San Lucas 19

Jesús xiꞌin ra Zaqueo

1Saa ku̱u ndi̱xaa Jesús yáꞌa ra maꞌñu ñuu Jericó kuaꞌan ra. 2Ta nuu ndi̱yaꞌa ra ikán índuꞌu iin ra náni Zaqueo, ra ínuu nuu na ndíkaya xuꞌun kuaꞌan ndaꞌa gobierno ku ra, ta kuika ni ra. 3Ta kúni ra ikán kuni ra Jesús, sundi köo kúchiñu ra kuni ñaꞌa ra saa chi iin chútu ndaa naꞌa, ta siin loꞌo ni tu xaꞌa va ra. 4Ta saa ke̱e ra xínu ra ndi̱kunuu ra kuaꞌan ra nda nuu. Ta ikán nda̱a ra ndaꞌa iin itun sicómoro ya kuchiñu ra kuni ra Jesús, chi ikán kua xíniñuꞌu yaꞌa ra. 5Tá yáꞌa Jesús kuaꞌan ra ta si̱kuꞌun nuu ra ndi̱koto ra ndaꞌa itun ikán. Saa xi̱ni ra ínuu ra Zaqueo ndaꞌa nu, ñaa ndi̱kaꞌan ra xiꞌin ra, káchi ra saa:

―Zaqueo, kuanuu ndaꞌa itun ñaa, kama loꞌo koo un nuu un, saa chi kivi vitin xíniñuꞌu i kuꞌun i veꞌe un ―káchi Jesús xiꞌin ra.

6Ñaa ndikun nu̱u ra, kúsini ka vi ra ndi̱kiꞌin ra Jesús kuaꞌan xiꞌin ra veꞌe ra. 7Saa tá xi̱ni inka naꞌa ya i̱kan Jesús xiꞌin ra Zaqueo, ta ñaa xa̱á na kánaꞌa na xaꞌa ra, káchi na saa:

―¿Ndachu kua kuaꞌan ra veꞌe ra yóꞌó?, ta süvi ra vaꞌa ku ra ―káchi na.

8Ñaa ndi̱kundichi ra Zaqueo xa̱á ra káꞌan ra xiꞌin Tata yo Jesús káchi ra saa:

―Koto un, Tata, vitin ta iin nditaꞌvi sava i ñaꞌa kúu mií i xiꞌin na ndaꞌvi. Ta sindiko koo ndiꞌi tu i ñaꞌa tá kúu na si̱ndaꞌvi i, nda kumi ichí ka kuaꞌa nduu ya sindiko koo i ndaꞌa na ―káchi ra xiꞌin Jesús.

9Saa ndi̱kaꞌan Jesús, káchi ra saa:

―Kivi vitin sikaku Ndioxi ra yóꞌó xiꞌin na veꞌe ra, saa chi seꞌe sikua ra Abraham ku tu ra yóꞌó va. 10Ta yeꞌe ku Taa ra xa̱a ñuu ivi yóꞌó ta vaxi i nduku i na nda̱ñuꞌu ya sikaku i na ―káchi Jesús.

Tuꞌun ndíchi xaꞌa uxi xuꞌun kàà ya yaꞌvi ni

(Mt. 25:14-30)

11Tá xíni soꞌo na káꞌan Jesús, ta saa ndi̱kaꞌan ra iin tuꞌun ndíchi xiꞌin na, saa chi xa kúyati ra xaa ra ñuu Jerusalén, ta xíka ini na: “Xa ti̱ndaa kivi kaꞌnda chiñu Ndioxi ñuu ivi yóꞌó”, káꞌán na.

12Ta saa xa̱á Jesús ndítuꞌun ra xiꞌin na káchi ra:

―Saa ndo̱ꞌo iin taa ra kúu mií chiñu ndee ni. Ke̱e ra kuaꞌan ra inka ñuu nuu taꞌnda xaꞌa ra niꞌi ra chiñu nduu ra rey, ta saa ndiko koo ra kaꞌnda chiñu ra nuu na ñuu ra. 13Tá xa ku̱yati kee ra kuꞌun ra ta ka̱na ra uxi nda xáa chiñu xiꞌin ra. Ta̱xi ra iin xuꞌun nani mina #19:13 Ya ikán ku yaꞌvi kíꞌin iin taa ra xáa chiñu uni yoo. ndaꞌa iin iin nda ta kuaꞌa ni ndáka ya. Ñaa ndi̱kaꞌan ra xiꞌin nda, káchi ra saa: “Ná ndoo xuꞌun yóꞌó xiꞌin ndo ikan ndo lucha xiꞌin ya, ná ndiko koo i saa ndikiꞌin i ya ndaꞌa ndo”, káchi ra xiꞌin nda. 14Ta mií na ñuu ra ni köo kúni na xíni ñaꞌa na. Kúndasi nuu na xíni na ra. Ñaa tá ke̱e ra kuaꞌan ra ta ti̱ꞌvi na ñuu ra sava nda taa, ndi̱kundikun nda kuaꞌan nda sata ra kaꞌan nda xiꞌin mií ra rey ra kaꞌnda chiñu xaꞌa ra ya ná täxi ra chiñu ndaꞌa ra nduu ra rey. Saa chi köo kúni na xíni ñaꞌa na, 15ta saa ni ndi̱niꞌi ra chiñu kuu ra rey, ñaa ndi̱ko koo ra ñuu ra. Tá ndi̱ko koo ra ndi̱xaa ra, ta saa ti̱ꞌvi ra chiñu kuaꞌan nuu nda moso ra ya kuꞌun nda nuu ra. Tá ndi̱xaa nda nuu ra, saa ndi̱ndakan tuꞌun ra nda ndisaa xuꞌun iin nda ndi̱niꞌi nda sata xuꞌun ya si̱ndoo ra xiꞌin nda. 16Saa ndi̱xaa ra núnu̱ú káꞌan ra, káchi ra saa: “Tata, uxi ka ku xuꞌun ndi̱niꞌi i siki xuꞌun ya ta̱xi un ndaꞌa i”, káchi ra xiꞌin ra. 17Saa ndi̱kuiin mií ra rey ikán káꞌan ra: “Vaꞌa ni i̱kan un. Vaꞌa ni moso ku un. Xaꞌa ya vaꞌa ni xa̱a chiñu un xiꞌin loꞌo ya ta̱xi i ndaꞌa un, ta vitin taxi i chiñu ndaꞌa un kundiso chiñu un xiꞌin uxi ñuu”, káchi ra xiꞌin ra. 18Ñaa ndi̱xaa ra uvi káchi ra saa: “Tata, xuꞌun ya ta̱xi un ndaꞌa i ta ndi̱niꞌi i uꞌun ka siki ya”, káchi ra xiꞌin ra. 19Saa ndi̱kuiin ra rey ikán káꞌan ra: “Vaꞌa ni i̱kan un. Vaꞌa ni moso ku tu yóꞌó va. Saa tu yóꞌo̱ va taxi i chiñu ndaꞌa un kundiso chiñu un xiꞌin uꞌun ñuu”, káchi ra. 20Ñaa ndi̱xaa inka ra moso, ra uni káchi ra saa: “Tata, uꞌún, yóꞌó íin xuꞌun un. Köo ndi̱sikuaꞌnu vi yeꞌe ya, chi̱vaꞌa i ya xi̱ndikaa vaꞌa ya ini paito va i. 21Chi ndi̱ndiꞌvi i xiꞌin ya ndañuꞌu ya saa chi ndee ni ini un. Síkee un ñaꞌa inka na ta ni köo ndi̱chiꞌi un xiꞌin na”, káchi ra moso ikán. 22Saa ndi̱kuiin mií ra rey ikán ndi̱kaꞌan ra: “Süvi moso vaꞌa ku yóꞌo̱. Suvi xiꞌin tuꞌun ya ndi̱kaꞌan un ñaa sikuiso kuachi i yóꞌo̱. Tá tu xíni un ndee ni ini i, ndíkuiso i ñaꞌa nuu köo ndi̱chiꞌi i káchi un, 23ta ¿ndachu köo ndi̱xaꞌan un chikaa un xuꞌun i banco tá ndi̱ko koo i ta ndikiꞌin i ya xiꞌin seꞌe ya?”, káchi ra. 24Saa ndi̱kaꞌan ra xiꞌin na ndíta ikán, káchi ra saa: “Kindaa ndo xuꞌun ndaꞌa ra ñaa, ta taxi ndo ya ndaꞌa ra ndi̱niꞌi uxi ka siki xuꞌun i”, káchi ra. 25Ñaa ndi̱kuiin na káꞌan na: “Tata, ¿ndachu taxi ka nde ya ndaꞌa ra?, xa uxi vi kua kúu mií ra”, káchi na. 26Saa ndi̱kuiin ra rey ikán káꞌan ra: “Tá íyo na xa kuaꞌa ni ñaꞌa kúu mií, ta niꞌi ka na ya saa chi xíni na kundaa na ya. Tá íyo na köo xíni kundaa ya, ta nda ya loꞌo kúu mií na ndundaa ndiꞌi ya ndaꞌa na, saa chi köo xíni na kundaa na ya. 27Saa tu ndiꞌi na sáa ini xíni yeꞌe, na köo ndi̱kuni koo i rey, siyaꞌa ndiꞌi ndo na ná kixi na chí choꞌo, ta vitin kaꞌni ndo na nuu i”, káchi ra rey ikán. Soꞌva káchi tuꞌun ndíchi ikán ―káchi Jesús xiꞌin na.

Kuakiꞌvi Jesús ñuu Jerusalén

(Mt. 21:1-11; Mr. 11:1-11; Jn. 12:12-19)

28Ñaa tá sindiꞌi Jesús ndi̱tuꞌun ra tuꞌun ndíchi ikán, saa xa̱á xíka tuku ra kuandaa ra kuaꞌan ra ñuu Jerusalén. 29Tá ndi̱xaa ra xaꞌa iku nuu íyo ni itun Olivo yati ñuu Betfagé xiꞌin ñuu Betania, saa ti̱ꞌvi ra uvi nda ítaꞌan xiꞌin ra, 30ndi̱kaꞌan ra xiꞌin nda, káchi ra saa:

―Kuáꞌan ndo ñuu loꞌo xíto ndaa kaa. Tá ndi̱xaa ndo ta nditaꞌan ndo iin burru loꞌo núꞌni ri, ri täꞌan koso naꞌa ku ri. Ta saa ndaxin ndo ri kixi xiꞌin ndo. 31Tá ndá naꞌa ke̱ta káꞌan xiꞌin ndo: “¿Ndachu ndáxin ndo ri?”, káchi na, ta kaꞌan ndo xiꞌin na: “Tata yo xíniñuꞌu ri”, kachi ndo xiꞌin na ―káchi ra xiꞌin nda.

32Saa ke̱e nda kuaꞌan nda. Tá íyo ndiꞌi ya ndi̱kaꞌan ra xiꞌin nda, saa ndixa íyo ya ndi̱taꞌan nda. 33Tá sikan ñúꞌu nda ndáxin nda ri, saa ka̱na koo xitoꞌo ri káꞌan na xiꞌin nda:

―¿Ndachu ndáxin ndo burru sana nde? ―káchi na xiꞌin nda.

34Ñaa ndi̱kuiin nda káꞌan nda:

―Tata yo xíniñuꞌu ri, yakan ndáxin nde ri ―káchi nda xiꞌin na.

35Saa ndi̱kundaka nda ri kuaꞌan xiꞌin nda nuu Jesús. Ndi̱xaa nda ki̱ꞌin nda chilo nda to̱so nda sata ri, ñaa si̱ndaa nda Jesús sata ri. 36Tá yóso ra ri kuaꞌan ra ta chíndoo naꞌa chilo na ichí nuu yáꞌa ra kuaꞌan ra. 37Ñaa tá ku̱yati ra nuu tíkaa ndee xaꞌa iku Olivo ikán, ta xa̱á ndiꞌi mií na ndíkun sata ra káꞌan na ta ndee ni nda̱niꞌi na tachi na káꞌan na ya vaꞌa xaꞌa Ndioxi, xaꞌa ya kuaꞌa ni ya vaꞌa i̱kan ra xi̱ni na. 38Saa káꞌan na:

―Ná ikan Ndioxi ya vaꞌa xiꞌin ra yóꞌó, chi Rey ra kaꞌnu nuu yo ku ra, ra ke̱e nuu Ndioxi ku ra. Vitin taxi Ndioxi koo vaꞌa naꞌa xiꞌin ra nuu ndivi, ta ná kunuu sukun ni ya toꞌo ra ―káchi na.

39Ta saa ndi̱kaꞌan sava nda fariseo ñúꞌu tañu naꞌa ikán xiꞌin Jesús, káchi nda saa:

―Tata Maestro, kaꞌan xiꞌin na ndíkun sata un ná kutaxin yuꞌu na ―káchi nda.

40Saa ndi̱kuiin Jesús káꞌan ra xiꞌin nda:

―Tá ná kaꞌan i xiꞌin na yóꞌó kutaxin yuꞌu na, ta ndikuiin yu̱ú kaꞌan ya xaꞌa i ―káchi ra xiꞌin nda.

41Ñaa ndi̱xaa Jesús yati ñuu Jerusalén. Tá xi̱ni ra ñuu ikán ta xa̱á ra xáku ra xaꞌa na ndóo ikán, 42káchi ra saa:

―Tá tu ndóꞌo̱ xíin ku ndo kundaa ini ndo unkua kúni Ndioxi ikan ra xiꞌin ndo vitin, ta kuchiñu ndo koo vaꞌa ini ndo. Sundi xïin ndo kundaa ini ndo, yakan kua íyo sêꞌe ya nuu ndo küvi kuni ndo ya. 43Sundi vaxi kivi ta kixi na íyo kuachi xiꞌin ndo kani taꞌan na xiꞌin ndo. Iin kava nduu ndiꞌi na nuu ñuu ndo. Ndiꞌi ni kúu ñaꞌñu ndasi na ndóꞌo̱. 44Iin sindiꞌi vaꞌa na xaꞌa ndo. Nda iin yu̱ú xaꞌa veꞌe ndo ndöo ikan na. Iin ndiꞌi vaꞌa xaꞌa ñuu ndo, saa chi köo xíin ndo ndikuni ndo yeꞌe, ya sikaku i ndóꞌo̱ ―káchi Jesús xiꞌin na.

Ndáꞌi Jesús xiꞌin na ñúꞌu xíko tin na sáta ini veꞌe ñuu kaꞌnu ñuu Jerusalén

(Mt. 21:12-17; Mr. 11:15-19; Jn. 2:13-22)

45Saa tá ndi̱ꞌi ikán ta ndi̱xaa ra ñuu Jerusalén, ndi̱keta ra ini veꞌe ñuꞌu kaꞌnu. Ñaa xa̱á ra táva ndiꞌi ra na ñúꞌu xíko tin na ñúꞌu sáta ini veꞌe ñuꞌu ikán. 46Ndi̱kaꞌan ra xiꞌin na, káchi ra saa:

―Soꞌva káchi tuꞌun Ndioxi: “Veꞌe i ta veꞌe nuu kaꞌan na xiꞌin i kua”, káchi tuꞌun ra. Ta ndóꞌo̱ köo íkan ndo saa. Nda tá káa iin kava nuu ndíkitaꞌan na kuiꞌna, saa íkan ndo xiꞌin veꞌe Ndioxi ―káchi Jesús xiꞌin na.

47Ndiꞌi saa kivi ndi̱xika ra sínaꞌa ra ini veꞌe ñuꞌu ikán. Ta nda ínuu nuu ndiꞌi sutu xiꞌin na xikuaꞌa tin nda sínaꞌa ya ta̱a ra Moisés mi ñuu ikán, ndúku nda kuꞌva kaꞌni nda ra. 48Ta ni köo kúvi niꞌi nda kuꞌva ikan nda saa, chi ndiꞌi ni kúu naꞌa xíni soꞌo ni na ya káꞌan ra.

Currently Selected:

San Lucas 19: xta

Highlight

Copy