ni Ndioxi yeꞌe Taa ra xa̱a ñuu ivi yóꞌó. 24Ya ndaa káꞌan i xiꞌin ndo iin ndikin trigo, ya köo chíꞌi na ta köo táꞌi ya, yakan köo ndúkuaꞌa ya, ndóo iindaa mií ya. Sundi tá ná chiꞌi na ya, taꞌi xeꞌe sata ya ta nduta ya, saa kua ndúkuaꞌa ni ka ya. 25Ndiꞌi na ndee ni kúꞌvi ini xíni xiꞌin mií, ta ndiꞌi xaꞌa na. Sundi na köo ndíꞌi ni ini xíni xiꞌin mií ñuu ivi yóꞌó, ta chívaꞌa na mií na nuu kutaku na ndiꞌi saa kúu kivi ya vaxi. 26Tá ndá ndóꞌo̱ kúni xaa chiñu nuu i, ta vaꞌa kundikun ndo yeꞌe. Chi nuu koo i ta ikán koo tu ndóꞌo̱ va xiꞌin i. Tá ndá ndo xáa chiñu nuu i, ta xaa kaꞌnu Iva i Ndioxi ndóꞌo̱ ―káchi Jesús xiꞌin na.

Ndítuꞌun Jesús xiꞌin na ndá kuꞌva ndoꞌo ra kuvi ra

27Saa ndi̱kaꞌan ka Jesús, káchi ra saa:

―Ta vitin yáꞌa ni ndíꞌi ini i, saa xíka ni ini i unkua nduku i nuu Ndioxi. ¿Án vaꞌa ka kaꞌan i xiꞌin Iva i ya sikaku ra yeꞌe xaꞌa ya kundoꞌo i vitin? Ta küvi kaꞌan i saa xiꞌin ra, chi xaꞌa ya kuvi i kua vaxi i ñuu ivi yóꞌó ―káchi Jesús.

28Ta saa ndi̱kaꞌan ra xiꞌin Ndioxi, káchi ra saa:

―Tata Iva i, vaꞌa xaa súvi un chiñu ya ná xaa kaꞌnu na yóꞌo̱ ―káchi ra.

Ta saa ke̱ta tachi Ndioxi nuu ndivi ndi̱kaꞌan ya, káchi ya saa:

―Xa xa̱a súvi i chiñu chee ni ya xaa kaꞌnu na yeꞌe saa chinuu sukun ni na ya toꞌo i, ta ikan tuku i saa ―káchi Ndioxi.

29Ta ndiꞌi na ndóo xiꞌin Jesús, xi̱ni soꞌo tachi ikán. Saa káꞌan sava na káchi na saa:

―Savi va ku rá ndee ni ndi̱ndaꞌi ―káchi na.

Ta sava na káꞌan:

―Iin tatun Ndioxi ku ya ndi̱kaꞌan ―káchi na.

30Saa ndi̱kuiin Jesús káꞌan ra:

―Süvi xaꞌa yeꞌe kua xi̱ni soꞌo ndo tachi na ikán, xaꞌa mií va ndo kua ku̱u saa. 31Vitin kua ti̱ndaa kivi ya taxi Ndioxi kuachi xaꞌa na ñuu ivi. Ta kindaa ra ichí ndaꞌa kiti nǎꞌa, ri xáꞌnda chiñu ñuu ivi yóꞌó, keta ri kuꞌun ri. 32Ta yeꞌe tá ná sindaa naꞌa yeꞌe ndikunuu sukun i, ta saa kua ndixita i ndiꞌi ni kúu na ñuu ivi kixi na nuu i ―káchi Jesús xiꞌin na.

33Ndi̱kaꞌan ra saa xiꞌin na ya ndítuꞌun ra xiꞌin na ndá kuꞌva kua kuvi ra. 34Saa ndi̱kuiin na káꞌan na xiꞌin ra, káchi na saa:

―Tuꞌun Ndioxi ya íyo nuu ley ta káꞌan ya xaꞌa ra kúu Cristo, ta ndïꞌi xaꞌa ra, sundi ndiꞌi saa ichí kutaku ra, káchi ya xaꞌa ra. Tá tu ndixa kúu un Taa ra xa̱a ñuu ivi yóꞌó, ta ¿ndachu káꞌan un xíniñuꞌu un ndikunuu sukun un? ¿Ta unku ra ku Taa ra xa̱a ñuu ivi? ―káchi na xiꞌin ra.

35Saa ndi̱kuiin Jesús káꞌan ra xiꞌin na, káchi ra saa:

―Siloꞌo ni kivi íyo yeꞌe kúu ñu̱ꞌu̱ xiꞌin ndo. Yakan xíniñuꞌu ndo ndikundikun ndo ichí nuu yéꞌe̱, süvi ka vi ya iin kama soꞌva ku̱u ta xaa ya naá tiin ya ndóꞌo̱. Chi ndiꞌi na xíka nuu naá, ta ni köo xíni na nuu kuꞌun na. 36Tá íyo ñu̱ꞌu̱ yóꞌó tañu ndo ta xíniñuꞌu ndo kandixa ndo ya, ta saa kuchiñu ndo nduu ndo na xíka nuu túun ñu̱ꞌu̱ ―káchi Jesús xiꞌin na.

Tá sindiꞌi ndi̱kaꞌan ra tuꞌun ikán ta saa ke̱ta ra kuaꞌan ra tiseꞌe ra.

Na judío ta köo kándixa na Jesús

37Ni kuaꞌa ni yatuꞌun Ndioxi xi̱ni na judío íkan Jesús ta köo ndi̱xiin na kandixa ñaꞌa na. 38Yóꞌó ku nuu ndi̱xinu tuꞌun Ndioxi ya ta̱a ra Isaías, ra ndi̱kaꞌan ndoso tuꞌun yuꞌu Ndioxi xinaꞌa, káchi ra saa:

Tata Iva i Ndioxi, ni köo na xíin kandixa tuꞌun ya káꞌan nde xiꞌin na,

ta ni köo ndi̱kundaa ini na ya i̱kan un yatuꞌun nuu na,

káchi ya ta̱a ra Isaías xinaꞌa. 39Xaꞌa ya yóꞌó kua köo ndi̱kuchiñu na judío kandixa na Jesús. Tá káchi ya ta̱a ra Isaías xaꞌa na, káchi ya saa:

40Ndi̱kasi Ndioxi nuu na ndu̱u kuáa̱ na, saa nda̱sa tuun ra nima na,

Ya ná küchiñu na koto na,

Ta saa ná küaꞌa na kandixa na xiꞌin ndinuꞌu nima na,

ya ná ndïko na nuu i ya sindaꞌa i na,

káchi ya ta̱a ra Isaías.

41Soꞌva ndi̱kaꞌan ra Isaías xaꞌa Jesús xinaꞌa, chi xi̱ni xiꞌin nuu ra ya ndee ni vaꞌa luvi kúu mií Jesús.

42Vani köo ndi̱xiin sava na kandixa na ra, sundi kuaꞌa ni na chiñu kúu mií chiñu ndee ka̱ndixa ñaꞌa, ta köo ndi̱tuꞌun na xiꞌin naꞌa, xaꞌa ya íꞌvi na nuu nda fariseo, chi koto ka tava ndaꞌa ñaꞌa nda veꞌe ñuꞌu sinagoga. 43Saa chi kúni ka nda kaꞌan vaꞌa na ivi yóꞌó xaꞌa nda, ta köo ndíꞌi ini nda ya kaꞌan vaꞌa Ndioxi xaꞌa nda.

Tuꞌun ya ndi̱kaꞌan Jesús kua táxi kuachi xaꞌa na ñuu ivi

44Saa nda̱niꞌi Jesús tachi ra ta ndikaꞌan ra, káchi ra saa: Na kándixa yeꞌe ta süvi ndisaa yeꞌe kándixa na, kándixa tu na Iva i, ra ti̱ꞌvi yeꞌe vaxi va i. 45Ta na xíni yeꞌe, ta xíni tu na ra ti̱ꞌvi yeꞌe vaxi va i. 46Yeꞌe ku ñu̱ꞌu̱ ya xa̱a i ñuu ivi yóꞌó, ta ndiꞌi na kándixa yeꞌe, ta ndöo na koo na nuu naá. 47Na xíni soꞌo tuꞌun ya káꞌan i, tá tu köo xíin na xaa súvi na ya, ta köo táxi i kuachi xaꞌa na, chi yeꞌe ta süvi ra vaxi taxi kuachi na ñuu ivi ku i, yeꞌe vaxi sikaku va ku i na. 48Ta ndiꞌi na kúndasi nuu xíni yeꞌe, na köo xíin ndikiꞌin tuꞌun i, ta íyo ya táxi kuachi xaꞌa na. Tuꞌun ya xi̱ni soꞌo na ndi̱kaꞌan i, ya ikán kua táxi kuachi xaꞌa na. 49Chi tuꞌun yuꞌu mií Ndioxi kua ndi̱kaꞌan i xiꞌin ndo, ta süvi tuꞌun mií i kua. Iva i Ndioxi ku ra ti̱ꞌvi yeꞌe vaxi i, ta xa̱ꞌnda ra chiñu nuu i ndá tuꞌun kua kaꞌan i xiꞌin ndo, ta ndá kuꞌva kua ndituꞌun i xiꞌin ndo. 50Chi yeꞌe ta xíni i ya xáꞌnda chiñu Ndioxi ku ichí ya táxi kutaku na ndiꞌi saa kúu kivi. Yakan tá íyo ya ndi̱kaꞌan Iva i xiꞌin i kaꞌan i, saa íyo ya káꞌan i ―káchi Jesús xiꞌin na.

Currently Selected:

San Juan 12: xta

Highlight

Copy