लुका 8
8
येसुके साहेता गर्लार बेटिहान
1ओख्रो पाछु येसु परमेस्वरको राज्येको बारेमा, नाम्रो खबर प्रचार गर्ले सहर सहर गाउँ गाउँ जाइक्। बार जना चेलाहान ओख्रो सङहे गेहाइ, 2भुत र रोगभि सन्चो होख्लो बेटिहान पनि ओख्रो पाछु लाग्वाइ, ओइ मध्यमा सात ओटा भुत लागिकनि सन्चो होख्लो मग्दला ठउँको मरियम पनि रहिक्,#मति २७:५५,५६; मर्कुस १५:४०,४१; लुका २३:४९ 3हेरोद राजाको नाइक्या खुजासको दुल्हेक योआन्ना रहिक्। साङ्हे सुसन्ना र अरु धेरे बेटिहान पनि रहाइ। जुनइ येसु र ओख्रो चेलाहान्के धन दिहिकनि सघातराइ।
बिया छिट्लारको उखान
(मति १३:१-९; मर्कुस ४:१-९)
4एक दिन सहर सहरभि मानिसहान येसुठुँ आइकनि भिड लाग्वाइ अनि येसुइ एउटा उखान कहिक्।
5“एक जना मानिस बारिमा बिया छरे निस्किक्। बिया छर्ते छर्ते कुन्हुँ बिया बाटमा परिक्, र मानिसहान्इ कुच्वाइ, अनि चराहान्इ खाइदिहिक। 6कुन्हुँ बिया चाहिँ पाथर होख्लो बारिमा परिक्, उ उम्रे त उम्रिक, तर चिस्यान माटि नाहोख्लोइ सुखाइघालिक। 7कुन्हुँ बिया चाहि काटो उम्रलार बारिमा परिक्, बिया साङ्हे काटोको झ्याङ चाहि बड्को होखिक्, र ओख्राइ बढे नादिहिक। 8कत्का बिया चाहि नाम्रो मलिलो माटिमा परिक् र हल्हलाइकनि बढिक्, अनि एउटा एउटाभि सय सय गुना फर फराइक्।”
एत्का कहिसक्लो पाछु येसुइ कहिक्, “जख्रो, कान बाटि ओइ सुनोस्!”
उखान्को उदेस्ये
(मति १३:१०-२३; मर्कुस ४:१०-२०)
9येसुको चेलाहान्इ इ उखान्को अर्थ क्या हो कहि ओख्राइ सुध्यावाइ, 10येसुइ उनहान्के कहिक्, “ताहान्के परमेस्वरको राज्येको भित्रि कुरा जान्लाहार बुद्धि देहेलाटि, तर अरुकहान्सिन मइ उखानभि बोल्तिन, र उनहान्इ चाहे त चाहातात् तर नादेख्तात्, र सुने त सुन्तात् तर नाबुझ्तात्।#यसइया ६:९
बिया छिट्लार उखान्को अर्थ
(मति १३:१८-२३; मर्कुस ४:१३-२०)
11“उखान्को अर्थ इ बाटि: बिया कलो परमेस्वरको बचन हो। 12बाटमा पर्लो बिया चाहि ओइ हो कि उनहान्इ बचन सुने त सुन्तात् तर मनमा धारे नासक्तात् कारन बिस्वास गरिकनि झिनबाचोस् कहि सइतान आउताइ र सुन्लो बचन लेग्देताइ। 13पाथर होख्लो बारिमा पर्लो बिया चाहि ओइ हो कि उनहान्इ परमेस्वरको बचन सुनिकनि खुसिसिन गर्हन गर्तात्। ओइ बचन नाम्रोसिन मनमा धारे नासक्तात् उसिगर्ते उनहान्को बिस्वास एक छिनभरिको लागि मात्रे होख्ताइ, अनि परिछाको बेरामा बिस्वास भुलाइताइ। 14काटो उम्रलार बारिमा पर्लो बिया ओइ हो, उनहान्इ परमेस्वरको बचन त सुन्तात्, तर जिबनको चिन्ता, धन र सुख बिलासइ गर्ते बिस्वासके हुर्के र बढे नादेताइ, र उनहान्भि केइपनि फर नाफर्ताइ। 15तर मलिलो माटिमा पर्लो बिया ओइ हो, उनहान्इ बचन सुन्तात् र मानिकनि सुन्लो बचन नाम्रोसिन हिर्दयमा धर्तात्, र धेरे फर फरातात्।
भडिया तर ढेभ्रि
(मर्कुस ४:२१-२५)
16“कुनुहि पनि ढेभ्रि जराइकनि भडियाइ नाढाक्तात् न त टक्ठातर लोकाइकनि धार्तात् बरु घर भित्र आउलाहारके उज्यालो होखुस कहिकनि ढेभ्रिके अल्गो ठउँमा धारेताइ।#मति ५:१५; लुका ११:३३
17“क्यारेकनिसिन लोकाइकनि धार्लो चिज ज्या बाटि उ सभइ देखेताइ, र ढाकिकनि धार्लो कुरा सभइ छर्लङ्ग देखेताइ।#मति १०:२६; लुका १२:२
18“उसिगर्ते ताहान्इ सुन्लो बोलिके नाम्रोसिन ध्यान देहेउ क्यारेकनिसिन जख्रोसिन बाटि, ओख्राइ अझइ देहेताइ, तर जख्रोसिन नाटि, ओख्रोसिन ज्या बाटि कहि ओइ सोच्ताइ उ पनि ओख्रोभि लुटेताइ।”#मति २५:२९; लुका १९:२६
येसुको आमा र भइयाकहान
(मति १२:४६-५०; मर्कुस ३:३१-३५)
19येसुको आमा र भइयाकहान ओख्राइ भेटे आवाइ, तर मानिसहान्को भिडइ गर्ते ओख्राइ भेटे नासक्वाइ। 20कुनुहि येसुके कहिक्, “तोरो आमा र भइयारहान तोर्हाइ भेटे बाहिर रुङिरलाटाइ।”
21तर येसुइ उनहान्के कहिक्, “परमेस्वरको बचन र मान्लार ज मोरो आमा र भाइहान हो।”
येसुइ आँधिके रोक्लो
(मति ८:२३-२७; मर्कुस ४:३५-४१)
22एक दिन येसु चेलाहान्सिन डोङोमा चढिक र ओइ उनहान्के कहिक्, “हामि तालको पारो पट्टि जाहुँ।” र उनहान डोङोमा चढिकनि जावाइ। 23जितिहि गर्ते येसु डोङोमा निदाइक्। एक्कासि तालमा आँधि आइक, डोङो भेलइ बुडे लागिक्, र उनहान अप्ठ्यारोमा पर्वाइ। 24चेलाहान्इ येसुको नजिक आइकनि उठातिहि कहाइ, “गुरुजिउ, ए गुरुजिउ! हामि त बुडे लाघ्हुँ!” इ सुनिकनि येसु उठिक, आँधि र बड्को बड्को भेलके हप्काइक ओइबेरा ज आँधि रोकिहिक र सान्त होखिक्, र नाम्रो होखिक्।
25ओख्रो पाछु येसुइ उनहान्के कहिक्, “ताहान्को बिस्वास काहाँ गिहिक?”
उनहान्इ येसुको सक्ति देखिकनि छक्क पर्वाइ, र डराइले आफि आफि बोले लाग्वाइ, “इ कुनको हो? एइ हप्काले बितिके बतास र पानि पनि एख्रो आग्या मान्तलाइ!”
भुत लाग्लो मानिस सन्चो होख्लो
(मति ८:२८-३४; मर्कुस ५:१-२०)
26येसु र ओख्रो चेलाहान गालिल तालको पारो, गेरासेनसको इलाकामा पुग्वाइ। 27जब येसु डोङोभि पाखामा ओघ्रिक, तब येसुइ एक जना सहरको मानिसके भेटिक्। ओख्राइ भुत लाग्लो रहिक्, ओइ धेरे दिनभि लुगा नालगातरिक्, घरमा नाबिसिकनि चिहानपट्टि#८:२७ उ ठउँमा चिहानहान पाथरके खोपिकनि बनातराइ। बिस्तरहिक्। 28येसुके देखिकनि, ओइ बेस्के चिच्याइतिहि, आघु घोप्टो परिकनि कहे लागिक्, “हे येसु, सर्बोच्च परमेस्वरको छउना! तइ मर्हाइ क्या गरे लाग्लो? बिन्ति बाटि, मर्हाइ दुख झिनदे!” 29क्यारेकनिसिन येसुइ भुत आत्माके ओइ मानिसभि निस्के आग्या देलो रहिक्। धेरे पल्ट ओख्राइ भुतइ छोप्लोरहिक्, बड्को डोराइ बाधिकनि धार्नि पनि भुतको सक्तिइ डोरा टोरिकनि, सुनसान ठउँरिपट्टि भाग्तरिक्।
30येसुइ ओख्राइ सुध्याइक, “तोरो नाउँ क्या हो?”
ओइ कहिक्, “फउज” क्यारेकनिसिन ओख्रोमा धेरे भुतहान पिस्लोरहिक्।#८:३० फउजके मुल सोरोतमा बथान कहेलाटि एख्रो अर्थ ६००० सिपाहिहान होख्ताइ।
31भुतहान्इ येसुसिन बिन्ति गरिक्, “हाम्राइ पातालमा जाए आग्या झिनदेहेस।”
32नजिक डाडामा सुङगुरको एउटा बड्को बगाल चरिधर्लो रहिक्। भुतइ येसुसिन ओइ सुङगुर भित्र पिसे अनुमति मागिक्, येसुइ उनहान्के जाए आग्या दिहिक्। 33अनि भुतहान मानिसभि निस्किकनि सुङगुर भित्र पिस्वाइ। ओइ बगाल ओरालो पट्टि घुस्मुडेले तालमा बुडिकनि मरिक्।
34इ देखिकनि सुङगुर चरुवाहान भाग्वाइ, अनि जाइकनि सभइ खबर गाउँ सहरमा सुनावाइ। 35मानिसहान क्या होख्लो कहिकनि चाहे येसुठुँ आवाइ, भुत आत्माभि दुख पाउलो मानिस सन्चो होख्लो र लुगा लगाइकनि येसुको गोड नजिक बिस्लो देखिकनि सभइ डरावाइ। 36देख्लारहान्इ भुत लाग्लो मानिस कसिगरि सन्चो होखिक् अरुहान्के सुनावाइ। 37अनि गेरासेनसको मानिसहान्इ येसुके इथिभि जाइघाल कहि बिन्ति गर्वाइ, क्यारेकनिसिन उनहान बेस्के डराइलो रहाइ। ओइकारनइ येसु जाएके डोङोमा चढिक। 38तर जुन मानिसभि भुत निस्कलो रहिक् ओइ मानिसइ येसुके कहिक्, “मर्हाइ पनि तोरोसिन लेग्हइ।”
तर येसुइ ओख्राइ कहिक्, 39“तइ आफ्नो घर फर्कइ परमेस्वरइ तोरो लागि क्या गरिक् ओइ सभइ अरुके सुनाहेस।”
येसुइ ओइ मानिसके लागि गर्लो बड्को धन्दाको बारेमा ओइ ज सहरभरि सुनातिहि भोइक्।
याइरसको छउनि र मदाइलो बेटि
(मति ९:१८-२६; मर्कुस ५:२१-४३)
40येसु तालको वारपट्टि फर्किकनि आइपुग्ते, मानिसको हुलइ ओख्राइ पर्खिकनि बिसिधार्लो रहाइ, उनहान्इ ओख्रो स्वागत गर्वाइ। 41एकछिनपाछु सभाघरको सासक याइरस नाउँ होख्लो मानिस आइकनि। येसुको गोडमा ढोग्तिहि मोरो घरमा आइदेहेस कहिकनि बिन्ति गरिक्, 42क्यारेकनिसिन ओख्रो बार बर्स पुग्लो, एउटे छउनि मोरे लाग्लो रहिक्। ओख्रो बिन्ति सुनिकनि येसु ओइसिन जाए लागिक्, येसु जितिहि गर्ते मानिसहान्को भिडइ धेक्लिधार्लो रहाइ।
43ओइ भिडमा बार बर्सभि रकत बग्लार ब्यथाइ दुख पाउलो एउटे बेटि रहिक्। ओइ आफ्नो होख्लो सम्पति बिरुँमा खर्च गर्ते पनि ओख्राइ कुन्हुँइ पनि सन्चो बनाए नासक्लोरहिक्। 44ओइ मानिसको भिडमा पाछुपट्टिभि आइकनि येसुइ लगालो लुगाको फुर्का छोइक, ओख्रो लुगाको फुर्का छउले बितिके ओख्रो रकत बग्लार ब्यथा सन्चो होखिघालिक। 45येसुइ सुध्याइक, “मर्हाइ कुनि छोइक?”
तर सभइ जनाइ मइ त नाछउलो कहाइ, अनि पतरुसइ कहिक्, “गुरु, तोर्हाइ मानिसको भिडइ धेक्लिधार्लाटि।”
46तर येसुइ कहिक्, “कुनुहि मराइ छउले हो, क्यारेकनि मोरोठुँभि सक्ति निस्किकनि गेलो मइ थाहा पाइन्।” 47आब लोकाए नासकेताइ कहि, उ बेटि डरइ थरथराइले आइक र येसुको गोडमा घोप्टो परिक्। ओइ ओख्राइ छोइक र छउले बितिके सन्चो होख्लो सभइको आघु कहिदिहिक। 48येसुइ ओख्राइ कहिक्, “ए छउनि, तोरो बिस्वासइ तइ आज सन्चो होखेर। आब नाम्रोसिन जा।”
49ओइ बोल्तिहि गर्ते, एक जना मानिस याइरसको घरभि आइकनि कहिक्, “मालिक, तोरो छउनि मरिसकिक्, आब गुरुके दुख झिनदिहि।”
50इ सुनिकनि येसुइ याइरसके कहिक्, “झिनडराहइ, बिस्वास मात्रे गर, तोरो छउनि बाच्ताइ।”
51येसु याइरसको घरमा पुगिकनि, आफिसिन पतरुस, याकुब, युहन्ना र छुडियाको आमा बुबाके बाहेक कख्राइ पनि भित्र पिसे नादिहिक। 52उथि बट्टेलो सभइ मानिसहान छुडिया मर्लो कहि रोइकनि सोक गरिधार्लो रहाइ। येसुइ उनहान्के कहिक्, “झिनरोओ, उ मर्लो नाहो, सुत्लाटि!”
53इ सुनिकनि उनहान्इ येसुको खिसि गर्वाइ, क्यारेकनि उनहान्के छुडिया मर्लो थाहा रहिक्। 54तर येसुइ छुडियाको हात छोपिकनि कहिक्, “बोबि, उठइ!” 55फेरि छुडियाको हङ्स फर्कि आइक, र उ जुरुके उठिक, अनि येसुइ ओख्राइ खइलाहार चिज खाए देहेउ कहिक्। 56छुडियाको आमा बुबा छक्क पर्वाइ, तर ज्या होख्लो रहिक् उ कुन्हुँके पनि झिनकहेउ कहि येसुइ उनहान्के अर्हाइक।
Currently Selected:
लुका 8: BOTE
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
