San Mateo 11

Ya ndi̱kaꞌan ra Juan, ra síkuchi naꞌa

(Lc. 7:18-35)

1Tá si̱ndiꞌi Jesús ta̱xi ra ichí nuu uxi uvi saa nda ítaꞌan xiꞌin ra, saa ke̱e ra kuaꞌan ra sinaꞌa ra tin kaꞌan ndoso ra xiꞌin na ndóo mií ñuu ya ñúꞌu Galilea.

2Saa ndíkaa ra Juan ra síkuchi naꞌa veꞌe kàà, ta xi̱ni soꞌo ra tuꞌun xaꞌa ya vaꞌa íkan Jesús xiꞌin naꞌa, saa ti̱ꞌvi ra uvi nda ítaꞌan xiꞌin ra kuaꞌan nda ndakan tuꞌun nda Jesús. 3Ndi̱xaa nda nuu ra, káꞌan nda xiꞌin ra, káchi nda saa:

―¿Án yóꞌo̱ ku ra ndátun nde tiꞌvi Ndioxi kixi sikaku na ñuu ivi yóꞌó án kundatun ka nde inka ra? ―káchi nda xiꞌin Jesús.

4Saa ndi̱kuiin Jesús ndi̱kaꞌan ra xiꞌin nda ikán, káchi ra saa:

―Ndiko koo ndo kuꞌun ndo kaꞌan ndo xiꞌin ra Juan, ndituꞌun ndo xiꞌin ra xaꞌa ya xíto ndo xiꞌin ya xíni soꞌo ndo. 5Tá kúu na kuáa̱ ta ndíkuna nuu na, na küvi kaka ta ndíkaka na, na ndóꞌo kueꞌe táꞌi náni lepra ta ndúvaꞌa ndiꞌi na, na sóꞌo ta xúna soꞌo na, na ndíi ta ndítaku na. Saa ndítuꞌun i xiꞌin ndiꞌi na ndaꞌvi tuꞌun vaꞌa xaꞌa Ndioxi. 6Vaꞌa ni kée naꞌa, na köo xíka uvi ini xaꞌa ya ndíkun na yeꞌe ―káchi Jesús xiꞌin nda ítaꞌan xiꞌin ra Juan.

7Saa ka̱na koo nda ikán kuaꞌan nda, ta xa̱á Jesús káꞌan ra xaꞌa ra Juan xiꞌin na ndóo ikán, káchi ra saa:

―Tá ndi̱xaꞌan ndo xi̱to ndo ra Juan iku yuyu, ¿ta unkua ndi̱kani ini ndo kuni ndo? ¿Án ndi̱kani ini ndo kuni ndo iin taa ra vita ni ini, ta iin ndíko koo mií ra tá kuꞌva ndóꞌo itun ndoo tá vaxi tachi? 8¿Án sana ndi̱xika tu ini ndo kuni ndo iin taa ra ndíxi vaꞌa ni? Süvi saa íyo ya. Chi na kuika, na ndíxi vaꞌa ni, ta köo ndóo na iku yuyu, veꞌe vaꞌa ni va ndóo na ikán. 9Tá tu süvi saa káa ra xi̱ni ndo, ta ¿ndá kuꞌva káa ra? Án iin ra profeta, ra káꞌan ndoso tuꞌun yuꞌu Ndioxi ku ra xi̱ni ndo? Saa ndixa, chi ra Juan ku iin ra profeta ra káꞌan ndoso tuꞌun yuꞌu Ndioxi, ta ndee ni ka chiñu ya xáa súvi ra Juan nuu ya xa̱a súvi inka nda ndi̱kaꞌan ndoso tuꞌun yuꞌu Ndioxi xinaꞌa. 10Soꞌva káꞌan tuꞌun Ndioxi xaꞌa ra, káchi ya saa:

Ra yóꞌó ku ra tiꞌvi i kunuu kuꞌun nuu un.

Kuꞌun ra nuu un, xaa vií ra ichí nuu kuꞌun un,

káchi Ndioxi xaꞌa ra Juan. 11Saa ndi̱kaꞌan tuku Jesús xiꞌin na, káchi ra saa:

―Ya ndaa káꞌan i xiꞌin ndo, köo nda profeta naꞌnu ni ka nuu ra Juan ra síkuchi naꞌa. Ra Juan ku ra ndee ni ndee chiñu kuu mií, ta saa ni naꞌa, na köo chiñu ndee ni ndee kúu mií taꞌan ya íkan ra Juan, ta na ikán ka ku na ndee ni ka ndee chiñu kúu mií nuu xáꞌnda chiñu Ndioxi ―káchi Jesús xiꞌin na.

12Saa ndi̱kaꞌan tuku ra, káchi ra saa:

―Nda kivi xa̱á ra Juan káꞌan ndoso ra tuꞌun Ndioxi, iin saa nda kivi vitin íyo ni naꞌa káni taꞌan ya kúni na sindiꞌi xaꞌa na ichí nuu xáꞌnda chiñu Ndioxi, ni saa ndóꞌo ya, ta ndisaa naꞌa, na ndaku ni ini ku na kúchiñu kuakiꞌvi koo nuu xáꞌnda chiñu Ndioxi. 13Tá kúu ndiꞌi nda profeta nda ndi̱kaꞌan tuꞌun yuꞌu Ndioxi xiꞌin ya ta̱a ra Moisés xinaꞌa, iin káchi ndi̱kaꞌan ndiꞌi nda ikán xaꞌa ya kuu saa, ta saa tu xaꞌa ra Juan va. 14Xíniñuꞌu ndo kundaa ini ndo ya xa ndi̱xinu tuꞌun yóꞌó, saa chi tá kuꞌva ndi̱xiyo ra Elías saa íyo ra Juan, ra síkuchi naꞌa. 15Ndiꞌi ndóꞌo̱ xíni soꞌo ya káꞌan i xiꞌin ndo, ta kuni soꞌo ni ndo ya káꞌan i xiꞌin ndo ―káchi Jesús xiꞌin na.

16Saa ndi̱kaꞌan tuku ra xiꞌin na, káchi ra saa:

―¿Ndá kuꞌva íin na ndóo ñuu ivi vitin? Nda tá íin na vali, na sísiki nuu yaꞌvi saa íin na. Sava na vali ikán káꞌan na xiꞌin taꞌan na, 17káchi na saa: “Ti̱vi nde yaa luvi ni kuaꞌan ta köo ndi̱xiin ndo tixaꞌa ndo. Saa xi̱ta tu nde yaa ndaꞌvi ni kuaꞌan, ta köo ndi̱xiin ndo kuaku ndo”, káchi na xiꞌin taꞌan na. 18Tá kuꞌva íin na vali yóꞌó, saa íin ndo, saa chi ki̱xi ra Juan ta ni köo ndi̱xixi vaꞌa ra, ni vinu köo ndi̱xiꞌi ra, ta káꞌan ndo xaꞌa ra kúu mií ra tachi nduvaꞌa. 19Ta yeꞌe Taa ra xa̱a ñuu ivi yóꞌo, xíxi vaꞌa i ta xíꞌi i vinu. Ta káꞌan ndo xaꞌa i kini ni xíxi i tin xíꞌi i, saa kútoo ni i koo migo i naꞌa, na ndíkaya xuꞌun nuu gobierno, xiꞌin na köo káñuꞌu Ndioxi, káchi ndo xaꞌa i. Ta ndiꞌi na kúu mií ya ndíchi vaxi nuu Ndioxi, na yóꞌó ku na íkan ya vaꞌa ―káchi Jesús xiꞌin na.

Na köo xíin kandixa

(Lc. 10:13-16)

20Saa ndi̱ndaꞌi Jesús xiꞌin na ñuu nuu kuaꞌa ni yatuꞌun i̱kan ra, saa chi köo ndi̱xiin na nama na kuꞌva íyo na, ta ni köo xíin na xaa súvi na ya kúni Ndioxi, saa ndi̱kaꞌan ra xiꞌin na, káchi ra saa:

21―¡Ndaꞌvi ni ndóꞌo̱ na ñuu Corazín! ¡Ndaꞌvi ni ndóꞌo̱ na ñuu Betsaida! Chi vaxi kivi tixuꞌvi ni ndo. Xinaꞌa tá ndi̱xini na ñuu Tiro xiꞌin na ñuu Sidón taꞌan yatuꞌun xíto ndo vitin, ta ndá tiempo vi ndi̱ko koo ini na ikán xaꞌa kuachi na, xa ndi̱kundixi na toto ndai ni nuu, ta xa chi̱kaa na yaa ñu̱ꞌu̱ xiní na xaꞌa ya sínaꞌa na mií na ya ndi̱ko koo ini na xaꞌa kuachi na ndikuu. 22Ta ndixa káꞌan i xiꞌin ndo, ndee ni ka kundoꞌo ndóꞌo̱ ñuu Corazín xiꞌin ndóꞌo̱ ñuu Betsaida nuu na ñuu Tiro xiꞌin na ñuu Sidón kivi sindiꞌi tá ná xaa nani Ndioxi kuachi xiꞌin na ñuu ivi. 23Ta ndóꞌo̱ na ñuu Capernaum, ¿Án ndíkani ini ndo ínuu vaꞌa ni tuꞌun ndo nda nuu ndivi, túvi ndo? Ndaꞌvi ni ndo chi nda kaꞌa ndaya nuu kunu ni̱nu̱ tiꞌvi Ndioxi ndóꞌo̱ kuꞌun ndo. Chi taꞌan yatuꞌun íkan i xiꞌin ndóꞌo̱ vitin, tá ndi̱xini na ñuu Sodoma ya ta xa ndi̱ko koo ini na xaꞌa ya väꞌa íkan na, ta ndïꞌi xaꞌa na táku na nda vitin, ndikuu. 24Ta ndixa káꞌan i xiꞌin ndo, kivi sindiꞌi tá ná xaa nani Ndioxi kuachi xiꞌin na ñuu ivi, ta ndee ni ndee ka tindoꞌo kixi nuu ndóꞌo̱ na ñuu Capernaum, süvi ka vi naꞌa, na väꞌa xi̱ndoo ñuu Sodoma ―káchi Jesús xiꞌin na.

Naꞌa ndo nuu i ta taxi i ndikundee ndo

(Lc. 10:21-22)

25Tiempo ikán ndi̱kaꞌan Jesús xiꞌin Ndioxi, káchi ra saa:

―Tata Iva yo, yóꞌo̱ ku ra chee nuu ndiꞌi na ñuu ivi yóꞌó xiꞌin nuu ndivi. Xáa kaꞌnu ni i yóꞌo̱ chi xa si̱naꞌa un na ndaꞌvi, na köo kúndaa ini, na íin tá íin na vali, ku̱ndaa ini na ya vaꞌa xaꞌa un. Ta ti̱seꞌe un ya vaꞌa yóꞌó nuu naꞌa, na ndíchi, na xíni ni. 26Saa va Tata, chi saa íyo ya kúni mií un ikán un xiꞌin na ―káchi Jesús xiꞌin Ndioxi.

27Saa ndi̱kaꞌan ka Jesús xiꞌin na, káchi ra saa:

―Iva i Ndioxi ta̱xi ndiꞌi ra ya vaꞌa ndaꞌa i. Ta nda iin naꞌa köo xíni yeꞌe, ra kúu seꞌe Ndioxi, iindaa mií Ndioxi ku ra xíni vaꞌa yeꞌe. Ta nda iin naꞌa köo xíni Iva i tá kuꞌva xíni yeꞌe ra, saa tu na ndi̱kaxin i taxi i kuni vaꞌa na ini ra. 28Ndiꞌi ndóꞌo̱ xa ku̱naa ni nuu ndiꞌi chiñu ya íkan ndo, ta köo kúndee ka ini ndo xiꞌin ñaꞌa ndíso ndo, ta naꞌa ndo nuu i, taxi i ndikundee ndo. 29Xaa súvi ndo ya káꞌan i xiꞌin ndo ya káa tá káa itun yuku i. Sikuaꞌá ndo tá kuꞌva íyo i, chi yeꞌe ta köo kueꞌe ini i, ndaꞌvi ni ini i, vaꞌa ni taa ku i, ikán ndo saa, ta saa kuchiñu ndo ndikundee ndo. 30Chiñu ya xaa chiñu ndo xiꞌin i ta süvi ya uꞌvi ni kua, ta ni köo vee ni ya, chi tá íyo itun yuku kama ni va, saa íyo ya ―káchi Jesús xiꞌin na.

Currently Selected:

San Mateo 11: xta

Highlight

Copy