लुका 17
17
पाप
(मति १८:६-७,२१-२२; मर्कुस ९:४२)
1येसुइ लयको चेलालमकाय तोसास्यावा, “मान्तालमको बिस्वास मिह्ताको कुरालमपाय दोङ्सिले स्याउलेना। तर धिक्कार ओउ मान्ताकाय, सुकसय ओउतताह्ङो कुरा स्याउना! 2सु मान्ताइ इ मयोलममध्ये यातज्योको बिस्वास मिह्ताक्नानि, ओउकायपाय कय्कहाङ ग्राइबाङ योकोति समुन्द्रहाङ तातिवाइसा पेतो स्याउना। 3ओउतझ्यान्ते लय जाह्ङो कुराहाङ होसियार स्याउन।
यदि नाङको बिस्वासि हउइ नाङको बिरोतहाङ पाप जाह्ङ्नउ त खेया, ओउकाय थतु। र यदि ओउइ लयको पाप चिःति पस्ताप जाह्ङ्ति फेनउ त खेया, ओउकाय छेमा बयु। 4यदि ओउइ नाङको बिरोतहाङ यात दिनहाङ सातखेप पाप जाह्ङ्नउ, अनि ओउ नाङकहाङ वाङ्ति ‘ङाइ जाह्ङो कुराहाङ ङाकाय पछुतो स्यावा, ङाकाय छेमा बइचि’ त दाह्य्ना त खेया, ओउकाय नाङइ छेमा बइसाले परना।”
बिस्वास
5मुख्य चेलालमइ प्रभु येसुकाय तोआकानि, “अ प्रभु, निकाय आन नाःतोकुस परमेस्वरहाङ बिस्वास जाह्ङ्साकाय सहयोग जाह्ङ्सास्याउपाना।”
6प्रभुइ तोसास्यावा, “यदि निङकहाङ रायोको यातज्यो बियाच्युक मात्र बिस्वास मुना त खेया, इ किम्बुको सिङकाय ‘लयले रुतदोहि च्योङस र समुन्द्रहाङ दुङ’ त तोयाकायमा, नाङइ तोओ ओउइ ग्यालेना।”
नोकरको कर्तब्बे
7 “जुगुलाङहाङ निङमध्ये यातचाकको नोकर खेतराङहाङ काम जाह्ङ्ति अथबा भेदा ह्राःम्ति मुना। जब ओउ राङसय द्याह्न्ति पाह्य्ति वाङ्ना, दोह नाङइ ओउकाय रेह्न्तो वाङ्ति जेःसाकाय च्युःङ त दाह्य्ति तोतेनउ र? 8खेल, नाङइ ओउत तोतेउलु! बरु नाङइ ओउकाय एत तोतेनउ, ‘ङाको लागि केहि जेःओ थोकलम तयार जाह्ङु। ङाकाय जेःगा-तुङ्गा बइचि र ङाइ जेःतिभ्यामाच्युककाय ङाको सेवा जाह्ङ्चि, अनि ओहाङसय मात्र नाङइ लय जेउ र तुङु।’ 9नाङइ तोओ ग्याति काम जाह्ङो नोकरकाय, दोह नाङइ धन्नेबाद त तोतेनउ र? पक्कामा ओउत तोतेउलु! 10ओउतले निङइमा लयकाय जाह्ङ्सा बयो काम जाह्ङ्ति द्योकापछि एतदाह्य्ति तोनु, ‘निपाय ज्योमालो नोकर खेनाङ्सु, निइपाय लयको कर्तब्बे मात्र पुरा जाह्ङो खेना।’”
येसुइ दस जना कोह्र्चाइ ङाःयो मान्तालमकाय स्याक्ताक्सास्यावो
11यात दिन येसु र ओउको चेलालम सामरिया र गालिल छेत्रको सिमाना स्याउधय यरुसलेम सहरताङ आल्धय खेइतो। 12येसु लयको चेलालमकुस यातज्यो गाउहाङ पोक्सास्याउधय खेतो, ओहाङ दस जना कोह्र्चाइ ङाःयो मान्तालम येसुकाय क्रुस्लाङ वाङाकाय। अनि ओउमय येसुसय बल लोक्तोहाङले चिङाकाय।#१७:१२ बल लोक्तोहाङले चिङाकाय परमेस्वरइ मोसा दुवारा बइसास्यावो नेम-कानुन अनुसार कोह्र्चाइ ङाःयो मान्तालम अरु सेल मान्तालम द्याङ्तो आल्सा स्यावाक्ल (लेबि १३:४६)। 13र ओउमयइ जोक्तो हिह्ति तोआकानि, “अ येसु, निको गुरु, निकाय योःन्ति स्याक्ताक्सा स्याउपाना।”
14जब येसुइ ओउमयकाय च्यउसास्यावा, अनि ओउमयकाय तोसास्यावा, “निङ पुजारिलमकहाङ आल्न र ओउमयइ निङकाय जाचति योतेपनय।” ओउमय आल्आल्बाले ल्यामहाङले कोह्र्चासय स्याक्माआकाय।
15अनि ओउमय मध्येको यातचाकइखे लय स्याको च्यवाकान, र येसुकताङ द्याह्न्ति वाङा, र ओउइ ताह्ङो हाउनयहाङ एतदाह्य्ति प्रसङ्सा जाह्ङ्सा फाःङाकान, “परमेस्वरको प्रसङ्सा स्याउपाना, धइतिदाह्य्सा परमेस्वरइ ङाकाय ग्याह्ङ्सितो स्याक्ताक्सास्यावो मुना!” 16अनि ओउ येसुको दोमहाङ खुङा र येसुकाय धन्नेबाद त तोआकान। अनि ओउ मान्ताखे यहुदि खेमात सामरि जातको खेतो। 17अनि येसुइ तोसास्यावा, “दोह ङाइ स्याक्ताको मान्तालम दस जना खेइलि र? अरु नउ जनाखे गाहाङ मुनय त? 18इ सामरिबाहेक अरुखे परमेस्वरकाय धन्नेबाद त तोलाङ धइति वाङिलि?” 19अनि येसुइ ओउ सामरि मान्ताकाय तोसास्यावा, “नाङ चिङ, र लयको किम पाह्य। धइतिदाह्य्सा नाङइ ङाकाय बिस्वास जाह्ङोझ्यान्ते परमेस्वरइ नाङकाय स्याक्ताक्तेआ।”
परमेस्वरको राज्य
(मति २४:२३-२८,३७-४१)
20यात दिन फरिसिलमइ येसुकाय ह्वताकानि, “परमेस्वर राजा स्याउति राज्य जाह्ङो दिन गल वाङ्ना?”
येसुइ ओउमयकाय तोसास्यावा, “परमेस्वरको राज्य मिकइ च्यउतो वाङ्ल। 21सुइमा ‘परमेस्वरको राज्य इहाङ मुना!’ अथबा ‘ओहाङ मुना!’ त दाह्य्सा खाइनिलि। धइतिदाह्य्सा योनु, परमेस्वरको राज्यपाय इहाङ निङको ङ्हाले मुना।”
22अनि येसुइ लयको चेलालमकाय तोसास्यावा, “ओउ दिनमा वाङ्ना, जब ङा मान्ताको चोःइ राज्य जाह्ङो निङ आन योसा झाक्तेनय, तर ओउ समय निङइ च्यउसा दोःतेइलि। 23केहि मान्तालमइ निङकाय ‘योनु, ख्रिस्त इहाङ मुना’ अथबा ‘ख्रिस्त ओहाङ मुना’ त तोतेनय, तर ओउबेला निङइ ओउमयकाय बिस्वास जाह्ङ्लाम र ओउमयको लोन्हे गुह्ल्ति वाह्लाम। 24धइतिदाह्य्सा जब ङा मान्ताको चोः राज्य जाह्ङ्लाङ वाङ्नाङ, न्याम प्लिह्ङ्धार्ना फेलबाङको यात छेउहाङसय अर्को छेउसम्म थोङो लेखाले ल्हाउदयबाङको जुदा मान्तालमइ ङाकाय च्यउनाताङ्स। 25तर ओउत स्याउसासय ङ्हा, ङा मान्ताको चोःइ आन नाःतो दुख च्यउसा परनाङ र इ पुस्ताको मान्तालमइ ङाकाय इन्कार जाह्ङ्नाताङ्स।
26 नोआको पालाहाङ मान्तालमइ लयनामन्द जाह्ङ्तिमुओलेखाले, ङा मान्ताको चोः लाङकासय द्याह्न्ति वाङ्तोक बेलाहाङमा ओउतले जाह्ङ्ति मुनय। #
उत ६:५-८
27ओउबेलाहाङ नोआ र ओउको माचरलम ताह्ङो दोङगाहाङ पोक्माच्युकसम्ममा जुदा मान्तालम सादाको लेखाले जेःधय, तुङ्धय र बिह्या जाह्ङ्धय खेइतो। अनि आन ताह्ङो भल वाङ्ति दोङगा बाहिर मुओ जुदाकाय म्हेत्ताकाकान।#उत ७:६-२४ 28जब ङा राज्य जाह्ङ्लाङ वाङ्नाङ, लोत सदोम सहरहाङ याक्तोकहाङ ओउको पालाहाङ मान्तालमइ जाह्ङोलेखाले स्याउलेना। जुदा मान्तालम सादाको लेखाले जेःधय र तुङ्धय, मालताल लेःधय र विःन्धय, अनि अन्न सुक्धय र किमलम जाह्ङ्धय खेइतो। 29तर लोत र ओउको माचरलमइ सदोम सहर फेओ दिनले लाङकासय म्हेः र ल्युङो गन्धक वाङ्ति ओउ सहरहाङ मुओ जुदाकाय म्हेत्ताकाकान।#उत १८:२०—१९:२५ 30ओउतहाइतिले ङा मान्ताको चोः लाङकासय ल्हाउदयबाङखा थालाङ वाङो बेलाहाङमा ओउतले स्याउना।
31 ओउ दिनहाङ, किम बाहिर मुओलम लयको मालताल लेःलाङ किमभित्र पोक्जेलाम, ओउतले खेतराङहाङ काम जाह्ङ्तिमुओलम किमताङ द्याह्न्ति पाह्य्जेलाम। #
मति २४:१७-१८; मर्क १३:१५-१६ 32लोतको माचा गतहाइति सिआ#१७:३२ लोतको माचा गतहाइति सिआ परमेस्वरइ लोत र ओउको माचाकाय निङ्जि याको सहर फेति क्रउज र द्याह्न्ति योलाम त दाह्य्ति ङ्हाखाले तोसास्यावो खेतो। तर क्रउतोक बेलाहाङ लोतको माचाइ द्याह्न्ति योआकान, धइतिदाह्य्सा सहरहाङ फेतिगमो मालताललमहाङ ओउको ल्हुङतुक खेतो। ओउतस्याउधार्ना परमेस्वरइ ओउकाय छेको धुर्कुन जाह्ङ्ति वायाथय (उत्पति १९:२६)। त दाह्यो कुरा सम्झनु। 33सुइ लयको रुवाङ दल्ताक्सा बोःङ्नउ ओउइ ओउ रुवाङ मिह्लेताक्नउ। तर सुखेइ लयको रुवाङ मिह्ताक्नउ ओउइखे ओउ रुवाङ दल्ताक्लेनउ।#१७:३३ सुखेइ लयको रुवाङ मिह्ताक्नउ ओउइखे ओउ रुवाङ दल्ताक्लेनउ लोतको माचाइ लयको मालतालको लागि सदोम सहरताङ द्याह्न्ति योधार्ना ओउ सिआ। येसुइ तोओको मानेखे “अजम्बरि रुवाङ दोःसाको लागि निकुस नाःओ जुदा धन-सम्पति निइ फेसाले परना।” 34ङाइ निङकाय तोनेनाङ्स, याह्दिङको बेला जब ङा द्याह्न्ति वाङ्नाङ, ओउबेलाहाङ निसचाक मान्ता यातज्यो न्हापहाङ एःन्तिमुओ स्याउना। यातचाककायखे आःल्लेना र अर्कोकायखे ओहाङले फेलेना। 35निसचाक मोम्चो ब्रकले अन्न ग्राइतिमुओ स्याउना। यातचाककायखे आःल्लेना र अर्कोकायखे ओहाङले फेलेना। 36[निसचाक गोय्चो ब्रकले खेतराङहाङ काम जाह्ङ्तिमुओ स्याउना। यातचाककायखे आःल्लेना र अर्कोकायखे ओहाङले फेलेना।]#१७:३६ नया नेम ङ्हापाय ग्रिक भासाहाङ लेखओ खेना र ओउबेलाहाङ मान्तालमइ जुदा कितापलम क्रुतइ लेखति तयार जाह्ङ्नितो। मान्तालमइ क्रुतइ लेखओ ङ्हाको कुनय-कुनय कितापलमहाङखे ओउ ताह्ङो कोस्थभित्र मुओ कुरालम लेखओ नाःआक्ल (मति २४:४०)।”
37अनि चेलालमइ येसुकाय ह्वताकानि, “प्रभु, एत गाहाङ स्याउना र?”
येसुइ ओउमयकाय जवाफ बइसास्यावा, “गतहाइति गिद्धलम हुमधार्ना ओहाङ द्याङ्तो सिनु मुना त दाह्य्ति चिःना, ओउतले इ चिनोलमइमा लोन्हेको दिन द्याङ्तोले मुना त दाह्य्ति चिःलेना।”#मति २४:२८
Currently Selected:
लुका 17: CHEP
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
