San Juan 5

Si̱ndaꞌa Jesús iin taa, ra íyo yuꞌu ñaꞌa nuu ñúꞌu tikuii Betesda

1Tá sindiꞌi ndiyaꞌa ta ke̱e Jesús estado Galilea, ta ndi̱kiꞌin ra kuaꞌan ra ñuu Jerusalén, chi ikán koo iin viko kaꞌnu ya ndítava na judío. 2Ta yati yeꞌe ya náni yeꞌe levo ñuu Jerusalén ikán íyo iin nuu chútu tikuii, ta náni ya Betesda tuꞌun hebreo, ta ikán ndi̱xiyo uꞌun yeꞌe nama yu̱ú, ndási xiní ya ta núna xaꞌa ya. 3Ta ikán ndóo kuaꞌa ni na kúꞌvi tin na kuáa̱ xiꞌin na köo iin xaꞌa xiꞌin na küvi kanda. Vitin taan ndóo na ndátun na ya kanda tikuii ini nuu ñúꞌu rá. 4Saa chi sava kivi núu iin tatun Ndioxi síkanda ya tikuii, ta na xiꞌna kúnumi kéta ini rá ta ndikun ndúvaꞌa na xiꞌin ndiꞌi ndá ka mií nuu kueꞌe ya kúu mií na. 5Ta tañu na ndóo ikán ndíkaa iin ra kúꞌvi, ta xa naꞌá ni kúꞌvi ra, küvi kaka ra. Xa ndi̱xinu oko xaꞌun uni kuiya kúꞌvi ra. 6Saa tá xi̱ni Jesús índuꞌu ra, ta ku̱ndaa ini ra xa naꞌa ni kúꞌvi ra. Ta saa ndi̱kaꞌan ra xiꞌin ra, káchi ra saa:

―¿Án kúni un nduvaꞌa un? ―káchi ra xiꞌin ra.

7Saa ndi̱kuiin ra káꞌan ra:

―Tata, nda iin na köo chikaa yeꞌe ini ñaꞌa nuu ñúꞌu tikuii tá xáa kánda rá. Tá kúni i kiꞌvi i ta kúvai va i kiꞌvi i, ta inka na xa kíꞌvi va nuu i ―káchi ra.

8Saa ndi̱kaꞌan Jesús xiꞌin ra, káchi ra saa:

―Kuandikoo, ta ndikiꞌin un xito un kaka un kuꞌun un ―káchi ra xiꞌin ra.

9Saa ndikun ndu̱vaꞌa ra, ta ndi̱kiꞌin ra xito ra nuu xi̱nuu ra, xa̱á ra xíka ra. Ta kivi i̱í ya ndíkundee na kua. 10Ñaa xa̱á nda judío káꞌan nda xiꞌin ra, káchi nda saa:

―Küvi kundiso un xito un kuꞌun xiꞌin un kivi vitin, saa chi kivi i̱í, ya ndíkundee yo kua ―káchi nda xiꞌin ra.

11Saa ndi̱kuiin ra káꞌan ra:

―Ra si̱ndaꞌa yeꞌe ndi̱kaꞌan xiꞌin i: “Vaꞌa ndikiꞌin un xito un, kundiso un kaka un kuꞌun un”, káchi ra xiꞌin i ―káchi ra ikán xiꞌin nda.

12Saa ndi̱kaꞌan nda xiꞌin ra, káchi nda saa:

―¿Unku ndi̱kaꞌan xiꞌin un ya ndikiꞌin un xito un kundiso un kuꞌun un? ―káchi nda xiꞌin ra.

13Ta köo xíni ra unku si̱ndaꞌa ñaꞌa, saa chi xa ndi̱kiꞌin va Jesús kuaꞌan ra maꞌñu na xíka ikán. 14Sindiꞌi ta ndi̱taꞌan Jesús ra ini veꞌe ñuꞌu, saa ndi̱kaꞌan ra xiꞌin ra:

―Koto un, vitin xa ndu̱vaꞌa un, ta ïkan ka un ndá ya ka ya väꞌa, saa chi koto ka ndoꞌo un ndá ka iin ya ndee vaꞌa ka ―káchi Jesús xiꞌin ra.

15Saa ke̱e ra ikán ndi̱xaꞌan ra ndi̱tuꞌun ra xiꞌin nda judío xaꞌa Jesús, chi Jesús va ku ra si̱ndaꞌa ñaꞌa. 16Xaꞌa ya ikán kua xa̱á nda judío ndíkun nda sata Jesús kúni nda kaꞌni ñaꞌa nda, xaꞌa ya síndaꞌa ra naꞌa kivi ndíkundee na. 17Ta ndi̱kaꞌan Jesús xiꞌin nda, káchi ra saa:

―Iva i ta ndiꞌi saa kivi xáa chiñu ra, ta saa tu yeꞌe va, ndiꞌi saa kivi xáa chiñu i ―káchi ra xiꞌin nda.

18Xaꞌa ya ikán kua kúni ni nda naꞌnu nuu na judío kaꞌni ñaꞌa nda, chi xáa soꞌo ra yáꞌa ra ley na xaꞌa ya síndaꞌa ra naꞌa kivi ndíkundee na, ta saa káꞌan ra Iva ra kúu Ndioxi, ta iin ndása ra mií ra xiꞌin Ndioxi.

Ndioxi ku ra ta̱xi ichí ndaꞌa Jesús ya ndee ni ndee kúu mií ra

19Saa ndi̱kaꞌan Jesús xiꞌin nda káchi ra saa:

―Ya ndaa káꞌan i xiꞌin ndo, ra kúu Seꞌe Ndioxi ta nda iin ñaꞌa küvi ikan mií ra, ndisaa ya xíni ra íkan Iva ra kua íkan ra. Ndiꞌi saa kivi kándixa ra ya káꞌan Iva ra xiꞌin ra. 20Saa chi Iva ra ta kúꞌvi ni ini ra xíni ñaꞌa ra, yakan kua sínaꞌa ndiꞌi ra ya íkan ra nuu ra, ta kuaꞌa ni ka va ya sinaꞌa ra nuu ndo kuni ndo, ta iin ndikanda ini ndo tá ná kuni ndo ya ikan ra. 21Tá kuꞌva sítaku Iva ra Ndioxi na ndíi ta táxi ra kutaku na, ta saa íkan tu Seꞌe va ra, táxi ra kutaku na kúni mií ra. 22Ta Iva ra köo xáa nani ra kuachi xiꞌin nda iin naꞌa, iindaa Seꞌe ra ku ra ta̱xi ndiꞌi ra ichí ndaꞌa ya xáa nani ra kuachi na, 23chi kúni Ndioxi ya ná xaa toꞌo ndiꞌi na Seꞌe ra, tá kuꞌva xáa toꞌo na mií ra, saa ná xaa toꞌo na Seꞌe ra. Saa chi ndiꞌi na köo xíin xaa toꞌo Seꞌe ra, ta kúni kachi ya köo xáa toꞌo na Iva ra, ra ti̱ꞌvi ra vaxi.

24’Ya ndaa káꞌan i xiꞌin ndo: Ndiꞌi na xíni soꞌo tuꞌun káꞌan i, ta kándixa na Ndioxi ra ti̱ꞌvi yeꞌe vaxi i ñuu ivi, ta na ikán ku na ndixa táku ndiꞌi saa kivi, ta täxi ra ndoꞌo na xaꞌa kuachi na. Saa chi tá íin na xa ndi̱xiꞌi yachi saa ndi̱xiyo na, ta vitin ndi̱taku na. 25Ta ya ndaa káꞌan i xiꞌin ndo, vitin ti̱ndaa kivi ta kuni soꞌo na ndíi tachi Ra kúu Seꞌe Ndioxi. Ta na xíni soꞌo ya káꞌan ra ta kutaku na. 26Saa chi Ndioxi ta kúu mií ra ndee táxi ra táku mií ra ta suvi ndee ikán ta̱xi ra ndaꞌa Seꞌe ra ya iin káchi táku ra xiꞌin ra. 27Ta ta̱xi ra ichí ndaꞌa Seꞌe ra ya xaa nani ra kuachi naꞌa, xaꞌa ya kúu ra Taa ra xa̱a ñuu ivi yóꞌó. 28Ta ndïkanda ni ini ndo xaꞌa ya xi̱ni soꞌo ndo ndi̱kaꞌan i xiꞌin ndo, chi vaxi kivi ta kuni soꞌo ndiꞌi na ndíi, na xa ndi̱nduxin, kuni soꞌo na tachi ra. 29Ta ndiꞌi na i̱kan ya vaꞌa ta nditaku na koo na xiꞌin Ndioxi ndiꞌi saa kivi, ta ndiꞌi na i̱kan ya väꞌa ta nditaku na kuꞌun na nuu ndoꞌo ni na ―káchi Jesús xiꞌin nda.

Káꞌan Jesús xaꞌa na ndíkuiin xaꞌa chiñu ya i̱kan ra

30Ta ndi̱kaꞌan ka ra xiꞌin nda, káchi ra saa:

―Yeꞌe ta süvi xiꞌin ichí mií i kua xáa nani i kuachi naꞌa, tá íyo ya xíni soꞌo i saa íyo ya íkan i xiꞌin na, xiꞌin ya ndaa xáa nani i kuachi na, chi süvi xiꞌin ya kúni mií i íkan i ya, xiꞌin ya kúni mií Iva i Ndioxi ra ti̱ꞌvi yeꞌe vaxi i kua xáa nani i kuachi na. 31Tá ná ndikuiin i kaꞌan i xaꞌa i xiꞌin ndo, ta köo ndáa yaꞌvi ya kaꞌan i xaꞌa i xiꞌin ndo. 32Sundi íyo iin ra ndíkuiin xaꞌa i, ta xíni i ya káꞌan ra xaꞌa i ta ya ndaa kua. 33Ndóꞌo̱ ta ti̱ꞌvi ndo chiñu kuaꞌan nuu ra Juan, nuu ndi̱ndakan tuꞌun ndo ra, ta ya ndi̱kuiin ra ikán ta ya ndaa kua. 34Sundi yeꞌe ta köo xíniñuꞌu i ya ndikuiin na ivi yóꞌó xaꞌa i, ya káꞌan i saa xiꞌin ndo ta ya kúni i ná sikaku Ndioxi ndóꞌo̱ va kua. 35Tá íyo ñu̱ꞌu̱ xíxi ta ndee ni ndíyeꞌe ya, saa ndi̱xiyo ra Juan, ta ndóꞌo̱ ta ku̱sini ni ndo xi̱ni soꞌo ndo ya ndi̱kaꞌan ra xiꞌin ndo, ta uvi ndaa kivi va kua ku̱sini ni ndo. 36Sundi íyo inka ya ndíkuiin xaꞌa i, ta ndee ni ka ya ikán nuu ya ndi̱kaꞌan ra Juan. Ta ya ikán ku chiñu ya ndi̱kaꞌan Iva i Ndioxi xiꞌin i ikan i. Ta chiñu ikán ku ya ndíkuiin teꞌe xaꞌa i, ya ndixa kua ti̱ꞌvi Iva i yeꞌe vaxi i. 37Ta Ndioxi ku ra ti̱ꞌvi yeꞌe vaxi i, ta ndíkuiin tu mií va ra xaꞌa i. Ta ndóꞌo̱, nda iin kivi köo ndi̱xini soꞌo ndo tachi ra, ni nuu ra köo xíni ndo unkua káa ra. 38Ni tuꞌun ra ta köo ya íyo nima ndo, chi köo kándixa ndo yeꞌe ra ti̱ꞌvi Ndioxi vaxi ñuu ivi yóꞌó. 39Tá káꞌvi ndo Tuꞌun Ndioxi ya ta̱a na xinaꞌa, ta vií ni káꞌvi ndo ya, chi ndíkani ini ndo nuu ya ikán kua nditaꞌan ndo ndá kuꞌva kutaku ndo koo ndo xiꞌin Ndioxi ndiꞌi saa kivi ya vaxi. Ta tuꞌun Ndioxi ikán kua káꞌan xaꞌa i. 40Sundi ndóꞌo̱ ta köo xíin ndo kixi ndo nuu i ya taxi i ichí ndaꞌa ndo koo ndo xiꞌin Ndioxi ndiꞌi saa kivi ya vaxi.

41’Yeꞌe, ta köo xíniñuꞌu i kaꞌan vaꞌa naꞌa xaꞌa i, 42saa chi yeꞌe ta xíni vaꞌa i ini ndo, xíni i köo kúꞌvi ini ndo xíni ndo Ndioxi. 43Iva i Ndioxi ku ra ti̱ꞌvi yeꞌe vaxi i ñuu ivi yóꞌó, ta ndóꞌo̱ köo xíin ndo kandixa ndo yeꞌe. Sundi tá tu inka ra ná kixi tixin ndee mií ra, ta kandixa va ndo ra ikán. 44Köo xíin ndo kandixa ndo yeꞌe, saa chi kútoo ni ndo kaꞌan vaꞌa ndo xaꞌa taꞌan ndo, ta köo ndúku ndo ya kaꞌan vaꞌa Ndioxi xaꞌa ndo ―káchi ra xiꞌin nda.

45Ta saa ndi̱kaꞌan ka ra xiꞌin nda, káchi ra saa:

―Ndïkani ini ndo ya taxi i kuachi xaꞌa ndo nuu Iva i Ndioxi, xaꞌa ya köo xíin ndo kandixa ndo yeꞌe. Xa íyo va ra Moisés ra ndíkani ini ndo sikaku ndóꞌo̱. 46Saa chi tá tu kándixa ndo ya ndi̱kaꞌan ra ikán, ta kandixa tu ndo ya káꞌan yeꞌe va xiꞌin ndo, ndikuu. Saa chi ya ta̱a ra ikán ta xaꞌa yeꞌe kua káꞌan ya. 47Tá tu köo kándixa ndo ya ta̱a ra ikán, ta ni ya káꞌan yeꞌe köo kándixa vi ndo ya ―káchi Jesús xiꞌin nda.

Currently Selected:

San Juan 5: xta

Highlight

Copy