San Lucas 20

Ndákan tuꞌun nda Jesús unku ta̱xi ichí ndaꞌa ra

(Mt. 21:23-27; Mr. 11:27-33)

1Saa ku̱u iin kivi tá ndíkaa Jesús veꞌe ñuꞌu kaꞌnu ñuu Jerusalén sínaꞌa ra tuꞌun vaꞌa xaꞌa Ndioxi. Ta saa ndi̱xaa nda ínuu nuu ndiꞌi sutu xiꞌin nda sínaꞌa ya ta̱a ra Moisés tin na xikuaꞌa, 2ndi̱xaa nda káꞌan nda xiꞌin ra, káchi nda saa:

―Kaꞌan xiꞌin nde: ¿mií ki̱ꞌin un ichí ya íkan un saa? ¿Ta unku ta̱xi ichí ndaꞌa un xaa un saa? ―káchi nda xiꞌin ra.

3Saa ndi̱kuiin ra káꞌan ra:

―Saa tu yeꞌe va, kúni i ndakan tuꞌun i ndóꞌo̱, ta ndikuiin ndo yuꞌu i: 4Ra Juan, ta ¿unku na ta̱xi ichí ndaꞌa ra ya si̱kuchi ra naꞌa? ¿Án Ndioxi ta̱xi ichí ndaꞌa ra sikuchi ra naꞌa án na ivi yóꞌó ta̱xi ya ndaꞌa ra i̱kan ra saa? ―káchi Jesús xiꞌin nda.

5Ñaa xa̱á nda káꞌan nda xiꞌin taꞌan nda, káchi nda saa:

―Tá ná kaꞌan yo xiꞌin ra: “Ndioxi ku ra ta̱xi ichí ndaꞌa ra Juan”, kachi yo, ta kaꞌan ra xiꞌin yo: “¿Ndachu köo ndi̱kandixa ndo ra?”, kachi ra. 6Ta ni küvi kaꞌan tuku yo: “Naꞌa ku na ta̱xi ichí ndaꞌa ra”, kachi yo, saa chi ndiꞌi na kándixa ni ñaꞌa na. “Ra ndi̱kaꞌan ndoso tuꞌun yuꞌu Ndioxi ku ra”, káchi na, ta ìyo ni kaꞌni na yoo xiꞌin yu̱ú ―káchi nda xiꞌin taꞌan nda.

7Ñaa ndi̱kuiin nda káchi nda saa:

―Köo xíni nde unku ta̱xi ichí ndaꞌa ra Juan ―káchi nda. 8Saa ndi̱kuiin Jesús káꞌan ra:

―Tá tu saa ra ni yeꞌe küvi kaꞌan i xiꞌin ndo unku ta̱xi ichí ndaꞌa i ―káchi ra xiꞌin nda.

Tuꞌun ndíchi xaꞌa ra ta̱xi too ñuꞌú

(Mt. 21:33-44; Mr. 12:1-11)

9Sindiꞌi ikán xa̱á tuku Jesús ndítuꞌun ra iin tuꞌun ndíchi káchi ra saa:

―Saa ndo̱ꞌo iin ra taa, ta̱an ra iin teꞌe ti uva nuu ñuꞌú ra. Ñaa ta̱xi too ra ya ndaꞌa inka naꞌa. Saa ke̱e ra kuaꞌan xika ra inka ñuu. 10Tá ti̱ndaa kivi ndi̱xinu ti uva, ta saa ti̱ꞌvi ra iin moso ra kuaꞌan ra kaꞌan ra xiꞌin na ndu̱ku too ñuꞌú nuu ra, ya nditaꞌvi na loꞌo ri xiꞌin ra ya kúu yaꞌvi ñuꞌú ra. Ta ni köo ndi̱xiin na taxi na ri ndaꞌa moso ra. Mií ka na ka̱ni ñaꞌa, xa̱a nduvaꞌa na xiꞌin ra, iin saa káa yuchi ndaꞌa ra, nda iin ñaꞌa köo ndáa ra ndi̱ko koo ra. 11Ta saa ti̱ꞌvi tuku ra inka moso ra kuaꞌan ra. Tá i̱kan na xiꞌin ra nuu, saa i̱kan tu na xiꞌin ra ikán va. Xa̱a nduvaꞌa ni na xiꞌin ra. Si̱ndiko koo yuchi tu na ra ikán va kuanuꞌu ra. 12Ñaa ti̱ꞌvi tuku ra inka moso ra, ra uni kuaꞌan ra. Saa i̱kan tu na xiꞌin ra ikán va, si̱tikueꞌe ni na ra, saa ta̱xin na ra kuaꞌan ra.

13’Ñaa xa̱á ndíkani ini mií ra ta̱xi too ñuꞌú ikán, káchi ra saa: “¿Ta unkua ikan yo vitin? ¿Án vaꞌa ka tiꞌvi yo seꞌe mani yo kuꞌun ra? Án sana kañuꞌu na ra yóꞌó ta xäa nduvaꞌa na xiꞌin ra”, káchi ra. 14Ta saa ti̱ꞌvi ra seꞌe ra kuaꞌan ra. Tá xi̱ni na seꞌe ra, ñaa xa̱á na káꞌan na: “Seꞌe ra xíin ñuꞌú ya yóꞌó ku ra vaxi kaa. Naꞌa ndo ná kaꞌni yo ra, ta ná ndoo ndiꞌi ñuꞌú iva ra ndaꞌa yo”, káchi na. 15Ñaa ta̱va na ra nuu ñuꞌú iva ra, xa̱ꞌni ñaꞌa na. Soꞌva káchi tuꞌun ndíchi yóꞌó ―káchi Jesús xiꞌin na.

Saa ndi̱kaꞌan ra xiꞌin na ndóo xíni soꞌo ikán káchi ra saa:

―Tá ná xaa iva ra ta ¿unkua ikan ra xiꞌin na xa̱ꞌni seꞌe ra, ná kachi ndóꞌo̱? 16Ná kaꞌan i xiꞌin ndo unkua ikan ra xiꞌin na. Tá ná xaa ra, ta iin sindiꞌi xaꞌa ndiꞌi ra na ta̱xi too ra ñuꞌú ndaꞌa, kaꞌni ra na. Ñaa nduku ra inka na kundaa ñuꞌú ra ―káchi Jesús xiꞌin na.

Tá xi̱ni soꞌo na ya ndi̱kaꞌan ra. Ñaa xa̱á na káꞌan na, káchi na saa:

―Ná täxi Ndioxi kundoꞌo yo tá ndo̱ꞌo na ndu̱ku too ñuꞌú ra ikán ―káchi na.

17Ñaa ndi̱koto ra nuu na ta ndi̱kaꞌan ra xiꞌin na, káchi ra saa:

―¿Án köo kándixa ndo ya káꞌan tuꞌun ndíchi yóꞌó? ¿Ta unkua kúni kaꞌan tuꞌun Ndioxi ya ta̱a na xinaꞌa? Chi tuꞌun ikán káꞌan ya:

Yu̱ú ya xíniñuꞌu ni na síkuaꞌa veꞌe kua ikán.

Ta köo ndi̱xiin na kuniñuꞌu na ya, ku̱ndasi na ya.

18Yakan tá kúu na kóyo sata yu̱ú ikán, ta ndoꞌni ndiꞌi na, án yu̱ú ikán ná ndíkava sata na ta iin síkuachi yuchi ndiꞌi ñaꞌa ya ―káchi Jesús.

Káꞌan Jesús xaꞌa xuꞌun ya chaꞌvi na nuu na chiñu

(Mt. 21:45-46; 22:15-22; Mr. 12:12-17)

19Ñaa xi̱ni soꞌo nda naꞌnu nuu sutu ikán xiꞌin nda sínaꞌa ley ya ta̱a ra Moisés ya ndi̱kaꞌan Jesús, ta ndikun ku̱ni nda tiin ñaꞌa nda, chi ku̱ndaa ini nda xaꞌa mií nda kua ndi̱kaꞌan tuꞌun ndíchi ikán. Sundi köo ndi̱kuchiñu nda tiin nda ra, saa chi íꞌvi nda nuu na ñuu.

20Saa ku̱u ta xa̱á nda ndúku nda ndá kuꞌva koo tiin nda Jesús, taxi nda kuachi xaꞌa ra nuu na chiñu. Ñaa ti̱ꞌvi nda sava nda taa kuaꞌan nda koto nani nda Jesús, chi kúni nda koto ndoso nda ra xaꞌa ndá ka mií tuꞌun káꞌan ra, saa kuchiñu taxi nda kuachi xaꞌa ra ndaꞌa na chiñu. 21Saa ndi̱ndakan tuꞌun nda ra, káchi nda saa:

―Tata Maestro, xíni nde vaꞌa ni sínaꞌa un, nina ya ndaa káꞌan un xiꞌin naꞌa, ta ni köo ndíkaxin un naꞌa. Tá íyo ndiꞌi ya kúni Ndioxi, saa íyo ya sínaꞌa un na, ndaa ni sínaꞌa un na. 22Ta vitin kúni nde kundaa ini nde unkua káchi yóꞌo̱, ¿án vaꞌa chaꞌvi yo xuꞌun ya káꞌan ra César, ra rey ñuu Roma xiꞌin yo án chäꞌvi yo ya? ―káchi nda xiꞌin ra.

23Sundi ku̱ndaa ini ra ya xíto ndoso ñaꞌa nda, saa ndi̱kaꞌan ra xiꞌin nda, káchi ra saa:

―¿Ndachu vaxi ndo xíto ndoso ndo yeꞌe? 24Taxi ndo iin xuꞌun kàà ná koto i nuu ya. ¿Unku naꞌna kua ta unku kivi kua ínuu nuu ya? ―káchi ra xiꞌin nda.

Saa ndi̱kuiin nda káꞌan nda:

―Naꞌna ra rey César kua ―káchi nda xiꞌin ra.

25Saa ndi̱kuiin ra káchi ra saa:

―Tá tu naꞌna ra rey ínuu nuu ya, ta kúni kachi ya xuꞌun ra ikán kua. Taxi ndo ya kúu kuenta ra rey ndaꞌa ra, ta vaꞌa taxi tu ndo ya kúu kuenta Ndioxi va ndaꞌa mií Iva yo Ndioxi ―káchi Jesús xiꞌin nda.

26Ta köo ndikuchiñu nda sindikava nda ra xaꞌa ya xíto ndoso ñaꞌa nda nuu na ñuu. Iin ndi̱kanda ini nda xíto nda nuu ra xaꞌa ya vaꞌa ni káꞌan ra, saa vaꞌa ka kutaxin yuꞌu nda.

Ndákan tuꞌun nda saduceo Jesús án ya ndixa kua ndítaku na ndíi

(Mt. 22:23-33; Mr. 12:18-27)

27Saa ku̱u ke̱e sava nda saduceo ndi̱xaꞌan nda nuu Jesús ndákan tuꞌun ñaꞌa nda xaꞌa na ndíi. Chi köo kándixa ya ndítaku na ndíi. Yakan ndi̱xaa nda káꞌan nda xiꞌin Jesús, káchi nda saa:

28―Tata Maestro, ley ya ta̱a ra Moisés káchi ya saa: “Tá íyo iin ra ti̱ndaꞌa xiꞌin iin ñaꞌa, tá tu ndi̱xiꞌi ra ta ndi̱ndoo kuâan mií yá síꞌi ra, ta xíniñuꞌu ndikiꞌin ñani ra yá, ya ná kaku seꞌe yá. Tá tu ka̱ku seꞌe yá, ta tá káa seꞌe ií yá ra ndi̱xiꞌi saa nduu mií ya loꞌo ikán”, káchi ya ta̱a ra Moisés. 29¿Ta unkua káchi yóꞌo̱? Saa ndo̱ꞌo sava na iin veꞌe, uxa ku nda veꞌe nda. Ta ra núnu̱ú, ti̱ndaꞌa ra xiꞌin iin ñaꞌa. Saa ku̱u ta ndi̱xiꞌi ra. Ni köo seꞌe ra ndi̱kaku xiꞌin yá. 30Ñaa ti̱ndaꞌa inka ñani ra, ra uvi xiꞌin yá ta ndi̱xiꞌi tu ra ikán va. Ni köo ndi̱kaku tu seꞌe ra ikán va xiꞌin yá. 31Ñaa ti̱ndaꞌa tuku inka ra uni xiꞌin yá, ta saa ndo̱ꞌo tu ra ikán va. Uxa saa nda ti̱ndaꞌa xiꞌin yá, ta saa ndo̱ꞌo ndiꞌi nda, ni köo seꞌe nda ndi̱kaku xiꞌin yá. 32Saa ku̱u ndi̱xiꞌi tu mií va yá. 33Ná nditaku na ndíi, ta ¿unku nda kindoo xiꞌin yá xaꞌa ya ndi̱xiyo ndiꞌi nda xiꞌin yá? ―káchi nda saduceo ikán xiꞌin Jesús.

34Saa ndi̱kuiin ra káꞌan ra:

―Naꞌa, na íyo ñuu ivi yóꞌó tíndaꞌa na, saa táxi na seꞌe na tíndaꞌa na. 35Sundi na kúu mií ichí, na ndi̱niꞌi taꞌvi kutaku kivi ikán, ta köo ka naꞌa tindaꞌa ni täxi na seꞌe na tindaꞌa ka na. 36Saa chi nuu ndivi köo ka na kuvi, tá íin na tatun Ndioxi, saa nduu na. Ta nduu na seꞌe Ndioxi xaꞌa ya ndi̱taku na i̱kan ra. 37Nda ni ya ta̱a ra Moisés xinaꞌa ta teꞌe ni káꞌan ya. Ya ikán sínaꞌa ya mií yo xaꞌa na ndíi ya ndítaku na, chi ya ta̱a ra Moisés tá ndi̱kaꞌan Ndioxi xiꞌin ra nuu xi̱ni ra xíxi itun iñú, káchi ya saa: “Yeꞌe ku Ndioxi ra káñuꞌu ra Abraham, tin ra Isaac xiꞌin ra Jacob”, káchi ra. 38Koto ndo unkua káꞌan Ndioxi, tá tu köo na ndítaku íkan ra ta köo na kañuꞌu vi ñaꞌa. Tá kúu nda ikán, nda ndi̱xiꞌi ku nda nuu ndóꞌo̱, sundi nuu Ndioxi ta köo ndi̱xiꞌi nda, nda táku va ku nda ―káchi Jesús xiꞌin nda saduceo ikán.

39Saa ndi̱kaꞌan sava nda maestro nda sínaꞌa ley ya ta̱a ra Moisés, káchi nda saa:

―Vaꞌa ni káꞌan un, Tata Maestro ―káchi nda xiꞌin Jesús.

40Ta saa xi̱kuiin nda, köo ndi̱keꞌe ka ñaꞌa nda.

Chee ka ra kúu Cristo ra sikaku na ñuu ivi nuu ra David

(Mt. 22:41-46; Mr. 12:35-37)

41Saa ku̱u ta ndi̱ndakan tuꞌun Jesús na ndóo ikán, káchi ra saa:

―¿Unkua káchi ndóꞌo̱? ¿Ndachu káꞌan naꞌa seꞌe sikua ra David ku ra kúu ra kúu Cristo, káchi na? 42Ta suvi mií ra David ku ra ndi̱kaꞌan nuu tutu ya Salmo, káchi ra saa:

Soꞌva káchi Ndioxi xiꞌin Tata i:

Naꞌa koo un ñaꞌñu kuáꞌá i.

43Yóꞌó koo un xiꞌin i nda ná sindiꞌi xaꞌa ndiꞌi i na sáa ini xíni yóꞌo̱,

káchi Ndioxi xiꞌin ra. 44Xiꞌin tuꞌun yóꞌó káꞌan ra David Cristo ku ra Kaꞌnu nuu ra. Ta ndachu kúu Cristo seꞌe sikua ra David? ―káchi Jesús xiꞌin na.

Väꞌa kutoo yo xaa toꞌo naꞌa yoo

(Mt. 23:1-36; Mr. 12:38-40; Lc. 11:37-54)

45Saa xíni soꞌo ndiꞌi naꞌa ndóo na, ñaa ndi̱kaꞌan Jesús xiꞌin nda ítaꞌan xiꞌin ra, káchi ra saa:

46―Kuenta ni koo ndo, ïkan ndo tá íkan nda sínaꞌa ya ta̱a ra Moisés, saa chi saa íkan nda: Ndíkundixi nda tikoto nani ni chi kútoo nda ná kañuꞌu ndiꞌi naꞌa nda. Kútoo nda ná chindee ndiꞌi na nda tá xíka nda kuaꞌan nda nuu yaꞌvi. Saa tu tá kuaꞌan nda veꞌe ñuꞌu sinagoga án nuu viko, nina nuu tai ndóo na kúu mií chiñu ndee kútoo nda kundoo nda. 47Ta kíndaa nda veꞌe ná ndi̱ndoo ndaa ndaꞌa ná, ñaa xáa nda ndása vaꞌa nda mií nda nuu inka na, ta xáa nda káꞌan nda xiꞌin Ndioxi. Naꞌa ni káꞌan nda xiꞌin ra ya ná kuni inka naꞌa káñuꞌu ni nda Ndioxi. Ndaꞌvi ni nda yóꞌó, chi ndee ni ka ndoꞌo nda ikan Ndioxi ―káchi Jesús.

Currently Selected:

San Lucas 20: xta

Highlight

Copy