San Lucas 2

Kivi ka̱ku Jesús

(Mt. 1:18-25)

1Ta suvi mií tiempo ikán kua ku̱u mií ra rey Augusto chiñu nuu ndiꞌi na ivi ta xa̱ꞌnda ra chiñu ya kuꞌun ndiꞌi na ndikaꞌi kivi na. 2Ta ya ikán ku censo ya núnuú ndi̱kuita tá kivi ku̱u ra Cirenio chiñu xa̱ꞌnda chiñu ra nuu na ñuu ya ñúꞌu estado Siria. 3Ta saa kuaꞌan ndiꞌi na kaꞌi kivi na ñuu nuu ka̱ku na yata xii na. 4Ta xaꞌa ya ikán kua ke̱e ra José ñuu Nazaret ya ndíkaa estado Galilea. Ta ndi̱kiꞌin ra kuaꞌan ra kaꞌi kivi ra ñuu Belén ya ndíkaa estado Judea, nuu ka̱ku ra rey David, xii sikua ra. 5Ke̱e ra kuaꞌan ra xiꞌin yá María kaꞌi kivi na, ta xa íyo nduvi ndiꞌi ya tindaꞌa na xiꞌin taꞌan na ta xa ñúꞌu va seꞌe yá. 6Tá ndóo na ñuu Belén ikán saa ti̱ndaa kivi kaku seꞌe yá. 7Ta köo ndi̱niꞌi na veꞌe nuu kundoo na, saa chi xa chútu ni veꞌe nuu kíxi na xíka ichí, yakan ndá nuu kíxi kiti ndi̱xaꞌan na ndi̱kixi na, ta ikán ka̱ku ya loꞌo seꞌe yá ra núnu̱ú, taa loꞌo ku ra ka̱ku, saa su̱vi yá ra xiꞌin iin tikoto ta chi̱nduꞌu yá ra kíxi ra nuu ñúꞌu ñaꞌa xíxi kiti.

Na tatun Ndioxi xiꞌin na paxto

8Ta mí kivi ka̱ku Jesús ndóo nda paxto yati ñuu Belén, ndóo nda iku ndáa nda levo sana nda, ta ikán kíxi nda xiꞌin ri ñûu. 9Saa ku̱u ta ndi̱tuvi iin tatun Ndioxi, ta ndi̱yeꞌe ni ya yeꞌe Ndioxi nuu ndóo nda. Ñaa ndi̱ndiꞌvi ni nda. 10Saa ndi̱kaꞌan tatun ikán xiꞌin nda, káchi ya saa: “Ku ïꞌvi ndo chi ya vaꞌa vaxi i ndituꞌun i xiꞌin ndo, ya kusini ni ndiꞌi ku na ñuu ivi kua vaxi i kaꞌan i xiꞌin ndo. 11Kivi vitin ka̱ku iin ra loꞌo sikaku ndóꞌo̱ ñuu ra rey David, ta ra ikán ku Cristo ra ndi̱kaxin Ndioxi kaꞌnda chiñu nuu na ñuu ivi. 12Tá ná nditaꞌan ndo ra, ta soꞌva káa ra nditaꞌan ndo: Súvi ra tikoto ndíkaa ra ini iin itun nuu ñúꞌu ñaꞌa xíxi kiti”, káchi tatun Ndioxi xiꞌin nda paxto ikán.

13Ta saa kama ni ndi̱tuvi kuaꞌa ka tatun Ndioxi nuu ndivi, ndi̱kitaꞌan ya xiꞌin tatun ya ndi̱kaꞌan xiꞌin nda paxto ikán. Ñaa xa̱á na káꞌan na ya vaꞌa xaꞌa Ndioxi, káchi na saa:

14¡Ná kunuu ka ya toꞌo Ndioxi, ra íyo nuu ndivi!

2 Ta ná koo vaꞌa ni ini na ñuu ivi na íkan ra ya vaꞌa xiꞌin ―káchi na tatun ikán.

15Ta saa tá ndi̱ko koo na tatun ikán kuaꞌan na nuu ndivi, saa xa̱á káꞌan nda paxto ikán xiꞌin taꞌan nda káchi nda saa:

―Ná koꞌyo ñuu Belén koto yo ya xi̱ni soꞌo yo ndi̱kaꞌan tatun Ndioxi xiꞌin yo ―káchi nda.

16Saa ke̱e nda xínu nda kuaꞌan nda. Ñaa ndi̱xaa nda ñuu Belén ta ndi̱taꞌan nda yá María xiꞌin ra José ndóo na xiꞌin ra loꞌo ka̱ku, ndíkaa ra nuu ñúꞌu ñaꞌa xíxi kiti. 17Saa tá ndi̱xaa nda xíto nda ra loꞌo ikán, ta xa̱á#2:17 nda ndítuꞌun ndiꞌi nda ya ndi̱kaꞌan tatun Ndioxi xiꞌin nda xaꞌa ra. 18Ta ndiꞌi na xíni soꞌo tuꞌun káꞌan nda paxto ikán ndi̱kanda ni ini na ndóo na. 19Saa xíni soꞌo ndiꞌi yá María ya káꞌan nda, ta chívaꞌa ndiꞌi yá ya nima yá, ta xíka ka vi ini yá xaꞌa ya káꞌan nda xaꞌa ra loꞌo seꞌe yá. 20Ta saa ndi̱ko koo nda kuanuꞌu nda iku nuu ndóo kiti sana nda, káꞌan nda ya vaꞌa xaꞌa Ndioxi kuaꞌan nda. Ta kúsini ka vi nda kuaꞌan nda xaꞌa ya xi̱ni soꞌo nda ndi̱kaꞌan tatun Ndioxi xiꞌin nda, saa chi tá íyo ya ndi̱kaꞌan tatun ikán xiꞌin nda, saa íyo ya xi̱ni nda.

Kuaꞌan ra José xiꞌin yá María nditaxi na ra loꞌo seꞌe na ndaꞌa Ndioxi

21Ndi̱xinu una kivi ka̱ku ra loꞌo ikán, ta saa chi̱nuu na tuni Ndioxi ra saa chi saa íyo ya ndi̱kaꞌan Ndioxi xinaꞌa. Ta chi̱nuu na kivi ra, náni ra Jesús, tá íyo ya ndi̱kaꞌan tatun Ndioxi xiꞌin yá María tá täꞌan kuñuꞌu seꞌe yá, saa íyo ya i̱kan na.

22Ta saa ndi̱xinu kivi ya xi̱nduꞌu yá María xa̱a i̱í yá tá kuꞌva káꞌan ya ndi̱kaꞌan Ndioxi xiꞌin ra Moisés ta̱a ra, ñaa ke̱e na kuaꞌan na xiꞌin ra loꞌo seꞌe na veꞌe ñuꞌu kaꞌnu ya íin ñuu Jerusalén. Kuaꞌan na taxi na ra ndaꞌa Ndioxi, 23tá káchi tuꞌun Ndioxi ya ta̱a ra Moisés xinaꞌa: “Ndiꞌi seꞌe taa nuú na, ta xíniñuꞌu taxi na ra ndaꞌa Ndioxi”. 24Saa ndiꞌi iva siꞌí nda vali xíniñuꞌu na taxi na uvi ndiuu án uvi sata ndaꞌa Ndioxi, káchi ya ta̱a ra Moisés xinaꞌa.

25Ta tiempo ikán íyo iin ra náni Simeón ñuu Jerusalén, ta vaꞌa ni taa kúu mií ra, káñuꞌu ni ra Ndioxi, ta íyo Tachi I̱í Ndioxi xiꞌin ra. Saa ndátun ra taa, ra tiꞌvi Ndioxi kixi sindiko ini na Israel. 26Ta xa yachi ndi̱kaꞌan Tachi I̱í Ndioxi xiꞌin ra, káchi ya saa:

―Küvi yachi un, nda ná kuni un taa ra ti̱ꞌvi Ndioxi sikaku na Israel, saa kuvi un ―káchi ya xiꞌin ra.

27Ta mi kivi ikán si̱kaꞌán Tachi I̱í Ndioxi ini ra Simeón ndi̱xaa ra veꞌe ñuꞌu. Saa ndi̱xaa ra José xiꞌin yá María tin ra loꞌo Jesús veꞌe ñuꞌu ya xaa ndúvi na ya káꞌan ya ta̱a ra Moisés. 28Saa ndi̱kiꞌin ra Simeón ra loꞌo Jesús ndi̱kunumi ndaa ñaꞌa ra. Ta xa̱á ra káꞌan ra ya vaꞌa xaꞌa Ndioxi, káchi ra saa:

29Tata Iva yo Ndioxi, vitin xa ndi̱xinu ya ndi̱kaꞌan un xiꞌin i yachi, yakan vaꞌa taxi un kuvi yeꞌe ra xáa chiñu nuu un chi xa íyo vaꞌa ni ini i.

30Chi xa xi̱ni i taa ra ti̱ꞌvi un vaxi sikaku na ñuu ivi.

31I̱kan un ya vaꞌa xaꞌa ndiꞌi kúu na ñuu ivi, chi ti̱ꞌvi un ra yóꞌó vaxi ra ya ná kuni ñaꞌa na.

32Ta ra loꞌo yóꞌó, tá káa ñu̱ꞌu̱ yéꞌe̱ saa káa ra, chi sinaꞌa ra ichí un nuu ndiꞌi na ñuu na köo kúu Israel.

Ta ra yóꞌó ku ra ndasa kaꞌnu ni kivi na Israel.

―káchi ra Simeón xiꞌin Ndioxi.

33Ta saa ndi̱kanda ini ra José xiꞌin yá María ya káꞌan ra Simeón xaꞌa ra loꞌo seꞌe na. 34Saa ndi̱kaꞌan ra tuꞌun yóꞌó xiꞌin na, káchi ra saa:

―Ndioxi ná chikaa ka ya vaꞌa ndóꞌo̱.

Ta saa ndi̱kaꞌan ka ra xiꞌin yá María siꞌí ra loꞌo Jesús, káchi ra saa:

―Ndioxi ndi̱kaxin ra loꞌo seꞌe un yóꞌó ya ka̱ku ra, ta kuaꞌa ni na Israel sikaku ra. Ta inka na xïin ndikiꞌin vaꞌa ñaꞌa ndiꞌi xaꞌa na, saa chi ra yóꞌó kúu taa ra koo iin seña sinaꞌa Ndioxi nuu na ñuu ivi ta kuaꞌa ni na küaꞌa kandixa ñaꞌa, 35saa ndituvi ya ndíkani ini na. Ta yóꞌo̱, tindaa iin kivi ta yáꞌa ni kusuchi ini un, nda tá ndóꞌo na táꞌnda xiꞌin i̱chi nima, saa kundoꞌo nima un ―káchi ra xiꞌin yá María.

36Ta kivi ikán íyo iin yá náni Ana ini veꞌe ñuꞌu kaꞌnu ikán ta xa ku̱chee ni yá, saa káꞌan ndoso yá tuꞌun yuꞌu Ndioxi, ta seꞌe ra Fanuel ku yá. Xii sikua yá ku ra Aser. Ta loꞌo ni yá ti̱ndaꞌa yá. Ta ndi̱xiyo yá xiꞌin ií yá uxa kuiya, ta saa ndi̱xiꞌi ra. 37Ñaa ki̱ndoo yá íyo kuâán yá nda kivi ku̱u mií yá kumi xiko kumi kuiya yá. Ta nda iin kivi köo ndi̱keta yá ini veꞌe ñuꞌu. Nduvi niuu ndíkaa yá veꞌe ñuꞌu, sava xíxi suꞌun yá ta káꞌan ni yá xiꞌin Ndioxi. 38Ta saa ndi̱xaa yá mií hora ikán nuu íyo iva siꞌi ra loꞌo Jesús. Ñaa xa̱á yá káꞌan yá xiꞌin Ndioxi, táxi yá ndixaꞌvi ndaꞌa ra xaꞌa ya ti̱ꞌvi ra, ra loꞌo Jesús vaxi ra ñuu ivi. Ta saa ndítuꞌun yá xaꞌa ra xiꞌin ndiꞌi na ndátun Ndioxi ya tiꞌvi ra taa sikaku na Israel.

Ndi̱ko koo na kuanuꞌu na ñuu Nazaret

39Sindiꞌi tá xa̱a súvi ndiꞌi na ya ndi̱kaꞌan Ndioxi ya ta̱a ra Moisés, ta saa ndi̱ko koo na kuanuꞌu na ñuu Nazaret ya ndíkaa estado Galilea. 40Ikán ku ñuu nuu xa̱ꞌnu ra loꞌo Jesús. Ndiꞌi kivi tin ndiꞌi kuiya ndu̱u ndee ka ra xa̱ꞌnu ra. Ta vaꞌa ka vi xiní ra, ndichi ku chi ra, saa chi íyo ya vaꞌa Ndioxi xiꞌin ra.

Kivi ndi̱ndoo Jesús veꞌe ñuꞌu kaꞌnu ñuu Jerusalén

41Saa kúu ndiꞌi kuiya xáꞌan ra José xiꞌin yá María viko pascua#2:41 Viko pascua kua ndása i̱í na, ndíkaꞌán ini na kivi tá si̱kaku Ndioxi xii sikua na ta̱va ra na ñuu Egipto. ñuu Jerusalén, saa chi saa ini ndiꞌi na ñuu na. 42Saa ke̱e na kuaꞌan na viko pascua chi saa ini na, ta kuaꞌan tu ra loꞌo Jesús va xiꞌin na, ndi̱xinu ra uxi uvi kuiya ra. 43Tá ndi̱ꞌi viko ikán, ta ndi̱ko koo na kua̱nuꞌu na ñuu Nazaret, ta köo ndi̱xini na ndi̱ndoo ra loꞌo Jesús seꞌe na ñuu Jerusalén. 44Kuaꞌan va ra xiꞌin na, ndá ndíkaa ra tañu na taꞌan na kuaꞌan ra, káꞌán na. Saa ku̱u tá ndi̱xinu iin kivi nii xíka na kuaꞌan na, ñaa xa̱á na ndúku na ra tañu na taꞌan na tin na xíni taꞌan xiꞌin na. 45Ta köo ra ndi̱niꞌi na, ñaa ndi̱ko koo tuku na kuaꞌan na nduku na ra nda ñuu Jerusalén.

46Ta nda kivi uni ndi̱taꞌan na ra veꞌe ñuꞌu kaꞌnu, índuꞌu koo ra maꞌñu nda maestro nda xíni ni ley Ndioxi ya ta̱a ra Moisés, xíni soꞌo ra ya káꞌan nda ta ndákan tuꞌun ñaꞌa ra. 47Ta ndiꞌi nda ndi̱kanda ni ini xaꞌa ya káꞌan ra, saa chi xíni ni ra ta vaꞌa ni ndíkuiin ra yuꞌu nda maestro ikán.

48Ta saa xa̱a iva siꞌí ra nuu índuꞌu ra, ndi̱kanda ni ini na xiꞌin ra. Ñaa ndi̱kaꞌan siꞌí ra xiꞌin ra, káchi yá saa:

―¿Ndachu i̱kan un saa xiꞌin nde, iva? Tata un tin yeꞌe ndúku ka vi nde yóꞌo̱, saa ndíꞌi ka vi ini nde xaꞌa un ―káchi yá xiꞌin ra.

49Saa ndi̱kuiin ra, káchi ra saa:

―¿Nana, ndachu ndúku ni ndo yeꞌe? ¿Án su chiñu Iva i kua xíniñuꞌu ni i xaa súvi i? ―káchi ra xiꞌin na.

50Ta ni köo ndi̱kundaa ini na unkua kúni kachi ya ndi̱kaꞌan ra xiꞌin na.

51Sundi siꞌí ra ta chívaꞌa ndiꞌi yá tuꞌun ikán nima yá. Ñaa ke̱e ra ñuu Jerusalén, ndi̱kiꞌin ra kuanuꞌu ra xiꞌin iva siꞌí ra nda ñuu Nazaret. Ta ndiꞌi saa kivi xíni soꞌo ndiꞌi ra ya káꞌan iva siꞌí ra xiꞌin ra. 52Saa ndúndichi ka ra, ta xáꞌnu suku ka ra. Ta kúsini ka vi Ndioxi xiꞌin ra, ta ndiꞌi na vaꞌa ka vi káꞌan na xaꞌa ra.

Currently Selected:

San Lucas 2: xta

Highlight

Copy