लुका 10
10
येसुइ बहतर जना चेलालमकाय ल्होक्सास्यावो
1ओहाङसयको प्रभु येसुइ अरु बहतर जना#१०:१ बहतर जना कुनय-कुनय सङ्सकरनलमइखे, सतरि जना त दाह्य्ति मात्र तोओ मुना (पद १७ मा योसा खाइतेनानि)। मान्तालमकाय छ्युह्ङ्सास्यावा। र ओउमयकाय नि-निसचाकको दक्कालहाङ लय आल्साखेओ गाउ र सहरताङ ङ्हा ल्होक्सास्यावा। 2अनि येसुइ ओउमयकाय तोसास्यावा, “राङहाङ अन्नपाय प्रसस्तले मुना, तर अन्न हुम्साकाय खेत्लालमखे मइतो मात्र मुनय। ओउतझ्यान्ते अन्न हुम्साकाय खेत्लालम ल्होक्सास्याउपा त दाह्य्ति अन्नको मालिककाय प्राथना जाह्ङ्नु। 3द्याह निङ आल्न, भेदाको पाथोलमकाय पारकुःइलमकहाङ ल्होको लेखाले ङाइ निङकाय मान्तालमको माझहाङ ल्होक्धय मुनाङ। 4निङइ थेपो, जाबि, जुत्ता, दोहमा लात्लाम, र ल्यामहाङ मान्तालमकाय झोरालाङ त दाह्य्ति अभिबादन जाह्ङ्तिभ्याआपछि ओहाङ न्यास्ति मुलाम।#१०:४ झोरालाङ त दाह्य्ति अभिबादन जाह्ङ्तिभ्याआपछि ओहाङ न्यास्ति मुलाम ओउतोक बेलाहाङ झोरालाङ त दाह्य्ति अभिबादन जाह्ङ्तिभ्याआपछि नाःतो समय नोःति मुसा परतो। ओउतझ्यान्ते अभिबादनहाङ समय खेरो वाइलाम त दाह्य्ति येसुइ दर्कसास्यावो। 5निङ मान्ताको किमहाङ पोक्धार्ना ङ्हा एत तोनु, ‘इ किमको मान्तालमकाय धोमाइतो स्याउपाना।’ 6ओउ किमको मान्तालम धोमायो झाक्नय त खेया, ओउमय धोमायो दोःलेनय, तर ओउमयइ धोमायो झाकिलि त खेया, आसिक निङकताङले द्याह्न्ति वाङ्ना। 7#१कोर ९:१४; १तिमो ५:१८ निङ ओउ किमहाङले मुन, ओउमयइ दोह बइतेनय, ओउले जेःनु र तुङ्नु, धइतिदाह्य्सा काम जाह्ङो मान्तालमइखे ज्याला दोःसाले परना। किमयपिछि बास एःन्ति वाहो काम जाह्ङ्लाम। 8ओउतहाइति सहरलमहाङ आल्धार्ना ओहाङको मान्तालमइ स्वागत जाह्ङ्ति जेःसा बयो जेःगा जेःनु। 9सहरहाङ मुओ बिरामिलमकाय स्याक्ताक्नु, अनि ‘द्याह परमेस्वरको राज्य द्याङ्तो दाह्सा लागआ’ त दाह्य्ति प्रचार जाह्ङ्नु। 10तर निङ आलो सहरको मान्तालमइ निङकाय स्वागत जाह्ङ्तेइलि त खेया, ल्यामहाङ ग्ल्युह्ङ्न अनि तोनु, 11‘निको दोमपाकहाङ ल्याह्वो निङको सहरको धाह्न्मा निङको बिरोतहाङ निइ काह्धय मुनाङ्सु। तर निङइ इ कुरा चिःति गम्नु, परमेस्वरको राज्य द्याङ्तो दाह्तिखायो मुना!’ 12ङाइ निङकाय तोनेनाङ्स, परमेस्वरइ जुदा मान्तालमकाय न्याय जाह्ङ्सास्यावो दिनहाङ, ओउ सहरको मान्तालमको हालतसयपाय बरु पापइ ब्लिङो सदोम सहरको मान्तालमको हालत सहसा खाइतोस्याउना!”
बिस्वास नाःमालो सहरलम
(मति ११:२०-२४)
13येसुइ तोसास्यावा, “अ खोराजिन र बेथसेदा गाउको मान्तालम, निङकाय धिक्कार! यदि निङकहाङ जाह्ङो ग्याह्ङ्सिओ कामलम तुरोस र सिदोन सहरहाङ जाह्ङो खेया, ओहाङको मान्तालमइ ङ्हाखाले ल-लयको पापकाय चिःति फेति वाइचानि खेतो अनि ओउ कुरा छ्यान्साकाय बोराको नाय लावति म्हेःमुतहाङ च्युःङ्चय खेतो।#यस २३:१-१८; इज २६:१—२८:२६; योए ३:४-८; आमो १:९-१०; जक ९:२-४ 14तर परमेस्वरइ जुदा मान्तालमकाय न्याय जाह्ङ्सास्यावो दिनहाङखे, तुरोस र सिदोनको मान्तालमइ दोःसाखेओ दन्दखे निङको भन्दा मइतो स्याउलेना। 15अ कफर्नहुमको मान्तालम, दोह निङ त्याःव लाङका दाह्नाङ्सु त म्हर्तेनय? खेल, निङपाय काःम्खा नरकहाङले दाह्तेनय!”#यस १४:१३-१५
16येसुइ लयको चेलालमकाय तोसास्यावा, “सुइ निङको नोःराय साइनानि ओउमयइ ङाको नोःराय साइनानि, सुइ निङकाय ङ्हाम्तेइलि ओउमयइ ङाकाय ङ्हामनिलि। अनि सुइ ङाकाय ङ्हामनिलि ओउमयइ ङाकाय ल्होक्सास्यावोकायमा ङ्हामनिलि।”
बहतर जना चेलालम द्याह्न्ति वाङो
17येसुइ ल्होक्सास्यावो ओउ बहतर जना चेलालम आन चोङाइति द्याह्न्ति वाङाकाय। ओउमयइ प्रभुकाय तोआकानि, “प्रभु, जब निइ नाङको मय्ङहाङ आग्या जाह्ङालाङ्सु, अनि लानलमइमा निइ तोओ ग्याआकाय!”
18येसुइ ओउमयकाय तोसास्यावा, “ङाइ फेलबाङसय बिजुलि प्लिह्ङोलेखा सय्तानकाय लाङकासय ग्लेधयमुओ च्यवालाङ। 19साइनु, ङाइ निङकाय रु र नेःकोसलमकाय झोति वाह्सा जिःङ अनि निङको बइरि सय्तानको जुदा जिःङलमसय जितसा अधिकार बयो मुना, र दोह कुराइमा निङकाय दुख बइतेइलि।#भजन ९१:१३ 20तर दुस्त सय्तानलम निङको कुरा ग्यानय त म्हर्ति निङ आसलाम, बरु लयको मय्ङ लाङकाहाङ लेखओ मुना त दाह्य्ति आसति चोङाइजेःन।”
येसुइ लयको परमेस्वर आपाकाय धन्नेबाद बइसास्यावो
(मति ११:२५-२७; १३:१६-१७)
21ओउबेलाहाङ पबित्र ग्वालामइ भरपुर स्याउति येसुइ तोसास्यावा, “अ परमेस्वर आपा, लाङका र ल्हाउदयबाङको मालिक! ङाइ नाङकाय धन्नेबाद त तोनेनाङ, धइतिदाह्य्सा बुद्दिमानि र ग्यानि मान्तालमकसय नुस्ति गम्सास्यावो कुरा नाङइ दोहमा चिःमालोलमकाय चिःताक्सास्यावा! अ आपा, एत जाह्ङ्साले नाङ झाक्तेआ। 22ङाको आपाइ जुदा कुरा ङाकाय सुम्पति बइसास्यावो मुना। आपाइ मात्र ङा, चोःकाय तह्य्नाताङ अरु सुइमा तह्य्ताङल, ओउतले ङा, चोःइ मात्र आपाकाय तह्य्नाङ। तर ङा, चोःइ सुखेकाय तोनाङ ओउमयइ मात्र आपाकाय तह्य्नानि।”
23ओहाङसयको चेलालमकताङ हिल्ति ओउमयकाय गोप्पेहाङ तोसास्यावा, “इ जुदा कुरा च्यउसा दोःओ निङ गच्युक धन्नेको खेतेनय! 24ङाइ निङकाय तोनेनाङ्स, नाःतो अगमबक्ता र राजालमइ निङइ च्यवो इ कुरालम च्यउसा र साइसा ताह्ङ्तो इच्छ्या जाह्ङो खेइतो, तर च्यउसा र साइसा दोःइलि।”
पेओ सामरि मान्ताको ल्हाकराय
25यातचाक धर्मगुरुइ येसुकाय परिछ्या जाह्ङ्साकाय चिङ्ति ह्वताथय, “अ गुरु, अजम्बरि रुवाङ दोःसाको लागि ङाइ दोह जाह्ङ्सा परनाङ?”
26येसुइ ओउकाय तोसास्यावा, “ओउ कुराकाय परमेस्वरइ मोसा दुवारा बइसास्यावो नेम-कानुनहाङ दोह त तोओ मुना? ओउकाय नाङइ दोह त चिःतेआकान?”
27ओउ मान्ता त्याङा, “धर्मसास्त्रहाङ लेखओ मुना, ‘नाङइ लयको प्रभु परमेस्वरकाय लयको जुदा ल्हुङतुकसय, जुदा प्रानसय, जुदा जिःङसय र जुदा मनसय रापु।’ अनि एतमा तोओ मुना, ‘लयको छिमेकिकायखे लयकाय रापो लेखाले रापु।’#बेब ६:५; लेबि १९:१८”
28येसुइ तोसास्यावा “नाङ दोङ्सिले सहि नोतेआ, ओउतले जाह्ङु नाङ स्याक्तेना।”#लेबि १८:५
29ओहाङसयको ओउ धर्मगुरुइ लयकाय चिःओ र पेओ मान्ता त दाह्य्ति छ्यान्साको लागि येसुकाय ह्वताकान, “ओउतखेया, ङाको छिमेकिखे सु खेना त?”
30येसुइ ओउकाय तोसास्यावा, “यातचाक मान्ता यरुसलेम सहरसय यरिहो सहरताङ आल्धयमुओ खेतो। ओउबेलाहाङ ल्यामहाङ पेमालो कुःरेउ मान्तालमइ ओउकाय क्रुस्ति लावनायमा क्रेत्तो घानाक्तिको सिखेतो जाह्ङ्ति फेति पाह्याकाय। 31यातछिन पछि यातचाक पुजारि ओउ ल्याम स्याउधय आल्धयमुतोकहाङ ओउ सिखेति मुओ मान्ताकाय च्यउति बल लोक्तोसयले यातसय विखोल्ति पाह्या। 32ओउतले परमेस्वरको मन्दिरहाङ काम जाह्ङो यातचाक लेबिमा ओउ ल्याम स्याउधय वाङा, ओउ सिखेओ मान्ताकाय च्यउति ओउमा बल लोक्तोसयले यातसय विखोल्ति पाह्या। 33ओउबेलाहाङ यातचाक सामरि#१०:३३ सामरि ओउबेलाहाङ यहुदिलमइ सामरि जातको मान्तालमकाय हेला जाह्ङ्नितो। मान्तामा ओउ ल्याम स्याउधय वाङा, ओउ सिखेओ मान्ताकाय च्यउति ओउको ल्हुङतुक आन योःन्ति वाङा। 34ओउकहाङ आल्ति ओउ मान्ताको चालमहाङ जयतुनको साति र धाकसायको ङोतिः दलति नायइ पोतोल्ति पाःनाकान। ओहाङसयको ओउइ ओउ सिखेओ मान्ताकाय लयको गधाहाङ लात्ति यातज्यो मयो पाहुना किमहाङ दाकाकान, याह्दिङभरि लयइले पेतो योतिगमाकान। 35स्याह्ङ्लो पल्त, ओउ सामरि मान्ताइ पाहुना किमको मालिककाय चान्दिको निसज्यो ध्याक थेपो बयाक्तिको तोआकान, ‘लउ, ङा द्याह्न्ति वाङ्माच्युकसम्म इ मान्ताकाय पेतो स्याहार्ति गमु, अरु नाःतो थेपो लागना त खेया, ङा द्याह्न्ति वाङ्धार्ना बइनेनाङ।’”
36इ ल्हाकराय ल्हाक्ति छ्यानापछि ओउ धर्मगुरुकाय येसुइ ह्वत्सास्यावा, “नाङको बिचारहाङ ओउ सुम जनामध्ये पेमालो कुःरेउलमइ घानो मान्ताको छिमेकि सुखे स्याउसा खाइनउ?”
37धर्मगुरु त्याङा, “ओउ सिखेयो मान्ताकाय योःनो मान्ताखे।”
ओहाङसयको येसुइ ओउकाय तोसास्यावा, “पाह्य, नाङइमा लयइ सहयोग जाह्ङ्सा खायो मान्तालमकाय ओउतले जाह्ङु।”
येसुइ मार्था र मरियमकाय क्रुस्सास्यावो
38येसु र ओउको चेलालम आल्धय मुधार्ना यातज्याङ गाउहाङ दाहाकाय। ओहाङ मार्था त मय्ङ्ओ मोम्चोइ ओउमयकाय लयको किमहाङ स्वागत जाह्ङाथास। 39ओउको मरियम त मय्ङ्ओ यातज्यो हउद्याङ खेतो। ओउ प्रभु येसुको दोमसय च्युःङ्ति येसुको स्यानराय सायुतो। 40तर मार्थाखे सेवा-सत्कार जाह्ङो अरु नाःतो कामहाङले मुतो, ओउतझ्यान्ते ओउइ येसुकहाङ वाङ्ति तोआकान, “प्रभु, सेवा-सत्कार जाह्ङो कामहाङ ङाकाय हउद्याङइ एकानले फेआताङ, दोह नाङइ च्यउसास्याउल र? ओउकाय ङाकहाङ वाङ्ति काम पुलिङ्साकाय तोसास्याउपाना!”
41तर प्रभुइ ओउकाय तोसास्यावा, “मार्था, मार्था! नाङ नाःतो कुराको बारेहाङ आन लिह्तेनउ, 42तर चाहओ कुरा यातज्याङ मुना। ओउ पेओ कुराले मरियमइ छ्युह्ङाकान, र ओउ कुरा ओउकसय सुइमा लानिलि।”
Currently Selected:
लुका 10: CHEP
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
