San Marcos 2

Síndaꞌa Jesús iin ra küvi kaka

(Mt. 9:1-8; Lc. 5:17-26)

1Saa ku̱u ndi̱yaꞌa sava kivi, ta ndi̱ko koo tuku Jesús ñuu Capernaum. Saa ku̱ndaa ini na ya íyo ra veꞌe, 2ñaa ndi̱kutu ndaa tuku na, ni köo nani koo na ini veꞌe, nda keꞌe chu̱tu ndaa na. Ta saa káꞌan ndoso Jesús tuꞌun Ndioxi xiꞌin na. 3Saa ndi̱xaa kumi nda taa, ndíso nda iin ra küvi kaka, ínuu ra nuu xito ndi̱xaa ra xiꞌin nda. 4Saa iin chútu ndaa naꞌa, ta ni küvi yaꞌa nda xiꞌin ra chinduꞌu ñaꞌa nda nuu Jesús. Saa vaꞌa ka nda̱a nda sata veꞌe, ta ikán xu̱na nda xiní ya, saa si̱nuu nda ra nda nuu íin Jesús. 5Ta ku̱ndaa ini Jesús ya ndáa ni ini nda xíni nda ra, saa ndi̱kaꞌan ra xiꞌin ra kúꞌvi ikán, káchi ra saa:

―Seꞌe, xáa kaꞌnu ini i xaꞌa kuachi un ―káchi ra xiꞌin ra.

6Saa ndóo sava nda maestro, nda sínaꞌa ley ya ta̱a ra Moisés, ta xíka ini nda káchi nda saa: 7“¿Ndachu káꞌan ra saa? ¿Án Ndioxi ta ndása ra mií ra? Chi káꞌan ra xáa kaꞌnu ini ra xaꞌa kuachi ra yóꞌó. Ta nda iin naꞌa küvi xaa kaꞌnu ini xaꞌa kuachi yo. Iindaa Ndioxi ku ra xáa kaꞌnu ini xaꞌa kuachi na ivi”, káchi nda. 8Ta xa ku̱ndaa va ini Jesús ya ndíkani ini nda, saa ndi̱kaꞌan ra xiꞌin nda, káchi ra saa:

―¿Ndachu kua xíka ini ndo ya köo ichí i xaa kaꞌnu ini i xaꞌa kuachi ra yóꞌó? 9¿Unkua vaꞌa kaꞌan i xiꞌin ra? ¿Án ndíchi ka kaꞌan i xiꞌin ra: xáa kaꞌnu ini i xaꞌa kuachi ra, ¿án ndíchi ka kaꞌan i xiꞌin ra: ndikoo ra ndikiꞌin ra xito ra ta kaka ra? 10Vaꞌa vitin kuni ndo, yeꞌe ku Taa ra xa̱a ñuu ivi yóꞌó, ta kúu mií i ichí ya xaa kaꞌnu ini i xaꞌa kuachi na ivi ―káchi ra xiꞌin nda.

Saa ndi̱kaꞌan ra xiꞌin ra kúꞌvi ikán, káchi ra saa:

11―Vitin káꞌan i xiꞌin un, kuándikoo, ndikiꞌin un xito un ta kuánuꞌu veꞌe un ―káchi ra xiꞌin ra.

12Tá ndi̱kaꞌan soꞌva Jesús xiꞌin ra, saa ndikun ndi̱koo ra nuu ndiꞌi na ndi̱kiꞌin ra xito ra kuaꞌan xiꞌin ra. Saa iin ndi̱kanda ini ndiꞌi na ndóo na, ta káꞌan toꞌo ka vi na xaꞌa Ndioxi, káchi na saa:

―Ndee ni ndee kúu mií ra yóꞌó, chi nda iin ichí köo taꞌan ya yóꞌó xíni yo ―káchi na.

Kána Jesús ra Leví ya kundikun ñaꞌa ra

(Mt. 9:9-13; Lc. 5:27-32)

13Saa ku̱u nuu ndi̱kiꞌin tuku Jesús kuaꞌan ra yuꞌu nduta ñûꞌu Galilea, ta iin taꞌnda chee naꞌa ndi̱xaa nuu ra. Saa xa̱á ra sínaꞌa ra na tuꞌun Ndioxi. 14Tá ndiꞌi ikán ta ndi̱kiꞌin ra kuaꞌan ra, saa ndi̱yaꞌa ra iin ñaꞌñu nuu ndíkaya na xuꞌun kuaꞌan ndaꞌa na ñuu Roma. Ta ikán índuꞌu ra Leví, seꞌe ra Alfeo, xáa chiñu ra. Saa ndi̱kaꞌan Jesús xiꞌin ra, káchi ra saa:

―Naꞌa koꞌyo xiꞌin i ―káchi ra xiꞌin ra.

Saa ndikun si̱ndoo ra chiñu ra, ta ndi̱kundichi ra kuaꞌan ra xiꞌin Jesús.

15Saa ku̱u iin kivi ta ndi̱xaa Jesús veꞌe ra Leví, saa índuꞌu ra xíxi ra nuu mesa, ta saa ndóo kuaꞌa ni tu na ndíkaya xuꞌun kuaꞌan ñuu Roma va xiꞌin ka inka na íkan ya väꞌa. Ndóo ndiꞌi na ikán nuu mesa nuu índuꞌu Jesús xiꞌin nda ítaꞌan xiꞌin ra, saa chi kuaꞌa ka vi ku na ndíkun ñaꞌa. 16Saa ndóo nda fariseo xiꞌin nda maestro, nda sínaꞌa ley Ndioxi, ta xi̱ni nda ya xíxi Jesús xiꞌin ndiꞌi na ikán, ta saa ndi̱kaꞌan nda xiꞌin nda ítaꞌan xiꞌin ra, káchi nda saa:

―¿Ni väꞌa mií íkan ra maestro ndo chi xíxi ra tin xíꞌi ra xiꞌin ndiꞌi na ñaa? Ta süvi ivi vaꞌa ku na, na íkan ya väꞌa ku ndiꞌi na ―káchi nda.

17Saa xi̱ni soꞌo Jesús ya ndi̱kaꞌan nda, ta ndi̱kuiin ra káꞌan ra xiꞌin nda, káchi ra saa:

―Na íyo vaꞌa ini, ta köo xíniñuꞌu na kuꞌun na nuu ndotor. Na kúꞌvi ku na xíniñuꞌu kuꞌun kutatan. Ta yeꞌe, vaxi i kana i ivi na väꞌa, süvi na vaꞌa vaxi i kana i ―káchi Jesús xiꞌin nda.

Káꞌan Jesús ndachu köo xíxi suꞌun nda ítaꞌan xiꞌin ra

(Mt. 9:14-17; Lc. 5:33-39)

18Iin ichí tá xíxi suꞌun nda ítaꞌan xiꞌin ra Juan, ra síkuchi naꞌa, xiꞌin nda ítaꞌan xiꞌin nda fariseo. Ta saa ndi̱xaa sava naꞌa nuu Jesús ndákan tuꞌun ñaꞌa na, káchi na saa:

―Nda ítaꞌan xiꞌin ra Juan xiꞌin nda ítaꞌan xiꞌin nda fariseo, ta xíxi suꞌun nda. ¿Ta ndachu köo xíxi suꞌun nda ítaꞌan xiꞌin yóꞌo̱? ―káchi na xiꞌin ra.

19Saa ndi̱kuiin Jesús káꞌan ra xiꞌin na:

―Tá kúu na kuaꞌan nuu viko tíndaꞌa, ta köo xíxi suꞌun na, saa chi íyo mií ra tíndaꞌa xiꞌin na. Tá káa ra tíndaꞌa ikán saa íyo yeꞌe xiꞌin nda ítaꞌan xiꞌin i, köo xíxi suꞌun nda saa chi íyo i xiꞌin nda. 20Sundi vaxi tiempo, tá ná tiin na yeꞌe, sindiꞌi xaꞌa na yeꞌe, saa kua kuxi suꞌun nda ítaꞌan xiꞌin i ―káchi ra xiꞌin na ikán.

21Saa ndi̱kaꞌan ka ra xiꞌin na, káchi ra saa:

―Nda iin naꞌa, ta köo na ndíkaꞌma tikoto xa̱á xiꞌin ya yata. Saa chi tá ná ndikaꞌma na ya xa̱á xiꞌin ya yata, ta sitivi taꞌan ya, tá ná ndikata na ya ta ndindií ya xa̱á ta sitaꞌnda ya yata, ta iin ndiꞌi vaꞌa ka xaꞌa ya. 22Ni vinu xa̱á, ta köo na táan rá ini iín yata, saa chi nduta xa̱á ta ìyo kaꞌnda rá iín, ta ya uun kuita ndiꞌi rá, saa ndiꞌi tu xaꞌa nda mií iín va. Xaꞌa ya ikán kua, táan na vinu xa̱á ini iín xa̱á ―káchi Jesús xiꞌin na.

Ndee ka Jesús nuu kivi ií ya ndíkundee na

(Mt. 12:1-8; Lc. 6:1-5)

23Saa ku̱u iin kivi sábado, ke̱e Jesús xíka ra kuaꞌan ra xiꞌin nda ítaꞌan xiꞌin ra. Saa ndi̱yaꞌa nda iin ñaꞌñu nuu íyo trigo, ñaa xa̱á nda xáꞌnu nda yokó trigo ikán xáxi nda ya kuaꞌan nda. 24Saa xi̱ni nda fariseo, ta ndi̱saa ni nda, ñaa ndi̱kaꞌan nda xiꞌin Jesús, káchi nda saa:

―¿Ni väꞌa mií íkan nda ítaꞌan xiꞌin un chi köo xáa i̱í nda kivi i̱í ya ndíkundee yo? Saa chi ndi̱xaꞌnu nda yoko trigo yáxi nda? Ta nda iin yo köo ichí xaa chiñu kivi i̱í ndíkundee yo ―káchi nda xiꞌin ra.

25Saa ndi̱kuiin ra, káꞌan ra xiꞌin nda, káchi ra saa:

―¿Án köo kúndaa ini ndo unkua káꞌan tuꞌun Ndioxi xaꞌa ya i̱kan ra rey David, tá kivi ndi̱kaꞌun un ini ra xiꞌin nda taꞌan ra? 26Saa ndi̱kiꞌvi ra ini veꞌe ñuꞌu, ndúku ra ñaꞌa kuxi ra nuu ra sutu xi̱nani Abiatar. Ta köo ka inka ñaꞌa ndi̱niꞌi ra taxi ra ndaꞌa nda. Iindaa xita vaꞌa ya i̱í xíxi sutu kua íyo, ta ya ikán kua ta̱xi sutu ndaꞌa ra xi̱xi ra xiꞌin nda taꞌan ra, vani süvi sutu ku ra ta xi̱xi ra ya xiꞌin nda taꞌan ra, káchi tuꞌun Ndioxi ―kách#2:26 i Jesús xiꞌin nda.

27Saa ndi̱kaꞌan ka Jesús xiꞌin nda, káchi ra saa:

―Xaꞌa ya vaꞌa na ivi kua xa̱kin Ndioxi iin kivi ya ndikundee na, ta süvi xaꞌa ya sindoꞌo ra na kua. 28Saa chi yeꞌe ta kúu mií i ichí ya kaꞌan i unkua vaꞌa ikan naꞌa ta unkua küvi ikan na kivi i̱í ―káchi Jesús xiꞌin nda.

Currently Selected:

San Marcos 2: xta

Highlight

Copy