मर्कुस 6
6
नासरतमा येसुके बिस्वास नागर्तात्
(मति १३:५३-५८; लुका ४:१६-३०)
1येसु ओइ ठउँ छाडिकनि आफि हुर्कलो सहर नासरतमा जाइक्। ओख्रो चेलाहान पनि ओख्रोसिन गेहाइ। 2बार्नाको दिनमा येसुइ सभाघरमा बचन सिखाए लागिक। ओइ सिखालो कुरा सुनिकनि धेरे जना मानिसहान्इ छक्क पर्तिहि कहाइ, “एइ मानिसइ इ सभइ कुरा काहाँभि सिखिक्क्? कस्नो बुद्धि पाउलो हो छ, कस्के एस्नो छक्क बनालार धन्दाहान गरे सक्ताइ? 3क्या इ त मरियमको छउना मिस्तिरि नाहो र? क्या इ याकुब, योसेफ, यहुदा र सिमोनको दाजि नाहो र? क्या एख्रो बहिनिहान पनि हामिसिन नाटाइ र?” यस्के कतिहिँ उनहान येसुसिन रिसावाइ।
4तब येसुइ उनहान्के कहिक्, “अगमबक्ताके सभइपट्टि मान होख्ताइ, तर आफि हुर्कलो सहरमा, आफ्नो घर गाउँमा र आफ्नो आफन्तहान्मा आदर नाहोख्ताइ।”#युहन्ना ४:४४
5उसिगर्ते येसुइ थोरे मदाइलोहानउप्रो हात धारिकनि सन्चो पार्लाहार धन्दाबाहेक अरु छक्क पार्लाहार धन्दाहान गरे नासकिक्। 6आफ्नो ठउँको मानिसहान्इ बिस्वास नागर्लो देखिकनि उ छक्क परिक्। अनि येसु गाउँ गाउँ सिखाले जाइक्।
येसुइ बार जना चेलाहान्के पठालो
(मति १०:१,५-१५; लुका ९:१-६)
7अनि येसुइ बार जना चेलाहान्के आफिठुँ बोलाइक र उनहान्के दुइ दुइ जना गरिकनि पठाइक्। उनहान्के भुत निस्कालाहार सक्ति दिहिक्। 8उनहान्के ओइ एस्नो आग्या दिहिक्, “ताहान्इ भोएके लागि लठ्ठि बाहेक केइ झिन लेहेउ, न त रोटि, न त झोला, न त खोल्तिमा पइसा तर लट्ठि मात्रे बोक्हेउ। 9जुत्ता लगाओ तर अरु फेरफार गर्लाहार भोटो झिनलेहेउ।” 10ओइ उनहान्के कहिक्, “जुन घरमा पिस्बो, उ गाउँभि नानिसकुनज्यालसम्म ओइ घरमा ज बिस्हेउ। 11यदि कुन्हुँ ठउँमा ताहान्को स्वागत नागर्नि र मानिसहान्इ ताहान्को बोलि सुने नामान्नि उ मानिसहान्के परमेस्वरइ गर्लाहार फइसलाको चेतावनि देतिहि गोडको धुलो ओइथि झारिदेहेउ।”#लुका १०:४-११
12तब उनहान निस्किकनि गेहाइ मानिसहान्इ आफ्नो आफ्नो पाप मानिकनि परमेस्वरपट्टि मन फर्काउस् कहिकनि पर्चार गरे लाग्वाइ। 13उनहान्इ धेरे भुतहान निस्कावाइ, र धेरे रोगिहान्के तेल लगाइकनि सन्चो बनावाइ।#याकुब ५:१४
बप्तिस्मा देलाहार युहन्ना मर्लो
(मति १४:१-१२; लुका ९:७-९)
14येसुको नाउँ चारेउपट्टि फइलेलो कारनइ हेरोद राजाइ पनि येसुको बारेमा सुनिक। कत्काइ कतरहाइ, “बप्तिस्मा देलाहार युहन्ना मर्लोभि जिउते होख्लाटि, उसिगर्ते त एइ एस्नो छक्क पार्लाहार धन्दाहान गर्ताइ।”
15तर अरुहान्इ कहाइ, “इ एलिया हो।”
र अझि अरुहान्इ कहाइ, “इ त पहिलिको पालामा रलो अगमबक्ताहानजस्ने एक जना अगमबक्ता हो।”#मति १६:१४; मर्कुस ८:२८; लुका ९:१९
16जब हेरोद राजाइ इ कुरा सुनिक, तब ओइ कहिक्, “युहन्नाको कपार मइ काटे लगाइन, तर उ फेरि मर्लोभि जिउते होखिक।” 17-18हेरोद राजाइ पहिलिहि ज आफ्नो भाइ फिलिपको दुल्हि हेरोदियासके दुल्हि बनालो रहिक्। तर युहन्नाइ हेरोदके यस्के कलो रहिक्, “आफ्नो भाइको दुल्हिके तइ बिहा गरे उचित नाटि!” उसिगर्ते हेरिदियासके खुसि बनाएके लागि हेरोद राजाइ युहन्नाके छोपे लगाइकनि ओख्राइ बाधिकनि जेलमा थुनिक।
19उसिगर्ते हेरोदियासइ युहन्नासिन इख धार्लो रहिक्। ओइ युहन्नाके मारे खोज्लोरहिक, तर ओख्राइ मारे नासक्लोरहिक्। 20क्यारेकनिसिन युहन्नाके धर्मि र पबित्र मानिस कहि ठानिकनि हेरोद ओख्रोसिन डराइतरिक, र ओख्राइ बचाइकनि धारिक। युहन्नाको बोलि सुनिकनि हेरोदके क्या गरुँ क्या गरुँ होख्तरहिक तर पनि हेरोदइ ओख्रो बोलि सुने मन परातरहिक।
21आखिरमा हेरोदियासइ बदला लेलाहार नाम्रो मउका पाइक। हेरोदइ आफ्नो जर्म दिनमा बड्को भोज गर्लोरहिक। ओइभोजमा ओइ आफ्नो सासकहान, सिपाहिको नाइक्याहान र गालिल इलाकाको मुख्य मुख्य मानिसहान्के बोलालो रहिक्। 22ओइबेला हेरोदियासको आफ्ने छउनि भित्र आइकनि नाचिक, छुडियाइ हेरोद र ओख्रो पहुनाहान्के खुसि बनाइक्। अनि राजाइ ओइ छुडियाके कहिक्, “तोर्हाइ ज्या इच्छा बाटि माग्हइ, र मइ तोर्हाइ देतिन।” 23फेरि राजाइ कसम खाइकनि ओख्राइ कहिक्, “तइ मइसिन ज्या माग्तेर मइ मोरो आधा राज्यसम्म पनि तोर्हाइ देतिन।”
24अनि छुडिया बाहिर निस्किकनि आफ्नो आमाके सुध्याइक्, “आमा, मइ क्या मागुँ?”
ओख्रो आमाकइ कहिक्, “बप्तिस्मा देलाहार युहन्नाको कपार।”
25तुरुन्ते उ छुडिया राजाठुँ जाइकनि कहिक्, “मर्हाइ आन्हा ज बप्तिस्मा देलाहार युहन्नाको कपार थरियामा दे।”
26इ सुनिकनि राजा बेस्के दुखि होखिक, तर पहुनाहान्को आघु कसम खाइकनि देतिन कलो कारनइ फेरि नादेतिन कहे नासकिक्। 27उसिगर्ते राजाइ तुरुन्ते आफ्नो एउटा सिपाहिके युहन्नाको कपार काटिकनि आने हुकुम गरिक्। अनि उ सिपाहि जेलमा जाइकनि युहन्नाको कपार काटिक, 28र थरियामा आनिकनि उ छुडियाके दिहिक्, र छुडियाइ उ लेगिकनि आफ्नो आमाकके दिहिक्। 29जब युहन्नाको चेलाहान्इ इ कुरा सुन्वाइ तब उनहान आइकनि ओख्रो लास लेगिकनि ओडारमा धार्वाइ।
येसुइ पाच हजार मानिसहान्के ख्वाउलो
(मति १४:१३-२१; लुका ९:१०-१७; युहन्ना ६:१-१४)
30तब बार जना पेरेरितहान येसुठुँ फर्कि आवाइ। उनहान्इ ज्या ज्या गर्लो र सिखालो रहाइ सभइ कुरा ओख्राइ सुनावाइ। 31येसुइ उनहान्के कहिक्, “हामि सुनसान ठउँमा जाइकनि एकछिन थकाइ मार्हुँ।” क्यारेकनिसिन उथि आउलाहार गेलाहार मानिसहान धेरे रहाइ, र उनहान्के खाएसम्म पनि फुर्सद नारहिक्। 32अनि उनहान डोङोमा चढिकनि सुनसान ठउँमा गेहाइ।
33तर धेरे मानिसहान्इ उनहान्के जाइधार्लो देख्वाइ र चिन्वाइ। अनि मानिसहान सभइ सहरहानभि भउले उथि गेहाइ, र येसु र चेलाहान पुगेकते आघु ज पुग्वाइ। 34जब येसु डोङोभि ओघ्रिक तब मानिसहान्को बड्को भिड बट्हेलो देखिकनि ओख्रो मनमा दया लागिक क्यारेकनिसिन उनहान चरुवा बिनाको भेडाहान जस्ने रहाइ। अनि ओइ उनहान्के धेरे कुराहान सिखाए लागिक।#गन्ति २७:१७; १ राजा २२:१७; २ इतिहास १८:१६; इजकिएल ३४:५; मति ९:३६ 35ब्यारो होखे लाग्लो देखिकनि चेलाहान्इ येसुके कहाइ, “इ सुनसान ठउँ हो र अबेला पनि होखे लागिक। 36इ मानिसहान्के छुट्टिदिहि, र उनहान्इ छेउछाउको गाउँमा जाइकनि आफ्नो लागि खइलाहार कुरा किनुस्।”
37तर ओइ कहिक्, “ताहान्इ ज इनहान्के केइ खाए देहो।”
चेलाहान्इ कहाइ, “क्या हामिइ जाइकनि दुइ सय चाँदिको सिक्काइ#६:३७ दुइ सय चाँदिको सिक्काइ मुल भासामा दुइ सय “दिनार” कहेताइ। दिनारचाहिँ उबेलाको चाँदिको पइसा। इ चाहि लगभग आठ महिनाको ज्याला रहिक्। रोटि किनिकनि इनहान्के खुवाए?”
38अनि येसुइ कहिक्, “ताहान्सिन कत्का ओटा रोटि बाटि? जाइकनि चाहो त!”
उनहान्इ पत्ता लगाइकनि कहाइ, “पाच ओटा रोटि र दुइटा माछो।”
39अनि येसुइ मानिसहान्के हरियो चउरमा समुह समुह बनाइकनि बिसे अर्हाइक। 40उसिगर्ते मानिसहान पचास पचास र सय सय जनाको समुह बनिकनि बिस्वाइ। 41अनि येसुइ पाच ओटा रोटि र दुइटा माछो लिहिकनि स्वर्गपट्टि चाहातिहि परमेस्वरके धन्येबाद दिहिक् र रोटि टुक्राइकनि मानिसहान्के बाटे कहिकनि चेलाहान्के दिहिक्। ओस्नेगरि दुइटा माछो पनि बाटिदेहे कहिकनि दिहिक्। 42र सभइ जनाइ अघाउनज्याल खावाइ। 43अनि उबर्लो रोटि र माछोको टुक्राहान चेलाहान्इ बट्याते बार ढकिया भरहिक्। 44उथि खइलाहार बेटा मानिसहान मात्रे पाच हजार रहाइ।
येसु पानिउप्रो भउलो
(मति १४:२२-३६; युहन्ना ६:१६-२१)
45अनि येसुइ तुरुन्ते आफ्नो चेलाहान्के डोङोमा चढिकनि समुन्द्रको पारोपट्टि बेथसेदा गाउँमा आफि कते आघु जाए अर्हाइक, र आफि चाहि भिडके छुट्टि देहे ओइथि ज बिसिक। 46अनि भिडके छुट्टि दिहिसक्लोपाछु उ पर्थना गरे डाडामा जाइक्। 47ब्यारोपख चेलाहान चढ्लो डोङो समुन्द्रको माझोमा रहिक्, र येसुचाहिँ अस्करे समुन्द्रको पाखामा रहिक्। 48ओइबेला हुरि बतास उनहान्को आघुभि चलिधार्लो कारनइ चेलाहान्के डोङो चलाए जारे ज अप्ठयारो होखिधार्लो येसुइ देखिक्। बेहानपख आलि आलि उज्यालो होखे लाग्लो बेला येसु पानिउप्रो भोइकनि चेलाहान होख्लो ठउँमा आइक, र उनहान्के जितिकनि आघु जाए लाग्लो रहिक्। 49तर चेलाहान्इ ओख्राइ पानिउप्रो भोइधार्लो देख्ते इ त भुत हो कहि सोचिकनि चिच्याए लाग्वाइ। 50क्यारेकनिसिन ओख्राइ देखिकनि सभइ जना जारे डराइलो रहाइ। तर येसुइ छिट्टे उनहान्के कहिक्, “झिन डराओ, मइ हो, आट गरो।”
51अनि येसु डोङोमा चढिक र हुरि बतास सान्त होखिक्। यस्नो देखिकनि उनहान झन छक्क पर्वाइ। 52उनहान्इ रोटिइ धेरे मानिसहान्के पुग्लो अचम्म होख्लो कुरा अझि पनि बुझे नासक्लो रहाइ, क्यारेकनिसिन उनहान्को मन कठोर होख्लो रहिक्।
येसुइ मदाइलोहान्के सन्चो बनालो
(मति १४:३४-३६)
53जब येसु चेलाहान्सिन समुन्द्र हेलिकनि पारो गनेसरेत कलाहार ठउँमा पुग्वाइ र डोङोके पाखामा टड्यावाइ। 54जब उनहान डोङोभि ओघ्रवाइ, तब तुरुन्ते उथिको मानिसहान्इ येसुके चिन्वाइ। 55र ओइ मानिसहान दुगर्ले गेहाइ उ ठउँको सभइपट्टि येसु आउलो खबर सुनावाइ। अनि जाहाँ जाहाँ येसु बाटि कहि सुन्वाइ उथिको मानिसहान्इ मदाइलोहान्के उनहान्को ओच्छ्यानसिन बोकिकनि येसुठुँ आने लगावाइ। 56येसु गाउँ, सहर जाहाँ जाहाँ जाइक्, उथि उथि मानिसहान्इ रोगिहान्के बजारमा धारिदेहाइ। उनहान्इ येसुको लुगाको फुर्का मात्र छोएके ओख्रोसिन बिन्ति गर्वाइ र जत्काइ छोवाइ उनहान सभइ सन्चो होख्वाइ।
Currently Selected:
मर्कुस 6: BOTE
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
