San Marcos 12

Tuꞌun ndíchi xaꞌa iin ra ta̱xi too ñuꞌú

(Mt. 21:33-46; Lc. 20:9-19)

1Saa xa̱á Jesús sínaꞌa ra na tixin tuꞌun ndíchi, káchi ra saa:

―Ndi̱xiyo iin taa, ta ndi̱taan ra teꞌe uva nuu ñuꞌú ra saa chi̱kaa ndiꞌi ra corra nuu ya. Ñaa xa̱ta ra yavi xa̱a vií ra nuu kee nduta ti uva koꞌní na. Ta si̱kuaꞌa ra iin torre sukun nuu kuchiñu kundoo na kundaa na ti uva.

’Sindiꞌi ta̱xi too ra ñuꞌú ra ndaꞌa inka naꞌa ta ndi̱kiꞌin ra kuaꞌan xika ra. 2Tá ti̱ndaa tiempo taꞌnda kiti uva, saa ti̱ꞌvi ra iin ra xáa chiñu nuu ra kuaꞌan ra ndikuiso ra sava uva ya kúu yaꞌvi ñuꞌú ra. 3Sundi nda ikán ta ti̱in nda ra moso ikán, ka̱ni ni ñaꞌa nda saa si̱ndiko koo nda ra kuanuꞌu ra nuu xitoꞌo ra, nda iin ñaꞌa köo ndi̱taxi nda ndaꞌa ra. 4Saa ti̱ꞌvi tuku xitoꞌo ra inka moso ra kuaꞌan ra, ta ka̱ni ni nda ra moso ikán xiꞌin yu̱ú, saa ta̱ꞌvi nda xiní ra, ta ndi̱kaꞌan kini nda xiꞌin ra. 5Ñaa ti̱ꞌvi tuku ra inka moso ra kuaꞌan ra, ta xa̱ꞌni nda ra ikán. Sindiꞌi saa ti̱ꞌvi kuaꞌa ka ra nda moso ra kuaꞌan nda, ta sava nda moso ikán xa̱a nduvaꞌa ni nda xiꞌin, ta inka nda xa̱ꞌni ñaꞌa nda.

6’Ta köo ka inka naꞌa tiꞌvi ra kuꞌun ndá siin seꞌe ra, ra kúꞌvi ni ini ra xíni ra ku ra ndi̱ndoo, saa ti̱ꞌvi ra ta ikán kuaꞌan ra nuu nda ndu̱ku too ñuꞌu ra, chi ndíkani ini ra káchi ra saa: “Kañuꞌu va nda ra yóꞌó saa chi seꞌe yo ku ra’’, káꞌán ra. 7Saa ndi̱kaꞌan nda ndu̱ku too ñuꞌú ikán xiꞌin taꞌan nda, káchi nda saa: “Naꞌa ndo chi ra loꞌo yóꞌó ku ra ndoo ñuꞌú ndaꞌa ikan iva ra tá ná kuvi ra. Naꞌa ndo ná kaꞌni yo ra, ta ndoo ñuꞌú iva ra ndaꞌa yo”, ka̱chi nda xiꞌin taꞌan nda. 8Saa ti̱in nda ra loꞌo seꞌe ra xa̱ꞌni nda, ki̱ꞌin nda ikin kuñu ra si̱kana nda sata corra ―káchi Jesús xiꞌin na.

9Saa ndi̱kaꞌan ra xiꞌin na, káchi ra saa:

―¿Unkua ikan ra ta̱xi too ñuꞌú xiꞌin nda ndu̱ku too ya nuu ra, káchi ndóꞌo̱? Yeꞌe káchi saa, tá ná ndiko koo ra ta kaꞌni ra nda ikán, saa taxi too ra ñuꞌú ra ndaꞌa inka naꞌa ―káchi Jesús xiꞌin na.

10Saa ndi̱kaꞌan ka Jesús xiꞌin na, káchi ra saa:

―¿Án täꞌan kaꞌvi ndo tuꞌun Ndioxi ya káchi saa?:

Yu̱ú ya ku̱ndasi nda síkuaꞌa veꞌe, ku yu̱ú ya ndee ni ndee,

ta ya ikán kua xíniñuꞌu ni ka.

11Ya yóꞌó kua i̱kan Ndioxi,

yakan ndi̱kanda ni ini yo xaꞌa ya, káchi tuꞌun ra ―káchi Jesús xiꞌin na.

12Saa ku̱ni nda xikuaꞌa veꞌe ñuꞌu tiin nda Jesús kuꞌun ra xiꞌin nda veꞌe kàà, saa chi ku̱ndaa ini nda xaꞌa mií nda ndi̱kaꞌan tuꞌun ndíchi ikán. Ta xaꞌa ya íꞌvi nda nuu naꞌa ta köo ya ndi̱kan nda xiꞌin ra, saa si̱ndoo nda ra ta ndi̱kiꞌin nda kuaꞌan nda.

Ndi̱kaꞌan Jesús xaꞌa ya kákuꞌun yo chaꞌvi yo nuu na chiñu

(Mt. 22:15-22; Lc. 20:20-26)

13Saa ti̱ꞌvi na xikuaꞌa sava nda fariseo xiꞌin nda ñúꞌu xiꞌin na partido ra Herodes, ti̱ꞌvi na nda kuaꞌan nda kaꞌan nda xiꞌin Jesús ya koto ndoso ñaꞌa nda án ndá tuꞌun väꞌa kaꞌan ra, ta saa kuchiñu niꞌi nda kuꞌva taxi nda kuachi xaꞌa ra. 14Saa ndi̱xaa nda ndi̱kaꞌan nda xiꞌin ra, káchi nda saa:

―Tata Maestro, xíni nde yóꞌo̱ ta nina ya ndaa káꞌan un, ta köo kíꞌin un kuenta xaꞌa ya káꞌan naꞌa xaꞌa ya sínaꞌa un, ta ni köo ndíkaxin un naꞌa, iin káchi káꞌan un xiꞌin ndiꞌi na. Ta ya ndixa ni kua káꞌan un, chi káꞌan un xiꞌin na ná ikan na ndisaa ya kúni Ndioxi. Ta kaꞌan un xiꞌin nde, ¿án xíniñuꞌu nde kakuꞌun nde xaꞌa xuꞌun ya kuaꞌan ndaꞌa ra rey César ra chiñu ñuu Roma án täxi nde ya? ¿Án vaꞌa chaꞌvi nde ya án chäꞌvi nde ya? ―káchi nda xiꞌin ra.

15Ta xa ku̱ndaa va ini Jesús nda uvi yuꞌu ku nda, saa ndi̱kaꞌan ra xiꞌin nda, káchi ra saa:

―¿Ndachu kua xíto ndoso ndo yeꞌe? Taxi ndo iin xuꞌun kàà ná koto i nuu ya ―káchi ra xiꞌin nda.

16Saa ta̱xi nda ya ndaꞌa ra, ta ndi̱kaꞌan ra xiꞌin nda:

―¿Unku naꞌna kua ínuu nuu ya, ta unku kivi kua ínuu xiꞌin ya? ―káchi ra xiꞌin nda.

Saa ndi̱kuiin nda káꞌan nda:

―Naꞌna ra rey César kua, ta kivi ra ikán kua ínuu xiꞌin ya ―káchi nda xiꞌin ra.

17Ta saa ndi̱kaꞌan ra xiꞌin nda:

―Tá tu saa ra taxi ndo ñaꞌa ra rey César ndaꞌa ra, ta taxi tu ndo ñaꞌa ya kúu kuenta Ndioxi va ndaꞌa ra ―káchi ra xiꞌin nda.

Tá ndi̱kaꞌan ra saa ta ndi̱kanda ni ini nda xaꞌa ya vaꞌa ni ndi̱kuiin ra.

Káꞌan nda saduceo xiꞌin Jesús án ya ndixa kua ndítaku na ndíi

(Mt. 22:23-33; Lc. 20:27-40)

18Saa ku̱u ke̱e sava nda saduceo kuaꞌan nda koto nda Jesús. Ta nda ikán köo kándixa nda ya ndítaku na ndíi, xaꞌa ya ikán kua ndi̱ndakan tuꞌun nda ra, káchi nda saa:

19―Tata Maestro, ley Ndioxi ya ta̱a ra Moisés káchi ya saa: “Tá íyo iin taa ta íyo yá síꞌi ra, ta köo seꞌe ra ndi̱kaku xiꞌin yá, ñaa ndi̱xiꞌi ra ta nduxa ndikiꞌin ñani ra yá, tá ka̱ku seꞌe ra xiꞌin yá ta nduu ya seꞌe ñani ra, ra ndi̱xiꞌi”, káchi ya ta̱a ra Moisés. 20Chi saa ndo̱ꞌo na iin veꞌe, ndi̱xiyo uxa nda taa, saa ti̱ndaꞌa ra núnu̱ú xiꞌin iin ñaꞌa, ñaa ndi̱xiꞌi ra ta nda iin seꞌe ra köo ndi̱kaku xiꞌin yá. 21Saa ti̱ndaꞌa inka ñani ra, ra uvi, xiꞌin yá ikán, saa ndi̱xiꞌi tu ra ikán va, ta ni köo tu seꞌe ra ikán va ndi̱kaku xiꞌin yá. Saa ndo̱ꞌo tu ra uni va xiꞌin yá. 22Uxa saa nda ndi̱xiyo xiꞌin yá, ta nda iin nda köo ndi̱kaku seꞌe xiꞌin yá. Ñaa ndi̱xiꞌi tu mií va yá. 23Ta kivi tá ná nditaku na ndíi, ¿ta unku ndiꞌi nda ndikiꞌin yá koo yá síꞌi nda, chi uxa saa nda ndi̱xiyo xiꞌin yá? ―káchi nda ikán xiꞌin Jesús.

24Saa ndi̱kuiin ra káꞌan ra:

―Ndóꞌo̱ yáꞌa ini ku ndó, síndaꞌvi ndo mií va ndo, chi köo xíni ndo unkua káꞌan tuꞌun Ndioxi, ta ni ndee Ndioxi köo xíni ndo. 25Chi kivi tá ná sitaku Ndioxi na ndíi, ta nda iin ka na ikán tïndaꞌa, saa chi koo na tá kuꞌva íyo na tatun Ndioxi, na íyo nuu ndivi ta köo tíndaꞌa na. 26Ta saa tu ya káꞌan ndo ya ndïtaku na ndíi va, ¿án täꞌan kundaa ini ndo xiꞌin ya ta̱a ra Moisés xinaꞌa tá ndi̱kaꞌan Ndioxi xiꞌin ra nuu xíxi itun iñu? káchi ra saa: “Yeꞌe ku Ndioxi ra káñuꞌu ra Abraham xiꞌin ra Isaac tin ra Jacob” káchi Ndioxi. 27Ta xiꞌin tuꞌun yóꞌó kúndaa ini yo ya nditaku va nda xii yo xiꞌin inka na xa ndi̱xiꞌi, chi tá ná ndïtaku nda ta küvi xaa kaꞌnu nda Ndioxi, yakan ndóꞌo̱ ta yáꞌa ni ini ndo xaꞌa ya káꞌan ndo saa ―káchi Jesús xiꞌin nda saduceo ikán.

Káꞌan Jesús ndá ley kua xíniñuꞌu ni ka yo ikan yo

(Mt. 22:34-40)

28Saa ku̱yati iin ra maestro ra sínaꞌa ley ya ta̱a ra Moisés, ta xi̱ni soꞌo ra ya ndi̱ndakan tuꞌun nda saduceo Jesús, ta xi̱ni ra ya vaꞌa ni ndi̱kuiin Jesús, saa xa̱á káꞌan ra xiꞌin Jesús, káchi ra saa:

―¿Tata, ndá ley kua xíniñuꞌu ni ka nuu ndiꞌi ley? ―káchi ra.

29Saa ndi̱kuiin Jesús káꞌan ra:

―Ley ya núnu̱ú xíniñuꞌu ni yo xaa súvi yo kua yóꞌó: Ndóꞌo̱ Israel ta kuni soꞌo ni ndo, chi Iva yo Ndioxi ta iindaa mituꞌun va ku ra. 30Ta kuꞌvi ini ndo kuni ndo ra xiꞌin ndiꞌi nima ndo, xiꞌin ndiꞌi ya vaꞌa ndo, tin ndee ndo xiꞌin ndiꞌi ya xínituni ndo”, ya yóꞌó kua xíniñuꞌu ni ka xaa súvi ndo. 31Ta ya uvi ku inka ya yóꞌó: “Kuꞌvi ini ndo kuni ndo na taꞌan ndo tá kuꞌva kúꞌvi ini ndo xíni ndo mií ndo”. Köo ka inka ya ndee ni ndee, uvi ya yóꞌó kua ndee ni ka ndee nuu ndiꞌi ya ―káchi Jesús xiꞌin ra.

32Saa ndi̱kuiin ra maestro ikán káꞌan ra, káchi ra saa:

―Vaꞌa ni ndi̱kaꞌan un Tata Maestro, ya ndaa ni kua ndi̱kaꞌan un, íyo iindaa mituꞌun Ndioxi, ta köo ka inka Ndioxi. 33Ya kuꞌvi ini yo kuni yo Ndioxi xiꞌin ndiꞌi nima yo, xiꞌin ndiꞌi ya vaꞌa yo tin ndiꞌi ndee yo, xiꞌin ndiꞌi ya xínituni yo, ta kuꞌvi ini yo kuni yo na taꞌan yo, tá kuꞌva kúꞌvi ini yo xíni xiꞌin mií yo, ya yóꞌó kua ndixa ni ka ndaa yaꞌvi nuu ya sóko yo nuu Ndioxi xiꞌin ya kaꞌmi yo ñaꞌa nuu Ndioxi ―káchi ra maestro ikán xiꞌin Jesús.

34Saa tá xi̱ni soꞌo Jesús ya vaꞌa ni ndi̱kuiin ra maestro ikán, saa ndi̱kaꞌan ra xiꞌin ra, káchi ra saa:

―Xa siloꞌo ni kúmani nuu un ya taxi un kaꞌnda chiñu Ndioxi nuu un ―káchi ra xiꞌin ra.

Ta saa nda iin ka na köo ndixaꞌa ndee ini ndakan tuꞌun ñaꞌa ya koto ndoso na ra.

Ra Cristo ra síkaku na ñuu ivi, ta chee ka ra ikán nuu ra David

(Mt. 22:41-46; Lc. 20:41-44)

35Saa ku̱u ndíkaa Jesús yeꞌe veꞌe ñuꞌu kaꞌnu sínaꞌa ra, ta saa ndi̱kaꞌan ra xiꞌin na, káchi ra saa:

―¿Ndachu káꞌan nda maestro sínaꞌa ley Ndioxi, ya seꞌe sikua ra David ku ra ti̱ꞌvi Ndioxi xa̱a sikaku na ñuu ivi, káchi nda? 36Ta suvi Tachi I̱í Ndioxi si̱kaꞌán ini xii sikua yo ra David ta̱a ra tuꞌun, káchi saa:

Soꞌva káchi Iva i Ndioxi xiꞌin Tata i ra chee, káchi ra saa:

“Naꞌa koo un ñaꞌñu kuáꞌá i nuu tai toꞌo yóꞌó.

Yóꞌó koo un xiꞌin i ndakua ná sindiꞌi xaꞌa ndiꞌi i na sáa ini xíni yóꞌo̱, káchi Ndioxi,

káchi ya ta̱a ra David xinaꞌa.

37Tá ta̱a ra David ya yóꞌó ta xaꞌa Cristo ndi̱kaꞌan ra, káchi ra, Cristo ku ra chee nuu ra. Ta ¿ndachu kúu Cristo seꞌe sikua ra David? ―káchi Jesús xiꞌin na.

Ta ndiꞌi na ikán kuaꞌa ka vi ku na, ta vaꞌa ka vi kúni na xíni soꞌo na ya káꞌan Jesús.

Väꞌa ndasa vaꞌa ni yo mií yo nuu inka na

(Mt. 23:1-36; Lc. 11:37-54; 20:45-47)

38Saa ndi̱kaꞌan ka Jesús xiꞌin na, sínaꞌa ra na, káchi ra saa:

―Kuenta koo ndo ïkan ndo tá kuꞌva íkan nda maestro nda sínaꞌa ley Ndioxi ya ta̱a ra Moisés, saa chi nda ikán ta kútoo nda kundixi nda toto náni ni, ya káꞌan vaꞌa ni xaꞌa nda, ta tá kuaꞌan nda nuu yaꞌvi ta kútoo ni nda ná xaa toꞌo ni naꞌa nda. 39Saa tu tá kuaꞌan nda veꞌe ñuꞌu sinagoga án tá kuaꞌan nda kuxi nda nuu viko, ta kútoo ni nda kundoo nda nuu tai toꞌo nuu ndóo na naꞌnu. 40Ta kíndaa nda veꞌe ná ndaꞌvi ndaꞌa ná, tá kuaꞌan nda veꞌe ñuꞌu ta naꞌa ni káꞌan nda xiꞌin Ndioxi ya ndása vaꞌa nda mií nda nuꞌu naꞌa. Xaꞌa ya íkan nda saa ta ndee ni ka tindoꞌo kixi nuu nda ikan Ndioxi ―káchi Jesús xiꞌin naꞌa.

Ndáa yaꞌvi ni ka xuꞌun ya ta̱xi yá ndaꞌvi nuu ya ta̱xi na kuika

(Lc. 21:1-4)

41Saa ku̱u iin ichí, índuꞌu koo Jesús yeꞌe veꞌe ñuꞌu kaꞌnu. Índuꞌu ra yati nuu íin caja nuu táan na xuꞌun sóko na nuu Ndioxi, ta xíto ra xáa na kuika táan na xuꞌun ini nu, kuaꞌa ka vi ya táan na. 42Saa ku̱u ta ndi̱xaa iin yá ndaꞌvi táan yá uvi xuꞌun vali ini nu, ta loꞌo ni ndáka ya ta̱an yá. 43Saa ka̱na Jesús nda ítaꞌan xiꞌin ra, ta ndi̱kaꞌan ra xiꞌin nda, káchi ra saa:

―Ya ndaa káꞌan i xiꞌin ndo, yá ndaꞌvi yóꞌó ta kuaꞌa ni ka xuꞌun ta̱an yá yóꞌó nuu ndiꞌi na kuika. 44Saa chi ta̱an ndiꞌi yá ya kúu mií yá, kúndaꞌvi ni yá ta ta̱an ndiꞌi yá ya kúu mií yá. Ta na kuika ni kuaꞌa ni ya táan na sundi ndóo kuaꞌa ka ya ndaꞌa na ―káchi Jesús xiꞌin nda ítaꞌan xiꞌin ra.

Currently Selected:

San Marcos 12: xta

Highlight

Copy