San Mateo 26

Chítaꞌan tuꞌun na tiin na Jesús

(Mr. 14:1-2; Lc. 22:1-2; Jn. 11:45-53)

1Tá si̱ndiꞌi ndi̱tuꞌun Jesús tuꞌun yóꞌó, saa ndi̱kaꞌan ra xiꞌin nda ítaꞌan xiꞌin ra, káchi ra saa:

2―Xíni ndo soo uvi kivi kúmani, saa kana viko pascua.#26:2 Pascua ku kivi ndíkaꞌán ini na judío ndá kuꞌva si̱kaku Ndioxi xii sikua na ka̱na koo na ñuu Egipto xinaꞌa. Saa nditaxi na yeꞌe, Taa ra xa̱a ñuu ivi yóꞌó, nditaxi na yeꞌe ndaꞌa naꞌa, na sáa ini xíni yeꞌe, ta na ikán chinuu yeꞌe ndaꞌa cruzin nuu kuvi i ―káchi Jesús xiꞌin nda ítaꞌan xiꞌin ra.

3Ta suvi mií tiempo ikán íyo nda sutu naꞌnu nuu sutu xiꞌin nda sínaꞌa ley Ndioxi xiꞌin na xikuaꞌa nuu na judío, ndi̱kitaꞌan ndiꞌi na yeꞌe veꞌe ra Caifás, ra kaꞌnu nuu ndiꞌi sutu. 4Ikán chítaꞌan tuꞌun nda ndá kuꞌva sindaꞌvi nda Jesús, ta tiin nda ra kaꞌni ñaꞌa nda. 5Saa káꞌan sava nda, káchi nda saa:

―Küchiñu tiin yo ra viko, chi ìyo ni katin naꞌa ta kanitaꞌan na xiꞌin yo ―káchi nda xiꞌin taꞌan nda.

Chíkaa iin ñaꞌa nduta tami xaꞌan xiní Jesús

(Mr. 14:3-9; Jn. 12:1-8)

6Saa íyo Jesús ñuu Betania veꞌe ra Simón, ra ndo̱ꞌo kueꞌe taꞌi náni lepra. 7Ñaa ku̱yati iin ñaꞌa nuu mesa nuu índuꞌu Jesús xíxíní ra, ku̱yati yá xiꞌin iin yuyu loꞌo ya ndi̱kuaꞌa xiꞌin yu̱ú ya náni alabastro nuu ñúꞌu nduta tami xáꞌan, ta yaꞌvi ni nduta ikán. Ñaa chi̱kaa ndiꞌi yá rá xiní ra. 8Saa ndi̱saa nda ítaꞌan xiꞌin ra, ta ndi̱kaꞌan nda xiꞌin taꞌan nda, káchi nda saa:

―¿Ndachu sísiki ni yá rá, ta yaꞌvi ni rá? 9Án vaꞌa ndi̱xiko yá rá, ta kuaꞌa ni na ndaꞌvi kuchiñu yo chindee yo xiꞌin xuꞌun ikán, ndikuu ―káchi nda xiꞌin taꞌan nda.

10Saa kundaa ini Jesús ya káꞌan nda, ta ndi̱kaꞌan ra xiꞌin nda, káchi ra saa:

―¿Ndachu káꞌan ndo saa xaꞌa yá? Ya vaꞌa i̱kan yá xiꞌin i. 11Ndiꞌi saa ichí koo na ndaꞌvi xiꞌin ndo, sundi yeꞌe, ta süvi ndiꞌi saa ichí koo i xiꞌin ndo. 12Yá yóꞌó, ta chi̱kaa yá rá yeꞌe, xa̱a vií yá xiꞌin ikin kuñu i ya kuꞌun i nduxin i. 13Ya ndixa káꞌan i xiꞌin ndo, ndiꞌi ni kúu nuu ndíkani na tuꞌun vaꞌa xaꞌa i, ta ndituꞌun na xaꞌa ya vaꞌa i̱kan yá xiꞌin i, ya ná ndikaꞌán ini na xaꞌa ya i̱kan yá xiꞌin i ―káchi Jesús xiꞌin nda.

Ndítaxi ra Judas Jesús ndaꞌa na sáa ini xini ñaꞌa

(Mt. 14:10-11; Lc. 22:3-6)

14Saa ke̱e ra Judas Iscariote, ra ítaꞌan xiꞌin uxi uvi nda ítaꞌan xiꞌin Jesús, ndi̱xaa ra nuu nda sutu naꞌnu. 15Saa ndi̱kaꞌan ra xiꞌin nda, káchi ra saa:

―¿Ndisaa chaꞌvi ndo yeꞌe ta chindee taꞌan i xiꞌin ndo, tiin ndo ra Jesús? ―káchi ra xiꞌin nda.

Saa ndi̱kuiin nda chaꞌvi nda ra oko uxi xuꞌun plata. 16Nda kivi saa xa̱á ra Judas ndúku ra kuꞌva nditaxi ra Jesús ndaꞌa nda ikán.

Xíxíní Jesús xiꞌin nda ítaꞌan xiꞌin ra

(Mr. 14:12-25; Lc. 22:7-23; Jn. 13:21-30; 1 Co. 11:23-26)

17Tá ti̱ndaa kivi ya xa̱á xíxi na judío xita vaꞌa ya köo uxan iya xiꞌin, saa ku̱yati nda ítaꞌan xiꞌin Jesús nuu ra, káꞌan nda xiꞌin ra, káchi nda saa:

―¿Tata, mií kua kúni un xaa súvi nde kuxini yo viko pascua? ―káchi nda xiꞌin ra.

18Saa ndi̱kuiin ra, káꞌan ra xiꞌin nda, káchi ra saa:

―Kuáꞌan ndo ñuu Jerusalén ta ikán kuni ndo iin taa, ta kaꞌan ndo xiꞌin ra, kachi ndo saa: “Káꞌan ra Maestro, ya xa ti̱ndaa yati ni kivi nuu sixinu ra chiñu chee ni. Ta veꞌe un yóꞌó kua kúni ra kuxini ra viko pascua xiꞌin ndeꞌe ítaꞌan xiꞌin ra”, kachi ndo xiꞌin ra ―káchi Jesús xiꞌin nda.

19Saa ke̱e nda kuaꞌan nda xaa súvi nda kuxini ra xiꞌin nda, tá íyo ya ndi̱kaꞌan ra xiꞌin nda, saa íyo ya i̱kan nda.

20Tá kuaꞌan kúñuu saa ndi̱xaa Jesús ndi̱kunduꞌu ra nuu mesa kuxi ra xiꞌin uxi uvi saa nda ítaꞌan xiꞌin ra. 21Tá ndóo nda xíxini nda saa ndi̱kaꞌan ra xiꞌin nda, káchi ra saa:

―Ya ndaa káꞌan i xiꞌin ndo, chi iin ndóꞌo̱ ndóo yóꞌó ku ndo ndixiko vata yeꞌe nuu na sáa ini xíni yeꞌe.

22Saa ku̱chiꞌña ni ini nda, ñaa xa̱á iin iin nda ndákan tuꞌun ñaꞌa nda, káchi nda saa:

―Tata, ¿án süvi yeꞌe ku i ikan saa xiꞌin un? ―káchi nda xiꞌin ra.

23Saa ndi̱kuiin ra káꞌan ra xiꞌin nda:

―Iin ndóꞌo̱ síndaxin xita vaꞌa xiꞌin i ini koꞌo nuu xíxi i ku ndo ndixiko vata yeꞌe nuu na sáa ini xíni yeꞌe. 24Yeꞌe kuu Taa, ra xa̱a ñuu ivi yóꞌó, ta ndixa kua xíniñuꞌu kuvi i, tá kuꞌva káꞌan tuꞌun Ndioxi ya ta̱a nda profeta xaꞌa i xinaꞌa. Sundi ¡ndaꞌvi ni taa ra ndixiko vata yeꞌe nuu na sáa ini xíni yeꞌe! Vaꞌa ni ka kua tá ná käku va ra, ndikuu ―káchi Jesús xiꞌin nda.

25Saa ndi̱ndakan tuꞌun tu ra Judas va Jesús, ra ndixiko vata ñaꞌa ra, káchi ra saa:

―Maestro, ¿án yeꞌe ku i? ―káchi ra xiꞌin ra.

Saa ndi̱kuiin Jesús káꞌan ra:

―Saa káchi mií va un ―káchi ra xiꞌin ra.

26Tá ndóo nda xíxi nda saa ti̱in Jesús xita vaꞌa ta ta̱xi ra ndixaꞌvi nda Ndioxi, saa ta̱ꞌvi ra ya ta ta̱xi ra ya ndaꞌa nda ítaꞌan xiꞌin ra, saa ndi̱kaꞌan ra xiꞌin nda, káchi ra saa:

―Kiꞌin ndo xita vaꞌa yóꞌó kuxi ndo chi ya yóꞌó ku ikin kuñu i ―káchi ra xiꞌin nda.

27Saa ti̱in ra copa, ta ta̱xi ra tixaꞌvi ndaꞌa Ndioxi, ñaꞌa ta̱xi ra ya ndaꞌa nda, ta ndi̱kaꞌan ra xiꞌin nda, káchi ra saa:

―Vaꞌa koꞌo ndiꞌi ndo yuꞌu iin copa yóꞌó. 28Chi nduta yóꞌó ku nií i rá kuita xaꞌa na ñuu ivi. Ta xiꞌin rá kuita yóꞌó ku rá kindoo Ndioxi iin trato xa̱á xiꞌin kuaꞌa ni naꞌa, nuu xáa kaꞌnu ini ra xaꞌa kuachi na. 29Ta ndixa káꞌan i xiꞌin ndo, köꞌo ka i nduta vinu, nduta kiti uva xiꞌin ndo, nda kivi tá ná ndikitaꞌan yo nuu xáꞌnda chiñu Iva i Ndioxi. Nda saa koꞌo yo vinu xa̱á ―káchi Jesús xiꞌin nda.

Káꞌan Jesús ya ndikuaa ñaꞌa ra Pedro

(Mr. 14:26-31; Lc. 22:31-34; Jn. 13:36-38)

30Tá ndiꞌi xi̱ta nda yaa nuu xa̱a kaꞌnu nda Ndioxi, saa ke̱e nda kuaꞌan nda xiki náni itun Olivo. 31Saa ndi̱kaꞌan Jesús xiꞌin nda ítaꞌan xiꞌin ra, káchi ra saa:

―Ndiꞌi ndo sindikoo ndaꞌa yeꞌe ñǔu vitin, ta ikán ku nuu xinu tuꞌun Ndioxi ya ta̱a na xaꞌa i xinaꞌa, káchi ya saa: “Sitikueꞌe i ra paxto ndáa levo, ta iin kuita yava ndiꞌi ri kuꞌun ri”, káchi tuꞌun Ndioxi ta̱a na xaꞌa i. 32Sundi tá ná nditaku i, ta kunuu i nuu ndo kuꞌun i estado Galilea ―káchi Jesús xiꞌin nda.

33Saa ndi̱kuiin ra Pedro, káꞌan ra:

―Tata, vani sindikoo ndaꞌa ndiꞌi nda yóꞌo̱, sundi yeꞌe ta sïndikoo ndaꞌa i yóꞌo̱ ―káchi ra xiꞌin Jesús.

34Saa ndi̱kuiin Jesús káꞌan ra xiꞌin ra:

―Ya ndaa káꞌan i xiꞌin un, ñǔu vitin tá täꞌan ka kana nduxi, ta xa uni ichí vi ndi̱kuaa un ya köo xíni un yeꞌe ―káchi Jesús xiꞌin ra.

35Saa ndi̱kaꞌan ra Pedro xiꞌin ra, káchi ra saa:

―Tata, vani kuvi i xaꞌa un, sundi ndïkuaa i yóꞌo̱ ―káchi ra.

Tá ndi̱kaꞌan ra ikán saa ndi̱kaꞌan ndiꞌi nda.

Káꞌan Jesús xiꞌin Ndioxi ñaꞌñu náni Getsemaní

(Mr. 12:32-42; Lc. 22:39-46)

36Saa ke̱e Jesús kuaꞌan ra xiꞌin nda ítaꞌan xiꞌin ra iin ñaꞌñu náni Getsemaní, ta ndi̱kaꞌan ra xiꞌin nda, káchi ra saa:

―Yóꞌó kundoo ndo ta ná kuꞌun i kaa kaꞌan i xiꞌin Ndioxi ―káchi ra xiꞌin nda.

37Saa ndi̱kiꞌin ra ta Pedro xiꞌin uvi saa nda seꞌe ra Zebedeo ke̱e nda kuaꞌan nda xiꞌin ra, ñaa xa̱á kúchiꞌña ni ini ra, ta ndee ni kúsuchi ini ra. 38Saa ndi̱kaꞌan ra xiꞌin uni saa nda, káchi ra saa:

―Kúndíi ka vi ini i, ndakua íyo ini i kuvi i. Yóꞌó koo ndo xiꞌin i, ta küsun ndo ―káchi Jesús xiꞌin nda.

39Saa ke̱e ra kuaꞌan xika loꞌo ka ra, ñaa ndi̱xaa ra si̱kusiti ra ta nda nuu ñuꞌú ndi̱xinu taan ra, ta xa̱á ra káꞌan ra xiꞌin Ndioxi, káchi ra saa:

―Tata Iva mií i, tá tu kúni un ta täxi un kundoꞌo i tindoꞌo yóꞌó, sundi ïkan un ya kúni yeꞌe, vaꞌa ikan un ya kúni mií va un ―káchi Jesús xiꞌin Ndioxi.

40Saa ndi̱ko koo ra ndi̱xaa ra nuu ndóo uni saa nda ítaꞌan xiꞌin ra, ta ndi̱taꞌan ra nda ndóo nda kíxi nda. Saa ndi̱kaꞌan ra xiꞌin ra Pedro, káchi ra saa:

―¿Án nda iin hora loꞌo vi köo ndi̱kuchiñu ndo kundito ndo xiꞌin i? ―káchi ra xiꞌin nda.

41Küsun ndo, kaꞌan ni ndo xiꞌin Ndioxi ya ná ndïkava ndo nuu ya väꞌa. Saa chi kúni ni va ndo ikan ndo ya vaꞌa, sundi vita ni va ini ndo ―káchi ra xiꞌin nda.

42Saa ke̱e tuku ra kuaꞌan ra kaꞌan ra xiꞌin Ndioxi ichí uvi, káchi ra saa:

―Tata Iva mií i, tá xíniñuꞌu i ndoꞌo ni i, ta íyo ndúvi i xaa súvi i ya kúni mií un ―káchi ra.

43Saa ndi̱ko koo tuku ra ndi̱xaa ra nuu ndóo nda ítaꞌan xiꞌin ra, ta ndi̱taꞌan tuku ra nda ndóo nda kíxi nda, chi kúni kusun ni nda. 44Saa si̱ndoo ra nda, ta ke̱e tuku ra kuaꞌan ra kaꞌan ra xiꞌin Ndioxi ichí uni. Tá kuꞌva xa ndi̱kaꞌan ra xiꞌin Ndioxi yachi, saa káꞌan tuku ra. 45Sindiꞌi ndi̱ko koo ra nuu nda, saa ndi̱kaꞌan ra xiꞌin nda, káchi ra saa:

―¿Án kíxi yaa va ndo? ¿Án ndee ni va ndíkundee ndo? Ta vaꞌa ndikoo ndiꞌi va ndo, saa chi xa ti̱ndaa hora ya nditaxi na yeꞌe, Taa ra xa̱a ñuu ivi yóꞌó ndaꞌa naꞌa, na väꞌa. 46Kuandikoo ndo koꞌyo. Xa vaxi ra nditaxi yeꞌe ndaꞌa naꞌa, na sáa ini xíni yeꞌe ―káchi Jesús xiꞌin nda.

Tíin na Jesús kuaꞌan ra xiꞌin na

(Mr. 14:43-50; Lc. 22:47-53; Jn. 18:2-11)

47Saa káꞌan ka ra, ta ndi̱xaa ra Judas taꞌan nda uxi uvi ítaꞌan xiꞌin ra ku ra. Kuaꞌa ni naꞌa ndi̱xaa xiꞌin ra ikán, ta ndíso na i̱chi ndi̱xaa na, saa ndíso tu na carroti va ndi̱xaa xiꞌin na. Na xikuaꞌa nuu na judío xiꞌin nda naꞌnu nuu sutu ku nda ti̱ꞌvi nda ikán kuaꞌan nda tiin nda Jesús. 48Ta xa yachi ndi̱kaꞌan ra Judas xiꞌin nda ikán, káchi ra saa:

―Taa ra chindee i, ta chutu i nuu ra. Ra ikán ku Jesús, ta vaꞌa tiin ndo ra ―káchi ra xiꞌin nda.

49Saa ku̱yati ra nuu Jesús, ta ndi̱kaꞌan ra xiꞌin ra, káchi ra saa:

―Kuaꞌa un, Tata Maestro ―káchi ra.

Ta chu̱tu ra nuu Jesús. 50Saa ndi̱kaꞌan Jesús xiꞌin ra, káchi ra:

―Migo, vaꞌa xaa súvi un chiñu vaxi un ―káchi Jesús xiꞌin ra.

Saa ti̱ndaa yati nda ndáka ra ndi̱xaa xiꞌin ra nuu Jesús, ta ti̱in nda ra.

51Saa ta̱va iin ra ítaꞌan xiꞌin Jesús i̱chi ra, ta xa̱ꞌnda ra soꞌo ra xáa chiñu nuu sutu, ra ínuu nuu ndiꞌi nda sutu. 52Ñaa ndi̱kaꞌan Jesús xiꞌin ra, káchi ra:

―Chivaꞌa i̱chi un. Saa chi ndiꞌi na káni taꞌan xiꞌin i̱chi, ta xiꞌin i̱chi kuvi na. 53¿Án köo kúndaa ini un yeꞌe ta vaꞌa kaꞌan i xiꞌin Iva i ta ndikun tiꞌvi ra nda uni xiko uxi uvi mil #26:53 Tuꞌun griego káꞌan ya tiꞌvi ra uxi uvi legión na tatun Ndioxi. Iin legión nda lapa ku̱u mií nda kumi mil án nda iñu mil naꞌa. na tatun Ndioxi kixi na chindee na yeꞌe? 54Sundi tá ná tiꞌvi ra na tatun ra, ta küchiñu i xaa súvi i ya káꞌan tuꞌun ra, ya xíniñuꞌu i kundoꞌo i saa ―káchi ra xiꞌin nda ítaꞌan xiꞌin ra.

55Saa ndi̱kaꞌan Jesús xiꞌin nda ikán, káchi ra saa:

―¿Án vaxi ndo xiꞌin ñaꞌa xiín xiꞌin carroti tiin ndo yeꞌe, tá kuꞌva íkan ndo xiꞌin na kuiꞌna, saa íkan ndo xiꞌin i? Ndiꞌi saa kivi ndi̱xiyo i si̱naꞌa i naꞌa veꞌe ñuꞌu kaꞌnu, ta köo ndi̱tiin ndo yeꞌe. 56Ta ndiꞌi ya yóꞌó ndóꞌo i vitin, saa sixinu i ya ta̱a nda profeta xaꞌa i xinaꞌa ―káchi Jesús xiꞌin nda.

Saa si̱ndoo ñaꞌa ndiꞌi nda ítaꞌan xiꞌin ra, ta xi̱nu ndiꞌi nda kuaꞌan nda.

Ndi̱xaa Jesús nuu na chiñu

(Mr. 14:53-65; Lc. 22:54-63-71; Jn. 18:12-14,19-24)

57Saa ti̱in nda ra, ndi̱kiꞌin nda ra kuaꞌan xiꞌin nda nuu ra Caifás, ra ínuu nuu ndiꞌi sutu. Chi veꞌe ra ikán ku nuu ndi̱kitaꞌan ndiꞌi nda ndóo nda. Ikán ndóo nda sínaꞌa ley ya ta̱a ra Moisés tin na xikuaꞌa nuu na judío. 58Saa ndi̱kundikun xika ra Pedro sata na kuaꞌan ra, ndi̱xaa ra keꞌe yeꞌe veꞌe mií ra sutu kaꞌnu ikán. Ndi̱xaa ra ndi̱kunduꞌu ra xiꞌin nda policía koto ra unkua kundoꞌo Jesús.

59Ndiꞌi nda sutu nda naꞌnu nuu sutu xiꞌin na xikuaꞌa veꞌe ñuꞌu ndi̱xaa nda ndúku nda kuachi siki xaꞌa ra, saa kuchiñu nda nditaxi nda ra ndaꞌa naꞌa ya kaꞌni ñaꞌa na. 60Ta köo ndi̱niꞌi na kuachi ra ya táxi kuvi ra, vani kuaꞌa ni naꞌa ndi̱xaa ta̱xi na kuachi siki xaꞌa ra, ta nda iin ya ndi̱kaꞌan na xaꞌa ra köo táxi ya kuvi ra. Nda nuu sindiꞌi saa ndi̱xaa uvi nda siki, 61ndi̱kaꞌan nda, káchi nda saa:

―Ra yóꞌo̱ ta ndi̱kaꞌan ra: “Yeꞌe, ta kuchiñu i sindiꞌi xaꞌa i veꞌe ñuꞌu kaꞌnu, ta tixin kivi uni sikuaꞌa tuku i ya,” káchi ra ―káchi nda xaꞌa ra.

62Saa ndi̱kundichi sutu ra ínuu nuu ndiꞌi sutu, ta ndi̱kaꞌan ra xiꞌin Jesús, káchi ra saa:

―¿Án ndïkuiin un yuꞌu nda? ¿Án ndixa saa íyo ya káꞌan nda xaꞌa un? ―káchi ra xiꞌin Jesús.

63Ta ni köo ndi̱kuiin Jesús. Saa ndi̱kaꞌan mií ra ínuu nuu ndiꞌi sutu xiꞌin ra, káchi ra saa:

―Káꞌan i xiꞌin un, vaꞌa chinaꞌa un tixin yuꞌu Ndioxi ra chee, ta kaꞌan un ya ndaa xiꞌin nde, ¿án ra Cristo ti̱ꞌvi Ndioxi vaxi ku un? Ta ¿án ndixa Seꞌe Ndioxi ku yóꞌo̱? ―káchi ra xiꞌin Jesús.

64Saa ndi̱kuiin Jesús káꞌan ra:

―Tá íyo ya ndi̱kaꞌan un saa íyo ya, ikán ku i. Ta káꞌan tuku i xiꞌin ndo, vaxi kivi ta kuni ndo yeꞌe, Taa ra xa̱a ñuu ivi yóꞌó koo i nuu tai toꞌo, itun íyo ñaꞌñu kuáꞌá Ndioxi, ta ndee ni ndee kúu mií ra. Saa kuni ndo yeꞌe ndiko koo i kixi i tañu viko nuu ndivi ―káchi Jesús xiꞌin nda.

65Tá xi̱ni soꞌo sutu ra ínuu nuu ndiꞌi sutu ya ndi̱kaꞌan Jesús, ta ndi̱saa ni ra, yakan xa̱ꞌnda ra toto ra ta ndi̱kaꞌan ra, káchi ra saa:

―¡Ra kánaꞌa xaꞌa Ndioxi va ku ra yóꞌó! Köo xíniñuꞌu ka yo kuni soꞌo yo kaꞌan inka naꞌa xaꞌa ra. Xa xi̱ni soꞌo mií va ndo ya ndee ni kini ndi̱kaꞌan ra xaꞌa Ndioxi. 66¿Unkua ikan yo xiꞌin ra, káchi ndó? ―káchi ra xiꞌin nda chiñu ikán.

Saa ndi̱kuiin nda, káꞌan nda:

―Xíniñuꞌu ra kuvi ra, saa chi íyo kuachi ra ―káchi nda.

67Saa ko̱ꞌni ndaa nda sii nuu ra, ta ka̱ni ni ñaꞌa nda xiꞌin ikin ndaꞌa nda, ta saa káni ni nda xaꞌnda nuu ra. 68Saa xa̱á nda káꞌan nda xiꞌin ra, káchi nda saa:

―Tá tu Cristo, ra vaxi sikaku na ñuu ivi yóꞌó ku un, ta vaꞌa kaꞌan un xiꞌin nde, ¿unku na ka̱ni yóꞌo̱? ―káchi nda xiꞌin ra.

Ndíkuaa ra Pedro Jesús

(Mr. 14:66-72; Lc. 22:55-62; Jn. 18:15-18,25-27)

69Tá kúu saa, ta índuꞌu ra Pedro keꞌe yeꞌe veꞌe mií ra ínuu nuu ndiꞌi sutu. Ñaa ndi̱xaa iin yá xáa chiñu veꞌe ra, ta ndi̱kaꞌan yá xiꞌin ra, Pedro, káchi yá saa:

―Saa tu yóꞌo̱ va, ra ítaꞌan xiꞌin Jesús, ra ke̱e chí Galilea ku tu yóꞌó va ―káchi yá xiꞌin ra.

70Ñaa ndi̱kaꞌan ra Pedro nuu ndiꞌi na ndóo ikán, káchi ra saa:

―Ni köo xíni i ndá xaꞌa kua káꞌan un saa xiꞌin i ―káchi ra xiꞌin yá.

71Saa ke̱ta ra keꞌe yeꞌe ikán, ta xi̱ni inka yá xáa chiñu veꞌe sutu ra, saa ndi̱kaꞌan yá xiꞌin na ndóo ikán, káchi yá saa:

―Ra ítaꞌan xiꞌin Jesús, ra ke̱e ñuu Nazaret ku tu ra yóꞌó va ―káchi yá xiꞌin na.

72Saa ndi̱kuaa tuku ñaꞌa ra Pedro ra, ta chi̱naꞌa ra Ndioxi nuu na ndóo ikán, káchi ra saa:

―Ni köo xíni i ra ñaa ―káchi ra.

73Naꞌa loꞌo, saa ku̱yati nda ndóo ikán nuu ra, ta ndi̱kaꞌan nda xiꞌin ra, káchi nda saa:

―Ya ndixa ra taꞌan Jesús ku tu yóꞌo̱ va, chi tá kuꞌva káꞌan na ndóo chí Galilea saa káꞌan tu yóꞌo̱ va ―káchi nda xiꞌin ra.

74Saa ndee ni ndikaꞌan ra Pedro, xa̱á ra kánaꞌa ra, saa chínaꞌa ra Ndioxi, káchi ra saa:

―¡Xa ndi̱kaꞌan i xiꞌin ndo, köo xíni i ra ñaa! ―káchi ra.

Tá ndi̱kaꞌan ra saa, ta ndikun ka̱na va nduxi. 75Saa ndi̱kaꞌán ini ra, ya ndi̱kaꞌan Jesús xiꞌin ra, káchi ra saa: “Täꞌan ka vi kana cheꞌle, ta xa uni ichí vi ndikuaa un ya köo xíni un yeꞌe”, káchi ra xiꞌin ra. Saa ke̱ta ra keꞌe ta xa̱á ndinuni loꞌo xáku suchi ni ini ra.

Currently Selected:

San Mateo 26: xta

Highlight

Copy