San Lucas 16
16
Tuꞌun ndíchi xaꞌa ra moso ra ndíchi xiní
1Saa ndi̱tuꞌun Jesús inka tuꞌun ndíchi xiꞌin nda ítaꞌan xiꞌin ra, káchi ra saa:
―Soꞌva ndo̱ꞌo iin ra kuika xiꞌin ra ndíso chiñu xiꞌin ñaꞌa ra. Ndi̱xaꞌan na ndi̱tuꞌun na xaꞌa ra xiꞌin xitoꞌo ra ya sísiki ndikuu ra xuꞌun xitoꞌo ra. 2Ñaa ka̱na ñaꞌa ra káꞌan ra xiꞌin ra, káchi ra saa: “¿Án ya ndaa kua sísiki ni un xuꞌun i che? Ta vitin kúni i taxi un kuenta ndaꞌa i xaꞌa ndiꞌi chiñu íkan un, saa chi küvi ka xaa chiñu un xiꞌin i”, káchi xitoꞌo ra xiꞌin ra. 3Ñaa xa̱á ra ndíkani ini ra, káchi ra saa: “¿Unkua ikan yo vitin? Köo xíin ka xitoꞌo yo kundaa chiñu yo xiꞌin ñaꞌa ra. Ta ni köo kúndee yo xaa chiñu yo chiñu iku, ni ya ndakan yo köo xáꞌa ndee ini yo, kúkaꞌan ni nuu yo. 4Ta xa xíni va yo unkua vaꞌa ikan yo, ta saa ndikiꞌin mani na yo veꞌe na tá ná ndiꞌi chiñu yo”, káchi ra. 5Saa ka̱na ra iin iin na níka nuu xitoꞌo ra. Ñaa ndi̱ndakan tuꞌun ñaꞌa ra núnu̱ú, káchi ra saa: “¿Ndisaa kua níka un nuu xitoꞌo i?”, káchi ra. 6Saa ndi̱kuiin ra ikán, káchi ra saa: “ Iin ciento yoo ceite xíxi ku ya níka i”, káchi ra. Saa ndi̱kaꞌan ra xiꞌin ra: “Yóꞌó íin recibo ya níka un, ta vaꞌa ndisama ya ná nduu ya ndá soo uvi xiko uxi yoo”, káchi ra. 7Tá ndiꞌi ndi̱ndakan tuꞌun tuku ra inka ra, káchi ra saa: “Ta yóꞌo̱, ¿ndisaa kua níka un?”, káchi ra. Saa ndi̱kuiin ra ikán káꞌan ra: “Iin ciento ku koxta trigo ya níka i”, káchi ra. Ñaa ndi̱kaꞌan ra xiꞌin ra: “Yóꞌó íin recibo ya níka un, ta vaꞌa ndisama ya ná nduu ya ndá soo kumi xiko koxta”, káchi ra. 8Saa tá ku̱ndaa ini ra kuika ikán ta ndi̱kaꞌan vaꞌa ra, xaꞌa ya i̱kan moso ra. Yakan káꞌan i xiꞌin ndo na kuäꞌan ichí Ndioxi ta xíni ni na ndá kuꞌva ikan na ya ndikitaꞌan vií na xiꞌin naꞌa, listo ni ka na ikán nuu na xíni Ndioxi ―káchi Jesús.
9Ta saa ndi̱kaꞌan ka ra káchi ra saa:
―Yeꞌe káꞌan xiꞌin ndo, vaꞌa kuniñuꞌu ndo xuꞌun ya íyo ñuu ivi väꞌa yóꞌó, ya xaa ganaa ndo na kutaꞌan xiꞌin ndo, tá xa ndi̱ꞌi ñaꞌa ndo ta koo na ndikuiso vií ndóꞌo̱ nuu koo ndo ndiꞌi saa kúu kivi nuu ndivi.
10’Tá kúu iin ra ndaa ni ini, vani loꞌo ku ñaꞌa táxi na ndaꞌa ra kundaa ra ta ndáa vií ra ya, tá kuaꞌa ná koo ya taxi na ndaꞌa ra ta kundàà vií ra ya, chi vií ini ra. Sundi tá tu köo vií ini ra, vani loꞌo ku ñaꞌa ya táxi na ndaꞌa ra ta küchiñu ra kundaa ra ya, kachi ka vi tá kuaꞌa ná koo ya taxi na ndaꞌa ra, ni küchiñu mií vi ra kundàà ra ya. 11Yakan kua tá tu köo ndáa ndo ya kuika íyo ñuu ivi yóꞌó, ta ni Ndioxi täxi ra ya vaꞌa ya kuika íyo nuu ndivi ndaꞌa ndo, saa chi köo xíni ndo kundaa ndo ya. 12Tá tu köo ndáa ndo ñaꞌa inka na, ta köo ka naꞌa taxi ñaꞌa niꞌi ndo.
13’Ni na xáa chiñu ta köo na íyo uvi xitoꞌo, chi tá iin káchi ná kaꞌnda chiñu uvi saa xitoꞌo na chiñu nuu na, ta küchiñu na ikan na chiñu nuu uvi saa nda. Ta kundasi nuu na kuni na iin ra ta inka ra vaꞌa ni kuni na xiꞌin, saa kuꞌvi ini na kuni na iin ra ta inka ra kundasi nuu na kuni na. Yakan tá xáꞌnda chiñu Ndioxi nuu yo ta küvi taxi yo kaꞌnda chiñu xuꞌun nuu yo ―káchi Jesús.
14Saa tá xi̱ni soꞌo nda fariseo ya ndi̱kaꞌan ra, ta ndi̱xaku ndaa ñaꞌa nda. Chi kútoo ni nda ya kuika. 15Saa ndi̱kaꞌan ra xiꞌin nda, káchi ra saa:
―Ndóꞌo̱ ta ndása vaꞌa ni ndo mií ndo nuu naꞌa. Sundi Ndioxi ta xíni vaꞌa ra nima ndo köo íyo ndaku ini ndo. Ndiꞌi ñaꞌa ya ndee ni ndáa yaꞌvi nuu ndo ñuu ivi yóꞌó ta köo ndáa yaꞌvi ya nuu Ndioxi, ya kúndasi nuu va ra ku ya ―káchi Jesús xiꞌin nda.
Ndïꞌi xaꞌa ley Ndioxi ya ta̱a ra Moisés
16Saa ndi̱kaꞌan ka Jesús, káchi ra saa:
―Tá yachi ta ley Ndioxi xiꞌin ya ta̱a nda ndi̱kaꞌan ndoso tuꞌun yuꞌu Ndioxi kua ndi̱xiyo, iin saa nda kivi tá ki̱xi ra Juan, ra si̱kuchi naꞌa. Saa ku nuu xa̱á káꞌan ndoso nde ndá kuꞌva xáꞌnda chiñu Ndioxi. Ta kuaꞌa ni na xáa nduxa kuakiꞌvi na ichí ra.
17’Ta kúni i ná kundaa ini ndo, vani ndiꞌi xaꞌa ñuu ivi yóꞌó xiꞌin ndivi, sundi ley Ndioxi ya xa íyo xinaꞌa, ta nda iin kivi ndïꞌi xaꞌa ya ―káchi Jesús.
Jesús káꞌan ra xaꞌa na síndoo taꞌan
(Mt. 19:1-12; Mr. 10:1-12)
18Saa ndi̱kaꞌan ka Jesús káchi ra saa:
―Tá íyo iin taa ra síndoo yá síꞌi ra, ta tíndaꞌa ra xiꞌin inka ñaꞌa, ra yóꞌó ta väꞌa íkan ra chi kuakiꞌvi ra kuachi, xaꞌa ya yáꞌa ra ichí Ndioxi. Saa tu iin ra tíndaꞌa xiꞌin ñaꞌa yá ndi̱ndoo i̱kan ií yá, kuakiꞌvi tu ra ikán va kuachi, chi yáꞌa ra ichí Ndioxi ―káchi Jesús xiꞌin na.
Tuꞌun ndíchi xaꞌa ra kuika xiꞌin ra Lázaro
19Saa ku̱u xa̱á Jesús ndítuꞌun ra inka tuꞌun ndíchi xiꞌin na káchi ra saa:
―Ndi̱xiyo iin ra kuika, ra ndíxi vaꞌa ni, ndíxi ra tikoto ya lino savi ni, color ndíꞌi kua, ta ndiꞌi saa kivi íyo viko veꞌe ra, xíxi vaꞌa ra. 20Ta ndi̱xiyo tu iin ra ndaꞌvi náni Lázaro va. Iin táꞌi ndiꞌi kuñu ra, xáa ra índuꞌu ndaa ra yeꞌe ra kuika ikán. 21Ta yasin ka vi kúni kuxi ra ñaꞌa kóyo tixin mesa ra kuika ikán. Ndaꞌvi ka vi káa ra, nda tina tíꞌvi ndaa nuu ti̱kueꞌe sata ra. 22Saa ku̱u ta ti̱ndaa kivi ndi̱xiꞌi ra ndaꞌvi. Ta ndi̱kiꞌin na tatun Ndioxi ra kuaꞌan ra xiꞌin na nuu ndivi, nuu íyo ra Abraham. Ta sindiꞌi ndi̱xiꞌi tu ra kuika va. Saa ndi̱xaꞌan na si̱nduxin na ra.
23’Ta tíxuꞌvi ka vi ra ndíkaa ra nuu ñúꞌu na ndíi. Saa si̱kuꞌun nuu ra ndi̱koto ra, ta xi̱ni ra, ra Lázaro íyo ra xiꞌin ra Abraham. 24Ñaa ndi̱ndaꞌi koꞌo ra, káchi ra saa: “¡Tata iva yo Abraham, kundaꞌvi ini un kuni un yeꞌe! Kaꞌan xiꞌin ra Lázaro ná kuꞌun ra chikaa ndaꞌa ra ini tikuii ta ná kixi ra xiꞌin rá ndiyakun ra yaa i, saa chi ndóꞌo ni ini i ndíkaa i nuu xíxi ñu̱ꞌu̱ yóꞌó”, káchi ra kuika ikán. 25Saa ndi̱kuiin ra Abraham káꞌan ra: “Seꞌe, kuñuꞌu ini un, kivi xi̱taku un ñuu ivi ta vaꞌa ni ndi̱xiyo un. Ndi̱xiyo ndiꞌi ya kúni un, ta ra Lázaro yóꞌó ndo̱ꞌo ni ra ndaꞌvi. Yakan kua íyo vaꞌa ra vitin, ta yóꞌo̱ ndóꞌo ni un. 26Nda ni kúni yo, küvi xaa ra chindee ra yóꞌó, chi küvi yaꞌa ra taꞌvi kaꞌnu kúnu ni yóꞌó. Yakan kua ni na íyo choꞌo küvi xaa chaan, ta ni na íyo chaan küvi kixi choꞌo”, káchi ra Abraham xiꞌin ra kuika ikán. 27Saa káꞌan tuku ra, káchi ra saa: “Tata Abraham, xíkan ni i ya mani nuu un, tiꞌvi loꞌo un ra Lázaro ná kuꞌun ra veꞌe iva siꞌí i. 28Chi ndóo ka uꞌun ñani i, ta ná kuꞌun loꞌo ra ndituꞌun ra xiꞌin nda ya ná ndiko koo ini nda ta kïxi nda nuu ndíkaa i yóꞌó chi tíxuꞌvi ni i”, káchi ra. 29Saa ndi̱kuiin ra Abraham káꞌan ra: “Xa íyo va ley Ndioxi ya ta̱a ra Moisés xiꞌin ya ta̱a nda ndi̱kaꞌan ndoso tuꞌun yuꞌu Ndioxi. Xa íyo ya ikán ta ná kuni soꞌo nda ya”, káchi ra xiꞌin ra. 30Ñaa ndi̱kuiin ra kuika ikán káꞌan ra: “Saa ndixa va tata, sundi tá tu ná nditaku iin na ndíi kuꞌun na ndituꞌun na xiꞌin nda ta ndiko koo va ini nda”, káchi ra. 31Ñaa ndi̱kaꞌan ra Abraham, káchi ra saa: “Tá tu köo xíin nda kuni soꞌo nda nda ya ta̱a ra Moisés ni ya ta̱a nda ndi̱kaꞌan ndoso tuꞌun yuꞌu Ndioxi ta ni ná nditaku na ndíi kuꞌun na kaꞌan na xiꞌin nda ta küaꞌa vi nda kuni soꞌo nda”, káchi ra Abraham xiꞌin ra kuika ikán. Soꞌva káchi tuꞌun ndíchi ikán ―káchi Jesús xiꞌin na.
Currently Selected:
San Lucas 16: xta
Highlight
Share
Copy
Want to have your highlights saved across all your devices? Sign up or sign in
Active: ©Wycliffe Bible Translators, Inc. All rights reserved.
